ಟೀಮ್ ಇಂಡಿಯಾ ಪಾಲಿಗೆ ನಿರ್ಣಾಯಕ ಪಂದ್ಯ: 8 ಕ್ಯಾಚ್ ಕೈಬಿಟ್ಟ ಪಾಕಿಸ್ತಾನ್

ಮಹಿಳಾ ಟಿ20 ವಿಶ್ವಕಪ್​ನ 19ನೇ ಪಂದ್ಯದಲ್ಲಿ ಪಾಕಿಸ್ತಾನ್ ತಂಡವು ಬರೋಬ್ಬರಿ 8 ಕ್ಯಾಚ್​ಗಳನ್ನು ಕೈಚೆಲ್ಲುವ ಮೂಲಕ ಅಚ್ಚರಿ ಮೂಡಿಸಿದೆ. ಟೀಮ್ ಇಂಡಿಯಾ ಪಾಲಿಗೆ ನಿರ್ಣಾಯಕವಾಗಿದ್ದ ಈ ಮ್ಯಾಚ್​ನಲ್ಲಿ ನ್ಯೂಝಿಲೆಂಡ್ ಬ್ಯಾಟರ್​ಗಳು ಸುಲಭ ಕ್ಯಾಚ್​ಗಳನ್ನು ನೀಡಿದರೂ ಪಾಕ್ ಆಟಗಾರ್ತಿಯರು ಅದನ್ನು ಹಿಡಿಯುವಲ್ಲಿ ವಿಫಲರಾಗಿರುವುದು ಇದೀಗ ಚರ್ಚೆಗೆ ಕಾರಣವಾಗಿದೆ.

ದುಬೈ ಇಂಟರ್​ನ್ಯಾಷನಲ್ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ನ್ಯೂಝಿಲೆಂಡ್ ತಂಡವು ಬ್ಯಾಟಿಂಗ್ ಆಯ್ದುಕೊಂಡಿತು. ಅದರಂತೆ ಇನಿಂಗ್ಸ್ ಆರಂಭಿಸಿದ ಕಿವೀಸ್ ಪರ ಸುಝಿ ಬೇಟ್ಸ್ 28 ರನ್ ಬಾರಿಸಿ ಉತ್ತಮ ಆರಂಭ ಒದಗಿಸಿದ್ದರು.

ಆದರೆ ಈ ಪಂದ್ಯದ 5ನೇ ಓವರ್​ನ 2ನೇ ಎಸೆತದಲ್ಲಿ ಸುಝಿ ನೀಡಿದ ಸುಲಭ ಕ್ಯಾಚ್ ಅನ್ನು ಪಾಕ್ ಫೀಲ್ಡರ್​ ಕೈಚೆಲ್ಲಿದರು. ಇದಾದ ಬಳಿಕ 6ನೇ ಓವರ್​ನ 2ನೇ ಎಸೆತದಲ್ಲಿ ನಶಾರ ಮತ್ತೊಂದು ಕ್ಯಾಚ್ ಕೈಬಿಟ್ಟರು.

ಇನ್ನು ಅಮೆಲಿಯಾ ಕೆರ್ 8ನೇ ಓವರ್​ನ 4ನೇ ಎಸೆತದಲ್ಲಿ ನೀಡಿದ ಕ್ಯಾಚ್ ಹಿಡಿಯುವಲ್ಲಿ ಪಾಕ್ ಫೀಲ್ಡರ್ ವಿಫಲರಾದರು. ಆ ಬಳಿಕ ಸೋಫಿ ಡಿವೈನ್ ನೀಡಿದ ಕ್ಯಾಚ್ ಅನ್ನು ಸಹ ಕೈಚೆಲ್ಲಿದರು.

18ನೇ ಓವರ್​ನಲ್ಲಿ ಹಾಲ್ಲಿಡೆ ನೀಡಿದ ಮತ್ತೊಂದು ಕ್ಯಾಚ್ ಕೂಡ ಪಾಕ್ ಆಟಗಾರ್ತಿಯ ಕೈಯಿಂದ ಜಾರಿತು. ಇದರ ಬೆನ್ನಲ್ಲೇ ಇಝಬೆಲ್ಲೆ ನೀಡಿದ ಕ್ಯಾಚ್ ಹಿಡಿಯುವಲ್ಲಿ ನಾಯಕಿ ಫಾತಿಮಾ ಸನಾ ವಿಫಲರಾದರು.

ಹೀಗೆ 8 ಕ್ಯಾಚ್​ಗಳನ್ನು ಕೈ ಚೆಲ್ಲುವ ಮೂಲಕ ಪಾಕ್ ಆಟಗಾರ್ತಿಯರು ನ್ಯೂಝಿಲೆಂಡ್ ತಂಡಕ್ಕೆ ಜೀವದಾನದ ಮೇಲೆ ಜೀವದಾನ ನೀಡಿದ್ದರು. ಪರಿಣಾಮ ನ್ಯೂಝಿಲೆಂಡ್ ತಂಡವು 20 ಓವರ್​ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 110 ರನ್​ ಕಲೆಹಾಕಿತು.

ಪಾಕ್ ಆಟಗಾರ್ತಿಯರ ಫೀಲ್ಡಿಂಗ್ ವಿಡಿಯೋ:

111 ರನ್​ಗಳ ಸುಲಭ ಗುರಿ ಬೆನ್ನತ್ತಿದ ಪಾಕಿಸ್ತಾನ್ ತಂಡವು 28 ರನ್​ಗಳಿಸುವಷ್ಟರಲ್ಲಿ 5 ಪ್ರಮುಖ ವಿಕೆಟ್ ಕಳೆದುಕೊಂಡಿತು. ಈ ಹಂತದಲ್ಲಿ ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದ ಫಾತಿಮಾ ಸನಾ 21 ರನ್​ಗಳ ಕೊಡುಗೆ ನೀಡಿದರು. ಪರಿಣಾಮ 10 ಓವರ್​ಗಳಲ್ಲಿ 6 ವಿಕೆಟ್ ಕಳೆದುಕೊಂಡು ಪಾಕಿಸ್ತಾನ್ 54 ರನ್​ ಕಲೆಹಾಕಿತು.

ಆದರೆ ಈ ಮೊತ್ತಕ್ಕೆ 2 ರನ್ ಸೇರ್ಪಡೆಯಾಗುವಷ್ಟರಲ್ಲಿ ಪಾಕ್ ತಂಡ ಆಲೌಟ್ ಆಗಿದ್ದು ವಿಶೇಷ. ಅಂದರೆ 10 ಓವರ್​ಗಳಲ್ಲಿ 54 ರನ್​ಗಳಿಸಿದ್ದ ಪಾಕಿಸ್ತಾನ್ 11.4 ಓವರ್​ಗಳಲ್ಲಿ 56 ರನ್​ಗಳಿಸಿ ಆಲೌಟ್ ಆಯಿತು. ಈ ಮೂಲಕ ನ್ಯೂಝಿಲೆಂಡ್ ತಂಡವು 54 ರನ್​ಗಳ ಜಯ ಸಾಧಿಸಿ ಸೆಮಿಫೈನಲ್​ಗೆ ಪ್ರವೇಶಿಸಿತು.

ಟೀಮ್ ಇಂಡಿಯಾ ಪಾಲಿಗೆ ನಿರ್ಣಾಯಕ ಪಂದ್ಯ:

ಈ ಪಂದ್ಯದಲ್ಲಿ ಪಾಕಿಸ್ತಾನ್ ತಂಡ ಗೆಲುವು ಸಾಧಿಸಿದ್ದರೆ ಭಾರತ ತಂಡವು ಸೆಮಿಫೈನಲ್​ಗೆ ಪ್ರವೇಶಿಸುತ್ತಿತ್ತು. ಆದರೆ ಟೀಮ್ ಇಂಡಿಯಾ ಪಾಲಿಗೆ ನಿರ್ಣಾಯಕವಾಗಿದ್ದ ಈ ಮ್ಯಾಚ್​ನಲ್ಲಿ ನ್ಯೂಝಿಲೆಂಡ್ ಅತ್ಯಂತ ಕಳಪೆ ಪ್ರದರ್ಶನ ನೀಡಿ ಅಚ್ಚರಿ ಮೂಡಿಸಿದೆ. ಅಲ್ಲದೆ ಪಾಕ್ ತಂಡದ ಈ ಸೋಲಿನೊಂದಿಗೆ ಭಾರತ ತಂಡ ಟಿ20 ವಿಶ್ವಕಪ್ ಅಭಿಯಾನ ಕೂಡ ಅಂತ್ಯವಾಗಿದೆ.