Paris Olympics 2024: ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಭಾರತಕ್ಕೆ ಮೊದಲ ಸೋಲು
Paris Olympics 2024: ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಭಾರತದ 117 ಕ್ರೀಡಾಪಟುಗಳು ಕಾಣಿಸಿಕೊಂಡಿದ್ದಾರೆ. ಈ ಕ್ರೀಡಾಳುಗಳು ಒಟ್ಟು 69 ಸ್ಪರ್ಧೆಗಳಲ್ಲಿ ಕಣಕ್ಕಿಳಿಯಲಿದ್ದಾರೆ. ಅದರಂತೆ ಶನಿವಾರ ನಡೆದ ಶೂಟಿಂಗ್ ಸ್ಪರ್ಧೆಯಲ್ಲಿ ಭಾರತೀಯರಿಂದ ನೀರಸ ಪ್ರದರ್ಶನ ಮೂಡಿಬಂದಿದೆ. ಇದಾಗ್ಯೂ ರೋಯಿಂಗ್ನಲ್ಲಿ ಮುಂದಿನ ಹಂತಕ್ಕೇರುವಲ್ಲಿ ಬಲರಾಜ್ ಪನ್ವಾರ್ ಯಶಸ್ವಿಯಾಗಿದ್ದಾರೆ.
Paris Olympics 2024
ಫ್ರಾನ್ಸ್ ರಾಜಧಾನಿ ಪ್ಯಾರಿಸ್ನಲ್ಲಿ ನಡೆಯುತ್ತಿರುವ ಒಲಿಂಪಿಕ್ಸ್ ಕ್ರೀಡಾಕೂಟದ ಮೊದಲ ದಿನವೇ ಭಾರತೀಯ ಸ್ಪರ್ಧಿಗಳಿಂದ ನೀರಸ ಪ್ರದರ್ಶನ ಮೂಡಿಬಂದಿದೆ. ಶನಿವಾರ ನಡೆದ 10 ಮೀಟರ್ ಏರ್ ರೈಫಲ್ ಶೂಟಿಂಗ್ ಸ್ಪರ್ಧೆಯಲ್ಲಿ ಭಾರತದ ನಾಲ್ವರು ಶೂಟರ್ಗಳು ಭಾಗವಹಿಸಿದ್ದರು. ಆದರೆ ಮಿಶ್ರ ಏರ್ ರೈಫಲ್ ವಿಭಾಗದಲ್ಲಿ ಪದಕದ ಸುತ್ತಿಗೆ ಪ್ರವೇಶಿಸುವಲ್ಲಿ ಭಾರತೀಯ ಶೂಟರ್ಗಳು ವಿಫಲರಾಗಿದ್ದಾರೆ.
- 10 ಮೀಟರ್ ಏರ್ ರೈಫಲ್ (ಮಿಶ್ರ) ಅರ್ಹತಾ ಸುತ್ತಿನಲ್ಲಿ ಸಂದೀಪ್ ಸಿಂಗ್, ಅರ್ಜುನ್ ಬಬೌತಾ, ರಮಿತಾ ಜಿಂದಾಲ್ ಮತ್ತು ಎಲವೆನಿಲ್ ವಲರಿವನ್ ಸ್ಪರ್ಧಿಸಿದ್ದರು.
- 10 ಮೀಟರ್ ಏರ್ ರೈಫಲ್ (ಮಿಶ್ರ) ಸ್ಪರ್ಧೆಯಲ್ಲಿ ರಮಿತಾ ಮತ್ತು ಅರ್ಜುನ್ 6ನೇ ಸ್ಥಾನ ಪಡೆದರೆ, ಎಲವೆನಿಲ್ ಮತ್ತು ಸಂದೀಪ್ 12ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು.
- 10 ಮೀಟರ್ ಏರ್ ರೈಫಲ್ (ಮಿಶ್ರ) ಶೂಟಿಂಗ್ ಸ್ಪರ್ಧೆಯಲ್ಲಿ ಟಾಪ್-4 ತಂಡಗಳು ಮಾತ್ರ ಪದಕ ಸುತ್ತಿಗೆ ಅರ್ಹತೆ ಪಡೆಯುತ್ತವೆ. ಇದರೊಂದಿಗೆ ಪ್ಯಾರಿಸ್ ಒಲಿಂಪಿಕ್ಸ್ನ 10 ಮೀಟರ್ ಏರ್ ರೈಫಲ್ (ಮಿಶ್ರ) ಸ್ಪರ್ಧೆಯಲ್ಲಿ ಭಾರತ ಪದಕ ಗೆಲ್ಲುವ ಕನಸು ಕಮರಿದೆ.
- ಚೀನಾ ಮತ್ತು ಕೊರಿಯಾ ದೇಶಗಳು 10 ಮೀಟರ್ ಏರ್ ರೈಫಲ್ (ಮಿಶ್ರ) ಶೂಟಿಂಗ್ ಸ್ಪರ್ಧೆಯಲ್ಲಿ ಚಿನ್ನದ ಪದಕ ಸುತ್ತಿನಲ್ಲಿವೆ. ಹಾಗೆಯೇ ಕಜಕಿಸ್ತಾನ್ ಮತ್ತು ಜರ್ಮನಿ ಕಂಚಿನ ಪದಕ ಸುತ್ತಿನಲ್ಲಿವೆ.
ಭಾರತೀಯ ಶೂಟರ್ಗಳು ಪಡೆದ ಅಂಕಗಳು:
- ➡️ರಮಿತಾ ಮತ್ತು ಅರ್ಜುನ್- 6ನೇ ಸ್ಥಾನ (628.7 ಅಂಕಗಳು)
- ➡️ಎಲವೆನಿಲ್ ಮತ್ತು ಸಂದೀಪ್- 12ನೇ ಸ್ಥಾನ (626.3 ಅಂಕಗಳು)
ಒಂದು ಅಂಕದಿಂದ ಕೈ ತಪ್ಪಿದ ಅವಕಾಶ:
ಶೂಟಿಂಗ್ನಲ್ಲಿ ಕಂಚಿನ ಪದಕದ ಸ್ಪರ್ಧೆಗೆ ಅರ್ಹತೆ ಪಡೆಯಲು ಭಾರತೀಯರು ಕೇವಲ 1 ಅಂಕದಿಂದ ವಿಫಲರಾಗಿದ್ದಾರೆ. ಅಂದರೆ 4ನೇ ಸ್ಥಾನ ಪಡೆದಿರುವ ಜರ್ಮನಿಯು ಶೂಟರ್ಗಳು ಒಟ್ಟು 629.7 ಅಂಕಗಳನ್ನು ಕಲೆಹಾಕಿ ಅರ್ಹತೆ ಪಡೆದುಕೊಂಡಿದ್ದಾರೆ. ಇದೇ ವೇಳೆ 6ನೇ ಸ್ಥಾನ ಪಡೆದ ರಮಿತಾ ಮತ್ತು ಅರ್ಜುನ್ 628.7 ಅಂಕಗಳನ್ನು ಕಲೆಹಾಕಿದ್ದರು ಎಂಬುದು ಇಲ್ಲಿ ಉಲ್ಲೇಖಾರ್ಹ.
ಇದನ್ನೂ ಓದಿ: Paris Olympics 2024: ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಭಾರತಕ್ಕೆ ಪದಕ ಗೆದ್ದುಕೊಡಬಲ್ಲ 10 ಸ್ಪರ್ಧಿಗಳು
ರೋಯಿಂಗ್ನಲ್ಲಿ ಮಿಂಚಿಂಗ್:
ಪುರುಷರ ಸಿಂಗಲ್ ಸ್ಕಲ್ಸ್ ಹೀಟ್ಸ್ ರೋಯಿಂಗ್ ಸ್ಪರ್ಧೆಯಲ್ಲಿ ಭಾರತದ ಬಲರಾಜ್ ಪನ್ವಾರ್ ಉತ್ತಮ ಪ್ರದರ್ಶನ ನೀಡಿದ್ದಾರೆ. ಒಟ್ಟು 3 ನಿಮಿಷ 31 ಸೆಕೆಂಡುಗಳು ಮತ್ತು 24 ಮಿಲಿ ಸೆಕೆಂಡುಗಳಲ್ಲಿ ಗುರಿ ತಲುಪುವ ಮೂಲಕ ಬಲರಾಜ್ ನಾಲ್ಕನೇ ಸ್ಥಾನ ಪಡೆದುಕೊಂಡಿದ್ದಾರೆ. ಈ ಮೂಲಕ ನಾಳೆ ನಡೆಯಲಿರುವ ರೆಪೆಚೇಜ್ ಸುತ್ತಿಗೆ ಅರ್ಹತೆ ಪಡೆದುಕೊಂಡಿದ್ದಾರೆ.
Published On - 2:13 pm, Sat, 27 July 24