ಏಷ್ಯನ್ ಗೇಮ್ಸ್ ಕ್ರಿಕೆಟ್ ಕ್ವಾರ್ಟರ್ ಫೈನಲ್​ಗೆ 8 ತಂಡಗಳು ಎಂಟ್ರಿ

2026 ರ ಐಚಿ ನಗೋಯಾ ಏಷ್ಯನ್ ಗೇಮ್ಸ್‌ನಲ್ಲಿ ನಡೆಯಲಿರುವ ಪುರುಷರ ಕ್ರಿಕೆಟ್ ಪಂದ್ಯಾವಳಿಯ ಕ್ವಾರ್ಟರ್‌ಫೈನಲ್‌ ಸುತ್ತಿಗೆ 8 ತಂಡಗಳು ಎಂಟ್ರಿಕೊಟ್ಟಿವೆ. ಸೆಪ್ಟೆಂಬರ್ 26 ರ ಶನಿವಾರ ಮಳೆಯಿಂದಾಗಿ ಗ್ರೂಪ್ ಎ ಪಂದ್ಯಗಳು ರದ್ದಾದ ನಂತರ ನೇಪಾಳ ಮತ್ತು ಅಫ್ಘಾನಿಸ್ತಾನ ಕ್ವಾರ್ಟರ್ ಫೈನಲ್‌ಗೆ ಮುನ್ನಡೆದರೆ, ಇತ್ತ ಆತಿಥೇಯ ಜಪಾನ್ ಗ್ರೂಪ್ ಬಿ ನಿಂದ ಹೊರಬಿದ್ದಿದೆ. ಇನ್ನು ಬಿ ಗುಂಪಿನಿಂದ ಮಲೇಷ್ಯಾ ಮತ್ತು ಹಾಂಗ್ ಕಾಂಗ್ ತಂಡಗಳು ಕ್ವಾರ್ಟರ್‌ಫೈನಲ್​ಗೆ ಅರ್ಹತೆ ಪಡೆದುಕೊಂಡಿವೆ.

ಮಳೆಯಿಂದ ಪಂದ್ಯಗಳು ರದ್ದು

ಗ್ರೂಪ್ ಎ ನ ಅಂತಿಮ ಪಂದ್ಯದಲ್ಲಿ ನೇಪಾಳ ಮತ್ತು ಜಪಾನ್ ಮುಖಾಮುಖಿಯಾಗಿದ್ದವು. ನಿಶಿನ್‌ನ ಕೊರೋಗಿ ಸ್ಪೋರ್ಟ್ಸ್ ಪಾರ್ಕ್‌ನಲ್ಲಿ ನಡೆದ ಈ ಪಂದ್ಯದಲ್ಲಿ, ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ನೇಪಾಳ, 15 ಓವರ್‌ಗಳಲ್ಲಿ 149 ರನ್ ಕಲೆಹಾಕಿತು. ತಂಡದ ಪರ ಸಂದೀಪ್ ಜೋರಾ ಮತ್ತು ಲೋಕೇಶ್ ಬಾಮ್ ಅರ್ಧಶತಕಗಳ ಇನ್ನಿಂಗ್ಸ್ ಆಡಿದರು. ಆದರೆ ಈ ಹಂತದಲ್ಲಿ ಮಳೆ ಬಂದಿತು. ಅಲ್ಲದೆ ಮಳೆಯಿಂದಾಗಿ ಜಪಾನ್‌ನ ಇನ್ನಿಂಗ್ಸ್ ಕೂಡ ಪ್ರಾರಂಭವಾಗಲಿಲ್ಲ. ಹೀಗಾಗಿ ಪಂದ್ಯವು ಡ್ರಾದಲ್ಲಿ ಕೊನೆಗೊಂಡಿತು.

ಈ ಫಲಿತಾಂಶವು ನೇಪಾಳ ಮತ್ತು ಅಫ್ಘಾನಿಸ್ತಾನಕ್ಕೆ ನೇರ ಲಾಭವನ್ನು ತಂದುಕೊಟ್ಟಿತು. ನೇಪಾಳ ಈ ಹಿಂದೆ ಅಫ್ಘಾನಿಸ್ತಾನವನ್ನು ಸೋಲಿಸುವ ಮೂಲಕ ಗ್ರೂಪ್ ಎ ನಲ್ಲಿ ಕ್ವಾರ್ಟರ್ ಫೈನಲ್​ ರೇಸ್​ನಲ್ಲಿ ಮೇಲುಗೈ ಸಾಧಿಸಿತ್ತು. ಹೀಗಾಗಿ ಜಪಾನ್‌ ಕ್ವಾರ್ಟರ್‌ಫೈನಲ್ ರೇಸ್​ನಲ್ಲಿ ಉಳಿಯಬೇಕಾದರೆ ನೇಪಾಳದ ವಿರುದ್ಧ ಗೆಲ್ಲಲೇಬೇಕಿತ್ತು. ಆದರೆ ಮಳೆ ಜಪಾನ್ ತಂಡದ ಭರವಸೆಯನ್ನು ಕೊನೆಗೊಳಿಸಿತು.

ಬಿ ಗುಂಪಿನಲ್ಲಿ, ಮಲೇಷ್ಯಾ ಮತ್ತು ಓಮನ್ ನಡುವಿನ ಪಂದ್ಯವು ಮಳೆಯಿಂದಾಗಿ ಒಂದು ಚೆಂಡು ಕೂಡ ಎಸೆಯದೆ ರದ್ದಾಯಿತು. ಈ ಫಲಿತಾಂಶವು ಮಲೇಷ್ಯಾ ಮತ್ತು ಹಾಂಗ್ ಕಾಂಗ್ ತಂಡಗಳು ಕ್ವಾರ್ಟರ್ ಫೈನಲ್‌ಗೆ ಅರ್ಹತೆ ಪಡೆಯುವುದನ್ನು ಖಚಿತಪಡಿಸಿತು. ಇತ್ತ ಓಮನ್ ತಂಡದ ಅಭಿಯಾನ ಕೊನೆಗೊಂಡಿತು.

ಕ್ವಾರ್ಟರ್ ಫೈನಲ್ ಸುತ್ತು

ಪ್ರಾಥಮಿಕ ಸುತ್ತಿನ ಪಂದ್ಯಗಳು ಪೂರ್ಣಗೊಂಡಿದ್ದು, ಇದೀಗ ಕ್ವಾರ್ಟರ್ ಫೈನಲ್ ಪಂದ್ಯಗಳು ಶುರುವಾಗಲಿವೆ. ಈ ಸುತ್ತಿನಲ್ಲಿ ಭಾರತವು ಸೆಪ್ಟೆಂಬರ್ 28 ರ ಸೋಮವಾರ ಬೆಳಿಗ್ಗೆ 10:00 ಗಂಟೆಗೆ ಅಫ್ಘಾನಿಸ್ತಾನವನ್ನು ಎದುರಿಸಲಿದೆ. ಪಾಕಿಸ್ತಾನ ಮತ್ತು ಹಾಂಗ್ ಕಾಂಗ್ ತಂಡಗಳು ಅದೇ ದಿನ ಬೆಳಿಗ್ಗೆ 5:30 ಕ್ಕೆ ಮುಖಾಮುಖಿಯಾಗಲಿವೆ. ಶ್ರೀಲಂಕಾ ಮೂರನೇ ಕ್ವಾರ್ಟರ್ ಫೈನಲ್‌ನಲ್ಲಿ ನೇಪಾಳವನ್ನು ಎದುರಿಸಲಿದೆ. ಇತ್ತ ಬಾಂಗ್ಲಾದೇಶ ನಾಲ್ಕನೇ ಕ್ವಾರ್ಟರ್ ಫೈನಲ್‌ನಲ್ಲಿ ಮಲೇಷ್ಯಾವನ್ನು ಎದುರಿಸಲಿದೆ. ಎರಡೂ ಪಂದ್ಯಗಳು ಸೆಪ್ಟೆಂಬರ್ 29 ರ ಮಂಗಳವಾರ ನಡೆಯಲಿವೆ. ಇನ್ನು ಅಕ್ಟೋಬರ್ 1 ರಂದು ಸೆಮಿಫೈನಲ್ ಪಂದ್ಯಗಳು ನಡೆಯಲಿದ್ದು, ನಂತರ ಅಕ್ಟೋಬರ್ 3 ರಂದು ಚಿನ್ನ ಮತ್ತು ಕಂಚಿನ ಪದಕದ ಪಂದ್ಯಗಳು ನಡೆಯಲಿವೆ. ಎಲ್ಲಾ ಪಂದ್ಯಗಳನ್ನು ಕೊರೋಗಿ ಸ್ಪೋರ್ಟ್ಸ್ ಪಾರ್ಕ್‌ನಲ್ಲಿ ಆಡಲಾಗುತ್ತದೆ.

ಏಷ್ಯನ್ ಗೇಮ್ಸ್​ನಲ್ಲಿ ಭಾರತಕ್ಕೆ 4ನೇ ಸ್ವರ್ಣ; ಚಿನ್ನಕ್ಕೆ ಮುತ್ತಿಕ್ಕಿದ ಪುರುಷರ ಕಬಡ್ಡಿ ತಂಡ..!

ಕ್ವಾರ್ಟರ್ ಫೈನಲ್ ಪಂದ್ಯಗಳ ವೇಳಾಪಟ್ಟಿ

• ಸೆಪ್ಟೆಂಬರ್ 28: ಪಾಕಿಸ್ತಾನ vs ಹಾಂಗ್ ಕಾಂಗ್, ಬೆಳಿಗ್ಗೆ 5.30
• ಸೆಪ್ಟೆಂಬರ್ 28: ಭಾರತ vs ಅಫ್ಘಾನಿಸ್ತಾನ, ಬೆಳಿಗ್ಗೆ 10 ಗಂಟೆ
• ಸೆಪ್ಟೆಂಬರ್ 29: ಶ್ರೀಲಂಕಾ vs ನೇಪಾಳ, ಬೆಳಿಗ್ಗೆ 5.30
• ಸೆಪ್ಟೆಂಬರ್ 29: ಬಾಂಗ್ಲಾದೇಶ vs ಮಲೇಷ್ಯಾ, ಬೆಳಿಗ್ಗೆ 10 ಗಂಟೆ

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ