ವಿಮಾನದಲ್ಲೇ ಲೋಕಲ್ ಟ್ರೈನ್ ಅನುಭವ! ಎದ್ದು ಓಡಾಡಿದ ಪ್ರಯಾಣಿಕರು; ವಿಡಿಯೊ ನೋಡಿ ನೆಟ್ಟಿಗರು ಶಾಕ್
ಥಾಯ್ಲೆಂಡ್‌ನ ಕ್ರಾಬಿಯಿಂದ ದೆಹಲಿಗೆ ಬರುತ್ತಿದ್ದ ಇಂಡಿಗೋ ವಿಮಾನದಲ್ಲಿ ಕೆಲ ಪ್ರಯಾಣಿಕರು ಸೀಟಿನಿಂದ ಎದ್ದು ಹಾದಿಯಲ್ಲಿ ಓಡಾಡುತ್ತಾ ಪರಸ್ಪರ ಊಟ ಹಂಚಿಕೊಂಡಿದ್ದಾರೆ. ಸಿಬ್ಬಂದಿ ಕುಳಿತುಕೊಳ್ಳುವಂತೆ ಸೂಚಿಸಿದರೂ ಪ್ರಯಾಣಿಕರು ಕೇಳಲಿಲ್ಲ ಎನ್ನಲಾಗಿದೆ. ಈ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ನೆಟ್ಟಿಗರು ವಿಮಾನವನ್ನು ಲೋಕಲ್ ಟ್ರೈನ್ಗೆ ಹೋಲಿಸಿ ಪ್ರತಿಕ್ರಿಯಿಸಿದ್ದಾರೆ.
ಮುಖ್ಯಾಂಶಗಳು
- ವಿಮಾನದಲ್ಲೇ ಪ್ರಯಾಣಿಕರ ‘ಲೋಕಲ್ ಟ್ರೈನ್’ ಅನುಭವ!
- ಸೀಟಿನಿಂದ ಎದ್ದು ಓಡಾಡಿ, ಪರಸ್ಪರ ಊಟ ಹಂಚಿಕೊಂಡ ಪ್ರಯಾಣಿಕರು
- ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಯ್ತು ಇಂಡಿಗೋ ವಿಮಾನದ ವಿಡಿಯೊ
ವಿಮಾನದಲ್ಲಿ ಪ್ರಯಾಣಿಸುವಾಗ ಎಲ್ಲರೂ ತಮ್ಮ ತಮ್ಮ ಸೀಟಿನಲ್ಲಿ ಕುಳಿತು, ಸುರಕ್ಷತಾ ಸೂಚನೆಗಳನ್ನು ಪಾಲಿಸುವುದು ಸಾಮಾನ್ಯ. ಆದರೆ ಇಲ್ಲೊಂದು ಇಂಡಿಗೋ (IndiGo) ವಿಮಾನದಲ್ಲಿ ಪ್ರಯಾಣಿಕರು ಸೀಟಿನಿಂದ ಎದ್ದು ನಿಂತು, ಒಂದು ಸಾಲಿನಿಂದ ಮತ್ತೊಂದು ಸಾಲಿಗೆ ಓಡಾಡುತ್ತಾ, ಊಟವನ್ನು ಪರಸ್ಪರ ಹಂಚಿಕೊಂಡಿದ್ದಾರೆ. ಈ ದೃಶ್ಯ ನೋಡಿದ ನೆಟ್ಟಿಗರು, ‘ಇದು ವಿಮಾನನಾ ಅಥವಾ ಲೋಕಲ್ ಟ್ರೈನಾ?’ ಎಂದು ಪ್ರಶ್ನಿಸುತ್ತಿದ್ದಾರೆ.
ಥಾಯ್ಲೆಂಡ್‌ನ ಕ್ರಾಬಿಯಿಂದ ದೆಹಲಿಗೆ ತೆರಳುತ್ತಿದ್ದ ಇಂಡಿಗೋ ವಿಮಾನದಲ್ಲಿ ಈ ಘಟನೆ ನಡೆದಿದೆ. ವಿಮಾನದ ಒಳಗಿನ ದೃಶ್ಯವನ್ನು ನೀರಾಜ್ ಪ್ರಿಯಾಂಕಾ ಚೌಧರಿ ಎಂಬ ಇನ್‌ಸ್ಟಾಗ್ರಾಂ ಬಳಕೆದಾರರು ವಿಡಿಯೊ ಮಾಡಿ ಹಂಚಿಕೊಂಡಿದ್ದಾರೆ. ವಿಡಿಯೊದಲ್ಲಿ ಕೆಲ ಪ್ರಯಾಣಿಕರು ತಮ್ಮ ಸೀಟುಗಳಿಂದ ಎದ್ದು ವಿಮಾನದ ಹಾದಿಯಲ್ಲಿ ನಿಂತಿರುವುದು ಹಾಗೂ ಕುಟುಂಬದವರ ನಡುವೆ ಊಟವನ್ನು ಹಂಚುತ್ತಿರುವುದು ಕಂಡುಬಂದಿದೆ.
ವಿಡಿಯೊದ ಒಂದು ಹಂತದಲ್ಲಿ ಮುಂಭಾಗದ ಸಾಲಿನಲ್ಲಿದ್ದ ಕೆಲವರು ತಮ್ಮ ಸೀಟಿನ ಮೇಲ್ಭಾಗದಿಂದ ಹಿಂದೆ ಕುಳಿತಿದ್ದವರೊಂದಿಗೆ ಮಾತನಾಡಲು ಪ್ರಯತ್ನಿಸುತ್ತಿರುವುದು ಕಾಣಿಸುತ್ತದೆ. ಕೆಲವರು ಆಹಾರದ ತಟ್ಟೆಗಳನ್ನು ಹಿಡಿದುಕೊಂಡು ಒಂದು ಸೀಟಿನಿಂದ ಮತ್ತೊಂದು ಸೀಟಿನತ್ತ ಓಡಾಡುತ್ತಿರುವ ದೃಶ್ಯವೂ ಇದೆ. ಈ ವೇಳೆ ಇಬ್ಬರು ವಿಮಾನ ಸಿಬ್ಬಂದಿ ಪ್ರಯಾಣಿಕರನ್ನು ತಮ್ಮ ಸೀಟಿನಲ್ಲಿ ಕುಳಿತುಕೊಳ್ಳುವಂತೆ ಮನವಿ ಮಾಡುತ್ತಿರುವುದು ವಿಡಿಯೊದಲ್ಲಿ ಕಾಣಿಸುತ್ತದೆ.
ವೈರಲ್ ವಿಡಿಯೊ ಇಲ್ಲಿದೆ:
ವಿಡಿಯೊ ಹಂಚಿಕೊಂಡಿರುವ ನೀರಾಜ್, ವಿಮಾನದಲ್ಲಿ 1ರಿಂದ 5ನೇ ಸಾಲಿನವರೆಗೆ ಕುಳಿತಿದ್ದ ಕೆಲ ಪ್ರಯಾಣಿಕರು ಜೋರಾಗಿ ಮಾತನಾಡುತ್ತಾ, ಪರಸ್ಪರ ಆಹಾರ ಹಂಚಿಕೊಳ್ಳುತ್ತಿದ್ದರು. ಸಿಬ್ಬಂದಿ ಹಲವು ಬಾರಿ ಕುಳಿತುಕೊಳ್ಳುವಂತೆ ಸೂಚಿಸಿದರೂ ಅವರು ಅದನ್ನು ನಿರ್ಲಕ್ಷಿಸಿದ್ದರು ಎಂದು ಆರೋಪಿಸಿದ್ದಾರೆ. ಆದರೆ ಆಹಾರ ತಿನ್ನುವುದೇ ತಮ್ಮ ಆಕ್ಷೇಪವಲ್ಲ, ಸುರಕ್ಷತಾ ಸೂಚನೆಗಳನ್ನು ನಿರ್ಲಕ್ಷಿಸಿ ಇತರ ಪ್ರಯಾಣಿಕರಿಗೆ ತೊಂದರೆ ನೀಡಿರುವುದೇ ಸಮಸ್ಯೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಅದರಲ್ಲೂ ವಿಮಾನದಲ್ಲಿ ಪ್ರಕ್ಷುಬ್ಧ ವಾತಾವರಣ ಉಂಟಾಗಿದ್ದರಿಂದ ಸೀಟ್‌ಬೆಲ್ಟ್ ಸೂಚನೆ ಆನ್ ಆಗಿತ್ತು ಎನ್ನಲಾಗಿದೆ. ಇಂತಹ ಸಂದರ್ಭದಲ್ಲಿ ಪ್ರಯಾಣಿಕರು ಸೀಟಿನಿಂದ ಎದ್ದು ಓಡಾಡುವುದು ಸುರಕ್ಷಿತವಲ್ಲ. ಸಿಬ್ಬಂದಿ ಮತ್ತೆ ಮತ್ತೆ ಕುಳಿತುಕೊಳ್ಳುವಂತೆ ಸೂಚಿಸಿದರೂ ಕೆಲವರು ಕೇಳುತ್ತಿರಲಿಲ್ಲ ಎಂದು ನೀರಾಜ್ ತಮ್ಮ ಪೋಸ್ಟ್‌ನಲ್ಲಿ ತಿಳಿಸಿದ್ದಾರೆ.
ಈ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ತಮ್ಮದೇ ರೀತಿಯಲ್ಲಿ ಪ್ರತಿಕ್ರಿಯಿಸಿದ್ದಾರೆ. ಕೆಲವರು ಪ್ರಯಾಣಿಕರ ವರ್ತನೆಯನ್ನು ಟೀಕಿಸಿದರೆ, ಇನ್ನು ಕೆಲವರು ವಿಮಾನದ ಹಾದಿಯಲ್ಲಿ ಓಡಾಡುತ್ತಾ ಊಟ ಹಂಚಿಕೊಂಡ ದೃಶ್ಯವನ್ನು ನೋಡಿ, ‘ವಿಮಾನವನ್ನೇ ಲೋಕಲ್ ಟ್ರೈನ್ ಮಾಡಿದ್ದಾರೆ’ ಎಂದು ತಮಾಷೆ ಮಾಡಿದ್ದಾರೆ. ಮತ್ತಷ್ಟು ಮಂದಿ, ಇತರ ಪ್ರಯಾಣಿಕರಿಗೆ ತೊಂದರೆ ಆಗದಂತೆ ವಿಮಾನದಲ್ಲಿ ಶಿಸ್ತು ಪಾಲಿಸಬೇಕು ಎಂದು ಹೇಳಿದ್ದಾರೆ.
ಆದರೆ ಈ ಘಟನೆಗೆ ಸಂಬಂಧಿಸಿದಂತೆ ಇಂಡಿಗೋ ಸಂಸ್ಥೆ ಈವರೆಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ. ಸದ್ಯ ಪ್ರಯಾಣಿಕರು ವಿಮಾನದೊಳಗೆ ಓಡಾಡುತ್ತಾ ಆಹಾರ ಹಂಚಿಕೊಳ್ಳುತ್ತಿರುವ ದೃಶ್ಯವೇ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಕಾರಣವಾಗಿದೆ.