ಪಾಕಿಸ್ತಾನದಲ್ಲಿ 118 ವರ್ಷಗಳ ಹಳೆಯ ಟೆಸ್ಟ್ ದಾಖಲೆ ಉಡೀಸ್
Pakistan vs West Indies, 2nd Test: ಪಾಕಿಸ್ತಾನ್ ಮತ್ತು ವೆಸ್ಟ್ ಇಂಡೀಸ್ ನಡುವಣ 2ನೇ ಟೆಸ್ಟ್ ಪಂದ್ಯದ ಮೊದಲ ಇನಿಂಗ್ಸ್ ಮೊದಲ ದಿನದಾಟದಲ್ಲೇ ಮುಗಿದಿದೆ. ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ವೆಸ್ಟ್ ಇಂಡೀಸ್ 163 ರನ್ಗಳಿಗೆ ಆಲೌಟ್ ಆದರೆ, ಆತಿಥೇಯ ಪಾಕಿಸ್ತಾನ್ ತಂಡವು ಪ್ರಥಮ ಇನಿಂಗ್ಸ್ನಲ್ಲಿ 154 ರನ್ಗೆ ಸರ್ವಪತನ ಕಂಡಿದೆ.
ಪಾಕಿಸ್ತಾನ್ ಹಾಗೂ ವೆಸ್ಟ್ ಇಂಡೀಸ್ ನಡುವಣ ಟೆಸ್ಟ್ ಪಂದ್ಯವು ಐತಿಹಾಸಿಕ ದಾಖಲೆಗೆ ಸಾಕ್ಷಿಯಾಗಿದೆ. ಅದು ಕೂಡ ಮೊದಲ ದಿನದಾಟದಲ್ಲೇ 20 ವಿಕೆಟ್ ಪತನಗೊಳ್ಳುವ ಮೂಲಕ. ಮುಲ್ತಾನ್ನ ನ್ಯಾಷನಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಈ ಪಂದ್ಯದಲ್ಲಿ ಟಾಸ್ ಗೆದ್ದ ವೆಸ್ಟ್ ಇಂಡೀಸ್ ತಂಡವು ಮೊದಲು ಬ್ಯಾಟಿಂಗ್ ಆಯ್ದುಕೊಂಡಿತು.
ಅದರಂತೆ ಮೊದಲ ಇನಿಂಗ್ಸ್ ಆರಂಭಿಸಿದ ವೆಸ್ಟ್ ಇಂಡೀಸ್ ನಿರೀಕ್ಷಿತ ಪ್ರದರ್ಶನ ನೀಡಲಿಲ್ಲ. ನೊಮಾನ್ ಅಲಿ ಅವರ ಸ್ಪಿನ್ ಮೋಡಿಗೆ ತತ್ತರಿಸಿದ ವಿಂಡೀಸ್ ಕೇವಲ 58 ರನ್ಗಳಿಗೆ 8 ವಿಕೆಟ್ ಕಳೆದುಕೊಂಡಿತು. ಈ ಹಂತದಲ್ಲಿ ಕಣಕ್ಕಿಳಿದ ಗುಡಾಕೇಶ್ ಮೋಟಿ 55 ರನ್ ಬಾರಿಸಿದರು. ಈ ಅರ್ಧಶತಕದ ನೆರವಿನಿಂದ ವೆಸ್ಟ್ ಇಂಡೀಸ್ ತಂಡವು 163 ರನ್ಗಳಿಸಿ ಆಲೌಟ್ ಆಯಿತು.
ಇದರ ಬೆನ್ನಲ್ಲೇ ಮೊದಲ ಇನಿಂಗ್ಸ್ ಆರಂಭಿಸಿದ ಪಾಕಿಸ್ತಾನ್ ಕೂಡ ರನ್ಗಳಿಸಲು ಪರದಾಡಿದರು. ಇದರ ನಡುವೆ ಮೊಹಮ್ಮದ್ ರಿಝ್ವಾನ್ 49 ರನ್ ಬಾರಿಸಿದ್ದು ಗರಿಷ್ಠ ಸ್ಕೋರ್. ಅಲ್ಲದೆ ಪಾಕಿಸ್ತಾನ್ ತಂಡವು ಕೇವಲ 154 ರನ್ಗಳಿಗೆ ಆಲೌಟ್ ಆಗುವ ಮೂಲಕ 9 ರನ್ಗಳ ಹಿನ್ನಡೆ ಅನುಭವಿಸಿತು.
ವಿಶೇಷ ಎಂದರೆ ಮೊದಲ ದಿನದಾಟದಲ್ಲೇ ಉರುಳಿದ 20 ವಿಕೆಟ್ಗಳಲ್ಲಿ 16 ವಿಕೆಟ್ ಕಬಳಿಸಿದ್ದು ಸ್ಪಿನ್ನರ್ಗಳು. ಪಾಕಿಸ್ತಾನ್ ಪರ ಸ್ಪಿನ್ನರ್ಗಳಾದ ನೊಮಾನ್ ಅಲಿ (6), ಸಾಜಿದ್ ಖಾನ್ (2), ಅಬ್ರಾರ್ ಅಹ್ಮದ್ (1) ಒಟ್ಟು 9 ವಿಕೆಟ್ ಕಬಳಿಸಿದರೆ, ವೆಸ್ಟ್ ಇಂಡೀಸ್ ಸ್ಪಿನ್ನರ್ಗಳಾದ ಗುಡಾಕೇಶ್ ಮೋಟಿ (3), ಜೋಮೆಲ್ ವಾರಿಕನ್ (4) ಒಟ್ಟು 7 ವಿಕೆಟ್ ಪಡೆದರು.
ಈ 16 ವಿಕೆಟ್ಗಳೊಂದಿಗೆ ಪಾಕಿಸ್ತಾನ್ ಮತ್ತು ವೆಸ್ಟ್ ಇಂಡೀಸ್ ಸ್ಪಿನ್ನರ್ಗಳು ಟೆಸ್ಟ್ ಕ್ರಿಕೆಟ್ನಲ್ಲಿ ಹೊಸ ಇತಿಹಾಸ ಬರೆದರು. ಅಂದರೆ ಟೆಸ್ಟ್ ಇತಿಹಾಸದಲ್ಲಿ ಮೊದಲ ದಿನದಾಟದಲ್ಲಿ ಸ್ಪಿನ್ನರ್ಗಳು ಕಬಳಿಸಿದ ಗರಿಷ್ಠ ವಿಕೆಟ್ಗಳ ಸಂಖ್ಯೆ 14. ಇಂತಹದೊಂದು ದಾಖಲೆ ನಿರ್ಮಾಣವಾಗಿದ್ದು 1907 ರಲ್ಲಿ.
1907ರಲ್ಲಿ ಇಂಗ್ಲೆಂಡ್ನ ಲೀಡ್ಸ್ನಲ್ಲಿ ನಡೆದ ಪಂದ್ಯದಲ್ಲಿ ಸೌತ್ ಆಫ್ರಿಕಾ-ಇಂಗ್ಲೆಂಡ್ ಸ್ಪಿನ್ನರ್ಗಳು ಜೊತೆಗೂಡಿ ಮೊದಲ ದಿನದಾಟದಲ್ಲಿ 14 ವಿಕೆಟ್ ಉರುಳಿಸಿದ್ದರು. ಇದು ಈವರೆಗಿನ ಶ್ರೇಷ್ಠ ದಾಖಲೆಯಾಗಿತ್ತು. ಅಲ್ಲದೆ ಕಳೆದ ಒಂದು ಶತಮಾನದಲ್ಲಿ ಈ ದಾಖಲೆಯನ್ನು ಮುರಿಯಲು ಸಾಧ್ಯವಾಗಿರಲಿಲ್ಲ.
ಆದರೀಗ ಪಾಕಿಸ್ತಾನ್-ವೆಸ್ಟ್ ಇಂಡೀಸ್ ಸ್ಪಿನ್ನರ್ಗಳು ಜೊತೆಗೂಡಿ 118 ವರ್ಷಗಳ ಹಳೆಯ ದಾಖಲೆಯನ್ನು ಅಳಿಸಿ ಹಾಕಿದ್ದಾರೆ. ಅಲ್ಲದೆ ಮುಲ್ತಾನ್ ಪಿಚ್ನಲ್ಲಿ 16 ವಿಕೆಟ್ ಕಬಳಿಸಿ, ಟೆಸ್ಟ್ನಲ್ಲಿ ಐತಿಹಾಸಿಕ ಸಾಧನೆ ಮಾಡುವಲ್ಲಿ ನೊಮಾನ್ ಅಲಿ, ಸಾಜಿದ್ ಖಾನ್, ಅಬ್ರಾರ್ ಅಹ್ಮದ್, ಗುಡಾಕೇಶ್ ಮೋಟಿ , ಜೋಮೆಲ್ ವಾರಿಕನ್ ಯಶಸ್ವಿಯಾಗಿದ್ದಾರೆ.
Published On - 10:30 am, Sun, 26 January 25