ಭಾರತದ ಜಿಡಿಪಿ ಲೆಕ್ಕಾಚಾರದಲ್ಲಿ ಬದಲಾವಣೆ: ಮೂಲ ವರ್ಷ 2022-23ಕ್ಕೆ ವರ್ಗಾವಣೆ – ಇದರ ಅರ್ಥ ಮತ್ತು ಪರಿಣಾಮಗಳೇನು?
India's GDP Base Year Shift from 2011-12 to 2022-23: ಭಾರತವು ತನ್ನ ಜಿಡಿಪಿ ಮೂಲ ವರ್ಷವನ್ನು 2011-12 ರಿಂದ 2022-23ಕ್ಕೆ ಬದಲಾಯಿಸಿದೆ. ಈ ಬದಲಾವಣೆಯು ಡಿಜಿಟಲ್ ಸೇವೆಗಳು, ಗಿಗ್ ಆರ್ಥಿಕತೆ ಸೇರಿದಂತೆ ಆಧುನಿಕ ಆರ್ಥಿಕ ರಚನೆಯನ್ನು ಪ್ರತಿಬಿಂಬಿಸುತ್ತದೆ. ಕೋವಿಡ್ ನಂತರದ ಸಾಮಾನ್ಯ ವರ್ಷವಾದ 2022-23, ನಿಖರ ಅಂದಾಜಿಗೆ ಸೂಕ್ತವಾಗಿದೆ. ಹೊಸ ಲೆಕ್ಕಾಚಾರಗಳು ಉತ್ಪಾದನೆ, ಸೇವಾ ವಲಯದ ಪಾಲುಗಳನ್ನು ಸ್ಪಷ್ಟಪಡಿಸಿ, ಅಂತರಾಷ್ಟ್ರೀಯ ಹೂಡಿಕೆದಾರರಲ್ಲಿ ವಿಶ್ವಾಸ ಹೆಚ್ಚಿಸಲಿದೆ.
ನವದೆಹಲಿ, ಮೆ 8: ಭಾರತ ಸರ್ಕಾರವು ದೇಶದ ಆರ್ಥಿಕ ಪ್ರಗತಿಯನ್ನು ಅಳೆಯುವ ಜಿಡಿಪಿ (GDP- ಒಟ್ಟು ದೇಶೀಯ ಉತ್ಪನ್ನ) ಲೆಕ್ಕಾಚಾರದ ಮೂಲ ವರ್ಷವನ್ನು (Base Year) 2011-12ರಿಂದ 2022-23ಕ್ಕೆ ಬದಲಾಯಿಸಿದೆ. ಈ ಬದಲಾವಣೆಯು ದೇಶದ ಆರ್ಥಿಕತೆಯ ನೈಜ ಚಿತ್ರಣವನ್ನು ನೀಡಲು ಸಹಕಾರಿಯಾಗಲಿದೆ. ಜಿಡಿಪಿ ಲೆಕ್ಕಾಚಾರ ಮಾಡುವಾಗ ಬೆಲೆ ಏರಿಕೆಯ (ಹಣದುಬ್ಬರ) ಪ್ರಭಾವವನ್ನು ಹೊರತುಪಡಿಸಿ, ಕೇವಲ ಉತ್ಪಾದನೆಯಲ್ಲಿನ ನೈಜ ಬೆಳವಣಿಗೆಯನ್ನು ಅಳೆಯಲು ಒಂದು ನಿರ್ದಿಷ್ಟ ವರ್ಷದ ಬೆಲೆಗಳನ್ನು ಆಧಾರವಾಗಿಟ್ಟುಕೊಳ್ಳಲಾಗುತ್ತದೆ. ಇದನ್ನೇ ‘ಮೂಲ ವರ್ಷ’ ಎನ್ನಲಾಗುತ್ತದೆ. ಇದುವರೆಗೆ 2011-12ರ ಬೆಲೆಗಳನ್ನು ಆಧರಿಸಿ ಜಿಡಿಪಿ ಲೆಕ್ಕ ಹಾಕಲಾಗುತ್ತಿತ್ತು. ಆದರೆ, ಪರಿಸ್ಥಿತಿ ಈಗ ಬದಲಾಗಿರುವ ಕಾರಣ ಜಿಡಿಪಿ ಲೆಕ್ಕಾಚಾರದ ಕ್ರಮಗಳಲ್ಲೂ ಬದಲಾವಣೆ ಮಾಡಬೇಕಾಗಿದೆ.
ಮೂಲ ವರ್ಷ ಬದಲಾವಣೆ ಯಾಕೆ?
ಕಳೆದ ಹತ್ತು ವರ್ಷಗಳಲ್ಲಿ ಭಾರತದ ಆರ್ಥಿಕ ರಚನೆ ಬದಲಾಗಿದೆ. ಡಿಜಿಟಲ್ ಸೇವೆಗಳು, ಗಿಗ್ ಎಕಾನಮಿ (Gig Economy) ಮತ್ತು ನವೋದ್ಯಮಗಳ ಪಾಲು ಹೆಚ್ಚಾಗಿದೆ. ಹಳೆಯ ಮೂಲ ವರ್ಷವು ಈ ಹೊಸ ಬದಲಾವಣೆಗಳನ್ನು ಸರಿಯಾಗಿ ಗುರುತಿಸುತ್ತಿರಲಿಲ್ಲ.
ಇದನ್ನೂ ಓದಿ: ಬೈನಾನ್ಸ್ನಿಂದ ಹೊಸ ‘ವಿತ್ಡ್ರಾ ಪ್ರೊಟೆಕ್ಷನ್’: ಬಳಕೆದಾರರ ಕ್ರಿಪ್ಟೋ ಆಸ್ತಿಗಳಿಗೆ ಈಗ ಹೆಚ್ಚುವರಿ ಭದ್ರತೆ
2019 ರಿಂದ 2021ರ ಅವಧಿಯು ಕೋವಿಡ್ ಸಾಂಕ್ರಾಮಿಕ ರೋಗದಿಂದಾಗಿ ಆರ್ಥಿಕ ಏರಿಳಿತ ಕಂಡಿತ್ತು. 2022-23 ವರ್ಷವು ಒಂದು ‘ಸಾಮಾನ್ಯ’ (Normal) ವರ್ಷವೆಂದು ಪರಿಗಣಿಸಲ್ಪಟ್ಟಿದ್ದರಿಂದ ಅದನ್ನು ಮೂಲ ವರ್ಷವಾಗಿ ಆಯ್ಕೆ ಮಾಡಲಾಗಿದೆ.
ಈಗ ಜಿಎಸ್ಟಿ (GST), ಇ-ವಾಹನ್ ಪೋರ್ಟಲ್ ಮತ್ತು ಹೊಸ ಕಾರ್ಮಿಕ ಸಮೀಕ್ಷೆಗಳಂತಹ ಆಧುನಿಕ ದತ್ತಾಂಶಗಳನ್ನು ಲೆಕ್ಕಾಚಾರಕ್ಕೆ ಬಳಸಿಕೊಳ್ಳಲಾಗುತ್ತಿದೆ.
ಮೂಲ ವರ್ಷ ಬದಲಾವಣೆಯಿಂದ ಪರಿಣಾಮಗಳೇನು?
ಹೊಸ ಮೂಲ ವರ್ಷದ ಅನ್ವಯ 2025-26ರ ಹಣಕಾಸು ವರ್ಷದ ಅಂದಾಜು ಜಿಡಿಪಿ ಬೆಳವಣಿಗೆ ದರವು ಶೇ. 7.4 ರಿಂದ ಶೇ. 7.6ಕ್ಕೆ ಏರಿಕೆ ಆಗಬಹುದು. ಕೃಷಿ ಮತ್ತು ಕೈಗಾರಿಕಾ ವಲಯದ ಪಾಲು ಜಿಡಿಪಿಯಲ್ಲಿ ಸ್ವಲ್ಪ ಮಟ್ಟಿಗೆ ಹೆಚ್ಚಾಗಿದ್ದು, ಸೇವಾ ವಲಯದ ಪಾಲಿನಲ್ಲಿ ಅಲ್ಪ ಇಳಿಕೆ ಕಂಡುಬಂದಿದೆ.
ಜಿಡಿಪಿ ಲೆಕ್ಕಾಚಾರವು ಹೆಚ್ಚು ಪಾರದರ್ಶಕ ಮತ್ತು ನಿಖರವಾಗಿರುವುದರಿಂದ ಅಂತರಾಷ್ಟ್ರೀಯ ಹೂಡಿಕೆದಾರರಿಗೆ ಭಾರತದ ಆರ್ಥಿಕತೆಯ ಮೇಲೆ ಹೆಚ್ಚಿನ ವಿಶ್ವಾಸ ಮೂಡಲಿದೆ.
ಇದನ್ನೂ ಓದಿ: ಆಯುಷ್ಮಾನ್ ಭಾರತ್ ಹೆಲ್ತ್ ಇನ್ಷೂರೆನ್ಸ್; ಬೆಂಗಳೂರಿನಲ್ಲಿ ಎಐ ಹ್ಯಾಕಥಾನ್ ಶೋಕೇಸ್
ಜಿಡಿಪಿ ಲೆಕ್ಕಾಚಾರದಲ್ಲಿ ಕೆಲ ಪ್ರಮುಖ ಬದಲಾವಣೆಗಳಿವು, ಗಮನಿಸಿ
- ಉತ್ಪಾದನಾ ವಲಯದಲ್ಲಿ ‘ಡಬಲ್ ಡಿಫ್ಲೇಶನ್’ (Double Deflation) ಎಂಬ ಹೊಸ ತಂತ್ರಜ್ಞಾನ ಬಳಸಿ ಬೆಲೆ ಏರಿಕೆಯನ್ನು ಹೆಚ್ಚು ನಿಖರವಾಗಿ ಸರಿಹೊಂದಿಸಲಾಗುತ್ತಿದೆ.
- ಅನೌಪಚಾರಿಕ ವಲಯದ (Unorganised Sector) ಲೆಕ್ಕಾಚಾರಕ್ಕಾಗಿ ಹೊಸ ವಾರ್ಷಿಕ ಸಮೀಕ್ಷೆಗಳನ್ನು (ASUSE) ಬಳಸಲಾಗುತ್ತಿದೆ.
ಈ ಬದಲಾವಣೆಯು ಭಾರತವನ್ನು ವಿಶ್ವದ ವೇಗವಾಗಿ ಬೆಳೆಯುತ್ತಿರುವ ದೊಡ್ಡ ಆರ್ಥಿಕತೆಯಾಗಿ ಮತ್ತಷ್ಟು ಬಲವಾಗಿ ಬಿಂಬಿಸಲು ಸಹಾಯ ಮಾಡಲಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ