ಯುಗಾದಿಯಲ್ಲಿ ನಡೆಯುವ ಶ್ರೀಶೈಲ ಮಲ್ಲಿಕಾರ್ಜುನ ಜಾತ್ರೆಗಾಗಿ ಪಾದಯಾತ್ರೆ ಹೊರಟ ಭಕ್ತರು, ದಾರಿಯುದ್ದಕ್ಕೂ ಆಹಾರ ನೀಡಿ ಸೇವೆ
ಯುಗಾದಿ ಪಾಡ್ಯದ ದಿನ ಶ್ರೀಶೈಲ ಮಲ್ಲಿಕಾರ್ಜುನನ ಜಾತ್ರೆ ರಥೋತ್ಸವ ಇದ್ದು, ಈಗಿಂದಲೇ ಭಕ್ತರು ಪಾದಯಾತ್ರೆ ನಡೆಸುತ್ತಾ ಶ್ರೀಶೈಲ ಕಡೆ ಹೊರಟಿದ್ದಾರೆ. ಮಕ್ಕಳು, ವೃದ್ದರು, ಮಹಿಳೆಯರು, ಯುವಕ ಯುವತಿಯರು ಸೇರಿದಂತೆ ಲಕ್ಷಾಂತರ ಮಂದಿ ಮಲ್ಲಯ್ಯನ ಕಣ್ತುಂಬಿಕೊಳ್ಳಲು ರಸ್ತೆಯಲ್ಲಿ ಹೆಜ್ಜೆ ಹಾಕುತ್ತಿದ್ದಾರೆ. ಪಾದಯಾತ್ರೆ ಹೊರಟ ಭಕ್ತರಿಗಾಗಿ ಕೆಲವರು ನೀರು, ಮಜ್ಜಿಗೆ, ಆಹಾರ ವಿತರಿಸುತ್ತಿದ್ದಾರೆ.
ಭಕ್ತಿ ಅನ್ನೋದೆ ಹಾಗೆ, ಭಕ್ತಿ ಮುಂದೆ ನೋವು, ದಣಿವು, ಆಯಾಸ ಎಲ್ಲವೂ ಲೆಕ್ಕಕ್ಕೇ ಬರಲ್ಲ. ತಮ್ಮ ಆರಾಧ್ಯ ದೈವದ ದರ್ಶನಕ್ಕಾಗಿ ಭಕ್ತರು ಏನೆಲ್ಲ ಹರಕೆ ಹೊರುತ್ತಾರೆ. ಅದರಲ್ಲಿ ಪಾದಯಾತ್ರೆ ಕೂಡ ಒಂದಾಗಿದ್ದು ಮಲ್ಲಯ್ಯನ ದರ್ಶನಕ್ಕೆ ಭಕ್ತಗಣ ಇದೀಗ ನೂರಾರು ಕಿಮೀ ಪಾದಯಾತ್ರೆ ಹೊರಟಿದೆ.
ಬಾಗಲಕೋಟೆಯ ಶ್ರೀಶೈಲ ಮಲ್ಲಿಕಾರ್ಜುನ ಜಾತ್ರೆ ಸಂಭ್ರಮ ಮನೆ ಮಾಡಿದೆ. ಯುಗಾದಿ ಪಾಡ್ಯದ ದಿನ ಶ್ರೀಶೈಲ ಮಲ್ಲಿಕಾರ್ಜುನನ ಜಾತ್ರೆ ರಥೋತ್ಸವ ಇದ್ದು, ಈಗಿಂದಲೇ ಭಕ್ತರು ಪಾದಯಾತ್ರೆ ನಡೆಸುತ್ತಾ ಶ್ರೀಶೈಲ ಕಡೆ ಹೊರಟಿದ್ದಾರೆ. ಇದಕ್ಕೆ ಇಲ್ಲಿ ಕಂಡು ಬರುತ್ತಿರುವ ಭಕ್ತಸಾಗರವೇ ಸಾಕ್ಷಿ.
ಶ್ರೀಶೈಲ ಮಲ್ಲಿಕಾರ್ಜುನ ದರ್ಶನ, ಜಾತ್ರೆಗಾಗಿ ಉತ್ತರ ಕರ್ನಾಟಕ ಭಾಗದಿಂದ ಲಕ್ಷಾಂತರ ಭಕ್ತರು ಪಾದಯಾತ್ರೆ ಹೊರಟಿದ್ದಾರೆ. ಮಕ್ಕಳು, ವೃದ್ದರು, ಮಹಿಳೆಯರು, ಯುವಕ ಯುವತಿಯರು ಎಲ್ಲರೂ ಮಲ್ಲಯ್ಯನ ಕಣ್ತುಂಬಿಕೊಳ್ಳಲು ರಸ್ತೆಯಲ್ಲಿ ಹೆಜ್ಜೆ ಹಾಕುತ್ತಿದ್ದಾರೆ.
ಇನ್ನು ಕೆಲ ಯುವಕರು ಮರಗಾಲು ಕಟ್ಟಿಕೊಂಡು ನೂರಾರು ಕಿ.ಮೀ ನಡೆಯುತ್ತಿದ್ದರೆ. ಕೆಲ ಯುವಕರು ಹೆಗಲ ಮೇಲೆ ಮಲ್ಲಯ್ಯನ ಕಂಬಿ ಹೊತ್ತು ನಡೆಯುತ್ತಿದ್ದಾರೆ. ಭಕ್ತರು ತಮ್ಮ ಹರಕೆ ಪ್ರಕಾರ ಪಾದಯಾತ್ರೆ ಮೂಲಕ ಮಲ್ಲಯ್ಯನ ಕಾಣೋದಕ್ಕೆ ಹೊರಟಿದ್ದಾರೆ.
ನೂರಾರು ಕಿ.ಮೀ ನಡೆಯೋದಕ್ಕೆ ಮಲ್ಲಿಕಾರ್ಜುನನ ಪ್ರೇರಣೆ. ಆತನ ಶಕ್ತಿ ನಮ್ಮ ಭಕ್ತಿ ಕಾರಣ ಎಂದು ಭಕ್ತರು ಭಕ್ತಿ ಮೆರೆದಿದ್ದಾರೆ. ಯುಗಾದಿ ಪಾಡ್ಯದಂದು ಆಂಧ್ರದ ಶ್ರೀಶೈಲದಲ್ಲಿ ಮಲ್ಲಿಕಾರ್ಜುನ ಜಾತ್ರೆ ಇದೆ. ಆದರೆ ಈಗಿಂದಲೇ ಲಕ್ಷಾಂತರ ಭಕ್ತರು ಪಾದಯಾತ್ರೆ ಆರಂಭಿಸಿದ್ದಾರೆ.
ಪಾಡ್ಯದ ವೇಳೆಗೆ ಎಲ್ಲ ಭಕ್ತರು ಶ್ರೀಶೈಲ ತಲುಪಿ ಮಲ್ಲಿಕಾರ್ಜುನ ದೇವರ ದರ್ಶನ ಪಡೆಯುತ್ತಾರೆ. ಬಾಗಲಕೋಟೆ, ಧಾರವಾಡ, ಬೆಳಗಾವಿ, ವಿಜಯಪುರ, ರಾಯಚೂರು, ಕೊಪ್ಪಳ ಹೀಗೆ ಉತ್ತರ ಕರ್ನಾಟಕ, ಹೈದರಾಬಾರ್ ಕರ್ನಾಟಕ ಭಾಗದಿಂದ ಲಕ್ಷಾಂತರ ಭಕ್ತರು ಕಾಲ್ನಡಿಗೆ ಹೊರಟಿದ್ದಾರೆ.
ಪಾದಯಾತ್ರೆ ಹೋಗದ ಭಕ್ತರು ಪಾದಯಾತ್ರಾರ್ಥಿಗಳಿಗೆ ಸೇವೆ ಮಾಡೋದರಲ್ಲೇ ಮಲ್ಲಯ್ಯನ ಕಾಣುತ್ತಾರೆ. ಪಾದಯಾತ್ರೆ ಹೊರಡುವ ಭಕ್ತರಿಗೆ ಬಾಗಲಕೋಟೆ ಅಕ್ಕಪಕ್ಕದ ಹೆದ್ದಾರಿಯುದ್ದಕ್ಕೂ ಎಳೆನೀರು, ಮಜ್ಜಿಗೆ ತಂಪು ಪಾನೀಯಗಳನ್ನು ಜನರು ನೀಡುತ್ತಾರೆ.
ಇಷ್ಟೇ ಅಲ್ಲದೆ ಉಪಹಾರ, ಊಟ, ಹೋಳಿಗೆ ಊಟ ನೀಡಿ ಪಾದಯಾತ್ರೆಗಳಿಗೆ ಊಟೋಪಚಾರ ಮಾಡಿ ಭಕ್ತಿ ಮೆರೆಯುತ್ತಾರೆ. ಇನ್ನು ವೀರಯ್ಯ ಹಿರೆಮಠ ಎಂಬ ಮಲ್ಲಿಕಾರ್ಜುನನ ಭಕ್ತರು 25 ವರ್ಷಗಳಿಂದಲೂ ಪಾದಯಾತ್ರಿಗಳಿಗೆ ಹೋಳಿಗೆ ಊಟ ನೀಡುತ್ತಿದ್ದಾರೆ. ಇದು ನಮ್ಮ ಸೇವೆ, ಪಾದಯಾತ್ರಿಗಳಲ್ಲೇ ನಾವು ಸಾಕ್ಷಾತ್ ಮಲ್ಲಯ್ತನ ಕಾಣುತ್ತೇವೆ ಅಂದರು.
ಇನ್ನು ಮುಸ್ಲಿಂ ಯುವಕ ಪಾದಯಾತ್ರಾರ್ಥಿಗಳಿಗೆ ಕಲ್ಲಂಗಡಿ ಹಣ್ಣನ್ನು ನೀಡುವ ಮೂಲಕ ಭಕ್ತರ ದಾಹ ತಣಿಸಿ ಭಾವೈಕ್ಯತೆ ಮೆರೆದಿದ್ದಾನೆ. ನಾನು ಪಾದಯಾತ್ರಾರ್ಥಿಗಳ ಸೇವೆಯಲ್ಲಿ ಮಲ್ಲಯ್ಯನ ಭಕ್ತಿ ಕಾಣ್ತೇನೆ ಎಂದರು.
ಇನ್ನು ಪಾದಯಾತ್ರೆ ಮಾಡುವವರಿಗೆ ಉಚಿತ ಮೆಡಿಸಿನ್ ಚಿಕಿತ್ಸೆ ಕೂಡ ಭಕ್ತರೆ ನೀಡಿದ್ದು ವಿಶೇಷವಾಗಿದೆ. ಒಟ್ಟಿನಲ್ಲಿ ಯುಗಾದಿ ಪಾಡ್ಯದ ದಿನ ಜಾತ್ರೆಗೆ ಈಗಿಂದಲೇ ಭಕ್ತರು ಪಾದಯಾತ್ರೆ ಹೊರಟಿದ್ದು, ಪಾದಯಾತ್ರಿಗಳ ಸಂಖ್ಯೆ ಈಗ ಬಾರಿ ಪ್ರಮಾಣದಲ್ಲಿ ಏರಿಕೆಯಾಗಿದೆ. ಪಾದಯಾತ್ರೆ ಮೂಲಕ ಮಲ್ಲಯ್ಯನ ಕಾಣ ಹೊರಟಿದ್ದು ಮಲ್ಲಯ್ಯನ ಮೇಲಿನ ಭಕ್ತಿ, ನಂಬಿಕೆ ಎಷ್ಟರ ಮಟ್ಟಿಗೆ ಇದೆ ಎಂಬುದಕ್ಕೆ ಸಾಕ್ಷಿಯಾಗಿದೆ.