ಪ್ರಧಾನಿ ಮೋದಿ ಕಾರು ಬದಲಾವಣೆ; ಈಗ ಬಳಸುತ್ತಿರುವ ಶಸ್ತ್ರಸಜ್ಜಿತ ಮರ್ಸಿಡಸ್ ಮೇಬ್ಯಾಕ್ S650 ಬೆಲೆ 12 ಕೋಟಿ ರೂ., ಉಳಿದ ವಿಶೇಷತೆ ಮಾಹತಿ ಇಲ್ಲಿದೆ
ನರೇಂದ್ರ ಮೋದಿ ಬಳಕೆ ಮಾಡುತ್ತಿರುವ ಮರ್ಸಿಡಸ್ ಮೇಬ್ಯಾಕ್ S650 ಕಾರು 6.0 ಲೀಟರ್ ಸಾಮರ್ಥ್ಯದ ಅವಳಿ ಟರ್ಬೋ V12 ಎಂಜಿನ್ನಿಂದ ಚಾಲಿತವಾಗುತ್ತದೆ. ಗಂಟೆಗೆ 160 ಕಿಮೀಗಳಷ್ಟು ವೇಗವಾಗಿ ಓಡುತ್ತದೆ.
ಪ್ರಧಾನಿ ಮೋದಿಯವರು ತಮ್ಮ ಕಾರನ್ನು ಬದಲಿಸಿದ್ದಾರೆ. ಈ ಹಿಂದೆ ಅವರು ಬಳಸಿದ್ದ ರೇಂಜ್ ರೋವರ್ ವೋಗ್ ಮತ್ತು ಟೊಯೋಟಾ ಲ್ಯಾಂಡ್ ಕ್ರೂಸರ್ಗಿಂತಲೂ ನವೀಕೃತಗೊಂಡಿರುವ, ಹೆಚ್ಚಿನ ಭದ್ರತಾ ವ್ಯವಸ್ಥೆ ಇರುವ ಮರ್ಸಿಡಸ್ ಮೇಬ್ಯಾಕ್ S650 ಕಾರ(Mercedes-Maybach S650)ನ್ನು ಅವರೀಗ ಬಳಸುತ್ತಿದ್ದಾರೆ. ಇದು ಶಸ್ತ್ರಸಜ್ಜಿತ ಕಾರ್ ಆಗಿದ್ದು, ಇತ್ತೀಚೆಗಷ್ಟೇ ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುತಿನ್ ಭಾರತಕ್ಕೆ ಆಗಮಿಸಿದ್ದಾಗ, ಅವರನ್ನು ಹೈದರಾಬಾದ್ ಹೌಸ್ನಲ್ಲಿ ಭೇಟಿಯಾಗಲು ಇದೇ ಕಾರಿನಲ್ಲಿ ಪ್ರಧಾನಿ ಮೋದಿ ಆಗಮಿಸಿದ್ದರು. ಆಗಲೇ ಮೊದಲು ಈ ಕಾರು ಗಮನಸೆಳೆದಿದ್ದು. ಅದಾದ ಬಳಿಕ ಇತ್ತೀಚೆಗೆ ಮತ್ತೊಮ್ಮೆ ಪ್ರಧಾನಿ ಮೋದಿಯವರ ಬೆಂಗಾವಲಿನಲ್ಲಿ ಕಾಣಿಸಿಕೊಂಡಿತ್ತು.
ಇದೀಗ ಪ್ರಧಾನಿ ಮೋದಿ ಬಳಸುತ್ತಿರುವ ಮರ್ಸಿಡಸ್ ಮೇಬ್ಯಾಕ್ S650 ಕಾರು VR 10 ಮಟ್ಟದ ರಕ್ಷಣಾ ಕವಚ ಹೊಂದಿದೆ. ಅಂದರೆ ಇದು ಅತ್ಯಂತ ಉನ್ನತ ಮಟ್ಟದ ರಕ್ಷಣಾ ವ್ಯವಸ್ಥೆಯಾಗಿದ್ದು, ಗುಂಡುಗಳ ದಾಳಿ, ಸ್ಫೋಟಗಳಂಥ ಘಟನೆ ನಡೆದಾಗ ಹೆಚ್ಚಿನ ಪ್ರತಿರೋಧಕ ಒಡ್ಡುತ್ತದೆ. ಒಳಗೆ ಇದ್ದವರಿಗೆ ಅಪಾಯ ಆಗುವುದನ್ನು ತಪ್ಪಿಸುತ್ತದೆ. ಮರ್ಸಿಡಸ್ ಮೇಬ್ಯಾಕ್ S600 ಗಾರ್ಡ್ ಕಾರು ಕಳೆದ ವರ್ಷವಷ್ಟೇ ಭಾರತದಲ್ಲಿ ಬಿಡುಗಡೆಯಾಗಿದ್ದು, ಆಗ ಅದರ ಬೆಲೆ 10.5 ಕೋಟಿ ರೂಪಾಯಿ ಇತ್ತು. ಆದರೆ ಸದ್ಯ ಅದರ ಮೌಲ್ಯ 12 ಕೋಟಿ ರೂಪಾಯಿ ಎಂದು ಹೇಳಲಾಗಿದೆ.
ಈ ದೇಶದ ಪ್ರಧಾನಿ ರಕ್ಷಣೆ ಹೊಣೆ ವಿಶೇಷ ರಕ್ಷಣಾ ದಳ(SPG)ದ್ದು. ಪ್ರಧಾನಿಗೆ ಯಾವ ಕಾರು ಬೇಕು ಎಂಬುದರ ಬಗ್ಗೆಯೂ ಈ ಎಸ್ಪಿಜಿಯೇ ಮನವಿ ಕಳಿಸುತ್ತದೆ. ಹಾಗೇ, ತಮ್ಮ ರಕ್ಷಣೆಯಲ್ಲಿರುವ ವ್ಯಕ್ತಿಗೆ ಎಷ್ಟರ ಮಟ್ಟಿಗೆ ರಕ್ಷಣೆ ಬೇಕು, ಅದಕ್ಕೆ ಅಗತ್ಯವಿರುವ ಕಾರು ಯಾವುದು ಎಂಬಿತ್ಯಾದಿ ನಿರ್ಧಾರಗಳನ್ನೂ ಎಸ್ಪಿಜಿಯೇ ತೆಗೆದುಕೊಳ್ಳುತ್ತದೆ. ಪ್ರಧಾನಿ ನರೇಂದ್ರ ಮೋದಿಯವರು ಗುಜರಾತ್ ಮುಖ್ಯಮಂತ್ರಿಯಾಗಿದ್ದಾಗ ಬಳಸುತ್ತಿದ್ದ ಕಾರು ಬುಲೆಟ್ ಪ್ರೂಫ್ ಆಗಿತ್ತು. 2014ರಲ್ಲಿ ಪ್ರಧಾನಿಯಾದ ನಂತರ ಮೊದಲ ಅವಧಿಗೆ ತಮ್ಮ ಕಾರಿನಲ್ಲಿ ಅಷ್ಟೊಂದು ಬದಲಾವಣೆ ಮಾಡಲಿಲ್ಲ. ಆದರೆ ಎರಡನೇ ಅವಧಿಯಲ್ಲಿ ಆಗಾಗ ಅವರು ಬಳಸುವ ಕಾರು ಬದಲಾಗುತ್ತಿದೆ. ರೇಂಜ್ ರೋವರ್ ವೋಗ್ ಮತ್ತು ಟೊಯೋಟಾ ಲ್ಯಾಂಡ್ ಕ್ರೂಸರ್ ಮತ್ತು ಬಿಎಂಡಬ್ಲ್ಯೂ ಸರಣಿಯ ಕಾರುಗಳನ್ನು ಈಗಾಗಲೇ ಬಳಸಿದ್ದಾರೆ.
ಏನಿದರ ವಿಶೇಷತೆ?
ಇದೀಗ ನರೇಂದ್ರ ಮೋದಿ ಬಳಕೆ ಮಾಡುತ್ತಿರುವ ಮರ್ಸಿಡಸ್ ಮೇಬ್ಯಾಕ್ S650 ಕಾರು 6.0 ಲೀಟರ್ ಸಾಮರ್ಥ್ಯದ ಅವಳಿ ಟರ್ಬೋ V12 ಎಂಜಿನ್ನಿಂದ ಚಾಲಿತವಾಗುತ್ತದೆ. ಗಂಟೆಗೆ 160 ಕಿಮೀಗಳಷ್ಟು ವೇಗವಾಗಿ ಓಡುತ್ತದೆ. ಕಾರಿನ ಕಿಟಕಿ ಮತ್ತು ಇಡೀ ಮೈ ಸ್ಟೀಲ್ ಕೋರ್ ಗುಂಡುಗಳನ್ನು ತಡೆದುಕೊಳ್ಳಬಹುದು. ಇದು 2010ರ ಸರಣಿಯ ಸ್ಫೋಟಕ ಪ್ರೂಫ್ ರೇಟಿಂಗ್ ಪಡೆದುಕೊಂಡಿದ್ದು, ಕೇವಲ ಮೀಟರ್ ಅಂತರದಲ್ಲೇ ಟ್ರಿನಿಟ್ರೋಟೊಲ್ಯೂನ್ (TNT) ಸ್ಫೋಟವಾದರೂ ಈ ಕಾರು ತಡೆದುಕೊಳ್ಳಬಹುದು. ಅನಿಲ ದಾಳಿ ಸಂದರ್ಭದಲ್ಲೂ ಕಾರು ರಕ್ಷಣೆ ಒದಗಿಸಬಲ್ಲದು. ಕಾರಿನ ಒಳಗೆ ಕೂಡ ಐಷಾರಾಮಿ ವ್ಯವಸ್ಥೆಯಿದೆ. ಆರಾಮಾಗಿ, ಕಾಲು ಚಾಚಿ ಕುಳಿತುಕೊಳ್ಳಬಹುದಾದ ವ್ಯವಸ್ಥೆಯಿದೆ.
ಇದನ್ನೂ ಓದಿ: Viral Video: ಸಿಡಿಲು ಬಡಿದು ಸ್ಪೋಟಗೊಂಡ ವ್ಯಕ್ತಿ; ನೆಟ್ಟಿಗರಲ್ಲಿ ಭಯ ಹುಟ್ಟಿಸಿದ ವಿಡಿಯೋ ನೋಡಿ