Paralympics 2024: ಹೈ ಜಂಪ್ನಲ್ಲಿ ಬೆಳ್ಳಿ, ಕಂಚಿನ ಪದಕ ಗೆದ್ದ ಶರದ್, ಮರಿಯಪ್ಪನ್
Paralympics 2024: 2020 ರಲ್ಲಿ ನಡೆದ ಟೋಕಿಯೋ ಪ್ಯಾರಾಲಿಂಪಿಕ್ಸ್ನಲ್ಲಿ ಭಾರತದ 54 ಕ್ರೀಡಾಪಟುಗಳು ಭಾಗವಹಿಸಿದ್ದರು. ಈ ವೇಳೆ 5 ಚಿನ್ನದ ಪದಕ, 8 ಬೆಳ್ಳಿ ಪದಕ ಮತ್ತು 6 ಕಂಚಿನ ಪದಕ ಗೆಲ್ಲುವಲ್ಲಿ ಭಾರತೀಯರು ಯಶಸ್ವಿಯಾಗಿದ್ದರು. ಈ ಬಾರಿ 84 ಕ್ರೀಡಾಪಟುಗಳು ಭಾಗವಹಿಸಿರುವುದರಿಂದ ಭಾರತವು ಹೆಚ್ಚಿನ ಪದಕಗಳ ನಿರೀಕ್ಷೆಯಲ್ಲಿದೆ.
ಫ್ರಾನ್ಸ್ನಲ್ಲಿ ನಡೆಯುತ್ತಿರುವ ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟದ ಹೈಜಂಪ್ ಟಿ63 ಸ್ಪರ್ಧೆಯಲ್ಲಿ ಭಾರತದ ಶದರ್ ಕುಮಾರ್ ಹಾಗೂ ಮರಿಯಪ್ಪನ್ ತಂಗವೇಲು ಪದಕಗಳನ್ನು ಗೆದ್ದಿದ್ದಾರೆ. 1.88 ಮೀಟರ್ ಎತ್ತರ ಜಿಗಿತದೊಂದಿಗೆ ಶರದ್ ಕುಮಾರ್ ಬೆಳ್ಳಿ ಪದಕ ಗೆದ್ದರೆ, 1.85 ಮೀಟರ್ ಎತ್ತರಕ್ಕೆ ಜಿಗಿಯುವ ಮೂಲಕ ಮರಿಯಪ್ಪನ್ ತಂಗವೇಲು ಕಂಚಿನ ಪದಕವನ್ನು ತಮ್ಮದಾಗಿಸಿಕೊಂಡರು.
ಟಿ63 ವಿಭಾಗದಲ್ಲಿ ವಿಶ್ವ ದಾಖಲೆ ಹೊಂದಿರುವ ಅಮೆರಿಕದ ಎಜ್ರಾ ಫ್ರೆಚ್ ಅವರು 1.94 ಮೀಟರ್ ಎತ್ತರಕ್ಕೆ ಜಿಗಿಯುವ ಮೂಲಕ ಪ್ಯಾರಾಲಿಂಪಿಕ್ಸ್ನಲ್ಲಿ ಹೊಸ ದಾಖಲೆಯನ್ನು ಬರೆದು, ಚಿನ್ನದ ಪದಕಕ್ಕೆ ಕೊರೊಳೊಡ್ಡಿದ್ದರು.
2016 ರಲ್ಲಿ ರಿಯೊ ಡಿ ಜನೈರೊದಲ್ಲಿ ಚಿನ್ನ ಮತ್ತು ಟೋಕಿಯೊದಲ್ಲಿ ಬೆಳ್ಳಿ ಗೆದ್ದಿದ್ದ ಮರಿಯಪ್ಪನ್ ಈ ಬಾರಿ ಕೂಡ ಪದಕವನ್ನು ಗೆದ್ದಿರುವುದು ವಿಶೇಷ. ಇದರೊಂದಿಗೆ ಮೂರು ಪ್ಯಾರಾಲಿಂಪಿಕ್ಸ್ನಲ್ಲಿ ಪದಕ ಗೆದ್ದ ವಿಶೇಷ ಸಾಧನೆ ಮಾಡಿದರು.
ಈ ಎರಡು ಪದಕಗಳೊಂದಿಗೆ ಪ್ಯಾರಿಸ್ ಪ್ಯಾರಾಲಿಂಪಿಕ್ಸ್ನಲ್ಲಿ ಭಾರತದ ಪದಕಗಳ ಸಂಖ್ಯೆ 20 ಕ್ಕೇರಿದೆ. ಇದು ಪ್ಯಾರಾಲಿಂಪಿಕ್ಸ್ನಲ್ಲಿ ಭಾರತೀಯರ ಶ್ರೇಷ್ಠ ಸಾಧನೆ ಎಂಬುದು ವಿಶೇಷ.2020 ರಲ್ಲಿ ನಡೆದ ಟೋಕಿಯೋ ಪ್ಯಾರಾಲಿಂಪಿಕ್ಸ್ನಲ್ಲಿ ಭಾರತದ 54 ಕ್ರೀಡಾಪಟುಗಳು ಭಾಗವಹಿಸಿದ್ದರು. ಈ ವೇಳೆ 5 ಚಿನ್ನದ ಪದಕ, 8 ಬೆಳ್ಳಿ ಪದಕ ಮತ್ತು 6 ಕಂಚಿನ ಪದಕಗಳೊಂದಿಗೆ ಭಾರತೀಯರು ಒಟ್ಟು 19 ಪದಕಗಳನ್ನು ಗೆದ್ದಿದ್ದರು. ಆದರೆ ಈ ಬಾರಿ ಈಗಾಗಲೇ 20 ಪದಕಗಳನ್ನು ಗೆಲ್ಲುವಲ್ಲಿ ಭಾರತೀಯ ಕ್ರೀಡಾಪಟುಗಳು ಯಶಸ್ವಿಯಾಗಿದ್ದಾರೆ.
| ಸಂ. | ಕ್ರೀಡಾಪಟು | ಕ್ರೀಡೆ | ಈವೆಂಟ್ | ಪದಕ |
|---|---|---|---|---|
| 1 | ಅವನಿ ಲೇಖನಾ | ಶೂಟಿಂಗ್ | ಮಹಿಳೆಯರ 10ಮೀ ಏರ್ ರೈಫಲ್ ಸ್ಟ್ಯಾಂಡಿಂಗ್ SH1 | ಚಿನ್ನ |
| 2 | ಮೋನಾ ಅಗರ್ವಾಲ್ | ಶೂಟಿಂಗ್ | ಮಹಿಳೆಯರ 10ಮೀ ಏರ್ ರೈಫಲ್ ಸ್ಟ್ಯಾಂಡಿಂಗ್ SH1 | ಕಂಚು |
| 3 | ಪ್ರೀತಿ ಪಾಲ್ | ಅಥ್ಲೆಟಿಕ್ಸ್ | ಮಹಿಳೆಯರ 100ಮೀ ಟಿ35 | ಕಂಚು |
| 4 | ಮನೀಶ್ ನರ್ವಾಲ್ | ಶೂಟಿಂಗ್ | ಪುರುಷರ 10 ಮೀ ಏರ್ ಪಿಸ್ತೂಲ್ SH1 | ಬೆಳ್ಳಿ |
| 5 | ರುಬಿನಾ ಫ್ರಾನ್ಸಿಸ್ | ಶೂಟಿಂಗ್ | ಮಹಿಳೆಯರ 10ಮೀ ಏರ್ ಪಿಸ್ತೂಲ್ SH1 | ಕಂಚು |
| 6 | ಪ್ರೀತಿ ಪಾಲ್ | ಅಥ್ಲೆಟಿಕ್ಸ್ | ಮಹಿಳೆಯರ 200ಮೀ ಟಿ35 | ಕಂಚು |
| 7 | ನಿಶಾದ್ ಕುಮಾರ್ | ಅಥ್ಲೆಟಿಕ್ಸ್ | ಪುರುಷರ ಎತ್ತರ ಜಿಗಿತ T47 | ಬೆಳ್ಳಿ |
| 8 | ಯೋಗೇಶ್ ಕಥುನಿಯಾ | ಅಥ್ಲೆಟಿಕ್ಸ್ | ಪುರುಷರ ಡಿಸ್ಕಸ್ ಥ್ರೋ F56 | ಬೆಳ್ಳಿ |
| 9 | ನಿತೇಶ್ ಕುಮಾರ್ | ಬ್ಯಾಡ್ಮಿಂಟನ್ | ಪುರುಷರ ಸಿಂಗಲ್ಸ್ SL3 | ಚಿನ್ನ |
| 10 | ತುಳಸಿಮತಿ ಮುರುಗೇಶನ್ | ಬ್ಯಾಡ್ಮಿಂಟನ್ | ಮಹಿಳೆಯರ ಸಿಂಗಲ್ಸ್ SU5 | ಬೆಳ್ಳಿ |
| 11 | ಮನಿಷಾ ರಾಮದಾಸ್ | ಬ್ಯಾಡ್ಮಿಂಟನ್ | ಮಹಿಳೆಯರ ಸಿಂಗಲ್ಸ್ SU5 | ಕಂಚು |
| 12 | ಸುಹಾಸ್ ಯತಿರಾಜ್ | ಬ್ಯಾಡ್ಮಿಂಟನ್ | ಪುರುಷರ ಸಿಂಗಲ್ಸ್ SL4 | ಬೆಳ್ಳಿ |
| 13 | ರಾಕೇಶ್ ಕುಮಾರ್ / ಶೀತಲ್ ದೇವಿ | ಬಿಲ್ಲುಗಾರಿಕೆ | ಮಿಶ್ರ ತಂಡ | ಕಂಚು |
| 14 | ಸುಮಿತ್ ಆಂಟಿಲ್ | ಅಥ್ಲೆಟಿಕ್ಸ್ | ಜಾವೆಲಿನ್ ಎಸೆತ F64 | ಚಿನ್ನ |
| 15 | ನಿತ್ಯ ಶ್ರೀ ಶಿವನ್ | ಬ್ಯಾಡ್ಮಿಂಟನ್ | ಮಹಿಳೆಯರ ಸಿಂಗಲ್ಸ್ SH6 | ಕಂಚು |
| 16 | ದೀಪ್ತಿ ಜೀವನಜಿ | ಅಥ್ಲೆಟಿಕ್ಸ್ | ಮಹಿಳೆಯರ 400 ಮೀ ಟಿ20 | ಕಂಚು |
| 17 | ಮರಿಯಪ್ಪನ್ ತಂಗವೇಲು | ಅಥ್ಲೆಟಿಕ್ಸ್ | ಪುರುಷರ ಎತ್ತರ ಜಿಗಿತ T63 | ಕಂಚು |
| 18 | ಶರದ್ ಕುಮಾರ್ | ಅಥ್ಲೆಟಿಕ್ಸ್ | ಪುರುಷರ ಎತ್ತರ ಜಿಗಿತ T63 | ಬೆಳ್ಳಿ |
| 19 | ಅಜೀತ್ ಸಿಂಗ್ | ಅಥ್ಲೆಟಿಕ್ಸ್ | ಪುರುಷರ ಜಾವೆಲಿನ್ ಎಸೆತ F46 | ಬೆಳ್ಳಿ |
| 20 | ಸುಂದರ್ ಸಿಂಗ್ ಗುರ್ಜರ್ | ಅಥ್ಲೆಟಿಕ್ಸ್ | ಪುರುಷರ ಜಾವೆಲಿನ್ ಎಸೆತ F46 | ಕಂಚು |
Published On - 8:17 am, Wed, 4 September 24