IND vs ENG: ‘ಅವನಲ್ಲಿ ಹಸಿವಿದೆ’; ಸರ್ಫರಾಜ್ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ ರೋಹಿತ್ ಶರ್ಮಾ
IND vs ENG: ಸತತ ಪ್ರಯತ್ನಗಳ ನಂತರ ಟೀಂ ಇಂಡಿಯಾದಲ್ಲಿ ಅವಕಾಶ ಗಿಟ್ಟಿಸಿಕೊಂಡು ಆಯ್ಕೆಗಾರರ ನಿರೀಕ್ಷೆಗೆ ತಕ್ಕಂತ ಪ್ರದರ್ಶನ ನೀಡಿದ ಸರ್ಫರಾಜ್ ಖಾನ್ ಚೊಚ್ಚಲ ಟೆಸ್ಟ್ನಲ್ಲಿ ಆಡಿದ ಎರಡೂ ಇನ್ನಿಂಗ್ಸ್ಗಳಲ್ಲಿ ಅರ್ಧಶತಕದ ಇನ್ನಿಂಗ್ಸ್ ಆಡಿದರು. ಪಂದ್ಯ ಮುಗಿದ ಬಳಿಕ ಮಾತನಾಡಿದ ರೋಹಿತ್, ಸರ್ಫರಾಜ್ ಆಟವನ್ನು ಹಾಡಿ ಹೊಗಳಿದ್ದಾರೆ.
ರಾಜ್ಕೋಟ್ ಟೆಸ್ಟ್ನಲ್ಲಿ ಬಲಿಷ್ಠ ಆಂಗ್ಲ ತಂಡವನ್ನು ಬರೋಬ್ಬರಿ 434 ರನ್ಗಳಿಂದ ಮಣಿಸಿದ ಖುಷಿಯಲ್ಲಿರುವ ಟೀಂ ಇಂಡಿಯಾ ನಾಯಕ ರೋಹಿತ್ ಶರ್ಮಾ, ಟೆಸ್ಟ್ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ ಯುವ ಆಟಗಾರರ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ.
ಅದರಲ್ಲೂ ಸತತ ಪ್ರಯತ್ನಗಳ ನಂತರ ಟೀಂ ಇಂಡಿಯಾದಲ್ಲಿ ಅವಕಾಶ ಗಿಟ್ಟಿಸಿಕೊಂಡು ಆಯ್ಕೆಗಾರರ ನಿರೀಕ್ಷೆಗೆ ತಕ್ಕಂತ ಪ್ರದರ್ಶನ ನೀಡಿದ ಸರ್ಫರಾಜ್ ಖಾನ್ ಚೊಚ್ಚಲ ಟೆಸ್ಟ್ನಲ್ಲಿ ಆಡಿದ ಎರಡೂ ಇನ್ನಿಂಗ್ಸ್ಗಳಲ್ಲಿ ಅರ್ಧಶತಕದ ಇನ್ನಿಂಗ್ಸ್ ಆಡಿದರು.
ಈ ಮೂಲಕ ಸರ್ಫರಾಜ್ ಟೀಂ ಇಂಡಿಯಾದಲ್ಲಿ ಖಾಯಂ ಸ್ಥಾನ ಗಿಟ್ಟಿಸಿಕೊಳ್ಳುವ ಸುಳಿವು ನೀಡಿದ್ದಾರೆ. ಅಲ್ಲದೆ ನಾಯಕ ರೋಹಿತ್ ಶರ್ಮಾ ಅವರ ನಂಬಿಕೆ ಗೆಲ್ಲುವಲ್ಲು ಯಶಸ್ವಿಯಾಗಿದ್ದಾರೆ. ಪಂದ್ಯ ಮುಗಿದ ಬಳಿಕ ಮಾತನಾಡಿದ ರೋಹಿತ್, ಸರ್ಫರಾಜ್ ಆಟವನ್ನು ಹಾಡಿ ಹೊಗಳಿದ್ದಾರೆ.
ಮೂರನೇ ಟೆಸ್ಟ್ ಪಂದ್ಯ ಮುಗಿದ ಬಳಿಕ ಮಾತನಾಡಿದ ರೋಹಿತ್, ಸರ್ಫರಾಜ್ ಆಟವನ್ನು ನಾನು ಅಷ್ಟಾಗಿ ನೋಡಿಲ್ಲ. ಆದರೆ ಕೆಲವು ಮುಂಬೈ ಆಟಗಾರರು ಹೇಳಿದ ಪ್ರಕಾರ, ತಂಡ ಸಂಕಷ್ಟದಲ್ಲಿದ್ದಾಗ ಸರ್ಫರಾಜ್ ಏಕಾಂಗಿಯಾಗಿ ನಿಂತು ಹಲವು ಪಂದ್ಯಗಳಲ್ಲಿ ಬಿಗ್ ಇನ್ನಿಂಗ್ಸ್ ಆಡಿದ್ದಾರೆ ಎಂಬುದನ್ನು ಕೇಳಿದ್ದೇನೆ.
ಸರ್ಫರಾಜ್ಗೆ ರನ್ಗಳ ಹಸಿವಿದೆ ಎಂಬುದನ್ನು ಅವರ ಆಟದಿಂದ ಗಮನಿಸಬಹುದಾಗಿದೆ. ಕಳೆದ 4-5 ವರ್ಷಗಳಿಂದ ದೇಶೀಯ ಕ್ರಿಕೆಟ್ನಲ್ಲಿ ನಿರಂತರವಾಗಿ ರನ್ ಗಳಿಸುತ್ತಿದ್ದಾರೆ ಎಂದರೆ ಅವರಲ್ಲಿ ಆ ಸಾಮಥ್ಯ್ರವಿದೆ ಎಂದರ್ಥ. ಸದ್ಯಕ್ಕೆ ನಾವು ಅವರೊಂದಿಗೆ ಯಾವುದೇ ಯೋಜನೆಗಳನ್ನು ಚರ್ಚಿಸಿಲ್ಲ.
ಏಕೆಂದರೆ ನೀವು ಅವನನ್ನು ಅವನ ಪಾಡಿಗೆ ಆಡಲು ಬಿಟ್ಟರೆ ಅವನು ತಂಡಕ್ಕಾಗಿ ಏನನ್ನು ಬೇಕಾದರು ಮಾಡುತ್ತಾನೆ ಎಂದು ನಾನು ಮುಂಬೈ ಆಟಗಾರರಿಂದ ಕೇಳಿದ್ದೇನೆ. ರಾಜ್ಕೋಟ್ನಲ್ಲಿ ಪಂದ್ಯ ಆರಂಭವಾದಾಗ ಸರ್ಫರಾಜ್ ಕೊಂಚ ನರ್ವಸ್ ಆದಂತೆ ಕಾಣುತ್ತಿದ್ದರು. ಆದರೆ ಆಟ ಆರಂಭವಾದ ಬಳಿಕ ವಿಭಿನ್ನವಾದ ಸರ್ಫರಾಜ್ ಕಂಡುಬಂದರು ಎಂದಿದ್ದಾರೆ.
ರಾಜ್ಕೋಟ್ ಟೆಸ್ಟ್ನ ಮೊದಲ ಇನ್ನಿಂಗ್ಸ್ನಲ್ಲಿ ಸರ್ಫರಾಜ್ ಖಾನ್ 62 ರನ್ಗಳ ಇನ್ನಿಂಗ್ಸ್ ಆಡಿದ್ದರೆ, ಎರಡನೇ ಇನ್ನಿಂಗ್ಸ್ನಲ್ಲಿ ಅವರು 68 ರನ್ ಗಳಿಸಿ ಅಜೇಯರಾಗಿ ಉಳಿದರು. ಈ ಮೂಲಕ ಚೊಚ್ಚಲ ಟೆಸ್ಟ್ನಲ್ಲಿ ಎರಡೂ ಇನ್ನಿಂಗ್ಸ್ಗಳಲ್ಲಿ ಅರ್ಧಶತಕ ಗಳಿಸಿದ ಭಾರತದ ನಾಲ್ಕನೇ ಆಟಗಾರ ಎನಿಸಿಕೊಂಡರು.
ರಾಜ್ಕೋಟ್ನಲ್ಲಿ ತನ್ನ ಆಟದಿಂದ ನಾಯಕ ರೋಹಿತ್ ಶರ್ಮಾ ಅವರ ಹೃದಯ ಗೆದ್ದಿರುವ ಸರ್ಫರಾಜ್ ಮುಂದಿನ ಟೆಸ್ಟ್ಗಳಲ್ಲಿ ಇದೇ ರೀತಿಯ ಪ್ರದರ್ಶನ ನೀಡುತ್ತಾರಾ ಎಂಬುದು ಮುಂದಿನ ದಿನಗಳಲ್ಲಿ ಗೊತ್ತಾಗಲಿದೆ.