ಏಷ್ಯನ್ ಗೇಮ್ಸ್ 2026​: ಭರ್ಜರಿ ಜಯದೊಂದಿಗೆ ಫೈನಲ್​ಗೇರಿದ ಪಾಕಿಸ್ತಾನ್!

ಏಷ್ಯನ್ ಗೇಮ್ಸ್​​ ಟಿ20 ಟೂರ್ನಿಯ ಮೊದಲ ಸೆಮಿಫೈನಲ್ ಪಂದ್ಯದಲ್ಲಿ ಪಾಕಿಸ್ತಾನ್ ತಂಡ ಭರ್ಜರಿ ಜಯ ಸಾಧಿಸಿದೆ. ಈ ಗೆಲುವಿನೊಂದಿಗೆ ಪಾಕ್ ಪಡೆ ಫೈನಲ್​ಗೇರಿದೆ. ಜಪಾನ್​ನ ನಿಶ್ಶಿನ್​ನಲ್ಲಿರುವ ಕೊರೋಗಿ ಸ್ಪೋರ್ಟ್ಸ್ ಪಾರ್ಕ್ ಮೈದಾನದಲ್ಲಿ ನಡೆದ ಈ ಪಂದ್ಯದಲ್ಲಿ ಪಾಕಿಸ್ತಾನ್ ಮತ್ತು ಬಾಂಗ್ಲಾದೇಶ್ ತಂಡಗಳು ಮುಖಾಮುಖಿಯಾಗಿದ್ದವು. ಮಳೆಯ ಕಾರಣ 13 ಓವರ್​ಗಳಿಗೆ ಸೀಮಿತವಾಗಿದ್ದ ಈ ಮ್ಯಾಚ್​ನಲ್ಲಿ ಟಾಸ್ ಗೆದ್ದ ಪಾಕ್ ತಂಡದ ನಾಯಕ ಸಾಹಿಬ್​ಝಾದ ಫರ್ಹಾನ್ ಬೌಲಿಂಗ್ ಆಯ್ದುಕೊಂಡಿದ್ದರು.

ಅದರಂತೆ ಮೊದಲು ಬ್ಯಾಟ್ ಮಾಡಿದ ಬಾಂಗ್ಲಾದೇಶ್ ತಂಡವು ನಿರೀಕ್ಷಿತ ಆರಂಭ ಪಡೆದಿರಲಿಲ್ಲ. ಇದಾಗ್ಯೂ ಮಧ್ಯಮ ಕ್ರಮಾಂಕದಲ್ಲಿ ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದ ತೌಹಿದ್ ಹೃದಯ್ 25 ಎಸೆತಗಳಲ್ಲಿ 42 ರನ್ ಬಾರಿಸಿದರು. ಈ 42 ರನ್​ಗಳ ಕೊಡುಗೆಯೊಂದಿಗೆ ಬಾಂಗ್ಲಾದೇಶ್ ತಂಡವು ನಿಗದಿತ 13 ಓವರ್​ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 111 ರನ್ ಕಲೆಹಾಕಿತು.

112 ರನ್​ಗಳ ಗುರಿ:

13 ಓವರ್​ಗಳಲ್ಲಿ 112 ರನ್​ಗಳ ಗುರಿ ಪಡೆದ ಪಾಕಿಸ್ತಾನ್ ತಂಡವು ಮೊದಲ ಓವರ್​ನಲ್ಲೇ ನಾಯಕ ಸಾಹಿಬ್​ಝಾದ ಫರ್ಹಾನ್ (1) ವಿಕೆಟ್ ಕಳೆದುಕೊಂಡಿತು. ಇದರ ಬೆನ್ನಲ್ಲೇ ಮಾಝ್ ಸದಾಕತ್ (15) ಹಾಗೂ ಉಸ್ಮಾನ್ ಖಾನ್ (14) ವಿಕೆಟ್ ಒಪ್ಪಿಸಿದರು.

ಈ ಹಂತದಲ್ಲಿ ಬಿರುಸಿನ ಬ್ಯಾಟಿಂಗ್ ಪ್ರದರ್ಶಿಸಿದ ಸೈಮ್ ಅಯ್ಯೂಬ್ 12 ಎಸೆತಗಳಲ್ಲಿ 21 ರನ್ ಬಾರಿಸಿ ತಂಡವನ್ನು ಆರಂಭಿಕ ಆಘಾತದಿಂದ ಪಾರು ಮಾಡಿದರು. ಆ ಬಳಿಕ ಜೊತೆಗೂಡಿದ ಅಬ್ದುಲ್ ಸಮದ್ ಹಾಗೂ ಹಸನ್ ನವಾಝ್ ಅದ್ಭುತ ಜೊತೆಯಾಟ ಪ್ರದರ್ಶಿಸುವ ಮೂಲಕ ಬಾಂಗ್ಲಾ ಬೌಲರ್​ಗಳ ಬೆಂಡೆತ್ತಿದರು.

ಪರಿಣಾಮ ಪಾಕಿಸ್ತಾನ್ ತಂಡಕ್ಕೆ ಕೊನೆಯ 4 ಓವರ್​ಗಳಲ್ಲಿ ಕೇವಲ 36 ರನ್​ಗಳ ಅವಶ್ಯಕತೆಯಿತ್ತು. ಈ ಹಂತದಲ್ಲಿ ದಾಳಿಗಿಳಿದ ಮುಸ್ತಫಿಝುರ್ ರೆಹಮಾನ್ ಒಂದೇ ಓವರ್​ನಲ್ಲಿ ಬರೋಬ್ಬರಿ 23 ರನ್ ನೀಡಿದರು.

ಅದರಂತೆ ಕೊನೆಯ 3 ಓವರ್​ಗಳಲ್ಲಿ 12 ರನ್​ಗಳ ಗುರಿ ಪಡೆದ ಪಾಕಿಸ್ತಾನ್ ತಂಡವು 11.3 ಓವರ್​ಗಳಲ್ಲಿ 112 ರನ್ ಬಾರಿಸಿ 6 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿದೆ. ಈ ಗೆಲುವಿನೊಂದಿಗೆ ಪಾಕ್ ಪಡೆ ಫೈನಲ್​ಗೇರಿದೆ.

ಪಾಕಿಸ್ತಾನ್ ಪ್ಲೇಯಿಂಗ್ 11: ಸಾಹಿಬ್‌ಝಾದ ಫರ್ಹಾನ್ (ನಾಯಕ) , ಸೈಮ್ ಅಯ್ಯೂಬ್, ಉಸ್ಮಾನ್ ಖಾನ್ (ವಿಕೆಟ್ ಕೀಪರ್ )
ಮಾಝ್ ಸದಾಕತ್ , ಹಸನ್ ನವಾಝ್ , ಅಬ್ದುಲ್ ಸಮದ್ , ಅರಾಫತ್ ಮಿನ್ಹಾಸ್ , ಅಹ್ಮದ್ ದಾನಿಯಲ್ , ಮೊಹಮ್ಮದ್ ವಾಸಿಮ್ ಜೂನಿಯರ್ , ಅಬ್ರಾರ್ ಅಹ್ಮದ್ , ಸುಫ್ಯಾನ್ ಮೋಕಿಮ್.

ಇದನ್ನೂ ಓದಿ: ಜಡ್ಡು ಐಡಿಯಾ ರಿಜೆಕ್ಟ್ ಮಾಡಿದ್ದೇನೆ: ಪಂದ್ಯದ ಬಳಿಕ ರೋಹಿತ್ ಶರ್ಮಾ ಹೇಳಿದ್ದೇನು?

ಬಾಂಗ್ಲಾದೇಶ್ ಪ್ಲೇಯಿಂಗ್ 11: ತಂಝಿದ್ ಹಸನ್ ತಮೀಮ್ , ಸೈಫ್ ಹಸನ್ , ಲಿಟ್ಟನ್ ದಾಸ್ (ನಾಯಕ) ,
ತೌಹಿದ್ ಹೃದಯ್ , ಪರ್ವೇಜ್ ಹೊಸೇನ್ ಎಮನ್ , ಮೊಸದ್ದೀಕ್ ಹೊಸೇನ್ , ಮಹೇದಿ ಹಸನ್ , ರಿಷಾದ್ ಹೊಸೇನ್ , ನಸುಮ್ ಅಹ್ಮದ್ , ಶೊರಿಫುಲ್ ಇಸ್ಲಾಂ , ಮುಸ್ತಫಿಝುರ್ ರೆಹಮಾನ್.