Mohammad Rizwan: ರಿಝ್ವಾನ್ ವಿಶ್ವ ದಾಖಲೆ ತಪ್ಪಿಸಿದ ಪಾಕ್ ನಾಯಕ
Pakistan vs Bangladesh, 1st Test: ಬಾಂಗ್ಲಾದೇಶ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದ ಪ್ರಥಮ ಇನಿಂಗ್ಸ್ನಲ್ಲಿ ಪಾಕಿಸ್ತಾನ್ ತಂಡವು 6 ವಿಕೆಟ್ ನಷ್ಟಕ್ಕೆ 448 ರನ್ ಬಾರಿಸಿ ಡಿಕ್ಲೇರ್ ಘೋಷಿಸಿದೆ. ಇದಕ್ಕುತ್ತರವಾಗಿ ಪ್ರಥಮ ಇನಿಂಗ್ಸ್ ಆರಂಭಿಸಿರುವ ಬಾಂಗ್ಲಾದೇಶ್ ತಂಡವು ಮೂರನೇ ದಿನದಾಟದ ಅಂತ್ಯದ ವೇಳೆ 5 ವಿಕೆಟ್ ಕಳೆದುಕೊಂಡು 320 ರನ್ ಕಲೆಹಾಕಿದೆ.
ರಾವಲ್ಪಿಂಡಿಯಲ್ಲಿ ನಡೆಯುತ್ತಿರುವ ಬಾಂಗ್ಲಾದೇಶ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಪಾಕಿಸ್ತಾನ್ ತಂಡದ ವಿಕೆಟ್ ಕೀಪರ್ ಮೊಹಮ್ಮದ್ ರಿಝ್ವಾನ್ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದ್ದಾರೆ. ಈ ಪಂದ್ಯದ ಮೊದಲ ಇನಿಂಗ್ಸ್ನಲ್ಲಿ 6ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ರಿಝ್ವಾನ್ 229 ಎಸೆತಗಳಲ್ಲಿ 3 ಭರ್ಜರಿ ಸಿಕ್ಸ್ ಹಾಗೂ 11 ಫೋರ್ಗಳೊಂದಿಗೆ ಅಜೇಯ 171 ರನ್ ಬಾರಿಸಿದ್ದಾರೆ.
ಇತ್ತ ಅಜೇಯ 171 ರನ್ಗಳೊಂದಿಗೆ ರಿಝ್ವಾನ್ ದ್ವಿಶತಕದತ್ತ ಸಾಗುತ್ತಿದ್ದರೆ, ಅತ್ತ ಪಾಕಿಸ್ತಾನ್ ತಂಡದ ನಾಯಕ ಶಾನ್ ಮಸೂದ್ ಇನಿಂಗ್ಸ್ ಡಿಕ್ಲೇರ್ ಘೋಷಿಸಿದರು. ಅದು ಸಹ 2ನೇ ದಿನದಾಟದ 3ನೇ ಸೆಷನ್ನಲ್ಲಿ ಎಂಬುದು ವಿಶೇಷ. ಅಂದರೆ ಉತ್ತಮವಾಗಿ ಬ್ಯಾಟಿಂಗ್ ಮಾಡುತ್ತಿದ್ದ ರಿಝ್ವಾನ್ಗೆ ದ್ವಿಶತಕ ಬಾರಿಸುವ ಅತ್ಯುತ್ತಮ ಅವಕಾಶವಿತ್ತು.
ಆದರೆ ಪಾಕಿಸ್ತಾನ್ ತಂಡದ ನಾಯಕ ಶಾನ್ ಮಸೂದ್ ಅವರ ನಡೆಯಿಂದಾಗಿ ಟೆಸ್ಟ್ ಕ್ರಿಕೆಟ್ನಲ್ಲಿ ಹೊಸ ವಿಶ್ವ ದಾಖಲೆ ಬರೆಯುವ ಅವಕಾಶ ಕೂಡ ಮೊಹಮ್ಮದ್ ರಿಝ್ವಾನ್ ಕೈತಪ್ಪಿದೆ. ಆ ದಾಖಲೆಗಳಾವುವು ಎಂಬುದರ ಸಂಪೂರ್ಣ ಮಾಹಿತಿ ಇಲ್ಲಿದೆ...
ಅಜೇಯ 171 ರನ್ ಬಾರಿಸಿದ್ದ ಮೊಹಮ್ಮದ್ ರಿಝ್ವಾನ್ ಈ ಇನಿಂಗ್ಸ್ನಲ್ಲಿ ಹೆಚ್ಚುವರಿ 39 ರನ್ಗಳಿಸಿದ್ದರೆ ಪಾಕಿಸ್ತಾನ್ ಪರ ಟೆಸ್ಟ್ ಕ್ರಿಕೆಟ್ನಲ್ಲಿ ಅತೀ ಹೆಚ್ಚು ರನ್ ಗಳಿಸಿದ ವಿಕೆಟ್ ಕೀಪರ್ ಎನಿಸಿಕೊಳ್ಳುತ್ತಿದ್ದರು. ಸದ್ಯ ಈ ದಾಖಲೆ 1980 ರಲ್ಲಿ 210 ರನ್ ಬಾರಿಸಿದ್ದ ಪಾಕ್ ವಿಕೆಟ್ ಕೀಪರ್ ತಸ್ಲೀಮ್ ಆರಿಫ್ ಹೆಸರಿನಲ್ಲಿದೆ.
ಇನ್ನು ಇದೇ ಪಂದ್ಯದ ಮೂಲಕ ಹೆಚ್ಚುವರಿ 61 ರನ್ ಬಾರಿಸಿದ್ದರೆ, ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲೇ ಗರಿಷ್ಠ ಸ್ಕೋರ್ ಗಳಿಸಿದ ಬ್ಯಾಟರ್ ಎಂಬ ವಿಶ್ವ ದಾಖಲೆ ಮೊಹಮ್ಮದ್ ರಿಝ್ವಾನ್ ಪಾಲಾಗುತ್ತಿತ್ತು. ಈ ವಿಶ್ವ ದಾಖಲೆ ಝಿಂಬಾಬ್ವೆಯ ಆ್ಯಂಡಿ ಫ್ಲವರ್ ಹೆಸರಿನಲ್ಲಿದೆ. 2000 ರಲ್ಲಿ ಟೀಮ್ ಇಂಡಿಯಾ ವಿರುದ್ಧ ಆ್ಯಂಡಿ ಫ್ಲವರ್ 232 ರನ್ ಬಾರಿಸಿ ಈ ದಾಖಲೆ ನಿರ್ಮಿಸಿದ್ದಾರೆ.
ಅಂದರೆ ಅಜೇಯ 171 ರನ್ಗಳೊಂದಿಗೆ ಅದ್ಭುತ ಬ್ಯಾಟಿಂಗ್ ಮುಂದುವರೆಸಿದ್ದ ಮೊಹಮ್ಮದ್ ರಿಝ್ವಾನ್ಗೆ ಈ ಎರಡು ದಾಖಲೆಗಳನ್ನು ಮುರಿಯುವ ಉತ್ತಮ ಅವಕಾಶವಿತ್ತು. ಆದರೆ ಪಾಕಿಸ್ತಾನ್ ತಂಡದ ನಾಯಕ ಶಾನ್ ಮಸೂದ್ ದಿಢೀರ್ ಡಿಕ್ಲೇರ್ ಘೋಷಿಸುವ ಮೂಲಕ ರಿಝ್ವಾನ್ಗೆ ಬಿಗ್ ಶಾಕ್ ನೀಡಿದ್ದರು. ಇದರೊಂದಿಗೆ ಟೆಸ್ಟ್ನಲ್ಲಿ ಹೊಸ ಇತಿಹಾಸ ನಿರ್ಮಿಸುವ ಅವಕಾಶ ಕೂಡ ಕೈತಪ್ಪಿತು.