ಭಾರತದಿಂದ ಇನ್ನೂ 8-9 ವ್ಯಾಪಾರ ಒಪ್ಪಂದಗಳಿಗೆ ಮಾತುಕತೆ ಚಾಲನೆಯಲ್ಲಿ: ಪಿಯೂಷ್ ಗೋಯಲ್

ನವದೆಹಲಿ, ಆಗಸ್ಟ್ 24: ಭಾರತ ಇತ್ತೀಚಿನ ವರ್ಷಗಳಿಂದ ಕೆಲವು ದೇಶಗಳು ಹಾಗೂ ಗುಂಪುಗಳೊಂದಿಗೆ ವ್ಯಾಪಾರ ಒಪ್ಪಂದ ಮಾಡಿಕೊಂಡಿದೆ. ಇನ್ನೂ ಹಲವು ದೇಶಗಳ ಜೊತೆ ಮಾತುಕತೆಗಳು ನಡೆಯುತ್ತಿವೆ. ವಾಣಿಜ್ಯ ಸಚಿವ ಪಿಯೂಷ್ ಗೋಯಲ್ (Piyush Goyal) ಪ್ರಕಾರ, 8-9 ದೇಶಗಳು ಮತ್ತು ಗುಂಪುಗಳೊಂದಿಗೆ ಒಪ್ಪಂದಕ್ಕಾಗಿ ಮಾತುಕತೆಗಳು ಚಾಲನೆಯಲ್ಲಿವೆಯಂತೆ. ಜಪಾನ್‌ನಲ್ಲಿ ನಡೆದ ಭಾರತ ಮತ್ತು ಜಪಾನ್ ವ್ಯಾಪಾರ ಪ್ರತಿನಿಧಿಗಳ ಸಭೆಯನ್ನು ಉದ್ದೇಶಿಸಿ ಮಾತನಾಡುತ್ತಾ ಅವರು ಈ ಮಾಹಿತಿ ಹಂಚಿಕೊಂಡಿದ್ದಾರೆ. ಈ ಒಪ್ಪಂದಗಳ ಬಳಿಕ ಭಾರತಕ್ಕೆ ವಿಶ್ವದ ಶೇ. 75ರಷ್ಟು ಮಾರುಕಟ್ಟೆ ಪ್ರವೇಶ ಸಿಗುತ್ತದೆ ಎಂದು ಅವರು ಹೇಳಿದ್ದಾರೆ. ಪೀಯೂಷ್ ಗೋಯಲ್ ನೀಡಿದ ಮಾಹಿತಿ ಈ ಕೆಳಕಂಡಂತಿದೆ:

ಹೊಸ ಒಪ್ಪಂದಗಳ ಮಾತುಕತೆ: ಭಾರತವು ಪ್ರಸ್ತುತ ಕನಿಷ್ಠ 8 ರಿಂದ 9 ದೇಶಗಳ ಗುಂಪುಗಳು ಮತ್ತು ಪ್ರತ್ಯೇಕ ರಾಷ್ಟ್ರಗಳೊಂದಿಗೆ ಮುಕ್ತ ವ್ಯಾಪಾರ ಒಪ್ಪಂದಗಳ ಕುರಿತು ಮಾತುಕತೆ ನಡೆಸುತ್ತಿದೆ. ಈ ದೇಶಗಳು ಒಟ್ಟಾರೆಯಾಗಿ ಸುಮಾರು 15 ಟ್ರಿಲಿಯನ್ ಡಾಲರ್‌ಗಳಷ್ಟು ಜಿಡಿಪಿ ಹೊಂದಿವೆ.

ಇದನ್ನೂ ಓದಿ: ರಾಷ್ಟ್ರೀಯ ಬಾಹ್ಯಾಕಾಶ ದಿನ: ಭಾರತದ ಬಾಹ್ಯಾಕಾಶ ಯೋಜನೆಗಳಿಗೆ ಶಕ್ತಿ ತುಂಬುತ್ತಿರುವ ‘ಮೇಡ್ ಇನ್ ಇಂಡಿಯಾ’ ಚಿಪ್‌ಗಳು

ಪ್ರಸ್ತುತ ಒಪ್ಪಂದಗಳ ವ್ಯಾಪ್ತಿ: ಕಳೆದ ನಾಲ್ಕು ವರ್ಷಗಳಲ್ಲಿ ಭಾರತವು ಒಟ್ಟು 60 ಟ್ರಿಲಿಯನ್ ಡಾಲರ್ ಜಿಡಿಪಿ ಹೊಂದಿರುವ ದೇಶಗಳೊಂದಿಗೆ 9 ಮುಕ್ತ ವ್ಯಾಪಾರ ಒಪ್ಪಂದಗಳಿಗೆ ಸಹಿ ಹಾಕಿದೆ. ಇದರೊಂದಿಗೆ ಜಪಾನ್, ಕೊರಿಯಾ ಮತ್ತು ಆಸಿಯಾನ್ (ASEAN) ಪ್ರದೇಶದ ಹಿಂದಿನ ಒಪ್ಪಂದಗಳು ಮತ್ತೊಂದು 10 ಟ್ರಿಲಿಯನ್ ಡಾಲರ್ ಜಿಡಿಪಿಯನ್ನು ತೆರೆದಿವೆ.

ಒಟ್ಟು ಮಾರುಕಟ್ಟೆ ಪ್ರವೇಶ: ಪ್ರಸ್ತುತ ಭಾರತವು ಒಟ್ಟು 70 ಟ್ರಿಲಿಯನ್ ಡಾಲರ್‌ಗಳಷ್ಟು ಮಾರುಕಟ್ಟೆಗೆ ಆದ್ಯತೆಯ ಪ್ರವೇಶವನ್ನು ಮುಕ್ತಗೊಳಿಸಿದೆ. ಹೊಸ ಒಪ್ಪಂದಗಳು ಅಂತಿಮಗೊಂಡರೆ, ಜಾಗತಿಕ ವಾಣಿಜ್ಯದ ಸುಮಾರು ಶೇ. 75ರಷ್ಟು ಭಾಗವು ಮುಕ್ತ ವ್ಯಾಪಾರ ಒಪ್ಪಂದಗಳ ವ್ಯಾಪ್ತಿಗೆ ಬರಲಿದೆ.

ಇದನ್ನೂ ಓದಿ: ಭಾರತ-ಅಮೆರಿಕ ವ್ಯಾಪಾರ ಒಪ್ಪಂದ, ತಾತ್ವಿಕವಾಗಿ ಅಂತಿಮ; ಕಾನೂನು ಅಂಶಗಳು ಅಂತಿಮಗೊಳ್ಳುವುದಷ್ಟೇ ಬಾಕಿ: ರಾಯಭಾರಿ ಸೆರ್ಗಿಯೋ ಗೋರ್

ಹೂಡಿಕೆ ಅವಕಾಶಗಳು: ಭಾರತದಲ್ಲಿ ಡಾಟಾ ಸೆಂಟರ್‌ಗಳು (Data Centers), ಉತ್ಪಾದನಾ ವಲಯ (Manufacturing) ಮತ್ತು ಕೃತಕ ಬುದ್ಧಿಮತ್ತೆ (Artificial Intelligence – AI) ಕ್ಷೇತ್ರಗಳಲ್ಲಿ ದೊಡ್ಡ ಮಟ್ಟದ ಹೂಡಿಕೆಗೆ ಅವಕಾಶಗಳಿವೆ ಎಂದು ಟೋಕಿಯೋದಲ್ಲಿ ಪಿಯೂಷ್ ಗೋಯಲ್ ಅವರು ತಿಳಿಸಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ