2 ವರ್ಷ 10 ತಿಂಗಳ ಪುಟ್ಟ ಕಂದನಿಂದ ತಬಲಾ ಜಾದೂ: ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್ಗೆ ಸೇರ್ಪಡೆಯಾದ ಹೊನ್ನಾವರದ ಸ್ವರಶ್ರೀ
ಉತ್ತರ ಕನ್ನಡದ ಹೊನ್ನಾವರದ 2 ವರ್ಷ 10 ತಿಂಗಳ ಪುಟ್ಟ ಮಗು ಸ್ವರಶ್ರೀ, ತಬಲಾ ವಾದನದಲ್ಲಿ ಅಸಾಧಾರಣ ಸಾಧನೆ ಮಾಡಿ 'ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್'ಗೆ ಸೇರ್ಪಡೆಯಾಗಿದ್ದಾಳೆ. 12 ಸಂಕೀರ್ಣ ತಾಳಗಳನ್ನು ನಿರರ್ಗಳವಾಗಿ ಬಾಯಲ್ಲಿ ಉಚ್ಚರಿಸಿ ತಬಲಾದಲ್ಲಿ ನುಡಿಸುವ ಮೂಲಕ ಈ ರಾಷ್ಟ್ರೀಯ ದಾಖಲೆ ನಿರ್ಮಿಸಿದ್ದಾಳೆ. ಈ ಕಿರಿಯ ವಯಸ್ಸಿನ ಪ್ರತಿಭೆಗೆ ಜಿಲ್ಲೆಯಾದ್ಯಂತ ವ್ಯಾಪಕ ಶ್ಲಾಘನೆ ವ್ಯಕ್ತವಾಗಿದೆ.
ಉತ್ತರ ಕನ್ನಡ, ಅ.24: ಜಿಲ್ಲೆಯ ಹೊನ್ನಾವರ ತಾಲೂಕಿನ ಆಡುಕಳ ಗ್ರಾಮದ ಕೇವಲ ಎರಡು ವರ್ಷ ಹತ್ತು ತಿಂಗಳ ವಯಸ್ಸಿನ ಪುಟ್ಟ ಮಗು ‘ಸ್ವರಶ್ರೀ’ ತಬಲಾ ಬಾರಿಸುವ ಮೂಲಕ ವಿಸ್ಮಯಕರ ಸಾಧನೆ ಮಾಡಿ ‘ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್’ (India Book of Records) ಗೆ ಸೇರ್ಪಡೆಯಾಗಿದ್ದಾಳೆ. ಕಿರಿಯ ವಯಸ್ಸಿನಲ್ಲೇ ಲಯ ಹಾಗೂ ತಾಳದ ಮೇಲೆ ಅಪಾರ ಹಿಡಿತ ಸಾಧಿಸಿರುವ ಈ ಪುಟ್ಟ ಕಂದಮ್ಮ, ತನ್ನ ಅಸಾಧಾರಣ ಪ್ರತಿಭೆಯಿಂದ ಇಡೀ ರಾಜ್ಯದ ಗಮನ ಸೆಳೆದಿದ್ದಾಳೆ. ಕೇವಲ 2 ವರ್ಷ 10 ತಿಂಗಳ ವಯಸ್ಸಿನ ಸ್ವರಶ್ರೀ, ತಬಲಾದಲ್ಲಿನ ಅತ್ಯಂತ ಸಂಕೀರ್ಣವಾದ ಹಾಗೂ ಪ್ರಮುಖವಾದ 12 ತಾಳಗಳನ್ನು ಬಾಯಲ್ಲಿ ಸ್ಪಷ್ಟವಾಗಿ ಉಚ್ಚರಿಸುತ್ತಲೇ ತಬಲಾದಲ್ಲಿ ಸೊಗಸಾಗಿ ನುಡಿಸುವ ಮೂಲಕ ಈ ಅಪರೂಪದ ರಾಷ್ಟ್ರೀಯ ದಾಖಲೆಯನ್ನು ತನ್ನದಾಗಿಸಿಕೊಂಡಿದ್ದಾಳೆ. ಸ್ವರಶ್ರೀಯ ತಂದೆ ಪ್ರಸಿದ್ಧ ತಬಲಾಪಟು ಗುರುರಾಜ ಹೆಗಡೆ ಹಾಗೂ ತಾಯಿ ಖ್ಯಾತ ಗಾಯಕಿ ಶ್ರೀಲತಾ. ಇವರು ತಮ್ಮದೇ ಸಂಗೀತ ಶಾಲೆಯನ್ನು ತೆರೆದು ನೂರಾರು ವಿದ್ಯಾರ್ಥಿಗಳಿಗೆ ಸಂಗೀತ ಮತ್ತು ವಾದ್ಯ ತರಬೇತಿಯನ್ನು ನೀಡುತ್ತಾ ಸಾಂಸ್ಕೃತಿಕ ಸೇವೆ ಸಲ್ಲಿಸುತ್ತಿದ್ದಾರೆ. ಸಂಗೀತಮಯ ವಾತಾವರಣದಲ್ಲೇ ಬೆಳೆದ ಸ್ವರಶ್ರೀಗೆ ಆಕೆಯ ಪಾಲಕರೇ ಮಾರ್ಗದರ್ಶಕರಾಗಿದ್ದು, ಮಗಳ ಅಪರೂಪದ ಲಯಜ್ಞಾನವನ್ನು ಗುರುತಿಸಿ ಪ್ರೋತ್ಸಾಹಿಸಿದ್ದಾರೆ. ಇದೀಗ ಈ ಪುಟ್ಟ ‘ಲಯಶ್ರೀ’ಯ ಸಾಧನೆಗೆ ಉತ್ತರ ಕನ್ನಡ ಜಿಲ್ಲೆ ಸೇರಿದಂತೆ ಗಡಿಭಾಗದ ಸಂಗೀತ ವಲಯದಿಂದ ವ್ಯಾಪಕ ಶ್ಲಾಘನೆ ಹಾಗೂ ಅಭಿನಂದನೆಗಳು ಹರಿದುಬರುತ್ತಿವೆ.
ವಿಡಿಯೋ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ