ಪ್ರತಿ ವರ್ಷ ಹೆಚ್ಚುತ್ತಿವೆ ಮೊಬೈಲ್‌, ಟ್ಯಾಬ್ಲೆಟ್‌ ದೂರುಗಳು: ಸಾಫ್ಟ್‌ವೇರ್‌ ಅಪ್‌ಡೇಟ್‌ ಬಳಿಕವೇ ಹೆಚ್ಚು ತೊಂದರೆ!

ಹೊಸ ಮೊಬೈಲ್ (Mobile) ಫೋನ್ ಅಥವಾ ಟ್ಯಾಬ್ಲೆಟ್ ಖರೀದಿಸುವಾಗ, ಪ್ರತಿಯೊಂದು ವಿವರವನ್ನು ಸಂಪೂರ್ಣವಾಗಿ ಪರಿಶೀಲಿಸಲಾಗುತ್ತದೆ. ಇಲ್ಲವಾದಲ್ಲಿ ಕೆಲವು ಸಂದರ್ಭ ಹೊಸ ಮೊಬೈಲ್‌ ಖರೀದಿಸಿದ ಕೆಲವೇ ಸಮಯದಲ್ಲಿ ಡಿಸ್​ಪ್ಲೇಯಲ್ಲಿ ಗೆರೆಗಳು ಕಾಣಿಸಿಕೊಳ್ಳುವುದು, ಡಿಸ್‌ಪ್ಲೇ ಕೆಲಸ ಮಾಡದಿರುವುದು ಅಥವಾ ದುರಸ್ತಿ ಸೇವೆ ಸಿಗದೆ ಪರದಾಡುವ ಪರಿಸ್ಥಿತಿ ಎದುರಾಗಬಹುದು. ಇಂತಹ ಸಮಸ್ಯೆಗಳಿಗೆ ಸಂಬಂಧಿಸಿದಂತೆ ಗ್ರಾಹಕರು ದಾಖಲಿಸುತ್ತಿರುವ ದೂರುಗಳ ಸಂಖ್ಯೆ ಹೆಚ್ಚುತ್ತಿದೆ. ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿಯ ಅಂಕಿಅಂಶಗಳು ಇದನ್ನು ತೋರಿಸಿವೆ.

2022-23ನೇ ಹಣಕಾಸು ವರ್ಷದಲ್ಲಿ ಮೊಬೈಲ್‌ ಮತ್ತು ಟ್ಯಾಬ್ಲೆಟ್‌ಗಳಿಗೆ ಸಂಬಂಧಿಸಿದಂತೆ 19,057 ದೂರುಗಳು ದಾಖಲಾಗಿದ್ದವು. 2023-24ರಲ್ಲಿ ಈ ಸಂಖ್ಯೆ 21,020ಕ್ಕೆ ಏರಿಕೆಯಾಯಿತು. 2024-25ನೇ ಹಣಕಾಸು ವರ್ಷದಲ್ಲಿ ಒಟ್ಟು 22,864 ದೂರುಗಳು ದಾಖಲಾಗಿವೆ. ಅಂದರೆ, ಎರಡು ವರ್ಷಗಳಲ್ಲಿ ದೂರುಗಳ ಸಂಖ್ಯೆ ಸುಮಾರು ಶೇ. 20ರಷ್ಟು ಹೆಚ್ಚಾಗಿದೆ.

ಸಾಫ್ಟ್‌ವೇರ್‌ ಅಪ್‌ಡೇಟ್‌ ಬಳಿಕ ಸಮಸ್ಯೆ

ಮೊಬೈಲ್‌ ಡಿಸ್​ಪ್ಲೇಗೆ ಸಂಬಂಧಿಸಿದ ದೂರುಗಳೂ ಹೆಚ್ಚಾಗಿವೆ. 2026ರ ಮಾರ್ಚ್‌ನಲ್ಲಿ ಲೋಕಸಭೆಯಲ್ಲಿ ನೀಡಿದ ಸರ್ಕಾರಿ ಮಾಹಿತಿಯ ಪ್ರಕಾರ, 2024ರಲ್ಲಿ ಮೊಬೈಲ್‌ ಪರದೆಗೆ ಸಂಬಂಧಿಸಿದಂತೆ 7,591 ದೂರುಗಳು ದಾಖಲಾಗಿದ್ದವು. 2025ರಲ್ಲಿ ಈ ಸಂಖ್ಯೆ 8,672ಕ್ಕೆ ಏರಿಕೆಯಾಗಿದೆ.

2025ರಲ್ಲಿ ಸಾಫ್ಟ್‌ವೇರ್‌ ಅಪ್‌ಡೇಟ್‌ ಮಾಡಿದ ಬಳಿಕ ಮೊಬೈಲ್‌ನಲ್ಲಿ ಸಮಸ್ಯೆ ಕಾಣಿಸಿಕೊಂಡಿರುವ ಕುರಿತು 3,261 ದೂರುಗಳು ದಾಖಲಾಗಿದ್ದವು. ದುರಸ್ತಿ ಸೇವೆ ನೀಡಲು ವಿಳಂಬ ಮಾಡಿದ ಬಗ್ಗೆ 1,383 ದೂರುಗಳು ಬಂದಿದ್ದವು. ವಾರಂಟಿ ಇದ್ದರೂ ದುರಸ್ತಿ ಮಾಡದಿರುವುದು ಅಥವಾ ಅದಕ್ಕಾಗಿ ಹಣ ಕೇಳಿದ ಕುರಿತು 1,222 ದೂರುಗಳು ದಾಖಲಾಗಿದ್ದವು. ದುರಸ್ತಿ ಮಾಡಿದ ಬಳಿಕವೂ ಸಮಸ್ಯೆ ಮುಂದುವರಿದಿರುವ ಬಗ್ಗೆ 461 ದೂರುಗಳು ಬಂದಿದ್ದವು.

ಇ-ಮುದ್ರಾ ಭದ್ರತಾ ಲೋಪದ ಕುರಿತು ಕೇಂದ್ರ ಸರ್ಕಾರ ಸ್ಪಷ್ಟನೆ; ನಿಜಕ್ಕೂ ಏನಾಯ್ತು?

ಸಮಸ್ಯೆ ಎದುರಾದರೆ ದೂರು ನೀಡುವುದು ಹೇಗೆ?

ಮೊಬೈಲ್‌ನಲ್ಲಿ ತೊಂದರೆ ಕಾಣಿಸಿಕೊಂಡರೆ ಮೊದಲು ಕಂಪನಿಯ ಅಧಿಕೃತ ಸೇವಾ ಕೇಂದ್ರವನ್ನು ಸಂಪರ್ಕಿಸಿ. ಸಮಸ್ಯೆಯ ಫೋಟೊ ಅಥವಾ ವಿಡಿಯೊ ತೆಗೆದಿಟ್ಟುಕೊಳ್ಳಿ. ಖರೀದಿ ರಸೀದಿ, ವಾರಂಟಿ ವಿವರ ಮತ್ತು ದುರಸ್ತಿ ಸಂಬಂಧಿತ ದಾಖಲೆಗಳನ್ನು ಸುರಕ್ಷಿತವಾಗಿ ಇರಿಸಿಕೊಳ್ಳಿ.

ಕಂಪನಿಯಿಂದ ಸೂಕ್ತ ಪರಿಹಾರ ಸಿಗದಿದ್ದರೆ ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿಯ 1915 ಸಂಖ್ಯೆಗೆ ಕರೆ ಮಾಡಿ ದೂರು ದಾಖಲಿಸಬಹುದು. ಅಧಿಕೃತ ಗ್ರಾಹಕ ಸಹಾಯವಾಣಿ ಪೋರ್ಟಲ್‌ ಮೂಲಕವೂ ದೂರು ಸಲ್ಲಿಸುವ ಅವಕಾಶವಿದೆ. ಸರ್ಕಾರದ ಮಾಹಿತಿಯ ಪ್ರಕಾರ, 8800001915 ಸಂಖ್ಯೆಯ ವಾಟ್ಸ್‌ಆ್ಯಪ್‌ ಮೂಲಕವೂ ಸಂಪರ್ಕಿಸುವ ಅವಕಾಶವಿದೆ.

ದೂರು ಸಲ್ಲಿಸುವಾಗ ಮೊಬೈಲ್‌ನ ಮಾದರಿ, ಖರೀದಿಸಿದ ದಿನಾಂಕ, ಎದುರಾಗಿರುವ ಸಮಸ್ಯೆ ಮತ್ತು ಕಂಪನಿಯೊಂದಿಗೆ ನಡೆಸಿದ ಸಂವಹನದ ವಿವರಗಳನ್ನು ಸ್ಪಷ್ಟವಾಗಿ ನೀಡಬೇಕು. ದುರಸ್ತಿ, ಬದಲಿ ಸಾಧನ ಅಥವಾ ಹಣ ಮರುಪಾವತಿ, ಇವುಗಳಲ್ಲಿ ಯಾವ ಪರಿಹಾರವನ್ನು ಬಯಸುತ್ತೀರಿ ಎಂಬುದನ್ನೂ ತಿಳಿಸಬೇಕು.

ಒಟ್ಟಾರೆ ಮೊಬೈಲ್‌ ಖರೀದಿಸುವಾಗ ಬೆಲೆ ಮತ್ತು ವೈಶಿಷ್ಟ್ಯಗಳ ಜೊತೆಗೆ ವಾರಂಟಿ ನಿಯಮಗಳು ಹಾಗೂ ಮಾರಾಟದ ನಂತರದ ಸೇವೆಗಳ ಬಗ್ಗೆಯೂ ತಿಳಿದುಕೊಳ್ಳುವುದು ಮುಖ್ಯ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ