Smriti Mandhana: ಹರ್ಮನ್ಪ್ರೀತ್ ರನೌಟ್ ಆದಾಗ ಡಗೌಟ್ನಲ್ಲಿದ್ದ ಸ್ಮೃತಿ ಮಂಧಾನ ಏನು ಮಾಡಿದ್ರು ನೋಡಿ
Harmanpreet Kaur Run Out: ಐಸಿಸಿ ಟಿ20 ವಿಶ್ವಕಪ್ನ ಆಸ್ಟ್ರೇಲಿಯಾ ಮಹಿಳಾ ತಂಡದ ವಿರುದ್ಧದ ಸೆಮಿ ಫೈನಲ್ ಮ್ಯಾಚ್ನಲ್ಲಿ ಹರ್ಮನ್ಪ್ರೀತ್ ಕೌರ್ ರನೌಟ್ಗೆ ಬಲಿಯಾದರು. ಈ ಸಂದರ್ಭ ಡಗೌಟ್ನಲ್ಲಿದ್ದ ಸ್ಮೃತಿ ಮಂಧಾನ ಏನು ಮಾಡಿದರು ನೋಡಿ.
ಐಸಿಸಿ ಟಿ20 ವಿಶ್ವಕಪ್ನಲ್ಲಿ ಫೈನಲ್ಗೇರುವ ಅವಕಾಶವನ್ನು ಭಾರತ ಮಹಿಳಾ ಕ್ರಿಕೆಟ್ ತಂಡ ತನ್ನ ಕೈಯಾರೆ ಕಳೆದುಕೊಂಡಿತು. ಕೇಪ್ಟೌನ್ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ನಡೆದ ಮೊದಲ ಸೆಮಿ ಫೈನಲ್ ಪಂದ್ಯದಲ್ಲಿ 5 ರನ್ಗಳಿಂದ ಸೋಲು ಕಾಣುವ ಮೂಲಕ ಟ್ರೋಫಿ ಗೆಲ್ಲುವ ಕನಸು ನುಚ್ಚುನೂರಾಯಿತು.
ಒಂದು ಹಂತದಲ್ಲಿ ಸುಲಭವಾಗಿ ಗೆಲುವು ಸಾಧಿಸಬಹುದಿದ್ದ ಹರ್ಮನ್ ಪಡೆ ಅಂತಿಮ ಹಂತದಲ್ಲಿ ಮಾಡಿದ ಕೆಲ ಎಡವಟ್ಟಿನಿಂದ ಸೋಲುಂಡಿತು. ತಂಡದ ಗೆಲುವಿಗೆ ಹರ್ಮನ್ಪ್ರೀತ್ ಕೌರ್ ಹಾಗೂ ಜೆಮಿಮ ರೋಡ್ರಿಗಸ್ ಕಠಿಣ ಹೋರಾಟ ನಡೆಸಿದರೂ ಸಾಧ್ಯವಾಗಲಿಲ್ಲ.
28 ರನ್ಗೆ 3 ವಿಕೆಟ್ ಕಳೆದುಕೊಂಡ ಸಂದರ್ಭ ಕ್ರೀಸ್ಗೆ ಬಂದ ಇವರಿಬ್ಬರು ರನ್ರೇಟ್ ಕುಗ್ಗದಂತೆ ಬ್ಯಾಟ್ ಬೀಸಿ 69 ರನ್ಗಳ ಜೊತೆಯಾಟ ಆಡಿದರು. ತಂಡಕ್ಕೆ ಗೆಲುವನ್ನೂ ಹತ್ತಿರ ಮಾಡಿದರು. ಆದರೆ, ಇವರಿಬ್ಬರು ನಿರ್ಗಮನವಾಗಿದ್ದೇ ತಡ ಪಂದ್ಯ ಭಾರತದಿಂದ ಕೈ ಜಾರುತ್ತಾ ಹೋಯಿತು.
ಅದರಲ್ಲೂ 15ನೇ ಓವರ್ನಲ್ಲಿ ಹರ್ಮನ್ಪ್ರೀತ್ ಕೌರ್ ರನೌಟ್ ಆಗಿದ್ದು ದೊಡ್ಡ ಹೊಡೆತ ಬಿದ್ದಿತು. ಎರಡನೇ ರನ್ ಕಂಪ್ಲೀಟ್ ಮಾಡಲು ಗೆರೆ ಮುಟ್ಟುವ ಸಂದರ್ಭ ಕೌರ್ ಅವರ ಬ್ಯಾಟ್ ನೆಲದಲ್ಲಿ ಸ್ಟ್ರಕ್ ಆದ ಕಾರಣ ಕಾಲನ್ನು ಕ್ರೀಸ್ ಒಳಗೆ ಇಡಲು ಕೊಂಚ ತಡವಾಯಿತು. ಈ ಸಂದರ್ಭ ವಿಕೆಟ್ ಕೀಪರ್ ಚೆಂಡನ್ನು ವಿಕೆಟ್ಗೆ ಬಡಿದಾಗಿತ್ತು. ಹೀಗೆ ದುರದೃಷ್ಟಕರವಾಗಿ ಹರ್ಮನ್ ಔಟಾದರು.
ರನೌಟ್ ಆಗಿ ಪೆವಿಲಿಯನ್ ಕಡೆ ಸಾಗುವಾಗ ಹರ್ಮನ್ ಮೈದಾನದಲ್ಲೇ ಕೋಪಗೊಂಡ ಘಟನೆ ಕೂಡ ನಡೆಯಿತು. ಬ್ಯಾಟ್ ಅನ್ನು ಎಸೆದು ಕೋಪ ಹೊರಹಾಕಿದರು. ಅತ್ತ ಡಗೌಟ್ನಲ್ಲಿದ್ದ ಭಾರತೀಯ ಆಟಗಾರರು ಕೂಡ ಬೇಸರಗೊಂಡರು. ಮುಖ್ಯವಾಗಿ ಸ್ಮೃತಿ ಮಂಧಾನ ಬೇಸರದಿಂದ ತಲೆಗೆ ಕೈಹಿಡಿದುಕೊಂಡು ಭಾವುಕರಾಗಿರುವುದು ಕಂಡುಬಂತು.
ಈ ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ಗೆ ಇಳಿದ ಆಸ್ಟ್ರೇಲಿಯಾ ಪರ ಓಪನರ್ಗಳಾದ ಬೆತ್ ಮೂನಿ (54) ಮತ್ತು ಅಲಿಸ್ಸಾ ಹೀಲಿ (25) ಭರ್ಜರಿ ಆರಂಭ ಒದಗಿಸಿದರು. ನಾಯಕಿ ಮೆಗ್ ಲ್ಯಾನಿಂಗ್ (49) ಕೂಡ ಸ್ಫೋಟಕ ಬ್ಯಾಟಿಂಗ್ ನಡೆಸಿ ತಂಡಕ್ಕೆ ಉಪಯುಕ್ತ ಕಾಣಿಕೆ ನೀಡಿದರು.
ಆಶ್ಲೀಗ್ ಗಾರ್ಡ್ನರ್ ಕೇವಲ 18 ಎಸೆತಗಳಲ್ಲಿ 31 ರನ್ ಕಲೆಹಾಕಿದರುಆಸ್ಟ್ರೇಲಿಯಾ 20 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 172 ರನ್ ಗಳಿಸಿತು. ಟಾರ್ಗೆಟ್ ಬೆನ್ನಟ್ಟಿದ ಭಾರತಕ್ಕೆ ಉತ್ತಮ ಆರಂಭ ಸಿಗಲಿಲ್ಲ.
ಮೂರನೇ ವಿಕೆಟ್ಗೆ ಹರ್ಮನ್ (54) ಹಾಗೂ ಜೆಮಿಮಾ (43) ಜೊತೆಯಾಗಿ ಗೆಲುವಿಗೆ ಹೋರಾಡಿದರು. ಆದರೆ, ಭಾರತ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 167 ರನ್ ಗಳಿಸಲಷ್ಟೇ ಶಕ್ತವಾಗಿ ಸೋಲು ಕಂಡಿತು. 5 ರನ್ಗಳ ಜಯದೊಂದಿಗೆ ಆಸ್ಟ್ರೇಲಿಯಾ ಮಹಿಳೆಯರು ಸೆಮಿ ಫೈನಲ್ ತಲುಪಿದ್ದಾರೆ.
Published On - 10:20 am, Fri, 24 February 23