ಚ್ಯಾಟ್ಜಿಪಿಟಿ, ಡೀಪ್ಸೀಕ್ಗೆ ಸಮನಾದ ಎಲ್ಎಲ್ಎಂ ನಿರ್ಮಿಸಲಿರುವ ಭಾರತ; ಮಹತ್ವಾಕಾಂಕ್ಷಿ ಎಐ ಮಿಷನ್ಗೆ 8 ಸಂಸ್ಥೆಗಳ ಆಯ್ಕೆ
India to build massive 1 trillion parameter AI model: ಚ್ಯಾಟ್ಜಿಪಿಟಿಗೆ ಸಮನಾದ ಲಾರ್ಜ್ ಲ್ಯಾಂಗ್ವೇಜ್ ಎಐ ಮಾಡಲ್ ಅನ್ನು ನಿರ್ಮಿಸಲು ಭಾರತ ಹೊರಟಿದೆ. ಮಹತ್ವಾಕಾಂಕ್ಷಿ ಎಐ ಮಿಷನ್ ಅಡಿಯಲ್ಲಿ ವಿವಿಧ ಎಐ ಮಾಡಲ್ಗಳನ್ನು ಅಭಿವೃದ್ಧಿಪಡಿಸಲು ಸರ್ಕಾರ 8 ಸಂಸ್ಥೆಗಳನ್ನು ಆಯ್ಕೆ ಮಾಡಿದೆ. ಟೆಕ್ ಮಹೀಂದ್ರ, ಐಐಟಿ ಬಾಂಬೆ ಮೊದಲಾದ ಸಂಸ್ಥೆಗಳು ಈ ಹೊಣೆ ಪಡೆದಿವೆ.
ನವದೆಹಲಿ, ಸೆಪ್ಟೆಂಬರ್ 21: ಭಾರತ ಎಲ್ಲಾ ಕ್ಷೇತ್ರಗಳಲ್ಲೂ ಸ್ವಾವಲಂಬನೆ ಸಾಧಿಸಲು ಹಾಗೂ ಬೃಹತ್ ಮಾರುಕಟ್ಟೆಯಾಗಿ ಬೆಳೆಯಲು ಸಕಲ ಪ್ರಯತ್ನಗಳನ್ನೂ ಹಾಕುತ್ತಿದೆ. ಈಗಾಗಲೇ ಬಹಳ ಮಹತ್ವ ಪಡೆದಿರುವ ಎಐ ಇತ್ಯಾದಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಅಮೆರಿಕ, ಚೀನಾದ ಮುನ್ನಡೆಯ ಮಟ್ಟ ತಲುಪಲು ಭಾರತ ದೊಡ್ಡ ಯೋಜನೆ ಹಾಕಿದೆ. ಚ್ಯಾಟ್ಜಿಪಿಟಿಯ ಸುಧಾರಿತ ಆವೃತ್ತಿಯಷ್ಟು ಪ್ರಬಲವಾದ ಎಐ ಮಾಡಲ್ ಅಥವಾ ಎಲ್ಎಲ್ಎಂಗಳನ್ನು (LLM- Large Language Model) ನಿರ್ಮಿಸಲು ಸರ್ಕಾರ ಸಂಕಲ್ಪ ತೊಟ್ಟಿದೆ. ಈ ನಿಟ್ಟಿನಲ್ಲಿ ಎಂಟು ಸಂಸ್ಥೆಗಳನ್ನು ಆಯ್ಕೆ ಮಾಡಲಾಗಿದೆ.
ಕೇಂದ್ರ ಐಟಿ ಸಚಿವ ಡಾ. ಅಶ್ವಿನಿ ವೈಷ್ಣವ್ ಅವರು ಇತ್ತೀಚೆಗೆ (ಸೆ. 18) ನಡೆದ ಎಐ ಇಂಪ್ಯಾಕ್ಟ್ ಸಮಿಟ್ 2026 (AI Impact Summit) ಸಂದರ್ಭದಲ್ಲಿ ಪ್ರಬಲ ಎಲ್ಎಲ್ಎಂಗಳನ್ನು ನಿರ್ಮಿಸಲು ಆಯ್ಕೆ ಮಾಡಲಾಗಿರುವ ಎಂಟು ಸಂಸ್ಥೆಗಳನ್ನು ಹೆಸರಿಸಿದ್ದಾರೆ. ಐಐಟಿ ಬಾಂಬೆ, ಟೆಕ್ ಮಹೀಂದ್ರ ಸಂಸ್ಥೆಗಳು ಇದರಲ್ಲಿ ಸೇರಿವೆ.
ಇದನ್ನೂ ಓದಿ: ಗಗನಕ್ಕೇರಿತು ರಾಜ್ಯಗಳ ಸಾಲ; ಮಿತಿಮೀರಿದ ಪಂಜಾಬ್ ಸಾಲ; ಕರ್ನಾಟಕದ್ದು ಎಷ್ಟು?
ಇಂಡಿಯಾ ಎಐ ಮಿಷನ್ ಮೂಲಕ ಈ ಪ್ರಯತ್ನಗಳಿಗೆ ಬೆಂಬಲ ನೀಡಲಾಗುತ್ತಿದೆ. ಸುಮಾರು 988.6 ಕೋಟಿ ರೂ ಮೊತ್ತದ ಧನಸಹಾಯಕ್ಕೆ ಅನುಮೋದನೆ ಕೊಡಲಾಗಿದೆ. ಈ ಮಿಷನ್ನಲ್ಲಿ ಹಲವು ಪ್ರಾಜೆಕ್ಟ್ಗಳನ್ನು ಕೈಗೊಳ್ಳಲಾಗುತ್ತಿದೆ. ಇದರಲ್ಲಿ ಐಐಟಿ ಬಾಂಬೆ ಬಹಳ ಮಹತ್ವದ ಪ್ರಾಜೆಕ್ಟ್ ಮುನ್ನಡೆಸಲಿದೆ. ಭಾರತ್ಜೆನ್ ಕನ್ಸಾರ್ಟಿಯಂ ಮೂಲಕ ಐಐಟಿ ಬಾಂಬೆ ಬಹಳ ಶಕ್ತಿಶಾಲಿ ಎಲ್ಎಲ್ಎಂ ಅನ್ನು ಅಭಿವೃದ್ದಿಪಡಿಸಲಿದೆ.
ಎಐ ಪ್ರಾಜೆಕ್ಟ್ಗಳನ್ನು ಕೈಗೊಳ್ಳಲು ಸರ್ಕಾರ ಆಯ್ಕೆ ಮಾಡಿದ 8 ಸಂಸ್ಥೆಗಳು
- ಐಐಟಿ ಬಾಂಬೆ (ಭಾರತ್ ಜೆನ್ ಕನ್ಸಾರ್ಟಿಯಂ)
- ಟೆಕ್ ಮಹೀಂದ್ರ
- ಫ್ರಾಕ್ಟಲ್ ಅನಾಲಿಟಿಕ್ಸ್
- ಅವತಾರ್ಎಐ
- ಜೇನ್ಟೇಕ್ ಎಐಟೆಕ್ ಇನ್ನೋವೇಶನ್ಸ್
- ಜೆನ್ಲೂಪ್ ಇಂಟೆಲಿಜೆನ್ಸ್ ಪ್ರೈ ಲಿ
- ನ್ಯೂರೋ ಡಿಎಕ್ಸ್ (ಇಂಟೆಲಿಹೆಲ್ತ್)
- ಶೋಧ್ ಎಐ
ಒಂದು ಟ್ರಿಲಿಯನ್ ಪ್ಯಾರಮೀಟರ್ನ ಎಲ್ಎಲ್ಎಂ
ಈ ಮೇಲಿನ ಎಂಟೂ ರಾಜ್ಯಗಳು ಬೇರೆ ಬೇರೆ ಗುರಿಗಳಿರುವ ಫೌಂಡೇಶನಲ್ ಎಐ ಮಾಡಲ್ಗಳನ್ನು ನಿರ್ಮಿಸಲು ನೆರವಾಗಲಿವೆ. ಭಾರತ್ಜೆನ್ ಕನ್ಸಾರ್ಟಿಯಂ (BharatGen Consortium) ಮೂಲಕ ಐಐಟಿ ಬಾಂಬೆ ನಡೆಸಲಿರುವ ಎಐ ಪ್ರಾಜೆಕ್ಟ್ ಮಹತ್ವದ್ದಾಗಿದೆ. ಒಂದು ಟ್ರಿಲಿಯನ್ ಪ್ಯಾರಮೀಟರ್ಗಳಿರುವ ಎಲ್ಎಲ್ಎಂ ಅನ್ನು ಇದು ಅಭಿವೃದ್ಧಿಪಡಿಸಲಿದೆ. ಡೀಪ್ಸೀಕ್, ಚ್ಯಾಟ್ಜಿಪಿಟಿಯಂತಹ ಕೆಲವೇ ಕೆಲವು ಎಐ ಮಾಡಲ್ಗಳು ಮಾತ್ರ ಒಂದು ಟ್ರಿಲಿಯನ್ (ಒಂದು ಲಕ್ಷ ಕೋಟಿ) ಪ್ಯಾರಮೀಟರ್ ಹೊಂದಿವೆ.
ಇದನ್ನೂ ಓದಿ: ಏಷ್ಯನ್ ಪೇಂಟ್ಸ್ ಕಥೆ… 1942ರಲ್ಲಿ ನಾಲ್ವರು ಹುಡುಗರು ಕಟ್ಟಿದ ಕಂಪನಿ; ಆರು ದಶಕಗಳಿಂದ ಇದು ನಂ. 1
ಪ್ಯಾರಮೀಟರ್ ಪ್ರಮಾನ ಹೆಚ್ಚಿದಷ್ಟೂ ಭಾಷೆಯನ್ನು ಅರಿಯುವ ನಿಖರತೆ ಹೆಚ್ಚುತ್ತದೆ. ಹೀಗಾಗಿ, ಭಾರತದ ಮಟ್ಟಿಗೆ ಒಂದು ಟ್ರಿಲಿಯನ್ ಪ್ಯಾರಮೀಟರ್ನ ಎಐ ಮಾಡಲ್ ನಿಜಕ್ಕೂ ಶ್ಲಾಘನೀಯ. ವಿದೇಶಗಳ ಎಐ ಮಾಡಲ್ ಬದಲು ದೇಶೀಯವಾದ ವಿಶ್ವಶ್ರೇಷ್ಠ ಎಐ ಬಳಸುವ ಅವಕಾಶ ಸಿಕ್ಕಲಿದೆ.
ಈಗಾಗಲೇ ಸರ್ವಂ ಎಐ ಇತ್ಯಾದಿ ಕೆಲ ಭಾರತೀಯ ಎಐ ಮಾಡಲ್ಗಳು ನಿರ್ಮಾಣವಾಗಿವೆಯಾದರೂ ಅವು ಬೇರೆ ದೇಶದ ಪ್ಲಾಟ್ಫಾರ್ಮ್ಗಳಲ್ಲಿ ಅಭಿವೃದ್ಧಿಯಾಗಿರುವಂತಹವು. ಸರ್ವಂ ಎಐ ಅನ್ನು ಓಪನ್ ಸೋರ್ಸ್ನ ಹಾಗೂ 24 ಬಿಲಿಯನ್ ಪ್ಯಾರಮೀಟರ್ ಇರುವ ಮಿಸ್ಟ್ರಾಲ್ ಎಐ ಪ್ಲಾಟ್ಫಾರ್ಮ್ ಬಳಸಿ ನಿರ್ಮಿಸಲಾಗಿದೆ. ಈಗ ಸಂಪೂರ್ಣ ಸ್ವಂತವಾಗಿ ಎಲ್ಎಲ್ಎಂಗಳನ್ನು ನಿರ್ಮಿಸಲು ಹೊರಟಿದೆ. ಬೇರೆ ಪ್ಲಾಟ್ಫಾರ್ಮ್ಗಳ ಅವಶ್ಯಕತೆ ಇರುವುದಿಲ್ಲ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ