Video : ಇದು ಎಐ ಎಫೆಕ್ಟ್ : ಅಜ್ಜಿಯ ಹುಟ್ಟುಹಬ್ಬಕ್ಕೆ ಅಜ್ಜನನ್ನೇ ಸ್ವರ್ಗದಿಂದ ಧರೆಗಿಳಿಸಿದ ಮೊಮ್ಮಗಳು
ಇತ್ತೀಚೆಗಿನ ದಿನಗಳಲ್ಲಿ ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ ಅನ್ನೋದು ಟ್ರೆಂಡ್ ಆಗಿದೆ. ವಿಜ್ಞಾನ, ವೈದ್ಯಕೀಯ, ಶಿಕ್ಷಣ, ವ್ಯಾಪಾರ ಹೀಗೆ ಎಲ್ಲಾ ಕ್ಷೇತ್ರದಲ್ಲಿ ಈ ಎಐ ಬಳಕೆ ಹೆಚ್ಚಾಗಿದೆ. ಇದೀಗ ಇಲ್ಲೊಬ್ಬ ಮೊಮ್ಮಗಳು ತನ್ನ ಅಜ್ಜಿಯ ಹುಟ್ಟುಹಬ್ಬಕ್ಕೆ ಎಐ ಬಳಸಿ ಭಾವನಾತ್ಮಕ ಕ್ಷಣವನ್ನು ಮರುಸೃಷ್ಟಿಸುವ ಕೆಲಸ ಮಾಡಿದ್ದಾಳೆ. ಈ ವಿಡಿಯೋ ನೋಡಿದ ಅಜ್ಜಿ ಭಾವುಕರಾಗಿದ್ದಾರೆ. ಅಷ್ಟಕ್ಕೂ ಈ ಮೊಮ್ಮಗಳು ಮಾಡಿದ್ದೇನು ಗೊತ್ತಾ? ಈ ಕುರಿತಾದ ಭಾವನಾತ್ಮಕ ವಿಡಿಯೋ ಇಲ್ಲಿದೆ ನೋಡಿ.
ಜೊತೆಗಿರದ ಜೀವ ಎಂದೆಂದಿಗೂ ಜೀವಂತ ಎನ್ನುವ ಮಾತಿದೆ. ಆದರೆ ನಮ್ಮವರು, ಆತ್ಮೀಯ ವ್ಯಕ್ತಿಗಳು ದೈಹಿಕವಾಗಿ ಜೊತೆಗಿಲ್ಲ ಎನ್ನುವ ನೋವು ಯಾರಿಗಾದ್ರೂ ಜೀವನ ಪರ್ಯಂತ ಕಾಡುತ್ತಲೇ ಇರುತ್ತದೆ. ವರುಷಗಳು ಉರುಳಿದ ಬಳಿಕ ಅಗಲಿದ ಆತ್ಮೀಯ ವ್ಯಕ್ತಿಯ ಫೋಟೋ, ವಿಡಿಯೋ ನೋಡಿದಾಗ ಕಣ್ಣಂಚಲಿ ನೀರೂ ಬರುವುದು ಸಹಜ. ಆದರೆ ಇನ್ಫ್ಲುಯೆನ್ಸರ್ ಅಪೂರ್ವ ವಿಜಯ್ ಕುಮಾರ್ (Influencer Apoorva Vijay Kumar) ಎನ್ನುವವರು ತಮ್ಮ ಅಜ್ಜಿಯ ಹುಟ್ಟುಹಬ್ಬಕ್ಕೆ ಊಹೆ ಮಾಡಲಾಗದ ಉಡುಗೊರೆಯನ್ನು ನೀಡಿ ಅಜ್ಜಿಯನ್ನು ಭಾವುಕರನ್ನಾಗಿಸಿದ್ದಾಳೆ. ಎಐ (AI) ತಂತ್ರಜ್ಞಾನ ಬಳಸಿ ಅಗಲಿದ ಅಜ್ಜನು ಅಜ್ಜಿಯ ಕೈ ಹಿಡಿದು ನಡೆಯುವ ವಿಡಿಯೋವನ್ನು ಮರುಸೃಷ್ಟಿಸಿ ಅಜ್ಜಿಗೆ ವಿಶೇಷ ಗಿಫ್ಟ್ ನೀಡಿದ್ದಾಳೆ. ಈ ಹೃದಯಸ್ಪರ್ಶಿ ವಿಡಿಯೋವೊಂದು ಸೋಶಿಯಲ್ ಮೀಡಿಯಾದಲ್ಲಿ (social media) ವೈರಲ್ ಆಗಿದ್ದು ಬಳಕೆದಾರರು ಮೊಮ್ಮಗಳ ಈ ಕೆಲಸಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
apoorva-vijaykumar ಹೆಸರಿನ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಎಐ ರಚಿತ ವಿಡಿಯೋ ಶೇರ್ ಮಾಡಿಕೊಂಡು, ಅಜ್ಜಿಗೆ ಪ್ರೀತಿಯ ಜನುಮ ದಿನದ ಶುಭಾಶಯಗಳನ್ನು ಮೊಮ್ಮಗಳು ಕೋರಿದ್ದಾಳೆ. ಜನ್ಮದಿನದ ಶುಭಾಶಯಗಳು ಅಮ್ಮು, ಅಪ್ಪುಪನ್ ಇಲ್ಲದೇ ಬದುಕುವುದು ಕಷ್ಟ ಎಂದು ನನಗೆ ತಿಳಿದಿದೆ. ಆದರೆ ಪ್ರತಿ ಕ್ಷಣ ಹಾಗೂ ಪ್ರತಿ ಸಂತೋಷದಲ್ಲಿ ಅವ್ರು ಇದ್ದಾರೆ. ನೀವು ಅವರನ್ನು ನೋಡದೇ ಇರಬಹುದು. ಆದರೆ ಅವರು ನಿಮ್ಮನ್ನು ಸದಾ ನೋಡುತ್ತಾರೆ. ನಿಮ್ಮನ್ನು ರಕ್ಷಿಸುತ್ತಾರೆ. ನಿಮ್ಮ ಪಕ್ಕದಲ್ಲಿ ಸದಾ ನಡೆಯುತ್ತಾರೆ ಎಂದಿದ್ದಾಳೆ.
ಮೊಮ್ಮಗಳು ಹಂಚಿಕೊಂಡ ವಿಡಿಯೋದಲ್ಲಿ ಅಜ್ಜಿಯೂ ಡೈನಿಂಗ್ ಟೇಬಲ್ ಮೇಲೆ ಕುಳಿತುಕೊಂಡಿದ್ದು, ಈ ವೇಳೆಯಲ್ಲಿ ಎಐ ರಚಿತ ವಿಡಿಯೋವೊಂದು ಪ್ಲೇ ಆಗುತ್ತದೆ. ಅಜ್ಜಿಯು ತನ್ನ ಪತಿಯ ಜೊತೆಗೆ ಕೈ ಹಿಡಿದುಕೊಂಡು ಹೋಗುವ ದೃಶ್ಯವನ್ನು ಮೊಮ್ಮಗಳು ಮರುಸೃಷ್ಟಿಸಿದ್ದಾಳೆ. ಈ ದೃಶ್ಯ ನೋಡುತ್ತಿದ್ದಂತೆ ಅಜ್ಜಿಯ ಮುಖದಲ್ಲಿ ನಗು ಮೂಡಿದರೂ ಆ ಬಳಿಕ ಭಾವುಕರಾಗುವುದನ್ನು ಕಾಣಬಹುದು.
ವೈರಲ್ ವಿಡಿಯೋ ಇಲ್ಲಿದೆ ನೋಡಿ
ಈ ವಿಡಿಯೋ 1.8 ಮಿಲಿಯನ್ ಗೂ ಅಧಿಕ ವೀಕ್ಷಣೆ ಪಡೆದುಕೊಂಡಿದ್ದು, ಬಳಕೆದಾರರೊಬ್ಬರು, ನೀವು ಅವಳ ದಿನವನ್ನಷ್ಟೇ ಖುಷಿಯಾಗಿಸಲಿಲ್ಲ, ನನ್ನ ಈ ದಿನವು ಅರ್ಥಪೂರ್ಣವನ್ನಾಗಿಸಿದೆ ಎಂದಿದ್ದಾರೆ. ಮತ್ತೊಬ್ಬರು, ತಂತ್ರಜ್ಞಾನವು ಎಲ್ಲವನ್ನು ಸಾಧ್ಯವಾಗಿಸಿದೆ. ನಮ್ಮವರು ಮತ್ತೆ ನಮ್ಮ ಜೊತೆಗೆ ಇದ್ದಾರೆ ಎನ್ನುವುದನ್ನು ಸಾಧ್ಯವಾಗಿಸಲು ಎಐಯಿಂದ ಮಾತ್ರ ಸಾಧ್ಯ ಎಂದು ಕಾಮೆಂಟ್ ಮಾಡಿದ್ದಾರೆ. ಮತ್ತೊಬ್ಬರು, ಇನ್ಸ್ಟಾಗ್ರಾಮ್ ನಲ್ಲಿ ಅಪರಿಚಿತಗಾಗಿ ಅಳುವುದು ನನ್ನ ದಿನಚರಿಯಾಗಿದೆ ಎಂದು ಕಾಮೆಂಟ್ ನಲ್ಲಿ ತಿಳಿಸಿದ್ದಾರೆ. ಇನ್ನು ಕೆಲವರು ಈ ವಿಡಿಯೋಗೆ ಹಾರ್ಟ್ ಸಿಂಬಲ್ ಕಳುಹಿಸಿ ಈ ಮೊಮ್ಮಗಳ ಈ ಉಡುಗೊರೆಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಇನ್ನಷ್ಟು ವೈರಲ್ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ