ಇಂಧನ ಘಟಕಗಳ ಮೇಲಿನ ದಾಳಿ ನಿಲ್ಲಿಸಲು ರಷ್ಯಾ-ಉಕ್ರೇನ್ ಒಪ್ಪಂದ: ಡೊನಾಲ್ಡ್ ಟ್ರಂಪ್ ಮಹತ್ವದ ಘೋಷಣೆ

ವಾಷಿಂಗ್ಟನ್, ಸೆಪ್ಟೆಂಬರ್ 15: ರಷ್ಯಾ ಮತ್ತು ಉಕ್ರೇನ್ ಪರಸ್ಪರ ಇಂಧನ ಮೂಲಸೌಕರ್ಯಗಳು ಹಾಗೂ ತೈಲ ಸಂಸ್ಕರಣಾಗಾರಗಳ ಮೇಲೆ ದಾಳಿ ನಡೆಸುವುದನ್ನು ನಿಲ್ಲಿಸಲು ಪರಸ್ಪರ ಒಪ್ಪಿಕೊಂಡಿವೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿದ್ದಾರೆ. ಜಾಗತಿಕವಾಗಿ ಡೀಸೆಲ್ ಮತ್ತು ಕಚ್ಚಾ ತೈಲ ಬೆಲೆ ಏರಿಕೆಗೆ ಉಕ್ರೇನ್ ಯುದ್ಧದಲ್ಲಿ ತೈಲ ರಿಫೈನರಿಗಳನ್ನು ನಾಶಪಡಿಸುತ್ತಿರುವುದೇ ಮುಖ್ಯ ಕಾರಣ ಎಂದು ಹೇಳಿರುವ ಟ್ರಂಪ್, ಇರಾನ್ ಬಿಕ್ಕಟ್ಟಿನಲ್ಲಿ ತಮ್ಮ ಸರ್ಕಾರದ ನಿಲುವನ್ನು ಸಮರ್ಥಿಸಿಕೊಂಡಿದ್ದಾರೆ. ಜೊತೆಗೆ ಇರಾನ್ ಕೂಡ ಅಮೆರಿಕದೊಂದಿಗೆ ತ್ವರಿತವಾಗಿ ಒಪ್ಪಂದ ಮಾಡಿಕೊಳ್ಳಲು ಹಾತೊರೆಯುತ್ತಿದೆ ಎಂದು ಹೇಳಿದ್ದಾರೆ.

ಟ್ರಂಪ್ ಸೋಶಿಯಲ್ ಮೀಡಿಯಾ ಪೋಸ್ಟ್: “ರಷ್ಯಾದ ಇಂಧನ ಘಟಕಗಳನ್ನು ಗುರಿಯಾಗಿಸದಿರಲು ಉಕ್ರೇನ್ ಒಪ್ಪಿದೆ. ಅದೇ ರೀತಿ ಉಕ್ರೇನ್‌ನ ವಿದ್ಯುತ್-ಇಂಧನ ಮೂಲಸೌಕರ್ಯ ಮುಟ್ಟದಿರಲು ರಷ್ಯಾ ಸಹ ಸಮ್ಮತಿಸಿದೆ. ವಿಶ್ವದ ಡೀಸೆಲ್ ಬೆಲೆ ಏರಿಕೆಗೆ ರಷ್ಯಾ-ಉಕ್ರೇನ್ ಸಂಘರ್ಷವೇ ಕಾರಣ ಹೊರತು ಇರಾನ್ ಅಲ್ಲ” ಎಂದು ಟ್ರಂಪ್ ತಮ್ಮ ಟ್ರೂತ್ ಸೋಷಿಯಲ್ನಲ್ಲಿ ಬರೆದುಕೊಂಡಿದ್ದಾರೆ.

ಝೆಲೆನ್‌ಸ್ಕಿ ಟೀಕಿಸಿದ ಬೆನ್ನಲ್ಲೇ ಬೆಳವಣಿಗೆ: ಭಾನುವಾರವಷ್ಟೇ ಉಕ್ರೇನ್ ಅಧ್ಯಕ್ಷ ಝೆಲೆನ್‌ಸ್ಕಿ ವಿರುದ್ಧ ಆಕ್ರೋಶ ಹೊರಹಾಕಿದ್ದ ಟ್ರಂಪ್, ಬೇರೆ ಸೇನಾ ನೆಲೆಗಳನ್ನು ಹೊಡೆಯಿರಿ, ಆದರೆ ಡೀಸೆಲ್ ರಿಫೈನರಿಗಳನ್ನು ಮುಟ್ಟಬೇಡಿ, ಅದು ಜಗತ್ತಿಗೆ ನೋವುಂಟುಮಾಡುತ್ತಿದೆ ಎಂದು ಎಚ್ಚರಿಸಿದ್ದರು. ಇದರ ಬೆನ್ನಲ್ಲೇ ಈ ಕದನವಿರಾಮದಂತಹ ಒಪ್ಪಂದದ ಸುದ್ದಿ ಹೊರಬಿದ್ದಿದೆ.

ಮತ್ತಷ್ಟು ಓದಿ: ರಷ್ಯಾದ ತೈಲ ಘಟಕಗಳ ಮೇಲೆ ದಾಳಿ ನಿಲ್ಲಿಸಿ, ಜಾಗತಿಕ ಡೀಸೆಲ್ ಬಿಕ್ಕಟ್ಟಿಗೆ ಝೆಲೆನ್‌ಸ್ಕಿ ಕಾರಣವೆಂದು ಕೆಂಡವಾದ ಟ್ರಂಪ್

ಇರಾನ್ ಜೊತೆ ಒಪ್ಪಂದದ ಮಾತು: ಇರಾನ್ ವಿರುದ್ಧದ ಯುದ್ಧವನ್ನು ಸಮರ್ಥಿಸಿಕೊಂಡಿರುವ ಟ್ರಂಪ್, ಟೆಹ್ರಾನ್ ಎಂದಿಗೂ ಅಣ್ವಸ್ತ್ರ ಹೊಂದಲು ಬಿಡುವುದಿಲ್ಲ ಎಂದಿದ್ದಾರೆ. ಅಲ್ಲದೆ, ಪ್ರಸ್ತುತ ಪರಿಸ್ಥಿತಿಯಲ್ಲಿ ಇರಾನ್ ತುರ್ತಾಗಿ ಒಪ್ಪಂದ ಮಾಡಿಕೊಳ್ಳಲು ಮುಂದಾಗಿದೆ, ಆದರೆ ಅದರಲ್ಲಿ ಅಮೆರಿಕ ಪಾಲ್ಗೊಳ್ಳಬೇಕೇ ಬೇಡವೇ ಎಂಬುದನ್ನು ನಾನೇ ನಿರ್ಧರಿಸುತ್ತೇನೆ ಎಂದು ಹೇಳಿದ್ದಾರೆ.

ಅಧಿಕೃತ ಸ್ಪಷ್ಟನೆ ಇನ್ನಷ್ಟೇ ಬರಬೇಕಿದೆ: ಈ ಒಪ್ಪಂದದ ಬಗ್ಗೆ ಟ್ರಂಪ್ ಹೇಳಿಕೆ ನೀಡಿದ್ದರೂ, ಮಾಸ್ಕೋ (ರಷ್ಯಾ) ಅಥವಾ ಕೀವ್ (ಉಕ್ರೇನ್) ಕಡೆಯಿಂದ ಯಾವುದೇ ಅಧಿಕೃತ ದೃಢೀಕರಣ ಅಥವಾ ಹೇಳಿಕೆ ಇನ್ನೂ ಹೊರಬಿದ್ದಿಲ್ಲ.

ಅಮೆರಿಕ ಎಲೆಕ್ಷನ್ ಮತ್ತು ಇಂಧನ ಬೆಲೆ ಒತ್ತಡ: ಅಮೆರಿಕದಲ್ಲಿ ಸನ್ನಿಹಿತವಾಗಿರುವ ಚುನಾವಣೆಗಳ ಹೊತ್ತಿನಲ್ಲಿ ತೈಲ ಬೆಲೆಗಳು ತೀವ್ರ ಏರಿಕೆಯಾಗುತ್ತಿರುವುದು ಮತ್ತು ಹಣದುಬ್ಬರ ಹೆಚ್ಚುತ್ತಿರುವುದು ಟ್ರಂಪ್ ಆಡಳಿತಕ್ಕೆ ತಲೆನೋವಾಗಿ ಪರಿಣಮಿಸಿದೆ. 7 ತಿಂಗಳಿಂದ ನಡೆಯುತ್ತಿರುವ ಇರಾನ್ ಸಂಘರ್ಷ ಹಾಗೂ ಉಕ್ರೇನ್ ದಾಳಿಗಳು ಜಾಗತಿಕ ಮಾರುಕಟ್ಟೆಯಲ್ಲಿ ಡೀಸೆಲ್ ಕೊರತೆ ಸೃಷ್ಟಿಸಿರುವುದರಿಂದ, ಇಂಧನ ದರ ನಿಯಂತ್ರಣಕ್ಕೆ ತರಲು ಟ್ರಂಪ್ ತುರ್ತು ಹೆಜ್ಜೆ ಇಡುತ್ತಿದ್ದಾರೆ.

ಮಿತ್ರರಾಷ್ಟ್ರಗಳಿಗೆ ಎಚ್ಚರಿಕೆ: ಇರಾನ್ ಸಂಘರ್ಷದ ವೇಳೆ ಅಮೆರಿಕಕ್ಕೆ ನೆರವು ನೀಡದ ಮಿತ್ರರಾಷ್ಟ್ರಗಳು ಮುಂದಿನ ದಿನಗಳಲ್ಲಿ ಅಮೆರಿಕಕ್ಕೆ ಪರಿಹಾರವನ್ನು ಮರುಪಾವತಿ ಮಾಡಬೇಕಾಗುತ್ತದೆ ಎಂದು ಟ್ರಂಪ್ ಅಸಮಾಧಾನ ಹೊರಹಾಕಿದ್ದಾರೆ.

ಹಾರ್ಮುಜ್ ಜಲಸಂಧಿಯ ಭದ್ರತೆ: ಜಾಗತಿಕ ತೈಲ ಸಾಗಣೆಯ ಪ್ರಮುಖ ನರನಾಡಿಯಾಗಿರುವ ಹಾರ್ಮುಜ್ ಜಲಸಂಧಿಯಲ್ಲಿ ಯಾವುದೇ ಅಡೆತಡೆಯಿಲ್ಲದೆ ತೈಲ ಹರಿಯುವಂತೆ ಮಾಡಲು ಅಮೆರಿಕ ನಿರಂತರವಾಗಿ ಶ್ರಮಿಸುತ್ತಿದೆ ಎಂದು ಅವರು ಒತ್ತಿಹೇಳಿದ್ದಾರೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ