ಬಿಟ್ಕಾಯಿನ್ 72,000 ಡಾಲರ್ ಮೈಲಿಗಲ್ಲು; ಸಾರ್ವಕಾಲಿಕ ಗರಿಷ್ಠ ಮಟ್ಟದಲ್ಲಿ ಕ್ರಿಪ್ಟೋ; ಯಾಕಿಷ್ಟು ಏರಿಕೆ ಆಗುತ್ತಿದೆ? ಇಲ್ಲಿದೆ ಕಾರಣ
Why Bitcoin Is In All-time High: ಬಿಟ್ಕಾಯಿನ್ ಮೌಲ್ಯ ಮೊದಲ ಬಾರಿಗೆ 72,000 ಡಾಲರ್ ಮೈಲಿಗಲ್ಲು ದಾಟಿದೆ. ಒಂದು ಹಂತದಲ್ಲಿ 73,000 ಡಾಲರ್ ಮಟ್ಟದ ಸಮೀಪಕ್ಕೆ ಏರಿತ್ತು. ಕಳೆದ ಆರು ತಿಂಗಳಿಂದ ಬಿಟ್ಕಾಯಿನ್ ಮೌಲ್ಯ ಮೂರು ಪಟ್ಟು ಹೆಚ್ಚಾಗಿದೆ. ಅಮೆರಿಕದಲ್ಲಿ ಬಡ್ಡಿದರ ಕಡಿಮೆ ಆಗುವ ಸೂಚನೆ ಇರುವುದು, ಮತ್ತು ಬಿಟ್ಕಾಯಿನ್ ಇಟಿಎಫ್ಗಳಲ್ಲಿ ಸಾಂಸ್ಥಿಕ ಹೂಡಿಕೆದಾರರಿಂದ ಹಣದ ಹರಿವು ಬರುತ್ತಿರುವುದು ಈ ಕ್ರಿಪ್ಟೋಕರೆನ್ಸಿ ಮೌಲ್ಯ ಹೆಚ್ಚಲು ಕಾರಣವಾಗಿದೆ.
ನವದೆಹಲಿ, ಮಾರ್ಚ್ 12: ವಿಶ್ವದ ಮೊದಲ ಹಾಗೂ ಪ್ರಮುಖ ಕ್ರಿಪ್ಟೋ ಕರೆನ್ಸಿ ಎನಿಸಿರುವ ಬಿಟ್ಕಾಯಿನ್ (Bitcoin) ಇತ್ತೀಚೆಗೆ ನಾಗಾಲೋಟದಲ್ಲಿದೆ. ಒಂದು ಬಿಟ್ಕಾಯಿನ್ ಮೌಲ್ಯ ಮೊದಲ ಬಾರಿಗೆ ಬರೋಬ್ಬರಿ 72,000 ಡಾಲರ್ ಮಟ್ಟದ ಮೈಲಿಗಲ್ಲು ಮುಟ್ಟಿದೆ. ಒಂದು ಹಂತದಲ್ಲಿ ಅದರ ಮೌಲ್ಯ 77,700 ಡಾಲರ್ ಗಡಿ ದಾಟಿ ಹೋಗಿತ್ತು. ಇವತ್ತು ಅದು 71,870 ಡಾಲರ್ ದರದಲ್ಲಿ ವಹಿವಾಟು ಕಾಣುತ್ತಿದೆ. ಕಳೆದ ಆರು ತಿಂಗಳಿಂದ ಬಿಟ್ಕಾಯಿನ್ ಬೆಲೆ ರಾಕೆಟ್ನಂತೆ ಏರುತ್ತಿದೆ. ಸೆಪ್ಟೆಂಬರ್ನಲ್ಲಿ 25,000 ಡಾಲರ್ ಆಸುಪಾಸಿನಲ್ಲಿ ಇದ್ದ ಬಿಟ್ಕಾಯಿನ್ ಬೆಲೆ ಬಹುತೇಕ ಮೂರು ಪಟ್ಟು ಹೆಚ್ಚಿರುವುದು ಸೋಜಿಗವೇ ಸರಿ.
ಬಿಟ್ಕಾಯಿನ್ಗೆ ಯಾಕಿಷ್ಟು ಬೇಡಿಕೆ?
ಬಿಟ್ಕಾಯಿನ್ ಡಿಜಿಟಲ್ ಕರೆನ್ಸಿ ಇಷ್ಟು ವೇಗದಲ್ಲಿ ಓಡುತ್ತಿರುವುದು ಯಾಕೆ ಎಂದು ಕ್ರಿಪ್ಟೋ ಮಾರುಕಟ್ಟೆ ತಜ್ಞರು ಎರಡು ಪ್ರಮುಖ ಕಾರಣಗಳನ್ನು ಪ್ರಸ್ತಾಪಿಸಿದ್ದಾರೆ. ಒಂದು, ಅಮೆರಿಕದಲ್ಲಿ ಫೆಡರಲ್ ರಿಸರ್ವ್ ಸಂಸ್ಥೆ ಬಡ್ಡಿದರ ಕಡಿಮೆ ಮಾಡಬಹುದು ಎನ್ನುವ ನಿರೀಕ್ಷೆ. ಇನ್ನೊಂದು ಕಾರಣವೆಂದರೆ, ಬಿಟ್ಕಾಯಿನ್ ಇಟಿಎಫ್ಗಳು.
ಅಮೆರಿಕದಲ್ಲಿ ಬಡ್ಡಿದರ ಕಡಿಮೆ ಆಗುತ್ತಿದೆ ಎಂದರೆ ಸಹಜವಾಗಿ ಅದರ ಲಾಭ ಷೇರು ಮಾರುಕಟ್ಟೆ, ಚಿನ್ನ ಮತ್ತಿತರ ಕಡೆ ಹೋಗುತ್ತದೆ. ಬಹಳಷ್ಟು ಹೂಡಿಕೆದಾರರು ಚಿನ್ನ ಖರೀದಿಸುತ್ತಿದ್ದಾರೆ. ಹಾಗೆಯೇ, ಬಿಟ್ಕಾಯಿನ್ನಂಥ ಕ್ರಿಪ್ಟೋಕರೆನ್ಸಿಗಳ ಮೇಲೆಯೂ ಹೂಡಿಕೆ ಮಾಡುತ್ತಿದ್ದಾರೆ.
ಇದನ್ನೂ ಓದಿ: ಕಾರ್ ಲೋನ್ಗೆ ನಿಮ್ಮ ಕನಿಷ್ಠ ಸಿಬಿಲ್ ಸ್ಕೋರ್ ಎಷ್ಟಿರಬೇಕು? ಇಲ್ಲಿದೆ ಡೀಟೇಲ್ಸ್
ಇನ್ನು ಬಿಟ್ಕಾಯಿನ್ ಇಟಿಎಫ್ ಅಥವಾ ಎಕ್ಸ್ಚೇಂಜ್ ಟ್ರೇಡೆಡ್ ಫಂಡ್ಗಳಲ್ಲಿ ಸಾಂಸ್ಥಿಕ ಹೂಡಿಕೆದಾರರಿಂದ ಬಹಳಷ್ಟು ಬಂಡವಾಳ ಹರಿದುಬರುತ್ತಿದೆ. ಹೀಗಾಗಿ, ಬಿಟ್ಕಾಯಿನ್ ಸಾರ್ವಕಾಲಿಕ ಗರಿಷ್ಠ ಮಟ್ಟ ದಾಟಿ ಹೋಗುತ್ತಲೇ ಇದೆ.
ಬಿಟ್ಕಾಯಿನ್ ಮಾತ್ರವಲ್ಲ, ಎಥಿರಿಯಮ್, ಬಿಎನ್ಬಿ, ಟೆಥರ್, ಸೊಲಾನ, ಡೋಜೆಕಾಯಿನ್ ಇತ್ಯಾದಿ ಹಲವು ಕ್ರಿಪ್ಟೊಕರೆನ್ಸಿಗಳೂ ಕೂಡ ಬೇಡಿಕೆ ಪಡೆದಿವೆ. ಕ್ರಿಪ್ಟೋ ಮಾರುಕಟ್ಟೆಯಲ್ಲಿ ಇತ್ತೀಚೆಗೆ ಸಾಕಷ್ಟು ಕಲರವ ನಡೆಯುತ್ತಿದೆ.
ಬಿಟ್ಕಾಯಿನ್ ಏರಿಳಿತದ ಹಾದಿ…
ಇದು ವಿಶ್ವದ ಮೊದಲ ಕ್ರಿಪ್ಟೋಕರೆನ್ಸಿ. 2008ರಲ್ಲಿ ಇದರ ಆವಿಷ್ಕಾರ ಆದುದು. ಸರ್ಕಾರ ಅಥವಾ ಬ್ಯಾಂಕುಗಳ ನಿಯಂತ್ರಣ ಇಲ್ಲದೆ ಮುಕ್ತವಾಗಿರುವುದ ಕ್ರಿಪ್ಟೋದ ವಿಶೇಷತೆ. 2017ರಲ್ಲಿ ಮೊದಲ ಬಾರಿಗೆ ಇದು ಏರಿಕೆ ಕಂಡಿತ್ತು. ಆ ವರ್ಷದ ಆರಂಭದಲ್ಲಿ ಸಾವಿರ ರೂ ಒಳಗಿದ್ದ ಅದರ ಬೆಲೆ ವರ್ಷಾಂತ್ಯದಲ್ಲಿ10 ಪಟ್ಟು ಹೆಚ್ಚಾಗಿತ್ತು.
ಇದನ್ನೂ ಓದಿ: ಮಾ. 1ರ ವಾರದಲ್ಲಿ ಭಾರತದ ಫಾರೆಕ್ಸ್ ಮೀಸಲು ನಿಧಿ 625 ಬಿಲಿಯನ್ ಡಾಲರ್ಗೆ ಏರಿಕೆ
ಅದಾದ ಬಳಿಕ ಎರಡನೇ ಬಾರಿ ಹೈಜಂಪ್ ಆಗಿದ್ದು ಕೋವಿಡ್ ಕಾಲಘಟ್ಟವಾದ 2020-21ರಲ್ಲಿ. ಈಗ ಮತ್ತೊಮ್ಮೆ ಸೂಪರ್ ಜಿಗಿತ ಕಂಡಿದೆ.
ಬಿಟ್ಕಾಯಿನ್ ಸೇರಿದಂತೆ ಕ್ರಿಪ್ಟೋಕರೆನ್ಸಿಗಳು ನೀರ ಮೇಲಣ ಗುಳ್ಳೆಗಳಂತೆ ಮಾತ್ರ ಎಂದು ಹಲವು ಪರಿಣಿತರು ಎಚ್ಚರಿಸುತ್ತಲೇ ಇದ್ದಾರೆ. ಆದರೂ ಕ್ರಿಪ್ಟೋಗಳಿಗೆ ಬೇಡಿಕೆ ಕಡಿಮೆ ಆಗಿಲ್ಲ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ