Vivian Kingma: ಕಳ್ಳಾಟ ಆಡಿ ಸಿಕ್ಕಿಬಿದ್ದ ಬೌಲರ್ಗೆ 4 ಪಂದ್ಯಗಳ ನಿಷೇಧ..!
Vivian Kingma ball-tampering: ಚೆಂಡು ವಿರೂಪಗೊಳಿಸಿದ ತಪ್ಪನ್ನು ಕಿಂಗ್ಮಾ ಕೂಡ ಒಪ್ಪಿಕೊಂಡಿದ್ದಾರೆ. ಹೀಗಾಗಿ ಮ್ಯಾಚ್ ರೆಫರಿ ಅವರನ್ನು ನಾಲ್ಕು ಪಂದ್ಯಗಳಿಗೆ ನಿಷೇಧಿಸಿದ್ದಾರೆ. ಅಷ್ಟೇ ಅಲ್ಲದೆ ಕಿಂಗ್ಮಾಗೆ ಐದು ಡಿಮೆರಿಟ್ ಅಂಕಗಳನ್ನು ಸಹ ನೀಡಲಾಗಿದೆ.
ಇತ್ತೀಚಿನ ದಿನಗಳಲ್ಲಿ ಕ್ರಿಕೆಟ್ ಮೈದಾನದಲ್ಲಿ ಕಳ್ಳಾಟ ತೀರಾ ವಿರಳ. ಅದರಲ್ಲೂ ಆಸ್ಟ್ರೇಲಿಯಾದ ಸ್ಟೀವ್ ಸ್ಮಿತ್ ಹಾಗೂ ಡೇವಿಡ್ ವಾರ್ನರ್ ಬಾಲ್ ವಿರೂಪಗೊಳಿಸಿ ಸಿಕ್ಕಿಬಿದ್ದ ಬಳಿಕ ಒಂದು ವರ್ಷ ನಿಷೇಧ ಹೇರಲಾಗಿತ್ತು. ಇದರ ಬಳಿಕ ಇಂತಹ ಕಳ್ಳಾಟದಿಂದ ಆಟಗಾರರು ಕೂಡ ದೂರ ಉಳಿದಿದ್ದರು. ಆದರೀಗ ಅಂತಹದ್ದೇ ಕಳ್ಳಾಟವಾಡಲು ಮುಂದಾಗಿ ನೆದರ್ಲೆಂಡ್ಸ್ ಬೌಲರ್ ವಿವಿಯನ್ ಕಿಂಗ್ಮಾ ಸಿಕ್ಕಿಬಿದ್ದಿದ್ದಾರೆ. ಅಫ್ಘಾನಿಸ್ತಾನ ವಿರುದ್ಧದ ಮೂರನೇ ಏಕದಿನ ಪಂದ್ಯದಲ್ಲಿ ಕಿಂಗ್ಮಾ ಬಾಲ್ ಟ್ಯಾಂಪರಿಂಗ್ ಮಾಡಿದ್ದರು.
ದೋಹಾದಲ್ಲಿ ನಡೆದ ಈ ಪಂದ್ಯದಲ್ಲಿ ವಿವಿಯನ್ 31ನೇ ಓವರ್ನಲ್ಲಿ ಬಾಲ್ ಟ್ಯಾಂಪರ್ ಮಾಡಿದ್ದಾರೆ. ಇದು ರೆಫರಿ ಗಮನಕ್ಕೆ ಬಂದಿದ್ದು, ಹೀಗಾಗಿ ದೂರು ನೀಡಲಾಗಿತ್ತು. ಅದರಂತೆ ಇದೀಗ ವಿವಿಯನ್ ಕಿಂಗ್ಮಾಗೆ ನಾಲ್ಕು ಪಂದ್ಯಗಳ ನಿಷೇಧ ಹೇರಲಾಗಿದೆ.
ಐಸಿಸಿ ನಿಯಮ 2.14 ರ ಅಡಿಯಲ್ಲಿ ನೀತಿ ಸಂಹಿತೆಯನ್ನು ಉಲ್ಲಂಘಿಸಿದ್ದಕ್ಕಾಗಿ ಕಿಂಗ್ಮಾ ತಪ್ಪಿತಸ್ಥರೆಂದು ದೃಢಪಟ್ಟಿದೆ. ಚೆಂಡು ವಿರೂಪಗೊಳಿಸಿದ ತಪ್ಪನ್ನು ಕಿಂಗ್ಮಾ ಕೂಡ ಒಪ್ಪಿಕೊಂಡಿದ್ದಾರೆ. ಹೀಗಾಗಿ ಮ್ಯಾಚ್ ರೆಫರಿ ಅವರನ್ನು ನಾಲ್ಕು ಪಂದ್ಯಗಳಿಗೆ ನಿಷೇಧಿಸಿದ್ದಾರೆ. ಅಷ್ಟೇ ಅಲ್ಲದೆ ಕಿಂಗ್ಮಾಗೆ ಐದು ಡಿಮೆರಿಟ್ ಅಂಕಗಳನ್ನು ಸಹ ನೀಡಲಾಗಿದೆ.
ಇನ್ನು ಈ ಪಂದ್ಯದಲ್ಲಿ ಅಫ್ಘಾನಿಸ್ತಾನ 50 ಓವರ್ಗಳಲ್ಲಿ 254 ರನ್ ಗಳಿಸಿತು. ಉತ್ತರವಾಗಿ ನೆದರ್ಲೆಂಡ್ಸ್ 179 ರನ್ಗಳಿಗೆ ಆಲೌಟ್ ಆಗಿ, 75 ರನ್ಗಳಿಂದ ಸೋಲೋಪ್ಪಿಕೊಂಡಿತು. ಈ ಪಂದ್ಯದಲ್ಲಿ ವಿವಿಯನ್ ಕಿಂಗ್ಮಾ 10 ಓವರ್ಗಳಲ್ಲಿ 50 ರನ್ ನೀಡಿ ಕೇವಲ ಒಂದು ವಿಕೆಟ್ ಪಡೆದಿದ್ದರು. ಈ ಗೆಲುವಿನೊಂದಿಗೆ ಅಫ್ಘಾನಿಸ್ತಾನ್ ನೆದರ್ಲೆಂಡ್ಸ್ ವಿರುದ್ದದ ಏಕದಿನ ಪಂದ್ಯವನ್ನು 3-0 ಅಂತರದಿಂದ ಕ್ಲೀನ್ ಸ್ವೀಪ್ ಮಾಡಿಕೊಂಡಿದೆ.
ವಿವಿಯನ್ ಕಿಂಗ್ಮಾ ನೆದರ್ಲೆಂಡ್ಸ್ ಪರವಾಗಿ 10 ಏಕದಿನ ಮತ್ತು 9 ಟಿ20 ಪಂದ್ಯಗಳನ್ನು ಆಡಿದ್ದಾರೆ. ಏಕದಿನದಲ್ಲಿ 12 ವಿಕೆಟ್ಗಳನ್ನು ಪಡೆದರೆ, ಟಿ20ಯಲ್ಲಿ 8 ವಿಕೆಟ್ಗಳನ್ನು ಕಬಳಿಸಿದ್ದಾರೆ. ಇದೀಗ ನಾಲ್ಕು ಪಂದ್ಯಗಳಲ್ಲಿ ನಿಷೇಧಕ್ಕೊಳಗಾಗಿರುವ ವಿವಿಯನ್ ಕಿಂಗ್ಮಾ ಮುಂದಿನ ದಿನಗಳಲ್ಲಿ ಕಂಬ್ಯಾಕ್ ಮಾಡಲಿದ್ದಾರಾ ಕಾದು ನೋಡಬೇಕಿದೆ.