ಬರಲಿವೆ ಪರಿಣಾಮಕಾರಿ, ಸುರಕ್ಷಿತ ಮತ್ತು ಕಡಿಮೆ ಉತ್ಪಾದನಾ ವೆಚ್ಚದ ಖಾದ್ಯ ಲಸಿಕೆಗಳು!

ನಮ್ಮಲ್ಲಿ ಈಗ ವಿಶ್ ಮಾಡುವ ಪದ್ಧತಿ ಬದಲಾಗಿದೆ. ಮೊದಲಾದರೆ, ನಮಸ್ಕಾರ ಸಾರ್, ಊಟ ಆಯ್ತಾ? ಅಂತ ಜನ ಕೇಳುತ್ತಿದ್ದರು. ಈಗ ನಮಸ್ಕಾರ ಸರ್, ಲಸಿಕೆ ಆಯ್ತಾ? ಒಂದಾಯ್ತಾ ಎರಡಾಯ್ತಾ? ಅಂತ ಕೇಳುತ್ತಿದ್ದಾರೆ. ಲಸಿಕೆ ಮತ್ತು ಅದನ್ನು ಕುರಿತ ಮಾತು ಬದುಕಿನ ಭಾಗವಾಗಿಬಿಟ್ಟಿದೆ. ಅಂದಹಾಗೆ ನಾವು ತೆಗೆದುಕೊಳ್ಳುತ್ತಿರುವ ಲಸಿಕೆಗಳಿ ಜೈವಿಕ ಉತ್ಪಾದನೆಗಳಾಗಿವೆ. ಒಬ್ಬ ನಿರ್ದಿಷ್ಟ ರೋಗಿಯಲ್ಲಿ ಇವು ಪ್ರತಿರಕ್ಷೆಯನ್ನು ಸುಧಾರಿಸಿ ಅವನಲ್ಲಿ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತವೆ. ಲಸಿಕೆಗಳು 19 ನೇ ಶತಮಾನದ ಸಂಶೋಧನೆಗಳ ಮಹತ್ತರ ಸಾಧನೆ ಎಂದರೆ ಉತ್ಪ್ರೇಕ್ಷೆ ಅನಿಸದು. ಲಸಿಕೆಯೊಂದು ರೋಗವನ್ನು ಉಂಟುಮಾಡುವ ಸೂಕ್ಷ್ಮಾಣು ಜೀವಿಗಳನ್ನು ಹೋಲುವ ಪ್ರೋಟೀನ್ ಹೊಂದಿರುತ್ತದೆ ಮತ್ತು ಇದನ್ನು ದುರ್ಬಲ ಅಥವಾ ಸತ್ತ ಸೂಕ್ಷ್ಮಜೀವಿಗಳಿಂದ ತಯಾರಿಸಲಾಗುತ್ತದೆ. ಲಸಿಕೆಗಳು ದೇಹದಲ್ಲಿ ರೋಗಾಣಗಳನ್ನು ಗುರುತಿಸುವ ರೋಗನಿರೋಧಕ ವ್ಯವಸ್ಥೆಯನ್ನು ಉತ್ತೇಜಿಸುವ ಏಜೆಂಟ್‌ಗಳಾಗಿವೆ. ಈಗ, ಲಸಿಕೆಯ ಹೊಸ ರೂಪವನ್ನು ಪರಿಚಯಿಸಲಾಗುತ್ತಿದ್ದು, ಇದು ಸಾಂಪ್ರದಾಯಿಕ ಲಸಿಕೆಗಳ ಅಪಾಯ ಮತ್ತು ಅಡ್ಡ ಪರಿಣಾಮಗಳನ್ನು ನಗಣ್ಯಗೊಳಿಸುವ ಶಕ್ತಿ ಹೊಂದಿರುತ್ತದೆ.

ಖಾದ್ಯ ಲಸಿಕೆಗಳೆಂದು ಕರೆಸಿಕೊಳ್ಳುವ ಇವುಗಳನ್ನು ತಳಿಯಾಗಿ ಮಾರ್ಪಡಿಸಿದ ಸಸ್ಯಗಳಿಂದ ಉತ್ಪಾದಿಸಲಾಗಿದೆ. ಖಾದ್ಯ ಲಸಿಕೆಗಳ ಉತ್ಪಾದನೆಯಲ್ಲಿ, ಜೀನ್-ಎನ್ಕೋಡಿಂಗ್ ಬ್ಯಾಕ್ಟೀರಿಯಾ ಅಥವಾ ವೈರಲ್ ರೋಗವನ್ನು ಉಂಟುಮಾಡುವ ಏಜೆಂಟ್ ಅನ್ನು ಅದರ ಇಮ್ಯುನೊಜೆನಿಕ್ ಸ್ವರೂಪವನ್ನು ಕಳೆದುಕೊಳ್ಳದೆ ಸಸ್ಯಗಳಲ್ಲಿ ಅಳವಡಿಸಬಹುದು. ಖಾದ್ಯ ಲಸಿಕೆಗಳ ಕ್ರಿಯೆಯ ಮುಖ್ಯ ಕಾರ್ಯವಿಧಾನವೆಂದರೆ ದೇಹವನ್ನು ಪ್ರವೇಶಿಸಿ ರೋಗವನ್ನು ಉಂಟುಮಾಡುವ ಸೂಕ್ಷ್ಮಾಣುಗಳ ವಿರುದ್ಧ ವ್ಯವಸ್ಥಿತ ಮತ್ತು ಮ್ಯೂಕೋಸಲ್ ಪ್ರತಿಕ್ರಿಯೆಯನ್ನು ಸಕ್ರಿಯಗೊಳಿಸುವುದಾಗಿದೆ.

ಆಯ್ದ ಸಸ್ಯ ಕೋಶಕ್ಕೆ ಟ್ರಾನ್ಸ್‌ಜೀನ್ ಅನ್ನು ಸೇರಿಸುವ ಮೂಲಕ ಖಾದ್ಯ ಲಸಿಕೆಗಳನ್ನು ಉತ್ಪಾದಿಸಲಾಗುತ್ತಿದೆ. ಪ್ರಸ್ತುತ ಖಾದ್ಯ ಲಸಿಕೆಯನ್ನು ಪಶುವೈದ್ಯಕೀಯ ಮತ್ತು ಮಾನವ ಬಳಕೆಗಾಗಿ ಅಭಿವೃದ್ಧಿಪಡಿಸಲಾಗುತ್ತಿದೆ. ಆದರೆ ಖಾದ್ಯ ಲಸಿಕೆ ಉತ್ಪಾದನೆ ಎದುರಿಸುತ್ತಿರುವ ಮುಖ್ಯ ಸವಾಲು ಎಂದರೆ ಜನರು ಅದರ ಬಗ್ಗೆ ಉದಾಸೀನ ಭಾವ ತಳೆದಿರುವುದು. ಸಮಾಜಕ್ಕೆ ಅದರ ಬಳಕೆ ಮತ್ತು ಪ್ರಯೋಜನಗಳ ಬಗ್ಗೆ ಅರಿವು ಮೂಡಿಸುವುದು ಅಗತ್ಯವಾಗಿದೆ ಎಂದು ವಿಜ್ಞಾನಿಗಳು ಹೇಳುತ್ತಿದ್ದಾರೆ.

ಇತರ ಸಾಂಪ್ರದಾಯಿಕ ಲಸಿಕೆಗಳಿಗೆ ಹೋಲಿಸಿದಾಗ, ಖಾದ್ಯ ಲಸಿಕೆಗಳು ಕಡಿಮೆ ವೆಚ್ಚ, ಪರಿಣಾಮಕಾರಿ ಮತ್ತು ಸುರಕ್ಷಿತವಾಗಿವೆ. ಇವು ರೋಗಗಳಿಂದ ಜನರನ್ನು ರಕ್ಷಿಸುವ ಉತ್ತಮ ಆಯ್ಕೆ ಮತ್ತು ಭರವಸೆ ನೀಡುತ್ತದೆ.

ಅಂದಹಾಗೆ, ಖಾದ್ಯ ಲಸಿಕೆಗಳಿನ್ನೂ ಪ್ರಾಯೋಗಿಕ ಹಂತದಲ್ಲಿವೆ, ಲಾಂಚ್ ಮಾಡಲು ರೆಡಿಯಾದ ಬಳಿಕ ಬೆಲೆ ನಿಗದಿಪಡಿಸಲಾಗುತ್ತದೆ.

ಇದನ್ನೂ ಓದಿ:  ಮಗಳ ವಿಡಿಯೋಗೆ ಕನ್ನಡದ ಹಾಡು ಹಾಕಿದ ಡೇವಿಡ್​ ವಾರ್ನರ್​; ಕನ್ನಡಿಗರು ಫುಲ್​ ಫಿದಾ