ಟ್ರಂಪ್ ಹತ್ಯೆಯ ಸಂಚು ಪ್ರಕರಣ; ಪಾಕಿಸ್ತಾನಿ ಪ್ರಜೆಗೆ ಅಮೆರಿಕ ನ್ಯಾಯಾಲಯದಿಂದ 27 ವರ್ಷಗಳ ಜೈಲು ಶಿಕ್ಷೆ

ಇರಾನ್ ಸರ್ಕಾರದೊಂದಿಗೆ ನಂಟು ಹೊಂದಿದ್ದ ಪಾಕಿಸ್ತಾನಿ ಪ್ರಜೆಯೊಬ್ಬನಿಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಇತರ ಉನ್ನತ ಅಧಿಕಾರಿಗಳನ್ನು ಹತ್ಯೆ ಮಾಡಲು ಸಂಚು ರೂಪಿಸಿದ ಪ್ರಕರಣದಲ್ಲಿ 27 ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಗಿದೆ. ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಮಾಜಿ ಅಧ್ಯಕ್ಷ ಜೋ ಬೈಡನ್ ಮತ್ತು ವಿಶ್ವಸಂಸ್ಥೆಯ ಅಮೆರಿಕದ ಮಾಜಿ ರಾಯಭಾರಿ ನಿಕ್ಕಿ ಹ್ಯಾಲಿ ಅವರನ್ನು ಹತ್ಯೆ ಮಾಡಲು ಬಾಡಿಗೆ ಹಂತಕರನ್ನು ನೇಮಿಸಿಕೊಳ್ಳಲು ಪ್ರಯತ್ನಿಸಿದ ಆರೋಪದ ಮೇಲೆ ಆಸಿಫ್ ಮರ್ಚೆಂಟ್ ಎಂಬಾತ ದೋಷಿ ಎಂದು ತೀರ್ಪು ನೀಡಲಾಗಿತ್ತು.

ಟ್ರಂಪ್ ಹತ್ಯೆಯ ಸಂಚು ಪ್ರಕರಣ; ಪಾಕಿಸ್ತಾನಿ ಪ್ರಜೆಗೆ ಅಮೆರಿಕ ನ್ಯಾಯಾಲಯದಿಂದ 27 ವರ್ಷಗಳ ಜೈಲು ಶಿಕ್ಷೆ
Asif Merchant And Donald Trump

Updated on: Nov 18, 2026 | 9:23 PM

ವಾಷಿಂಗ್ಟನ್, ನವೆಂಬರ್ 18: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ಹತ್ಯೆ ಮಾಡಲು ಸಂಚು ರೂಪಿಸಿದ ಪ್ರಕರಣದಲ್ಲಿ ದೋಷಿ ಎಂದು ಸಾಬೀತಾದ ಪಾಕಿಸ್ತಾನಿ ಪ್ರಜೆಗೆ ಅಮೆರಿಕದ ಫೆಡರಲ್ ನ್ಯಾಯಾಲಯವು 27 ವರ್ಷಗಳ ಕಠಿಣ ಜೈಲು ಶಿಕ್ಷೆ ವಿಧಿಸಿದೆ. ಅಮೆರಿಕದ ಉನ್ನತ ರಾಜಕೀಯ ನಾಯಕರು ಹಾಗೂ ವಿಶೇಷವಾಗಿ ಡೊನಾಲ್ಡ್ ಟ್ರಂಪ್ ಅವರನ್ನು ಗುರಿಯಾಗಿಸಿಕೊಂಡು ಹತ್ಯೆಗೆ ಸಂಚು ರೂಪಿಸಿದ ಗಂಭೀರ ಆರೋಪದಡಿ ಪಾಕಿಸ್ತಾನ ಮೂಲದ ವ್ಯಕ್ತಿಯನ್ನು ಅಮೆರಿಕದ ತನಿಖಾ ಸಂಸ್ಥೆಗಳು ಬಂಧಿಸಿದ್ದವು. ಸುದೀರ್ಘ ವಿಚಾರಣೆಯ ನಂತರ ನ್ಯಾಯಾಲಯವು ಆತನ ಮೇಲಿನ ಆರೋಪಗಳನ್ನು ಎತ್ತಿಹಿಡಿದು 27 ವರ್ಷಗಳ ಜೈಲು ಶಿಕ್ಷೆಯ ತೀರ್ಪು ಪ್ರಕಟಿಸಿದೆ.

2020ರಲ್ಲಿ ಇರಾನ್‌ನ ಅತ್ಯುನ್ನತ ಸೇನಾ ಕಮಾಂಡರ್ ಖಾಸಿಂ ಸುಲೈಮಾನಿ ಅವರನ್ನು ಅಮೆರಿಕ ಹತ್ಯೆ ಮಾಡಿದ್ದಕ್ಕೆ ಪ್ರತೀಕಾರ ತೀರಿಸಿಕೊಳ್ಳಲು ತಾನು ಇರಾನ್‌ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ನಿರ್ದೇಶನದ ಮೇರೆಗೆ ಕಾರ್ಯನಿರ್ವಹಿಸುತ್ತಿದ್ದೆ ಎಂದು ಆಸಿಫ್ ಮರ್ಚೆಂಟ್ ನ್ಯಾಯಾಲಯದಲ್ಲಿ ಒಪ್ಪಿಕೊಂಡಿದ್ದಾನೆ.

Loading...

ಇದನ್ನೂ ಓದಿ: ಯುದ್ಧ ನಿಲ್ಲಿಸಲು ಇರಾನ್‌ನ ಹೊಸ ಪ್ಲಾನ್: ಕತಾರ್ ಮೂಲಕ ಅಮೆರಿಕಕ್ಕೆ ಪರಮಾಣು ಪ್ರಸ್ತಾವನೆ

ಜ್ಯೂರಿಗಳು ಆತನನ್ನು ದೋಷಿ ಎಂದು ತೀರ್ಪು ನೀಡಿದ ಕೆಲವು ತಿಂಗಳ ನಂತರ, ನ್ಯೂಯಾರ್ಕ್‌ನ ಅಮೆರಿಕ ಫೆಡರಲ್ ನ್ಯಾಯಾಧೀಶ ಎರಿಕ್ ರಾಸ್ ಕೊಮಿಟಿ ಆಸಿಫ್ ಮರ್ಚೆಂಟ್‌ಗೆ 330 ತಿಂಗಳ (27 ವರ್ಷ ಮತ್ತು 6 ತಿಂಗಳು) ಜೈಲು ಶಿಕ್ಷೆ ವಿಧಿಸಿದ್ದಾರೆ.

ಬಾಡಿಗೆ ಹಂತಕರ ನೇಮಕಕ್ಕೆ ಯತ್ನ:

ತನಿಖಾ ದಾಖಲೆಗಳ ಪ್ರಕಾರ, ಆರೋಪಿಯು ಅಮೆರಿಕದ ನೆಲದಲ್ಲಿ ರಾಜಕೀಯ ಹತ್ಯೆಗಳನ್ನು ನಡೆಸಲು ಬಾಡಿಗೆ ಹಂತಕರನ್ನು ನೇಮಿಸಿಕೊಳ್ಳಲು ಪ್ರಯತ್ನಿಸಿದ್ದನು. ಆದರೆ, ಆತ ಸಂಪರ್ಕಿಸಿದ್ದ ವ್ಯಕ್ತಿಗಳು ಅಮೆರಿಕದ ತನಿಖಾ ಸಂಸ್ಥೆ ಎಫ್‌ಬಿಐನ ರಹಸ್ಯ ಏಜೆಂಟರಾಗಿದ್ದರಿಂದ ಈ ಸಂಚು ವಿಫಲಗೊಂಡು ಆತ ಸಿಕ್ಕಿಬಿದ್ದಿದ್ದನು.

ಇದನ್ನೂ ಓದಿ: ಸಂಪ್ರದಾಯ ಮುರಿದು ತಾವೇ ಖುದ್ದಾಗಿ ತೆರಳಿ ಟ್ರಂಪ್​ಗೆ ಅದ್ದೂರಿ ಸ್ವಾಗತ ಕೋರಿದ ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್

ರಾಷ್ಟ್ರೀಯ ಭದ್ರತೆಗೆ ಸವಾಲು:

ವಿದೇಶಿ ನೆಲದಿಂದ ಅಮೆರಿಕದ ಪ್ರಜಾಪ್ರಭುತ್ವ ಮತ್ತು ಉನ್ನತ ನಾಯಕರ ಭದ್ರತೆಗೆ ಧಕ್ಕೆ ತರುವ ಇಂತಹ ಯಾವುದೇ ಪ್ರಯತ್ನಗಳನ್ನು ಸಹಿಸುವುದಿಲ್ಲ ಮತ್ತು ಅಂತಹ ಕೃತ್ಯಗಳಲ್ಲಿ ಭಾಗಿಯಾಗುವವರಿಗೆ ಅತ್ಯಂತ ಕಠಿಣ ಶಿಕ್ಷೆ ನೀಡಲಾಗುವುದು ಎಂಬ ಸ್ಪಷ್ಟ ಸಂದೇಶವನ್ನು ಅಮೆರಿಕ ನ್ಯಾಯಾಂಗ ಇಲಾಖೆ ಈ ತೀರ್ಪಿನ ಮೂಲಕ ರವಾನಿಸಿದೆ.

ಆಸಿಫ್ ಮರ್ಚೆಂಟ್ ಆರಂಭದಲ್ಲಿ ಧಾರ್ಮಿಕ ಯಾತ್ರೆಗಳಿಗಾಗಿ ಇರಾನ್‌ಗೆ ಪ್ರಯಾಣಿಸಿದ್ದನು ಮತ್ತು ಅಲ್ಲಿ ಆತನಿಗೆ IRGC ನಿರ್ವಾಹಕರ ಪರಿಚಯವಾಯಿತು ಎಂದು ಪ್ರಾಸಿಕ್ಯೂಟರ್‌ಗಳು ತಿಳಿಸಿದ್ದಾರೆ. ಈ ಸಂಚನ್ನು ಕಾರ್ಯಗತಗೊಳಿಸಲು ಏಪ್ರಿಲ್ 2024ರಲ್ಲಿ ಅಮೆರಿಕಕ್ಕೆ ಹಾರುವ ಮೊದಲು, ಆತ 15 ಬಾರಿ ಇರಾನ್‌ಗೆ ಪ್ರಯಾಣಿಸಿ ಇರಾನಿನ ಗುಪ್ತಚರ ಅಧಿಕಾರಿಗಳಿಂದ ತರಬೇತಿ ಪಡೆದಿದ್ದನು. ಆಸಿಫ್ ಮರ್ಚೆಂಟ್ ರಹಸ್ಯ ಹಂತಕರಿಗೆ ಆರಂಭಿಕ ಪಾವತಿಯಾಗಿ 5,000 ಡಾಲರ್ ನೀಡಿದ್ದನು. 2024ರ ಜುಲೈನಲ್ಲಿ ಆತ ಅಮೆರಿಕವನ್ನು ತೊರೆಯಲು ಸಿದ್ಧನಾಗಿದ್ದಾಗ ಟೆಕ್ಸಾಸ್‌ನಲ್ಲಿ ಬಂಧಿಸಲಾಯಿತು.

ಇನ್ನಷ್ಟು ಅಂತಾರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ 

ಸುಷ್ಮಾ ಚಕ್ರೆ

ಸುಷ್ಮಾ ಚಕ್ರೆ ಮೂಲತಃ ಮಲೆನಾಡ ಹೆಬ್ಬಾಗಿಲು ಶಿವಮೊಗ್ಗದವರು. ಬೆಂಗಳೂರಿನಲ್ಲಿ ವಾಸ. ಪತ್ರಿಕೋದ್ಯಮದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. 10 ವರ್ಷಗಳಿಂದ ಸಂಯುಕ್ತ ಕರ್ನಾಟಕ, ವಿಜಯವಾಣಿ, ನ್ಯೂಸ್18 ಕನ್ನಡ, ಟಿವಿ9 ಡಿಜಿಟಲ್ ವಿಭಾಗದಲ್ಲಿ ಕೆಲಸ ಮಾಡಿದ ಅನುಭವವಿದೆ. ಸಾಹಿತ್ಯ, ಸಂಗೀತ, ಸಿನಿಮಾ, ಬರವಣಿಗೆಯಲ್ಲಿ ಆಸಕ್ತಿ ಹೊಂದಿದ್ದಾರೆ.

Read More
Loading...
Unable to load recommendations.
Follow Us