ಉಕ್ರೇನ್​ನ ಸುಮಿಯಲ್ಲಿ ರಷ್ಯನ್ ಡ್ರೋನ್ ದಾಳಿ; ಭಾರತೀಯ ವ್ಯಕ್ತಿಯ ಔಷಧ ಘಟಕ ಧ್ವಂಸ; ಒಬ್ಬನ ಸಾವು, ಹಲವರಿಗೆ ಗಾಯ

ನವದೆಹಲಿ, ಅಕ್ಟೋಬರ್ 4: ಉಕ್ರೇನ್ ಮೇಲೆ ರಷ್ಯಾ ನಡೆಸಿದ ಡ್ರೋನ್ ದಾಳಿಯೊಂದರಲ್ಲಿ ಭಾರತ ಮೂಲದ ವ್ಯಕ್ತಿಯೊಬ್ಬರ ಕಂಪನಿ ಘಟಕ ನಾಶಗೊಂಡಿರುವುದು ವರದಿಯಾಗಿದೆ. ಎನ್​ಡಿಟಿವಿಯಲ್ಲಿ ಬಂದಿರುವ ಎಕ್ಸ್​ಕ್ಲೂಸಿವ್ ವರದಿ ಪ್ರಕಾರ, ಸುಮಿ ನಗರದ (Sumy) ಮೇಲೆ ನಡೆದ ಡ್ರೋನ್ ದಾಳಿಯಲ್ಲಿ ಔಷಧ ಕಾರ್ಖಾನೆಯೊಂದು ನಾಶಗೊಂಡಿದೆ. ಭಾರತೀಯ ಮೂಲಕ ರಾಜೀವ್ ಗುಪ್ತಾ ಎಂಬುವವರ ಮಾಲೀಕತ್ವದ ‘ಕುಸುಮ್ ಗ್ರೂಪ್’ (Kusum Group) ಔಷಧ ತಯಾರಿಕಾ ಘಟಕ ಧ್ವಂಸಗೊಂಡಿದೆ. ಈ ದಾಳಿ ಘಟನೆಯಲ್ಲಿ ಒಬ್ಬರು ಸಾವನ್ನಪ್ಪಿದ್ದು, ಹಲವರು ಗಾಯಗೊಂಡಿದ್ದಾರೆ.

ದಾಳಿಯ ತೀವ್ರತೆಗೆ ಔಷಧ ಕಾರ್ಖಾನೆಯ ಮುಖ್ಯ ಕಟ್ಟಡ ಸಂಪೂರ್ಣವಾಗಿ ಹಾನಿಗೊಳಗಾಗಿದ್ದು, ಸ್ಥಳದಲ್ಲಿ ದಟ್ಟವಾದ ಹೊಗೆ ಆವರಿಸಿತ್ತು. ಈ ದಾಳಿಯಿಂದ ಕಂಪನಿಗೆ ಕನಿಷ್ಠ ₹400 ಕೋಟಿಗೂ ಹೆಚ್ಚು ನಷ್ಟ ಸಂಭವಿಸಿದೆ ಎಂದು ವರದಿಯಾಗಿದೆ. ರಕ್ಷಣಾ ಕಾರ್ಯಾಚರಣೆ ಮುಂದುವರಿದಿದ್ದು, ಸಾವಿನ ಸಂಖ್ಯೆ ಹೆಚ್ಚಾಗುವ ಸಾಧ್ಯತೆಯಿದೆ.

ಇದನ್ನೂ ಓದಿ: ಮಚ್ಚರ್, ಹಾಥಿ, ಘೋಡಾ: ಗುಜರಾತಿ ಕುಟುಂಬಗಳಲ್ಲಿ ಪ್ರಾಣಿಗಳ ಹೆಸರಿನ ಸರ್‌ನೇಮ್‌ ಇಡುವುದೇಕೆ ಗೊತ್ತಾ?

‘ಕುಸುಮ್ ಗ್ರೂಪ್’ ಹಿನ್ನೆಲೆ

ಭಾರತೀಯ ಮೂಲದ ಉದ್ಯಮಿ ರಾಜೀವ್ ಗುಪ್ತಾ ಅವರು ನಡೆಸುತ್ತಿರುವ ಈ ಸಂಸ್ಥೆಯು 1994 ರಲ್ಲಿ ಭಾರತೀಯ ಔಷಧಗಳನ್ನು ಉಕ್ರೇನ್‌ಗೆ ರಫ್ತು ಮಾಡುವ ವಿತರಕ ಕಂಪನಿಯಾಗಿ ಆರಂಭವಾಗಿತ್ತು. 2002ರಲ್ಲಿ ಬೇರೆ ಕಂಪನಿಗಳ ಉತ್ಪನ್ನಗಳ ಮಾರಾಟ ಮಾಡುವ ಬದಲು, ತನ್ನದೇ ಬ್ರ್ಯಾಂಡ್​​ಗಳನ್ನು ಮಾರಲು ಆರಂಭಿಸಿತು. 2009 ರಲ್ಲಿ ಉಕ್ರೇನ್‌ನ ಸುಮಿಯಲ್ಲಿ ತನ್ನ ಸ್ವಂತ ಔಷಧ ಉತ್ಪಾದನಾ ಘಟಕವನ್ನು ಪ್ರಾರಂಭಿಸಿತು. ಭಾರತದಲ್ಲೂ ಈ ಸಂಸ್ಥೆಯು ಮೂರು ಪ್ರಮುಖ ಉತ್ಪಾದನಾ ಘಟಕಗಳನ್ನು ಹೊಂದಿದೆ.

ಉಕ್ರೇನ್ ಪ್ರಧಾನಿ ಝೆಲೆನ್​ಸ್ಕಿ ಅವರು ಪೋಸ್ಟ್ ಮಾಡಿರುವ ವಿಡಿಯೋ

ರಷ್ಯಾ-ಉಕ್ರೇನ್ ಯುದ್ಧ ಆರಂಭವಾದ ದಿನದಿಂದಲೂ ಈ ಕಾರ್ಖಾನೆಯು ಕಾರ್ಯನಿರ್ವಹಿಸುತ್ತಾ ಉಕ್ರೇನ್, ಉಜ್ಬೇಕಿಸ್ತಾನ್, ಕಝಕಿಸ್ತಾನ್ ಸೇರಿದಂತೆ 9ಕ್ಕೂ ಹೆಚ್ಚು ದೇಶಗಳಿಗೆ ಸುಮಾರು 50ಕ್ಕೂ ಹೆಚ್ಚು ಅಗತ್ಯ ‘ಜೆನೆರಿಕ್’ (Generic) ಔಷಧಗಳನ್ನು ಪೂರೈಸುತ್ತಿತ್ತು.

ಇದನ್ನೂ ಓದಿ: ಮಲೇಷ್ಯಾ ಎಂಜಿನಿಯರ್ ಸಾವಿನ ಪ್ರಕರಣದ ತನಿಖೆಗೆ ಕೇರಳ ಆದೇಶ: ಜ್ಞಾನೇಶ್ ಕುಮಾರ್‌ಗೆ ಹೊಸ ಸಂಕಷ್ಟ

ಜಾಗತಿಕ ವಲಯದ ಪ್ರತಿಕ್ರಿಯೆ

ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಅವರು ಈ ದಾಳಿಯನ್ನು ತೀವ್ರವಾಗಿ ಖಂಡಿಸಿದ್ದು, ನಾಗರಿಕ ಮೂಲಸೌಕರ್ಯ ಹಾಗೂ ಉತ್ಪಾದನಾ ಘಟಕಗಳನ್ನು ಗುರಿಯಾಗಿಸಿಕೊಂಡು ರಷ್ಯಾ ದಾಳಿ ನಡೆಸುತ್ತಿದೆ ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ