‘ಪ್ಯಾರ್ ದಿವಾನಾ ಹೋತಾ ಹೈ’ ದೆಹಲಿ ಪೊಲೀಸ್ ಹಾಡಿಗೆ ನೆಟ್ಟಿಗರು ಫಿದಾ

Viral Video : ವೃತ್ತಿ ಯಾವುದಾದರೇನು ಪ್ರವೃತ್ತಿ ಎನ್ನುವುದೊಂದು ಇರುತ್ತದೆಯಲ್ಲ. ವೃತ್ತಿಗಿಂತ ಪ್ರವೃತ್ತಿಯೇ ನಮ್ಮ ಅಸ್ತಿತ್ವ ಮತ್ತು ಸಂತೋಷಕ್ಕೆ ಹೆಚ್ಚು ಕಾರಣವಾಗುವುದು. ಈಗಿಲ್ಲಿ ದೆಹಲಿಯ ಪೊಲೀಸರೊಬ್ಬರು ವೇದಿಕೆಯ ಮೇಲೆ ತಮ್ಮ ನೆಚ್ಚಿನ ಚಿತ್ರಗೀತೆಯನ್ನು ಹಾಡುತ್ತಿದ್ದಾರೆ. ಇವರ ಕಂಠಮಾಧುರ್ಯಕ್ಕೆ ಶರಣಾದ ನೆಟ್ಟಿಗರು ಶಭಾಷ್​ ಎನ್ನುತ್ತಿದ್ದಾರೆ.

ಈಗಾಗಲೇ ಇಂಥ ಸಂಗೀತಾಸಕ್ತ ಪೊಲೀಸರು, ಯೋಧರನ್ನು ನೋಡಿದ್ದೀರಿ. ಅವರ ಹಾಡನ್ನು ಕೇಳಿದ್ದೀರಿ. ಈ ಹಾಡನ್ನೂ ಕೇಳಿದಿರಲ್ಲವೆ? ಗಿಟಾರ್ ನುಡಿಸಿಕೊಂಡು ಅದೆಷ್ಟು ಭಾವಪೂರ್ಣವಾಗಿ ಇವರು ಈ ಹಾಡನ್ನು ಹಾಡಿದ್ದಾರೆ. ಈ ವಿಡಿಯೋ ಅನ್ನು ಲಕ್ಷಾಂತರ ಜನರು ನೋಡಿದ್ದಾರೆ. ಅಂದಹಾಗೆ ಈ ಪೊಲೀಸ್​ ಅಧಿಕಾರಿಯ ಹೆಸರು ರಜತ್ ರಾಥೋಡ್​.

ಇದನ್ನೂ ಓದಿ : ಡೋಲೋ 650 ಶಶಿರೇಖಾ; ನಿಮ್ಮ ಮನೆಮಗಳೀಗ ಮಾಡೆಲಿಂಗ್​ಗೂ ಸೈ?

ರಾಜೇಶ್​ ಖನ್ನಾ ಮತ್ತು ಆಶಾ ಪಾರೇಖ್​ ಅಭಿನಯದ ಕಟೀ ಪತಂಗ್​ ಸಿನೆಮಾದ ಈ ಹಾಡನ್ನು ಕಿಶೋರ್​ ಕುಮಾರ್ ಹಾಡಿದ್ದಾರೆ. ಪ್ಯಾರ್ ದಿವಾನಾ ಹೋತಾ ಹೈ ಈ ಹಾಡು ಕಿಶೋರ್​ ಅವರ ಸೂಪರ್ ಹಿಟ್ ಹಾಡುಗಳಲ್ಲಿ ಒಂದು. ಈಗ ಈ ಕೆಳಗಿನ ವಿಡಿಯೋದಲ್ಲಿ ರಜತ್ ಅವರ ಇನ್ನೊಂದು ಹಾಡನ್ನು ಕೇಳಿ.

ಇದು ತುಂಬಾ ಸುಮಧುರವಾಗಿದೆ, ಕೇಳುತ್ತಿದ್ದಂತೆ ಮನಸ್ಸು ಸಮಾಧಾನಗೊಳ್ಳುತ್ತದೆ ಎಂದು ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ಇದು ನನ್ನ ಮನಸ್ಸನ್ನು ತೀವ್ರವಾಗಿ ಸ್ಪರ್ಶಿಸುತ್ತಿದೆ ಎಂದು ಮತ್ತೊಬ್ಬರು ಹೇಳಿದ್ದಾರೆ. ನಾನು ನಿಮ್ಮ ಅಭಿಮಾನಿ ಸರ್​, ನೀವು ಉತ್ತಮ ಕಲಾವಿದರು ಎಂದು ಮಗದೊಬ್ಬರು ಪ್ರತಿಕ್ರಿಯಿಸಿದ್ದಾರೆ.

ಹೀಗೆ ಭಾವಸಾಗರದಲ್ಲಿ ತೇಲಿಹೋಗುವಂತೆ ಮಾಧುರ್ಯಪೂರ್ಣವಾಗಿ ಹಾಡುವ ಈ ಪೊಲೀಸ್​ ಅಧಿಕಾರಿಗೆ ಸಂಗೀತ ಕ್ಷೇತ್ರದಲ್ಲಿಯೂ ಉಜ್ವಲ ಭವಿಷ್ಯ ರೂಪುಗೊಳ್ಳಲಿ.

ಮತ್ತಷ್ಟು ವೈರಲ್​ ನ್ಯೂಸ್​ಗಾಗಿ ಕ್ಲಿಕ್ ಮಾಡಿ