ಮನೆಯಿಂದ ಹೊರಡುವಾಗ ಹಿಂದಿನಿಂದ ಕೂಗುವುದು ಅಶುಭವೇ? ಶಾಸ್ತ್ರಗಳು ಹೇಳುವುದೇನು?

ಮುಂಜಾನೆ ಅಥವಾ ದಿನದ ಯಾವುದೇ ಸಮಯದಲ್ಲಿ ಯಾರಾದರೂ ಯಾವುದಾದರೂ ಪ್ರಮುಖ ಕೆಲಸ, ಉದ್ಯೋಗ ಅಥವಾ ಪ್ರಯಾಣಕ್ಕಾಗಿ ಮನೆಯಿಂದ ಹೊರಡುವಾಗ ‘ಹಿಂದಿನಿಂದ ಕರೆಯಬೇಡಿ’ ಎಂದು ಹಿರಿಯರು ಸಲಹೆ ನೀಡುತ್ತಾರೆ. ನಮ್ಮಲ್ಲಿ ಅನೇಕರು ಇದನ್ನು ನಿರ್ಲಕ್ಷಿಸುತ್ತಾರೆ ಹಾಗೂ ಇದು ಹಳೆಯ ತಲೆಮಾರಿನ ಮೂಢನಂಬಿಕೆ ಎಂದು ಭಾವಿಸುತ್ತಾರೆ. ಆದರೆ, ಈ ನಿಯಮವು ಸನಾತನ ಸಂಪ್ರದಾಯ, ಜ್ಯೋತಿಷ್ಯ ಹಾಗೂ ಶಾಸ್ತ್ರಗಳಲ್ಲಿ ಆಳವಾದ ಮಹತ್ವವನ್ನು ಹೊಂದಿದೆ.

ಶಾಸ್ತ್ರಗಳ ಪ್ರಕಾರ, ಒಬ್ಬ ವ್ಯಕ್ತಿ ಶುಭ ಕಾರ್ಯಕ್ಕಾಗಿ ಮನೆಯಿಂದ ಹೊರಹೋಗುವಾಗ ಹಿಂದಿನಿಂದ ಕರೆಯುವುದು ಅಥವಾ ಅವರಿಗೆ ಅಡ್ಡಿಪಡಿಸುವುದು ಅಶುಭ ಶಕುನವೆಂದು ಪರಿಗಣಿಸಲಾಗುತ್ತದೆ. ಈ ನಂಬಿಕೆಯ ಹಿಂದಿರುವ ಧಾರ್ಮಿಕ, ಜ್ಯೋತಿಷ್ಯ ಮತ್ತು ಪ್ರಾಯೋಗಿಕ ಕಾರಣಗಳನ್ನು ಇಲ್ಲಿ ತಿಳಿಯಿರಿ.

ಶುಭ ಕಾರ್ಯಗಳಲ್ಲಿ ಅಡೆತಡೆಗಳು ಉಂಟಾಗುವ ಭೀತಿ:

ಶಾಸ್ತ್ರೀಯ ನಂಬಿಕೆಗಳ ಪ್ರಕಾರ, ಒಬ್ಬ ವ್ಯಕ್ತಿಯು ನಿರ್ದಿಷ್ಟ ಉದ್ದೇಶದಿಂದ ಮನೆಯಿಂದ ಹೊರಟಾಗ, ಆತನ ಮನಸ್ಸಿನಲ್ಲಿ ಸಕಾರಾತ್ಮಕ ಆಲೋಚನೆ ಮತ್ತು ಸಂಕಲ್ಪವಿರುತ್ತದೆ. ಹೊರಡುವ ಕ್ಷಣದಲ್ಲಿ ಹಿಂದಿನಿಂದ ಬರುವ ಧ್ವನಿಯು ಆ ಕಾರ್ಯದ ಹರಿವು ಹಾಗೂ ಸಂಕಲ್ಪವನ್ನು ಅಡ್ಡಿಪಡಿಸುತ್ತದೆ. ಹೀಗೆ ಮಾಡುವುದರಿಂದ ಕೈಗೊಳ್ಳುವ ಕಾರ್ಯದಲ್ಲಿ ವಿಘ್ನಗಳು, ಅಡೆತಡೆಗಳು ಹಾಗೂ ಯಶಸ್ಸಿನ ಬಗ್ಗೆ ಅನುಮಾನಗಳು ಮೂಡುತ್ತವೆ ಎಂದು ನಂಬಲಾಗಿದೆ.

ರಾಹು ದೋಷ ಮತ್ತು ನಕಾರಾತ್ಮಕ ಶಕ್ತಿಯ ಪ್ರಭಾವ:

ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ಒಬ್ಬ ವ್ಯಕ್ತಿಯು ಶುಭ ಕಾರ್ಯಕ್ಕಾಗಿ ಹೆಜ್ಜೆ ಇಟ್ಟಾಗ ಸಕಾರಾತ್ಮಕ ಶಕ್ತಿಯು ಆತನನ್ನು ಆವರಿಸಿರುತ್ತದೆ. ಆದರೆ ಇದ್ದಕ್ಕಿದ್ದಂತೆ ಹಿಂದಿನಿಂದ ಅಡ್ಡಿಪಡಿಸಿದಾಗ ನಕಾರಾತ್ಮಕ ಶಕ್ತಿಯು ತಕ್ಷಣವೇ ಆವರಿಸಿಕೊಳ್ಳುತ್ತದೆ. ಇದು ರಾಹುವಿನ ಅಶುಭ ಪ್ರಭಾವವನ್ನು ಹೆಚ್ಚಿಸುತ್ತದೆ, ಇದರಿಂದ ಮಾನಸಿಕ ಆತಂಕ, ಅಪಘಾತಗಳು ಅಥವಾ ನಷ್ಟದ ಅಪಾಯಗಳು ಹೆಚ್ಚಾಗುತ್ತವೆ ಎಂದು ಜ್ಯೋತಿಷ್ಯ ಹೇಳುತ್ತದೆ.

ಇದನ್ನೂ ಓದಿ: ಈ ವಾಚ್ ಬೆಲೆ ಬರೋಬ್ಬರಿ 4.25 ಕೋಟಿ ರೂ.! ಇದರೊಳಗಿದೆ ಶ್ರೀರಾಮ, ಹನುಮಂತನ ಸುಂದರ ಶಿಲ್ಪ

ಮಾನಸಿಕ ಏಕಾಗ್ರತೆ ಮತ್ತು ಧೈರ್ಯದ ಕೊರತೆ:

ಧಾರ್ಮಿಕ ಕಾರಣಗಳ ಜೊತೆಗೆ ಇದಕ್ಕೆ ಆಳವಾದ ಪ್ರಾಯೋಗಿಕ ಅಂಶವೂ ಇದೆ. ಒಬ್ಬ ವ್ಯಕ್ತಿಯು ಹೊರಡುವಾಗ ಆತನ ಗಮನವು ಗಮ್ಯಸ್ಥಾನ, ಸಮಯ ಮತ್ತು ಆ ಕೆಲಸದ ಮೇಲೆಯೇ ದೃಢವಾಗಿರುತ್ತದೆ. ಹಠಾತ್ತಾಗಿ ಯಾರಾದರೂ ಕರೆದಾಗ ಆತನ ಏಕಾಗ್ರತೆ ಭಂಗವಾಗುತ್ತದೆ. ಇದು ಮನಸ್ಸಿನಲ್ಲಿ ವಿವರಿಸಲಾಗದ ಭಯ, ಹಿಂಜರಿಕೆ ಅಥವಾ ಗೊಂದಲವನ್ನು ಉಂಟುಮಾಡಿ, ಆತ್ಮವಿಶ್ವಾಸವನ್ನು ಕುಗ್ಗಿಸುತ್ತದೆ.

ಆಕಸ್ಮಿಕವಾಗಿ ಯಾರಾದರೂ ಹಿಂದಿನಿಂದ ಕರೆದರೆ ಏನು ಮಾಡಬೇಕು?

ಒಂದು ವೇಳೆ ನೀವು ಹೊರಡುವಾಗ ಯಾರಾದರೂ ಆಕಸ್ಮಿಕವಾಗಿ ಹಿಂದಿನಿಂದ ಕರೆದರೆ ಭಯಪಡುವ ಅಗತ್ಯವಿಲ್ಲ. ಈ ದೋಷವನ್ನು ನಿವಾರಿಸಲು ಶಾಸ್ತ್ರಗಳಲ್ಲಿ ಸರಳ ಪರಿಹಾರಗಳನ್ನು ನೀಡಲಾಗಿದೆ. ಅಡಚಣೆ ಅಥವಾ ಧ್ವನಿ ಕೇಳಿದ ತಕ್ಷಣ ಮುನ್ನಡೆಯಬೇಡಿ. ತಕ್ಷಣ ಮನೆಗೆ ಹಿಂತಿರುಗಿ 2 ನಿಮಿಷಗಳ ಕಾಲ ಶಾಂತವಾಗಿ ಕುಳಿತುಕೊಳ್ಳಿ. ಮನಸ್ಸಿನ ಆತಂಕ ಹಾಗೂ ಗೊಂದಲವನ್ನು ಶಾಂತಗೊಳಿಸಲು ಸ್ವಲ್ವ ನೀರನ್ನು ಕುಡಿಯಿರಿ. ನಿಮ್ಮ ಇಷ್ಟದೇವರನ್ನು ಮನಸ್ಸಿನಲ್ಲಿಯೇ ಸ್ಮರಿಸಿ, ಪ್ರಾರ್ಥನೆ ಸಲ್ಲಿಸಿ, ನಂತರ ಸಕಾರಾತ್ಮಕ ಮನಸ್ಥಿತಿಯೊಂದಿಗೆ ಹೊಸದಾಗಿ ಹೆಜ್ಜೆ ಇಡಿ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ