ಟರ್ಕಿಶ್ ಮಿಲಿಟರಿ ಶಸ್ತ್ರಾಸ್ತ್ರ ಹೊತ್ತ ಹಡಗನ್ನು ಅಪಹರಿಸಿದ ಸೊಮಾಲಿಯಾ ಕಡಲ್ಗಳ್ಳರು: 6 ಭಾರತೀಯ ಸಿಬ್ಬಂದಿ ಒತ್ತೆಯಾಳು
ಸೊಮಾಲಿಯಾ ಕರಾವಳಿಯಲ್ಲಿ ಟರ್ಕಿಶ್ ಮಿಲಿಟರಿ ಶಸ್ತ್ರಾಸ್ತ್ರ ಹೊತ್ತ ಹಡಗನ್ನು ಕಡಲ್ಗಳ್ಳರು ಅಪಹರಿಸಿದ್ದಾರೆ. ಹಡಗಿನಲ್ಲಿದ್ದ 10 ಸಿಬ್ಬಂದಿ ಪೈಕಿ 6 ಭಾರತೀಯ ನಾವಿಕರು ಒತ್ತೆಯಾಳುಗಳಾಗಿದ್ದಾರೆ. ಮೊಗಾದಿಶುವಿನ ಟರ್ಕಿಶ್ ಮಿಲಿಟರಿ ತರಬೇತಿ ಕೇಂದ್ರಕ್ಕೆ ತೆರಳುತ್ತಿದ್ದ M/V ಲುಟುಫ್ ಎಂಬ ಹಡಗನ್ನು ಕಡಲ್ಗಳ್ಳರು ವಶಪಡಿಸಿಕೊಂಡಿದ್ದಾರೆ. ಏಡನ್ ಕೊಲ್ಲಿಯಲ್ಲಿ ಹೆಚ್ಚುತ್ತಿರುವ ಕಡಲ್ಗಳ್ಳತನ ಮತ್ತು ಡ್ರೋನ್ ದಾಳಿಗಳ ಬಗ್ಗೆ ಆತಂಕ ಹೆಚ್ಚಿದೆ.
ಮೊಗಾದಿಶು, ಆಗಸ್ಟ್ 21: ಸೊಮಾಲಿಯಾದ ಪಂಟ್ಲ್ಯಾಂಡ್ ಕರಾವಳಿಯ ಬಳಿ ಟರ್ಕಿಶ್ ಮಿಲಿಟರಿ ಶಸ್ತ್ರಾಸ್ತ್ರಗಳು ಮತ್ತು ಉಪಗ್ರಹ ಸಂವಹನ ಉಪಕರಣಗಳನ್ನು ಹೊತ್ತೊಯ್ಯುತ್ತಿದ್ದ ಸರಕು ಹಡಗನ್ನು ಕಡಲ್ಗಳ್ಳರು ಅಪಹರಿಸಿದ್ದಾರೆ. ಹಡಗಿನಲ್ಲಿದ್ದ 10 ಸಿಬ್ಬಂದಿ ಪೈಕಿ ಆರು ಮಂದಿ ಭಾರತೀಯ ನಾವಿಕರು ಸೇರಿದ್ದಾರೆ ಎಂದು ಸೊಮಾಲಿಯಾ ಭದ್ರತಾ ಅಧಿಕಾರಿಗಳು ತಿಳಿಸಿದ್ದಾರೆ.
ಪೋಲಾರ್ ಮೂವ್ಮೆಂಟ್ ಶಿಪ್ಪಿಂಗ್ ಒಡೆತನದ ‘M/V ಲುಟುಫ್’ (M/V LUTUF) ಎಂಬ ಹಡಗು ಮೊಗಾದಿಶುದಲ್ಲಿರುವ ಟರ್ಕಿಶ್ ಮಿಲಿಟರಿ ತರಬೇತಿ ಕೇಂದ್ರಕ್ಕೆ ತೆರಳುತ್ತಿದ್ದಾಗ ಐಲ್ ಜಿಲ್ಲೆಯ ಸಮೀಪ ಕಡಲ್ಗಳ್ಳರು ಇದನ್ನು ವಶಪಡಿಸಿಕೊಂಡು ನುಗಾಲ್ ಕರಾವಳಿಯತ್ತ ಕೊಂಡೊಯ್ದಿದ್ದಾರೆ.
ಸಿಬ್ಬಂದಿ ವಿವರ: ಅಪಹರಣಕ್ಕೊಳಗಾದ ಹಡಗಿನಲ್ಲಿ 6 ಭಾರತೀಯರು, ಒಬ್ಬ ಟರ್ಕಿಶ್ ಪ್ರಜೆ, ಒಬ್ಬ ಜಾರ್ಜಿಯನ್ ಹಾಗೂ ಇಬ್ಬರು ಸರ್ಬಿಯನ್ ಭದ್ರತಾ ಸಿಬ್ಬಂದಿ ಇದ್ದಾರೆ. ಈ ಹಿಂದೆ ‘M/V ಸ್ವಾರ್ಡ್’ ಹಡಗನ್ನು ಅಪಹರಿಸಿದ್ದ ಎಂಟು ಸಶಸ್ತ್ರ ಕಡಲ್ಗಳ್ಳರ ಗುಂಪೇ ಈ ಕೃತ್ಯದ ಹಿಂದಿದೆ ಎಂದು ಶಂಕಿಸಲಾಗಿದೆ.
ಮತ್ತಷ್ಟು ಓದಿ: ತಲೈಮನ್ನಾರ್ ಬಳಿ ಶ್ರೀಲಂಕಾ ನೌಕಾಪಡೆಯಿಂದ 9 ಭಾರತೀಯ ಮೀನುಗಾರರ ಬಂಧನ
ಟರ್ಕಿಶ್ ಪಡೆಗಳ ಕಣ್ಗಾವಲು: ಘಟನಾ ಸ್ಥಳದ ಸುತ್ತಲೂ ಟರ್ಕಿಶ್ ನೌಕಾಪಡೆಯ ಯುದ್ಧನೌಕೆಗಳು, ಡ್ರೋನ್ಗಳು ಹಾಗೂ ಹೆಲಿಕಾಪ್ಟರ್ಗಳು ನಿರಂತರ ಕಣ್ಗಾವಲು ನಡೆಸುತ್ತಿವೆ.
ಏಡನ್ ಕೊಲ್ಲಿಯಲ್ಲಿ ಆತಂಕ: ಕೆಂಪು ಸಮುದ್ರ ಮತ್ತು ಸೊಮಾಲಿಯಾ ಕರಾವಳಿ ಭಾಗದಲ್ಲಿ ಇತ್ತೀಚೆಗೆ ಕಡಲ್ಗಳ್ಳತನ ಹಾಗೂ ಡ್ರೋನ್ ದಾಳಿಗಳು ಮತ್ತೆ ಹೆಚ್ಚುತ್ತಿದ್ದು, ಭಾರತೀಯ ನೌಕಾಪಡೆಯು ಈ ಪ್ರದೇಶದಲ್ಲಿ ಭಾರತೀಯ ನಾವಿಕರ ಸುರಕ್ಷತೆಗೆ ವಿಶೇಷ ಕಾರ್ಯಾಚರಣೆಗಳನ್ನು ಮುಂದುವರೆಸಿದೆ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ