Viral Video : ‘ಲಗಣ ಲಾಗೀರೇ’; ಮತ್ತೆ ಬಂದಿದ್ದಾರೆ ‘ಡ್ಯಾನ್ಸಿಂಗ್ ದಾದೀ’

Viral Video : 63 ವರ್ಷದ ರವಿಬಾಲಾ ಶರ್ಮಾ ಎನ್ನುವ ಈ ಕಲಾವಿದೆ ಇನ್​ಸ್ಟಾಗ್ರಾಂನ ತಮ್ಮ ಖಾತೆಯಲ್ಲಿ ಅನೇಕ ಹಾಡುಗಳಿಗೆ ನೃತ್ಯಾಭಿನಯ ಮಾಡಿದ ವಿಡಿಯೋಗಳನ್ನು ಹಂಚಿಕೊಂಡಿದ್ದಾರೆ. ಪ್ರತೀ ಸಲ ಇವರು ಹೊಸ ವಿಡಿಯೋ ಪೋಸ್ಟ್​ ಮಾಡಿದಾಗ ನೆಟ್ಟಿಗರು ಇವರನ್ನು ಪ್ರೀತಿಯಿಂದ ಪ್ರಶಂಸಿಸುತ್ತಾರೆ. ಹೀಗಾಗಿ ನೆಟ್ಟಿಗರಿಗೆ ಇವರು  ಡ್ಯಾನ್ಸಿಂಗ್​ ದಾದೀ ಆಗಿಬಿಟ್ಟಿದ್ದಾರೆ. ಇತ್ತೀಚೆಗೆ ವೈರಲ್ ಆಗುತ್ತಿರುವ ವಿಡಿಯೋದಲ್ಲಿ ಇವರು ಶ್ರೇಯಾ ಘೋಷಾಲ್ ಹಾಡಿರುವ ಲಗಣ ಲಾಗೀರೇ ಹಾಡಿಗೆ ನೃತ್ಯಾಭಿನಯ ಮಾಡಿದ್ದಾರೆ. ಈ ವಿಡಿಯೋ ಅನ್ನು ಶ್ರೇಯಾ, ಕವಿತಾ ಸೇಠ್​ ಕೂಡ ತಮ್ಮ ಇನ್​ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.

ಹೀಗೆ ಕುಳಿತುಕೊಂಡೇ ನೃತ್ಯಾಭಿನಯ ಮಾಡುವ ಕಲಾವಿದರ ಸಂಖ್ಯೆ ಆನ್​ಲೈನ್​ನಲ್ಲಿ ಹೆಚ್ಚುತ್ತಿದೆ. ತಂತ್ರಜ್ಞಾನದ ಮಿತಿಯೊಳಗೇ, ಕಾಲಮಾನಕ್ಕೆ ತಕ್ಕಂತೆ ತಮ್ಮ ಪ್ರತಿಭಾ ಮತ್ತು ಕಲಾಪ್ರದರ್ಶನದಲ್ಲಿ ಮಾರ್ಪಾಡು ಮಾಡಿಕೊಂಡು ವಿಡಿಯೋ ಮಾಡುವ ಅನೇಕ ಕಲಾವಿದರು ಜನಪ್ರಿಯರಾಗುತ್ತಿದ್ದಾರೆ. ಈ ಪೈಕಿ ರವಿಬಾಲಾ ಶರ್ಮಾ ಕೂಡ ಒಬ್ಬರು. ಈ ಇಳಿವಯಸ್ಸಿನಲ್ಲಿಯೂ ಸುಲಲಿತವಾಗಿ ಭಾವ ಹೊಮ್ಮಿಸುವ ಇವರ ಕೌಶಲಕ್ಕೆ ಮತ್ತು ಉತ್ಸಾಹಕ್ಕೆ ನೆಟ್ಟಿಗರು ಮಾರುಹೋಗಿದ್ದಾರೆ. ಪ್ರಸ್ತುತ ಈ ವಿಡಿಯೋ ಅನ್ನು  5 ಲಕ್ಷಕ್ಕೂ ಹೆಚ್ಚು ಜನರು ಮೆಚ್ಚಿದ್ದಾರೆ.

ನಿಮ್ಮ ಈ ಪ್ರದರ್ಶನ ಪದಗಳಿಗೆ ನಿಲುಕುತ್ತಿಲ್ಲ ಎಂದು ಒಬ್ಬರು ಹರ್ಷ ವ್ಯಕ್ತಪಡಿಸಿದ್ದಾರೆ. ನೀವು ತುಂಬಾ ಆಕರ್ಷಕವಾಗಿದ್ದೀರಿ. ಪ್ರತೀ ಬಾರಿಯೂ ನೀವು ಪೋಸ್ಟ್ ಮಾಡಿದಾಗ ಅಚ್ಚರಿಯಿಂದ ನೋಡುತ್ತೇನೆ.’ ಎಂದಿದ್ದಾರೆ ಮತ್ತೊಬ್ಬರು.

ಯಾರಿಗೆ ಇಷ್ಟವಿಲ್ಲ ಕಲೆ ಎಂದರೆ? ಬಹುಶಃ ಕಲೆ ಎನ್ನುವುದು ಇರುವುದಕ್ಕೇ ಅಲ್ಲಲ್ಲಿ ಶಾಂತಿ ನೆಲೆಸಿರುವುದು. ಕಲೆಗೆ ನಿರಂತರ ಸಾಧನೆ ಬೇಕು. ಅದಕ್ಕಾಗಿ ಎಲ್ಲ ಜಂಜಡಗಳ ಮಧ್ಯೆಯೂ ಮನಸ್ಸನ್ನು ಕೇಂದ್ರೀಕರಿಸುವ ದೃಢಮನಸ್ಸನ್ನು ಹೊಂಚಿಕೊಳ್ಳುತ್ತಿರಬೇಕು. ನಿಮಗೆ ಈ ವಿಡಿಯೋ ಇಷ್ಟವಾಯಿತಲ್ಲವಾ?

ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ