Viral Video : ಢೋಲು ನುಡಿಸಾಣಿಕೆಗೆ ಮಾರುಹೋದ ಪಾಪ್ ಸ್ಟಾರ್ ಜಸ್ಟಿನ್ ಬೈಬರ್

ನಮ್ಮ ಕಿವಿಗಳು ನಾದತರಂಗಗಳಿಂದ ಸಂಸ್ಕಾರಗೊಂಡಂಥವು. ಹುಟ್ಟಿನಿಂದ ಚಟ್ಟದವರೆಗೂ ಶಬ್ದವು ನಮ್ಮನ್ನು ಅನೇಕ ರೀತಿಯಲ್ಲಿ ಸಂಚಲನಕ್ಕೀಡು ಮಾಡುತ್ತದೆ. ಸ್ತಂಭೀಭೂತರನ್ನಾಗಿಸುತ್ತದೆ. ಈ ವಿಡಿಯೋವನ್ನು ಗಮನಿಸಿ, ಇದರಲ್ಲಿ ಭಾವಪರವಶರಾಗಿ ವ್ಯಕ್ತಿಯೊಬ್ಬರು ಢೋಲು ನುಡಿಸುತ್ತಿದ್ದಾರೆ. ಭಾರತದ ಬಹುಮುಖಿ ಸಂಸ್ಕೃತಿಗೆ ಮಾರುಹೋಗದವರು ಯಾರಿದ್ದಾರೆ? ಅಂತೆಯೇ ಭಾರತೀಯರೊಬ್ಬರು ಢೋಲು ನುಡಿಸುತ್ತಿರುವ ವಿಡಿಯೋವನ್ನು ಕೆನಡಿಯನ್ ಗಾಯಕ ಜಸ್ಟಿನ್ ಬೈಬರ್ (Justin Bieber) ತನ್ನ ಇನ್​ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ಅದೀಗ ವೈರಲ್ ಆಗಿದೆ. ‘ಮಾತಾ ಕಾ ಜಾಗ್ರತ್’ ಕಾರ್ಯಕ್ರಮದಲ್ಲಿ ಉತ್ಸಾಹದಿಂದ ಢೋಲು ನುಡಿಸುತ್ತಿರುವ ವ್ಯಕ್ತಿಯೊಬ್ಬರ ವಿಡಿಯೋವನ್ನು ಜಸ್ಟಿನ್, ತನ್ನ ಸ್ನೇಹಿತ ಡ್ರಮ್ ಕಲಾವಿದ ಡೆವೊನ್ ಟೇಲರ್​ ಹಂಚಿಕೊಂಡ ಪೋಸ್ಟ್​ನಲ್ಲಿ ನೋಡಿ ಅಚ್ಚರಿಗೊಂಡಿದ್ದಾರೆ. ಈ ವ್ಯಕ್ತಿ ತನ್ಮಯನಾಗಿ ಡೋಲು ನುಡಿಸುತ್ತಿದ್ದರೆ ಉಳಿದವರು ಪ್ರಾರ್ಥನೆಯಲ್ಲಿ ಮುಳುಗಿದ್ದಾರೆ.

ವಿಡಿಯೋದಲ್ಲಿ ಅಲಂಕರಿಸಿದ ತಾಯಿ ದುರ್ಗೆ, ಹನುಮಂತನ ಮೂರ್ತಿಗಳನ್ನು ಕಾಣಬಹುದು. ಅಲ್ಲಿರುವ ಜನರು ಢೋಲು ನುಡಿಸುತ್ತಿರುವವರ ಶಕ್ತಿ ಮತ್ತು ಉತ್ಸಾಹದಿಂದ ಮೂಕವಿಸ್ಮಿತರಾಗಿ ಪ್ರಾರ್ಥನೆಯಲ್ಲಿ ಮುಳುಗಿರುವುದನ್ನು ಕಾಣಬಹುದು. ಈ ವಿಡಿಯೋ ರಂಗೀಲೆ ಹರ್ಯಾನ್ವಿ ಎಂಬ ಪೇಜ್​ನಲ್ಲಿ ಕಂಡುಬಂದಿದೆ. ಸುಮಾರು 20.3 ಮಿಲಿಯನ್​ ವೀಕ್ಷಣೆ, 8,60,000 ಲೈಕ್ಸ್​ ಮತ್ತು 11,09,000 ಸಾವಿರ ಕಮೆಂಟ್​ಗಳನ್ನು ಹೊಂದಿದೆ.

ನಾದಕ್ಕೆ ಲಯಕ್ಕೆ ಮನಸೋಲದ ಜೀವಿಯುಂಟೆ? ಜಸ್ಟಿನ್ ಮಾತ್ರವಲ್ಲ, ಈ ಪೋಸ್ಟ್​ ಹಂಚಿಕೊಂಡ ಒಬ್ಬರು, ‘ನಿಮ್ಮ ಕೆಲಸವನ್ನು ನೀವು ಹೇಗೆ ಆನಂದಿಸುತ್ತೀರಿ’ ಎಂದಿದ್ದಾರೆ. ಇನ್ನೊಬ್ಬರು, ‘ಈ ರೀತಿಯ ಶಕ್ತಿ ಬೇಕಿದೆ’ ಎಂದಿದ್ದಾರೆ.