ಜುಲೈನಲ್ಲೇ ವಿಮಾನ ಪತನಗೊಳಿಸಲು ಸ್ಕೆಚ್ ಹಾಕಿದ್ದ ಪೈಲಟ್ ಹಮಾಮ್ ಕೊನೇ ಕ್ಷಣದಲ್ಲಿ ಫ್ಲ್ಯಾನ್ ಏಕೆ ಮುಂದೂಡಿದ್ದ ಇಲ್ಲಿದೆ ಮಾಹಿತಿ

ಅಬುಧಾಬಿ, ಅಕ್ಟೋಬರ್ 05: ಫ್ಲೈದುಬೈ ವಿಮಾನದಲ್ಲಿ ಭಾರತೀಯ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಮೇಲೆ ದಾಳಿ ನಡೆಸಿದ ಕೋ-ಪೈಲಟ್ ಹಮಾಮ್ ಅಲ್-ಹಮ್ಮಾಮಿ, ಈ ದಾಳಿಯನ್ನು ಮೊದಲೇ ಯೋಜಿಸಿದ್ದ ಎಂದು ಇಸ್ರೇಲಿ ಮಾಧ್ಯಮಗಳು ವರದಿ ಮಾಡಿವೆ. ತನಿಖಾಧಿಕಾರಿಗಳಿಗೆ ನೀಡಿದ ಹೇಳಿಕೆಯಲ್ಲಿ, ಟೆಲ್ ಅವೀವ್‌ನ ಬೆನ್ ಗುರಿಯನ್ ವಿಮಾನ ನಿಲ್ದಾಣದ ಬಳಿ ವಿಮಾನವನ್ನು ಅಪ್ಪಳಿಸುವ ಉದ್ದೇಶ ಹೊಂದಿದ್ದಾಗಿ ಆತ ಹೇಳಿದ್ದಾನೆ ಎಂದು ವರದಿಯಾಗಿದೆ.

ವರದಿಗಳ ಪ್ರಕಾರ, ಹಮ್ಮಾಮಿ ಈ ಯೋಜನೆಯನ್ನು ಜುಲೈನಲ್ಲೇ ನಡೆಸಲು ಉದ್ದೇಶಿಸಿದ್ದ, ಆದರೆ ಕೆಲವು ಕಾರಣಗಳಿಂದ ಆ ಯೋಜನೆಯನ್ನು ಮುಂದೂಡಿದ್ದ ಎನ್ನಲಾಗಿದೆ. ಅಂದು ಆ ವಿಮಾನದಲ್ಲಿ ಆತನ ಗೆಳೆಯ ಕೂಡಾ ಇದ್ದ ಕಾರಣ, ಅಂದು ದಾಳಿ ನಡೆಸದೆ ಮುಂದೂಡಿದ್ದ ಎನ್ನಲಾಗಿದೆ. ಫ್ಲೈದುಬೈಗೆ ಸೇರುವ ಮುನ್ನವೇ ದಾಳಿಯ ಯೋಜನೆ ರೂಪಿಸಿದ್ದಾಗಿ ತನಿಖಾಧಿಕಾರಿಗಳಿಗೆ ಹೇಳಿದ್ದಾನೆ ಎಂದು ಇಸ್ರೇಲಿ ಮಾಧ್ಯಮಗಳು ವರದಿ ಮಾಡಿವೆ.

ಸ್ಮಿತ್ ಮಚ್ಚರ್ ಮೇಲೆ ಏಕೆ ದಾಳಿ?

ವಿಮಾನ ಇಸ್ರೇಲ್ ಸಮೀಪಿಸುತ್ತಿದ್ದಾಗ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಮೇಲೆ ದಾಳಿ ನಡೆಸಲು ಹಮ್ಮಾಮಿ ಉದ್ದೇಶಪೂರ್ವಕವಾಗಿ ಕೊನೆಯ ಕ್ಷಣದವರೆಗೆ ಕಾಯುತ್ತಿದ್ದ ಎಂದು ವರದಿಯಾಗಿದೆ. ಹೀಗೆ ಮಾಡಿದರೆ ವಿಮಾನದಲ್ಲಿರುವವರಿಗೆ ಪರಿಸ್ಥಿತಿ ಅರ್ಥವಾಗುವ ಮುನ್ನವೇ ತನ್ನ ಯೋಜನೆಯನ್ನು ಜಾರಿಗೆ ತರಬಹುದು ಎಂದು ಆತ ಭಾವಿಸಿದ್ದ ಎನ್ನಲಾಗಿದೆ. ಆದರೆ ಸ್ಮಿತ್ ಮಚ್ಚರ್ ಗಾಯಗೊಂಡಿದ್ದರೂ ಹೋರಾಟ ಮುಂದುವರೆಸಿದ್ದರು. ಕಾಕ್‌ಪಿಟ್ ಬಾಗಿಲು ತೆರೆಯುವ ಮೂಲಕ ಪ್ರಯಾಣಿಕರು ಮತ್ತು ಸಿಬ್ಬಂದಿಗೆ ಒಳಗೆ ಬರುವ ಅವಕಾಶ ನೀಡಿದರು. ಬಳಿಕ ಹಮ್ಮಾಮಿಯನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಲಾಯಿತು.

ಮತ್ತಷ್ಟು ಓದಿ: ಇಸ್ರೇಲ್ ಮೇಲೆ ವಿಮಾನ ಅಪ್ಪಳಿಸುವುದೇ ನನ್ನ ಪ್ಲ್ಯಾನ್ ಆಗಿತ್ತು, ಸಾವಿಗೆ ಹೆದರಲ್ಲ: ಫ್ಲೈದುಬೈ ಸಹ-ಪೈಲಟ್ ಹಮ್ಮಾಮಿ ಸ್ಫೋಟಕ ತಪ್ಪೊಪ್ಪಿಗೆ

ವಿಮಾನ ತೀವ್ರವಾಗಿ ಕೆಳಕ್ಕೆ ಇಳಿದಿತ್ತು

ಇಟಲಿಯ ‘ಕೊರಿಯೆರೆ ಡೆಲ್ಲಾ ಸೆರಾ’ ವರದಿಯನ್ನು ಉಲ್ಲೇಖಿಸಿ, ಹಮ್ಮಾಮಿ ವಿಮಾನದ ನಿಯಂತ್ರಣಕ್ಕೆ ಬಂದ ನಂತರ ಎಂಜಿನ್‌ಗಳನ್ನು ಸ್ಥಗಿತಗೊಳಿಸಲು ಪ್ರಯತ್ನಿಸಿದ್ದ ಎಂದು ವರದಿಯಾಗಿದೆ. ವಿಮಾನವು ಕೆಲವೇ ಕ್ಷಣಗಳಲ್ಲಿ ಸುಮಾರು 16,000 ಅಡಿ ಎತ್ತರ ಕಳೆದುಕೊಂಡಿತ್ತು ಎನ್ನಲಾಗಿದೆ. ಈ ವೇಳೆ ಪ್ರಯಾಣಿಕರಾಗಿ ವಿಮಾನದಲ್ಲಿದ್ದ ಇಬ್ಬರು ಆಫ್-ಡ್ಯೂಟಿ ಪೈಲಟ್‌ಗಳು ನಿಯಂತ್ರಣ ವಹಿಸಿಕೊಂಡರು. ಅವರು ವಿಮಾನವನ್ನು ಸ್ಥಿರಗೊಳಿಸಿ ಸೌದಿ ಅರೇಬಿಯಾದ ತಬೂಕ್‌ನಲ್ಲಿ ಸುರಕ್ಷಿತವಾಗಿ ಇಳಿಸುವಲ್ಲಿ ನೆರವಾದರು.

ಸ್ಮಿತ್ ಮಚ್ಚರ್‌ಗೆ ಗಂಭೀರ ಗಾಯ

ದಾಳಿಯ ವೇಳೆ ಹಮ್ಮಾಮಿ ಕ್ರ್ಯಾಶ್ ಆಕ್ಸ್‌ನಿಂದ ತಮ್ಮ ತಲೆಗೆ ಹೊಡೆದಿದ್ದಾಗಿ ಸ್ಮಿತ್ ಮಚ್ಚರ್ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರಿಗೆ ತಿಳಿಸಿದ್ದಾರೆ ಎಂದು ವರದಿಯಾಗಿದೆ. ಆರಂಭದಲ್ಲಿ ವಿಮಾನಕ್ಕೆ ಏನೋ ಡಿಕ್ಕಿ ಹೊಡೆದಿದೆ ಎಂದು ಭಾವಿಸಿದ್ದಾಗಿ, ನಂತರ ಕಾಕ್‌ಪಿಟ್‌ನಲ್ಲಿದ್ದ ವ್ಯಕ್ತಿಯೇ ದಾಳಿ ಮಾಡುತ್ತಿರುವುದು ಗೊತ್ತಾಯಿತು ಎಂದು ಅವರು ಹೇಳಿದ್ದಾರೆ.

ತನಿಖೆ ಮುಂದುವರಿಕೆ

ಹಮ್ಮಾಮಿ ಈ ಯೋಜನೆಯನ್ನು ಫ್ಲೈದುಬೈಗೆ ಸೇರುವ ಮೊದಲೇ ರೂಪಿಸಿದ್ದನೇ ಎಂಬುದೂ ತನಿಖೆಯ ಪ್ರಮುಖ ಭಾಗವಾಗಿದೆ. ಜೂನ್‌ನಲ್ಲಿ ಇಸ್ರೇಲ್‌ಗೆ ಭೇಟಿ ನೀಡಿದ್ದ ವೇಳೆ ದಾಳಿಗೆ ಸಂಬಂಧಿಸಿದ ಮಾಹಿತಿ ಸಂಗ್ರಹಿಸಿದ್ದಾನೆ ಎಂಬ ಆರೋಪಗಳೂ ವರದಿಗಳಲ್ಲಿವೆ.

ಅದೇ ವೇಳೆ, ಹಮ್ಮಾಮಿಯ ಹಿನ್ನೆಲೆ ಮತ್ತು ಆತನಿಗೆ ವಿಮಾನ ಹಾರಿಸಲು ಅನುಮತಿ ಹೇಗೆ ದೊರೆಯಿತು ಎಂಬ ಪ್ರಶ್ನೆಗಳೂ ಎದ್ದಿವೆ. ಆತನ ವಿರುದ್ಧ ಈ ಹಿಂದೆ ಭದ್ರತಾ ಕಳವಳಗಳಿದ್ದವು ಎಂಬ ವರದಿಗಳ ಹಿನ್ನೆಲೆಯಲ್ಲಿ ಯುಎಇ ಮತ್ತು ಇತರ ಅಧಿಕಾರಿಗಳು ತನಿಖೆ ನಡೆಸುತ್ತಿದ್ದಾರೆ. ಸದ್ಯ ಈ ಎಲ್ಲಾ ವಿವರಗಳು ತನಿಖಾ ಮೂಲಗಳು ಮತ್ತು ಮಾಧ್ಯಮ ವರದಿಗಳ ಆಧಾರದಲ್ಲಿವೆ. ಪ್ರಕರಣದ ಅಂತಿಮ ತನಿಖಾ ವರದಿ ಇನ್ನೂ ಹೊರಬರಬೇಕಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ