ಫೆಬ್ರುವರಿಯಲ್ಲಿ ಸರ್ಕಾರಕ್ಕೆ ಸಿಕ್ಕಿದ ಒಟ್ಟು ಜಿಎಸ್ಟಿ 1.84 ಲಕ್ಷ ಕೋಟಿ ರೂ; ಶೇ 9.1 ಹೆಚ್ಚು ಸಂಗ್ರಹ
February gross GST collections Rs 1.84 lakh crore: ಸರಕು ಮತ್ತು ಸೇವೆಗಳ ತೆರಿಗೆಯಾದ ಜಿಎಸ್ಟಿ ಸಂಗ್ರಹ ಫೆಬ್ರುವರಿಯಲ್ಲಿ ಶೇ. 9.1ರಷ್ಟು ಹೆಚ್ಚಳ ಆಗಿದೆ. ಒಟ್ಟು 1.84 ಲಕ್ಷ ಕೋಟಿ ರೂನಷ್ಟು ಜಿಎಸ್ಟಿ ಸಿಕ್ಕಿದೆ. ಇದರಲ್ಲಿ ರೀಫಂಡ್ ಕಳೆದರೆ ಉಳಿಯುವ ನಿವ್ವಳ ಜಿಎಸ್ಟಿ 1.63 ಲಕ್ಷ ಕೋಟಿ ರೂನಷ್ಟು ಆದಾಯ ಸರ್ಕಾರಕ್ಕೆ ಬಂದಿದೆ.
ನವದೆಹಲಿ, ಮಾರ್ಚ್ 2: ಸರ್ಕಾರಕ್ಕೆ ತೆರಿಗೆ ಆದಾಯದಲ್ಲಿ ಗಣನೀಯ ಏರಿಕೆ ಮುಂದುವರಿದಿದೆ. ಫೆಬ್ರುವರಿ ತಿಂಗಳಲ್ಲಿ ಜಿಎಸ್ಟಿ ಸಂಗ್ರಹದಲ್ಲಿ (GST collections) ಶೇ. 9.1ರಷ್ಟು ಏರಿಕೆ ಆಗಿದೆ. ಸರ್ಕಾರ ನಿನ್ನೆ ಶನಿವಾರ ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ ಫೆಬ್ರುವರಿಯಲ್ಲಿ 1.84 ಲಕ್ಷ ಕೋಟಿ ರೂನಷ್ಟು ಜಿಎಸ್ಟಿ ಪ್ರಾಪ್ತವಾಗಿದೆ. ದೇಶದ ಆಂತರಿಕ ಬಿಸಿನೆಸ್ ಚಟುವಟಿಕೆಗಳಿಂದ ಸಿಕ್ಕಿರುವ ಜಿಎಸ್ಟಿಯಲ್ಲಿ ಶೇ. 10.2ರಷ್ಟು ಏರಿಕೆ ಆಗಿದೆ. ಇವುಗಳಿಂದಲೇ 1.42 ಲಕ್ಷ ಕೋಟಿ ರೂ. ಜಿಎಸ್ಟಿ ಸಿಕ್ಕಿದೆ. ಆಮದು ಸರಕುಗಳಿಂದ ಸಿಕ್ಕ ಜಿಎಸ್ಟಿಯಲ್ಲಿ ಶೇ. 5.4ರಷ್ಟು ಏರಿಕೆ ಆಗಿ, 41,702 ಕೋಟಿ ರೂ ಸಿಕ್ಕಿದೆ.
ಫೆಬ್ರುವರಿಯಲ್ಲಿ ಸಿಕ್ಕಿರುವ ಒಟ್ಟು ಜಿಎಸ್ಟಿಯಾದ 1.84 ಲಕ್ಷ ಕೋಟಿ ರೂನಲ್ಲಿ ಕೇಂದ್ರದ ಜಿಎಸ್ಟಿ 35,204 ಕೋಟಿ ರು ಇದೆ. ಹಾಗೆಯೇ, ರಾಜ್ಯದ ಜಿಎಸ್ಟಿ 43,704 ಕೋಟಿ ರೂ ಸೇರಿದೆ. ಐಜಿಎಸ್ಟಿ 90,870 ಕೋಟಿ ರೂನಷ್ಟು ಇದ್ದರೆ, ಕಾಂಪೆನ್ಸೇಶನ್ ಸೆಸ್ 13,868 ಕೋಟಿ ರೂನಷ್ಟಿದೆ.
ಇದನ್ನೂ ಓದಿ: GDP: ಮೂರನೇ ಕ್ವಾರ್ಟರ್ನಲ್ಲಿ ಜಿಡಿಪಿ ದರ ಶೇ. 6.2; ಪೂರ್ಣವರ್ಷದಲ್ಲಿ ಶೇ. 6.5ರಷ್ಟು ಬೆಳೆಯುವ ಸಂಭವ
ಈ ಬಾರಿ ರೀಫಂಡ್ಗಳ ಪ್ರಮಾಣದಲ್ಲಿ ಏರಿಕೆ ಆಗಿದೆ. ಕಳೆದ ವರ್ಷದಕ್ಕೆ ಹೋಲಿಸಿದರೆ ಶೇ. 17.3ರಷ್ಟು ಹೆಚ್ಚು ರೀಫಂಡ್ಗಳಾಗಿರುವುದು ದತ್ತಾಂಶದಿಂದ ತಿಳಿದುಬರುತ್ತದೆ. 20,889 ಕೋಟಿ ರೂನಷ್ಟು ರೀಫಂಡ್ಗಳನ್ನು ನೀಡಲಾಗಿದೆ. ಇದರೊಂದಿಗೆ ಒಟ್ಟು ಜಿಎಸ್ಟಿಯಲ್ಲಿ ಈ ರೀಫಂಡ್ಗಳನ್ನು ಕಳೆದರೆ ಉಳಿಯುವ ನಿವ್ವಳ ಜಿಎಸ್ಟಿ ಸಂಗ್ರಹ 1.63 ಲಕ್ಷ ಕೋಟಿ ರೂ. ಕಳೆದ ವರ್ಷದ ಫೆಬ್ರುವರಿ ತಿಂಗಳಿಗೆ ಹೋಲಿಸಿದರೆ ನಿವ್ವಳ ಜಿಎಸ್ಟಿಯಲ್ಲಿ ಶೇ. 8.1ರಷ್ಟು ಹೆಚ್ಚಳ ಆಗಿದೆ. 2024ರ ಫೆಬ್ರುವರಿಯಲ್ಲಿ ಒಟ್ಟು ಜಿಎಸ್ಟಿ 1.68 ಲಕ್ಷ ಕೋಟಿ ರೂ ಇದ್ದರೆ, ನಿವ್ವಳ ಜಿಎಸ್ಟಿ 1.50 ಲಕ್ಷ ಕೋಟಿ ರೂ ಬಂದಿತ್ತು.
2025ರ ಫೆಬ್ರುವರಿಯಲ್ಲಿ ಜಿಎಸ್ಟಿ ಸಂಗ್ರಹದ ವಿವರ
ಒಟ್ಟು ಜಿಎಸ್ಟಿ ಸಂಗ್ರಹ: 1.84 ಲಕ್ಷ ಕೋಟಿ ರೂ
- ಸಿಜಿಎಸ್ಟಿ: 35,204 ಕೋಟಿ ರೂ
- ಎಸ್ಜಿಎಸ್ಟಿ: 43,704 ಕೋಟಿ ರೂ
- ಐಜಿಎಸ್ಟಿ: 90,870 ಕೋಟಿ ರೂ
- ಕಾಂಪೆನ್ಸೇಶನ್ ಸೆಸ್: 13,868 ಕೋಟಿ ರೂ
ರೀಫಂಡ್ ಕಳೆದು ಉಳಿಯುವ ನಿವ್ವಳ ಜಿಎಸ್ಟಿ: 1.63 ಲಕ್ಷ ಕೋಟಿ ರೂ
ಕಾಂಪೆನ್ಸೇಶನ್ ಸೆಸ್ ಎಂದರೆ ಯಾವುದು?
ಯಾವುದಾದರೂ ಸರಕು ಅಥವಾ ಸೇವೆಗಳಿಗೆ ಜಿಎಸ್ಟಿಯಿಂದಾಗಿ ಯಾವುದಾದರೂ ರಾಜ್ಯದ ಆದಾಯಕ್ಕೆ ಕುಂಠಿತವಾಗುತ್ತಿದೆ ಎನಿಸಿದಲ್ಲಿ ಅದಕ್ಕೆ ಪರಿಹಾರವಾಗಿ ಹೆಚ್ಚುವರಿ ಸೆಸ್ ವಿಧಿಸುವ ಅವಕಾಶ ಇರುತ್ತದೆ. ಇದನ್ನೇ ಕಾಂಪೆನ್ಸೇಶನ್ ಸೆಸ್.
ಇದನ್ನೂ ಓದಿ: 2024-25ಕ್ಕೆ ಇಪಿಎಫ್ ಹಣಕ್ಕೆ ಶೇ. 8.25 ಬಡ್ಡಿ: ಸಿಬಿಟಿ ನಿರ್ಧಾರ; 1952ರಿಂದೀಚೆಗಿನ ಇಪಿಎಫ್ ಬಡ್ಡಿದರಗಳ ಪಟ್ಟಿ
ಐಜಿಎಸ್ಟಿ ಎಂದರೆ ಯಾವುದು?
ಒಂದು ರಾಜ್ಯದಲ್ಲಿರುವ ಬಿಸಿನೆಸ್ ಸಂಸ್ಥೆ ಮತ್ತು ಬೇರೊಂದು ರಾಜ್ಯದಲ್ಲಿರುವ ಬಿಸಿನೆಸ್ ಸಂಸ್ಥೆ ಮಧ್ಯೆ ನಡೆಯುವ ವ್ಯಾಪಾರ ವಹಿವಾಟುಗಳಲ್ಲಿ ಐಜಿಎಸ್ಟಿ ಅನ್ವಯ ಆಗುತ್ತದೆ. ಈ ತೆರಿಗೆಯನ್ನು ಕೇಂದ್ರ ಸರ್ಕಾರವು ಆಯಾ ರಾಜ್ಯಗಳಿಗೆ ನಿರ್ದಿಷ್ಟ ಸೂತ್ರದ ಪ್ರಕಾರ ಹಂಚಿಕೆ ಮಾಡುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ