Foxconn: ಸೆಮಿಕಂಡಕ್ಟರ್ ಯೋಜನೆ: ವೇದಾಂತ ಬಿಟ್ಟ ಫಾಕ್ಸ್ಕಾನ್ ಈಗ ಹೊಸ ಜೊತೆಗಾರಿಕೆಗೆ ಟಿಎಸ್ಎಂಸಿ, ಟಿಎಂಎಚ್ ಜೊತೆ ಮಾತುಕತೆ
Semiconductor Manufacturing in India: ಭಾರತದಲ್ಲಿ ಸೆಮಿಕಂಡಕ್ಟರ್ ಉತ್ಪಾದನೆಗೆ ಫಾಕ್ಸ್ಕಾನ್ ಸಂಸ್ಥೆ ತೈವಾನ್ನ ಟಿಎಸ್ಎಂಸಿ ಮತ್ತು ಜಪಾನ್ನ ಟಿಎಂಎಚ್ ಗ್ರೂಪ್ ಜೊತೆ ಮಾತುಕತೆ ನಡೆಸುತ್ತಿದೆ ಎನ್ನುವ ಸುದ್ದಿ ಮಾಧ್ಯಮಗಳಲ್ಲಿ ಪ್ರಕಟವಾಗಿದೆ.
ನವದೆಹಲಿ, ಜುಲೈ 14: ಗುಜರಾತ್ನಲ್ಲಿ ಸೆಮಿಕಂಡಕ್ಟರ್ ಫ್ಯಾಬ್ ಯೂನಿಟ್ಗಳ (Semiconductor Fab Units) ಸ್ಥಾಪನೆಗೆ ವೇದಾಂತ ಗ್ರೂಪ್ ಜೊತೆ ಒಪ್ಪಂದ ಮಾಡಿಕೊಂಡಿದ್ದ ಫಾಕ್ಸ್ಕಾನ್ (Foxconn) ಕೆಲ ದಿನಗಳ ಹಿಂದೆ ಈ ಯೋಜನೆಯಿಂದ ಹಿಂದಕ್ಕೆ ಸರಿದಿತ್ತು. ವೇದಾಂತ ಗ್ರೂಪ್ನೊಂದಿಗಿನ ಜೊತೆಗಾರಿಕೆಯಿಂದ ಹಿಂದಕ್ಕೆ ಸರಿದರೂ ಭಾರತದಲ್ಲಿ ಸೆಮಿಕಂಡಕ್ಟರ್ ತಯಾರಿಕೆಗೆ ಬದ್ಧವಾಗಿರುವುದಾಗಿ ಹೇಳಿದ್ದ ಫಾಕ್ಸ್ಕಾನ್ ಇದೀಗ ಎರಡು ಕಂಪನಿಗಳ ಜೊತೆ ಮಾತುಕತೆ ನಡೆಸುತ್ತಿರುವ ಸುದ್ದಿ ಕೆಲ ಮಾಧ್ಯಮಗಳಲ್ಲಿ ಪ್ರಕಟವಾಗಿದೆ. ಎಕನಾಮಿಕ್ ಟೈಮ್ಸ್ನಲ್ಲಿ ಪ್ರಕಟವಾಗಿರುವ ವರದಿ ಪ್ರಕಾರ ತೈವಾನ್ ಮೂಲದ ಫಾಕ್ಸ್ಕಾನ್ ಸಂಸ್ಥೆ ಭಾರತದಲ್ಲಿ ಸೆಮಿಕಂಡಕ್ಟರ್ ಫ್ಯಾಬ್ ಘಟಕಗಳ ಸ್ಥಾಪನೆಗೆ ತೈವಾನ್ ಮೂಲದ ಮತ್ತೊಂದು ಟೆಕ್ ದೈತ್ಯ ಟಿಎಸ್ಎಂಸಿಯೊಂದಿಗೆ ಜೊತೆಗಾರಿಕೆಗೆ ಪ್ರಯತ್ನಿಸುತ್ತಿದೆ. ಹಾಗೆಯೇ, ಜಪಾನ್ನ ಟಿಎಂಎಚ್ ಗ್ರೂಪ್ ಜೊತೆಗೂ ಫಾಕ್ಸ್ಕಾನ್ ಮಾತುಕತೆ ನಡೆಸುತ್ತಿದೆ ಎಂದು ಎಕನಾಮಿಕ್ ಟೈಮ್ಸ್ ಪತ್ರಿಕೆ ವರದಿ ಮಾಡಿದೆ.
ಕುತೂಹಲವೆಂದರೆ ವೇದಾಂತ ಗ್ರೂಪ್ ಮತ್ತು ಫಾಕ್ಸ್ಕಾನ್ ಈ ಎರಡೂ ಸಂಸ್ಥೆಗಳಿಗೆ ಸೆಮಿಕಂಡಕ್ಟರ್ ಚಿಪ್ ತಯಾರಿಕೆಯ ತಂತ್ರಜ್ಞಾನ ತಿಳಿದಿಲ್ಲ. ಎರಡೂ ಜೊತೆಯಾಗಿ ಸೇರಿ ಸೆಮಿಕಂಡಕ್ಟರ್ ಚಿಪ್ ತಯಾರಿಕೆಯ ಅನುಭವ ಇರುವ ಮತ್ತೊಂದು ವಿದೇಶೀ ಕಂಪನಿ ಜೊತೆ ಮಾಡಿಕೊಳ್ಳುವ ಯೋಜನೆ ಇತ್ತು. ಅದು ಸರಿಯಾದ ದಾರಿಯಲ್ಲಿ ಸಾಗದೇ ಇದ್ದ ಹಿನ್ನೆಲೆಯಲ್ಲಿ ಫಾಕ್ಸ್ಕಾನ್ ವೇದಾಂತದಿಂದ ಬೇರ್ಪಟ್ಟು ಇದೀಗ ಸ್ವತಂತ್ರವಾಗಿ ಸೆಮಿಕಂಡಕ್ಟರ್ ಯೋಜನೆಗೆ ಕೈಹಾಕುತ್ತಿದೆ. ಅತ್ತ ವೇದಾಂತ ಗ್ರೂಪ್ ಕೂಡ ಪ್ರತ್ಯೇಕವಾಗಿ ಸೆಮಿಕಂಡಕ್ಟರ್ ಘಟಕ ಸ್ಥಾಪನೆಗೆ ಪ್ರಯತ್ನಿಸುತ್ತಿದೆ.
ಇನ್ನು, ಫಾಕ್ಸ್ಕಾನ್ ಮಾತುಕತೆ ನಡೆಸುತ್ತಿರುವ ಟಿಎಸ್ಎಂಸಿ ಮತ್ತು ಟಿಎಂಎಚ್ ಗ್ರೂಪ್ ಸಂಸ್ಥೆಗಳು ಸೆಮಿಕಂಡಕ್ಟರ್ ಕ್ಷೇತ್ರದಲ್ಲಿರುವ ಅಗ್ರಗಣ್ಯ ಕಂಪನಿಗಳಾಗಿವೆ. ತೈವಾನ್ ಸೆಮಿಕಂಡಕ್ಟರ್ ಮ್ಯಾನುಫ್ಯಾಕ್ಚರಿಂದ ಕಂಪನಿ (ಟಿಎಸ್ಎಂಸಿ) ವಿಶ್ವದ ಪ್ರಮುಖ ಚಿಪ್ ತಯಾರಕ ಸಂಸ್ಥೆ ಹೌದು. ಇನ್ನು ಜಪಾನ್ನ ಟಿಎಂಎಚ್ ಗ್ರೂಪ್ ಸೆಮಿಕಂಡಕ್ಟರ್ ಘಟಕದ ನಿರ್ವಹಣೆ ಇತ್ಯಾದಿ ಸೇವೆಯಲ್ಲಿ ನಿಷ್ಣಾತವಾಗಿದೆ. ಫಾಕ್ಸ್ಕಾನ್, ಟಿಎಸ್ಎಂಸಿ ಮತ್ತು ಟಿಎಂಎಚ್ ಈ ಮೂರೂ ಕಂಪನಿಗಳು ಜೊತೆಯಾಗಿ ಸೇರಿ ಭಾರತದಲ್ಲಿ ಸೆಮಿಕಂಡಕ್ಟರ್ ಫ್ಯಾಬ್ ತಯಾರಿಕೆ ಘಟಕಗಳನ್ನು ಸ್ಥಾಪಿಸುತ್ತವಾ ಎಂದು ಕಾದು ನೋಡಬೇಕು.
ಹಾಗೆಯೇ, ಯೂರೋಪ್ನ ಎಸ್ಟಿ ಮೈಕ್ರೋ ಹಾಗೂ ಅಮೆರಿಕದ ಗ್ಲೋಬಲ್ ಫೌಂಡರೀಸ್ ಸಂಸ್ಥೆಗಳೂ ಕೂಡ ಭಾರತದಲ್ಲಿ ಸೆಮಿಕಂಡಕ್ಟರ್ ಘಟಕ ಸ್ಥಾಪನೆಗೆ ಫಾಕ್ಸ್ಕಾನ್ ಅಥವಾ ವೇದಾಂತ ಜೊತೆ ಕೈ ಜೋಡಿಸುವ ಸಾಧ್ಯತೆಗಳೂ ಇವೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ