ಒಂದೇ ದಿನ 15 ವಿಕೆಟ್‌ಗಳು ಪತನವಾದರೂ ಸಿಡ್ನಿ ಮೈದಾನಕ್ಕೆ ಕ್ಲೀನ್ ಚಿಟ್ ನೀಡಿದ ಐಸಿಸಿ

ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ 5 ಪಂದ್ಯಗಳ ಟೆಸ್ಟ್ ಸರಣಿಯ ಕೊನೆಯ ಪಂದ್ಯ ಸಿಡ್ನಿಯಲ್ಲಿ ನಡೆಯಿತು. ಈ ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡ 6 ವಿಕೆಟ್‌ಗಳಿಂದ ಗೆದ್ದು ಬಾರ್ಡರ್ ಗವಾಸ್ಕರ್ ಟ್ರೋಫಿಯನ್ನು 3-1 ಅಂತರದಿಂದ ಗೆದ್ದುಕೊಂಡಿತು. ಇದೀಗ ಈ ಪಂದ್ಯ ಸೇರಿದಂತೆ ಇಡೀ ಸರಣಿಯಲ್ಲಿ ಬಳಸಲಾದ ಪಿಚ್‌ನ ರೇಟಿಂಗ್ ಅನ್ನು ಐಸಿಸಿ ಬಿಡುಗಡೆ ಮಾಡಿದೆ. ಆ ಪ್ರಕಾರ, ಪರ್ತ್, ಅಡಿಲೇಡ್, ಬ್ರಿಸ್ಬೇನ್ ಮತ್ತು ಮೆಲ್ಬೋರ್ನ್‌ನ ಪಿಚ್‌ಗಳನ್ನು ‘ವೆರಿ ಗುಡ್’ ಎಂದು ರೇಟ್ ಮಾಡಲಾಗಿದೆ. ಆದರೆ ಕೊನೆಯ ಟೆಸ್ಟ್​ಗೆ ಆತಿಥ್ಯ ನೀಡಿದ್ದ ಸಿಡ್ನಿ ಪಿಚ್​ಗೆ ಐಸಿಸಿ ‘ತೃಪ್ತಿದಾಯಕ’ ರೇಟಿಂಗ್ ನೀಡಿರುವುದು ಎಲ್ಲರ ಅಚ್ಚರಿಗೆ ಕಾರಣವಾಗಿದೆ. ಏಕೆಂದರೆ ಪಂದ್ಯದ ಮೊದಲ ದಿನ 11 ವಿಕೆಟ್‌ಗಳು ಬಿದ್ದರೆ, ಎರಡನೇ ದಿನ 15 ವಿಕೆಟ್‌ಗಳು ಬಿದ್ದವು. ಗ್ಲೆನ್ ಮೆಕ್‌ಗ್ರಾತ್ ಮತ್ತು ಸುನಿಲ್ ಗವಾಸ್ಕರ್ ಸೇರಿದಂತೆ ಅನೇಕ ಅನುಭವಿಗಳು ಈ ಪಿಚ್ ಬಗ್ಗೆ ಆಶ್ಚರ್ಯ ವ್ಯಕ್ತಪಡಿಸಿದ್ದರು ಮತ್ತು ಪ್ರಶ್ನೆಗಳನ್ನು ಸಹ ಎತ್ತಿದ್ದರು. ಇದರ ಜೊತೆಗೆ ಇದನ್ನು ಅತ್ಯಂತ ಕೆಟ್ಟ ಪಿಚ್ ಎಂದು ಕರೆದಿದ್ದರು.

ಎರಡೂವರೆ ದಿನಗಳಲ್ಲಿ ಪಂದ್ಯ ಮುಕ್ತಾಯ

ಸಿಡ್ನಿ ಮೈದಾನವನ್ನು ಸಾಮಾನ್ಯವಾಗಿ ಬ್ಯಾಟ್ಸ್‌ಮನ್‌ಗಳಿಗೆ ಅನುಕೂಲಕರವೆಂದು ಪರಿಗಣಿಸಲಾಗುತ್ತದೆ. ಈ ಬಾರಿಯೂ ಈ ಪಿಚ್‌ನಿಂದ ಅದೇ ರೀತಿಯ ನಿರೀಕ್ಷೆ ಇತ್ತು. ಆದರೆ ಪಂದ್ಯ ಆರಂಭವಾದ ಬಳಿಕ ಪ್ರತಿ ಬಾಲ್ ಆಡಲು ಬ್ಯಾಟ್ಸ್​ಮನ್​ಗಳು ಸಾಕಷ್ಟು ಪ್ರಯಾಸಪಡಬೇಕಾಯಿತು. ಇದರ ಫಲವಾಗಿ ಕೇವಲ ಎರಡೂವರೆ ದಿನಗಳಲ್ಲಿ ಪಂದ್ಯ ಮುಗಿದಿತ್ತು. ಕೇವಲ 1141 ಎಸೆತಗಳಲ್ಲಿ ಪಂದ್ಯದ ಫಲಿತಾಂಶ ಪ್ರಕಟವಾಯಿತು.

ಇದಕ್ಕೂ ಮುನ್ನ 1931ರಲ್ಲಿ ಆಸ್ಟ್ರೇಲಿಯಾ ಮತ್ತು ವೆಸ್ಟ್ ಇಂಡೀಸ್ ನಡುವಿನ ಪಂದ್ಯ 1184 ಎಸೆತಗಳಲ್ಲಿ ಕೊನೆಗೊಂಡಿತ್ತು. ಆ ಬಳಿಕ 1985 ರಲ್ಲಿ ನಡೆದಿದ್ದ ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ನಡುವಿನ ಪಂದ್ಯವು 911 ಎಸೆತಗಳಲ್ಲಿ ಅಂತ್ಯಗೊಂಡಿತ್ತು. ಹಾಗೆಯೇ 1888 ರಲ್ಲಿ ಈ ಎರಡು ತಂಡಗಳ ನಡುವಿನ ಪಂದ್ಯದ ಫಲಿತಾಂಶವು ಕೇವಲ 1129 ಎಸೆತಗಳಲ್ಲಿ ಹೊರಬಂದಿತ್ತು. ಇದರಿಂದ ಪಿಚ್ ಎಷ್ಟು ಕೆಟ್ಟದಾಗಿರಬಹುದೆಂದು ಅಂದಾಜಿಸಬಹುದು. ಇದರ ಹೊರತಾಗಿಯೂ, ಐಸಿಸಿ ಈ ಪಿಚ್​ ಅನ್ನು ‘ತೃಪ್ತಿದಾಯಕ’ ವಿಭಾಗದಲ್ಲಿ ಇರಿಸಿದೆ.

ಅಚ್ಚರಿ ವ್ಯಕ್ತಪಡಿಸಿದ ಮಾಜಿ ಕ್ರಿಕೆಟಿಗರು

ಸಿಡ್ನಿ ಪಿಚ್‌ನಲ್ಲಿ ಸಾಕಷ್ಟು ಹುಲ್ಲಿತ್ತು. ಇದರಿಂದಾಗಿ ಬೌಲರ್‌ಗಳು ಸ್ವಿಂಗ್ ಜೊತೆಗೆ ಸಾಕಷ್ಟು ಸೀಮ್ ಮೂವ್‌ಮೆಂಟ್ ಪಡೆಯುತ್ತಿದ್ದರು. ಈ ಕಾರಣಕ್ಕೆ ಎರಡೂ ತಂಡಗಳ ಬ್ಯಾಟ್ಸ್‌ಮನ್‌ಗಳು ರನ್ ಗಳಿಸಲು ಹರಸಾಹಸ ಪಡಬೇಕಾಯಿತು. ಕಳೆದ ಹಲವು ವರ್ಷಗಳಿಂದ ಸಿಡ್ನಿಯಲ್ಲಿ ಇಂತಹ ಪಿಚ್ ನೋಡಿರಲಿಲ್ಲ ಎಂದು ಸ್ವತಃ ಆಸ್ಟ್ರೇಲಿಯಾದ ದಿಗ್ಗಜ ಗ್ಲೆನ್ ಮೆಕ್‌ಗ್ರಾತ್ ಹೇಳಿದ್ದರು.

ಇವರೊಂದಿಗೆ ಈ ಪಿಚ್​ ಬಗ್ಗೆ ಅಸಮಾಧಾನ ಹೊರಹಾಕಿದ್ದ ಸುನಿಲ್ ಗವಾಸ್ಕರ್, ‘ಭಾರತದಲ್ಲಿ ದಿನವೊಂದಕ್ಕೆ 15 ವಿಕೆಟ್‌ಗಳು ಬಿದ್ದರೆ ಜಗತ್ತಿನಾದ್ಯಂತ ಚರ್ಚೆ ನಡೆಯುತ್ತಿತ್ತು. ನನ್ನ ಪ್ರಕಾರ ಈ ಪಿಚ್ ಅನ್ನು ಟೆಸ್ಟ್ ಪಂದ್ಯಕ್ಕಾಗಿ ಸಿದ್ದಪಡಿಸಲಾಗಿಲ್ಲ. ಬದಲಿಗೆ ಹಸುವನ್ನು ಒಂಟಿಯಾಗಿ ಬಿಟ್ಟರೆ ಆರಾಮವಾಗಿ ಮೇವು ತಿನ್ನಬಹುದೆಂಬಷ್ಟು ಹುಲ್ಲು ಪಿಚ್​ನಲ್ಲಿ ಉಳಿಸಲಾಗಿದೆ ಎಂದು ಆರೋಪಿಸಿದ್ದರು. ಮತ್ತೊಂದೆಡೆ, ಆಸ್ಟ್ರೇಲಿಯಾದ ಆರಂಭಿಕ ಆಟಗಾರ ಉಸ್ಮಾನ್ ಖವಾಜಾ ಕೂಡ ಪಂದ್ಯದ ನಂತರ ಪಿಚ್ ತುಂಬಾ ಕಷ್ಟಕರವಾಗಿದೆ ಎಂದು ಬಣ್ಣಿಸಿದ್ದರು.

ಪಿಚ್​ಗಳಿಗೆ ರೇಟಿಂಗ್ ನೀಡಲು ಮಾನದಂಡಗಳೇನು?

ಐಸಿಸಿ ಯಾವುದೇ ಪಿಚ್‌ಗೆ 6 ವಿಭಾಗಗಳಲ್ಲಿ ರೇಟಿಂಗ್ ನೀಡುತ್ತದೆ. ಅದರಂತೆ ‘ಅತ್ಯುತ್ತಮ’ ರೇಟಿಂಗ್ ಪಡೆದ ಪಿಚ್​ನಲ್ಲಿ ಬೌಲರ್​ಗಳು ಹಾಗೂ ಬ್ಯಾಟ್ಸ್‌ಮನ್​ಗಳು ಸಮಾನ ಸಹಾಯ ಪಡೆದಿರುತ್ತಾರೆ. ‘ಉತ್ತಮ’ ರೇಟಿಂಗ್ ಪಡೆದ ಪಿಚ್ ಬೌಲರ್ ಅಥವಾ ಬ್ಯಾಟ್ಸ್​ಮನ್ ಈ ಇಬ್ಬರಲ್ಲಿ ಒಬ್ಬರಿಗೆ ಹೆಚ್ಚು ನೆರವಾಗಿರುತ್ತದೆ. ಮತ್ತೊಂದೆಡೆ, ‘ಸರಾಸರಿ’ ರೇಟಿಂಗ್ ಪಡೆದ ಪಿಚ್ ಆಡಲು ಸೂಕ್ತವಾಗಿದ್ದರೂ ಬೌಲರ್ ಹಾಗೂ ಬ್ಯಾಟರ್ ಇಬ್ಬರಿಗೂ ನೆರವಾಗಿರುವುದಿಲ್ಲ.

ಹಾಗೆಯೇ ಪಿಚ್​ಗೆ ‘ಸರಾಸರಿಗಿಂತ ಕೆಳಗೆ’ ರೇಟಿಂಗ್ ನೀಡಿದರೆ, ಅದನ್ನು ಆಡಲು ಸೂಕ್ತವಲ್ಲವೆಂದು ಪರಿಗಣಿಸಿ ಒಂದು ಡಿಮೆರಿಟ್ ಪಾಯಿಂಟ್ ಕೂಡ ನೀಡಲಾಗುತ್ತದೆ. ಆದರೆ ‘ಕಳಪೆ’ ರೇಟಿಂಗ್‌ ಪಡೆದ ಪಿಚ್​ ಅನ್ನು ಅಸುರಕ್ಷಿತವೆಂದು ಪರಿಗಣಿಸಲಾಗುತ್ತದೆ ಮತ್ತು 3 ಡಿಮೆರಿಟ್ ಅಂಕಗಳನ್ನು ನೀಡಲಾಗುತ್ತದೆ. ಉಳಿದಂತೆ ಕೊನೆಯದಾಗಿ ‘ಅನ್ಫಿಟ್’ ರೇಟಿಂಗ್ ಪಡೆದ ಪಿಚ್ ಅನ್ನು ಆಡಲು ಅಸುರಕ್ಷಿತವೆಂದು ಘೋಷಿಸಲಾಗುವುದರ ಜೊತೆಗೆ 5 ಡಿಮೆರಿಟ್ ಅಂಕಗಳನ್ನು ಸಹ ನೀಡಲಾಗುತ್ತದೆ.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ