ಹ್ಯುಂಡೈ ಕ್ರೆಟಾಗೆ ಭಾರಿ ಬೇಡಿಕೆ; ಒಂದೇ ತಿಂಗಳಲ್ಲಿ ಬರೋಬ್ಬರಿ 17,657 ಕಾರುಗಳ ಮಾರಾಟ

ಹ್ಯುಂಡೈ ಮೋಟಾರ್ ಇಂಡಿಯಾ (Hyundai Motor India) 2026ರ ಸೆಪ್ಟೆಂಬರ್ ತಿಂಗಳ ಕಾರು ಮಾರಾಟದ ಅಂಕಿಅಂಶಗಳನ್ನು ಬಿಡುಗಡೆ ಮಾಡಿದೆ. ಈ ಅವಧಿಯಲ್ಲಿ ಹ್ಯುಂಡೈ ಕ್ರೆಟಾ ಕಂಪನಿಯ ಅತಿ ಹೆಚ್ಚು ಮಾರಾಟವಾದ ಕಾರು ಎನಿಸಿಕೊಂಡಿದೆ. ವೆನ್ಯೂ, ಎಕ್ಸ್‌ಟರ್, ಔರಾ ಮತ್ತು ಐ20 ಕಾರುಗಳೂ ಮಾರಾಟದಲ್ಲಿ ಉತ್ತಮ ಪ್ರದರ್ಶನ ನೀಡಿವೆ. ಕಂಪನಿಯ ದೇಶೀಯ ಮಾರಾಟವು ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಹೆಚ್ಚಳ ಕಂಡಿದೆ.

ಸೆಪ್ಟೆಂಬರ್‌ನಲ್ಲಿ ಒಟ್ಟು 57,166 ಹ್ಯುಂಡೈ ವಾಹನಗಳು ದೇಶೀಯ ಮಾರುಕಟ್ಟೆಯಲ್ಲಿ ಮಾರಾಟವಾಗಿವೆ. 2025ರ ಸೆಪ್ಟೆಂಬರ್‌ನಲ್ಲಿ 51,547 ವಾಹನಗಳು ಮಾರಾಟವಾಗಿದ್ದವು. ಈ ಮೂಲಕ ವರ್ಷದಿಂದ ವರ್ಷಕ್ಕೆ ಮಾರಾಟದಲ್ಲಿ ಸುಮಾರು ಶೇ 10.9ರಷ್ಟು ಬೆಳವಣಿಗೆ ದಾಖಲಾಗಿದೆ.

ಕ್ರೆಟಾ ಮೊದಲ ಸ್ಥಾನದಲ್ಲಿ

ಹ್ಯುಂಡೈ ಕ್ರೆಟಾ ಸೆಪ್ಟೆಂಬರ್‌ನಲ್ಲಿ 17,657 ಯುನಿಟ್‌ಗಳ ಮಾರಾಟದೊಂದಿಗೆ ಮೊದಲ ಸ್ಥಾನದಲ್ಲಿದೆ. ಕಳೆದ ವರ್ಷದ ಇದೇ ತಿಂಗಳಲ್ಲಿ 18,861 ಕ್ರೆಟಾ ಕಾರುಗಳು ಮಾರಾಟವಾಗಿದ್ದವು. ಅಂದರೆ, ಈ ಬಾರಿ ಮಾರಾಟದಲ್ಲಿ ಸ್ವಲ್ಪ ಇಳಿಕೆಯಾಗಿದೆ. ಆದರೂ ಕಂಪನಿಯ ಒಟ್ಟು ಮಾರಾಟದಲ್ಲಿ ಕ್ರೆಟಾ ಪ್ರಮುಖ ಪಾತ್ರ ವಹಿಸಿದೆ.

ಎರಡನೇ ಸ್ಥಾನದಲ್ಲಿರುವ ಹ್ಯುಂಡೈ ವೆನ್ಯೂ ಕಾರಿನ 11,466 ಯುನಿಟ್‌ಗಳು ಮಾರಾಟವಾಗಿವೆ. ಕಳೆದ ವರ್ಷದ ಸೆಪ್ಟೆಂಬರ್‌ನಲ್ಲಿ 11,484 ಕಾರುಗಳು ಮಾರಾಟವಾಗಿದ್ದವು. ಈ ಮೂಲಕ ವೆನ್ಯೂ ಮಾರಾಟದಲ್ಲಿ ಬಹುತೇಕ ಸ್ಥಿರತೆ ಕಾಯ್ದುಕೊಂಡಿದೆ.

ಎಕ್ಸ್‌ಟರ್‌, ಔರಾ ಮಾರಾಟದಲ್ಲಿ ಏರಿಕೆ

ಹ್ಯುಂಡೈ ಎಕ್ಸ್‌ಟರ್ ಕಾರಿನ 8,344 ಯುನಿಟ್‌ಗಳು ಮಾರಾಟವಾಗಿದ್ದು, ಕಳೆದ ವರ್ಷದ ಇದೇ ತಿಂಗಳಿಗೆ ಹೋಲಿಸಿದರೆ ಗಮನಾರ್ಹ ಏರಿಕೆ ಕಂಡಿದೆ. ಔರಾ ಸೆಡಾನ್ ಕಾರಿನ 7,530 ಯುನಿಟ್‌ಗಳು ಮಾರಾಟವಾಗಿವೆ. 2025ರ ಸೆಪ್ಟೆಂಬರ್‌ನಲ್ಲಿ 5,387 ಯುನಿಟ್‌ಗಳು ಮಾರಾಟವಾಗಿದ್ದವು.

ಹ್ಯುಂಡೈ ಐ20 ಕಾರಿನ 5,426 ಯುನಿಟ್‌ಗಳು ಮಾರಾಟವಾಗಿವೆ. ಗ್ರ್ಯಾಂಡ್ ಐ10 ನಿಯೋಸ್ ಕಾರಿನ 5,230 ಯುನಿಟ್‌ಗಳು ಮಾರಾಟವಾಗಿದ್ದು, ಈ ಎರಡೂ ಕಾರುಗಳ ಮಾರಾಟದಲ್ಲಿಯೂ ಬೆಳವಣಿಗೆ ದಾಖಲಾಗಿದೆ.

ಪ್ರತಿ ವರ್ಷ ಹೆಚ್ಚುತ್ತಿವೆ ಮೊಬೈಲ್‌, ಟ್ಯಾಬ್ಲೆಟ್‌ ದೂರುಗಳು: ಸಾಫ್ಟ್‌ವೇರ್‌ ಅಪ್‌ಡೇಟ್‌ ಬಳಿಕವೇ ಹೆಚ್ಚು ತೊಂದರೆ!

ಇತರ ಕಾರುಗಳ ಮಾರಾಟ ಹೇಗಿದೆ?

ಹ್ಯುಂಡೈ ವರ್ನಾ ಕಾರಿನ 762 ಯುನಿಟ್‌ಗಳು ಮಾರಾಟವಾಗಿವೆ. ಅಲ್ಕಜಾರ್ ಕಾರಿನ ಮಾರಾಟ 742 ಯುನಿಟ್‌ಗಳಿಗೆ ಸೀಮಿತವಾಗಿದೆ. ಹ್ಯುಂಡೈ ಐಯೋನಿಕ್ 5 ಎಲೆಕ್ಟ್ರಿಕ್ ಕಾರಿನ ಒಂಬತ್ತು ಯುನಿಟ್‌ಗಳು ಮಾರಾಟವಾಗಿವೆ. ವರದಿಯಲ್ಲಿ ಟಕ್ಸನ್ ಕಾರಿನ ಸೆಪ್ಟೆಂಬರ್ ಮಾರಾಟ ಶೂನ್ಯ ಎಂದು ತೋರಿಸಲಾಗಿದೆ.

ಒಟ್ಟಿನಲ್ಲಿ, ಸೆಪ್ಟೆಂಬರ್ ತಿಂಗಳಲ್ಲಿ ಹ್ಯುಂಡೈ ಕಂಪನಿಯ ದೇಶೀಯ ಮಾರಾಟ ಹೆಚ್ಚಳ ಕಂಡಿದೆ. ಕ್ರೆಟಾ ಅಗ್ರಸ್ಥಾನ ಉಳಿಸಿಕೊಂಡಿದ್ದರೆ, ಎಕ್ಸ್‌ಟರ್ ಮತ್ತು ಔರಾ ಕಾರುಗಳ ಮಾರಾಟದ ಬೆಳವಣಿಗೆಯೂ ಗಮನ ಸೆಳೆದಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ