ಭಾರತದ ಸ್ಟಾರ್ಟಪ್​ಗಳಿಗೆ ಈ ವಾರ ಫಂಡಿಂಗ್ ಸುಗ್ಗಿ; ಶೇ. 226ರಷ್ಟು ಫಂಡಿಂಗ್ ಹೆಚ್ಚಳ

ನವದೆಹಲಿ, ನವೆಂಬರ್ 24: ಭಾರತದ ಸ್ಟಾರ್ಟಪ್​ಗಳಿಗೆ ಈ ವಾರ ಉತ್ತಮ ಮೊತ್ತದ ಹೂಡಿಕೆಗಳು ಸಿಕ್ಕಿವೆ. ಕಳೆದ ವಾರಕ್ಕೆ ಹೋಲಿಸಿದರೆ ಭಾರತೀಯ ಸ್ಟಾರ್ಟಪ್​ಗಳು ಈ ವಾರ ಶೇ. 226ರಷ್ಟು ಹೆಚ್ಚು ಫಂಡಿಂಗ್ ಪಡೆಯುವಲ್ಲಿ ಸಫಲವಾಗಿವೆ. ವರದಿ ಪ್ರಕಾರ ಕಳೆದ ವಾರ ಭಾರತೀಯ ಸ್ಟಾರ್ಟಪ್​ಗಳಿಗೆ 19 ಡೀಲ್​ಗಳು ಸಿಕ್ಕಿದ್ದವು. ಒಟ್ಟು 182.62 ಮಿಲಿಯನ್ ಡಾಲರ್​ನಷ್ಟು ಫಂಡಿಂಗ್ ದೊರಕಿತ್ತು. ಈ ವಾರ ಸಿಕ್ಕಿರುವ ಫಂಡಿಂಗ್ ಮೊತ್ತ 596 ಮಿಲಿಯನ್ ಡಾಲರ್. ಅಂದರೆ ಸುಮಾರು 5,000 ಕೋಟಿ ರೂಗೂ ಅಧಿಕ ಬಂಡವಾಳವನ್ನು ಸಂಗ್ರಹಿಸಲು ಸ್ಟಾರ್ಟಪ್​ಗಳು ಯಶಸ್ವಿಯಾಗಿವೆ.

ನವೆಂಬರ್ 18ರಿಂದ ಹಿಡಿದು ನ. 23ರವರೆಗೆ 23ಕ್ಕೂ ಹೆಚ್ಚು ಸ್ಟಾರ್ಟಪ್​ಗಳು ಹೂಡಿಕೆಗಳನ್ನು ಪಡೆಯುವಲ್ಲಿ ಸಫಲವಾಗಿವೆ. ಇದರಲ್ಲಿ ಆರಂಭಿಕ ಹಂತದ ಒಪ್ಪಂದಗಳ ಸಂಖ್ಯೆ 15 ಇದ್ದರೆ, ಮುಂದುವರಿದ ಭಾಗವಾಗಿ 6 ಒಪ್ಪಂದಗಳು ಒಳಗೊಂಡಿವೆ.

ಇದನ್ನೂ ಓದಿ: ಉಚಿತವಾಗಿ ಆಧಾರ್ ಅಪ್​ಡೇಟ್ ಮಾಡಲು ಡಿಸೆಂಬರ್​ನಲ್ಲಿ ಗಡುವು; ಅದಾದ ಬಳಿಕ ಮುಂದೆ ಹೇಗೆ? ಇಲ್ಲಿದೆ ವಿವರ

ಕ್ವಿಕ್ ಕಾಮರ್ಸ್ ಕಂಪನಿಯಾದ ಜೆಪ್ಟೋವೊಂದೇ 350 ಮಿಲಿಯನ್ ಡಾಲರ್ ಫಂಡಿಂಗ್ ಪಡೆದಿದೆ. ಮೋತಿಲಾಲ್ ಓಸ್ವಾಲ್ ಅವರ ಖಾಸಗಿ ನಿಧಿಯಿಂದ ಹಣಕಾಸು ನೆರವು ಸಿಕ್ಕಿದೆ. ಕಳೆದ 5 ತಿಂಗಳಿಂದ ಝೆಪ್ಟೋ ಸಂಸ್ಥೆ ಪಡೆದಿರುವ ಒಟ್ಟು ಹೂಡಿಕೆ 1.3 ಬಿಲಿಯನ್ ಡಾಲರ್​ನಷ್ಟಾಗಿದೆ.

ಇನ್ನು, ಈ ವಾರ ಅತಿಹೆಚ್ಚು ಫಂಡಿಂಗ್ ಪಡೆದ ಕಂಪನಿಗಳಲ್ಲಿ ಎರಡನೇ ಸ್ಥಾನವು ಹೆಲ್ತ್​ಕಾರ್ಟ್​ಗೆ ಹೋಗುತ್ತದೆ. ಕ್ರಿಸ್​ಕ್ಯಾಪಿಟಲ್ ಮತ್ತು ಮೋತಿಲಾಲ್ ಓಸ್ವಾಲ್ ಆಲ್ಟರ್ನೇಟಿವ್ಸ್ ಸಂಸ್ಥೆಗಳು ಹೆಲ್ತ್​ಕಾರ್ಟ್​ಗೆ ಈ ವಾರ 153 ಮಿಲಿಯನ್ ಡಾಲರ್ ಫಂಡಿಂಗ್ ಮಾಡಿವೆ.

ಇನ್ಷೂರೆನ್ಸ್ ತಂತ್ರಜ್ಞಾನ ಪ್ಲಾಟ್​ಫಾರ್ಮ್ ಆಗಿರುವ ಝಾಪ್ಪರ್ ಸಂಸ್ಥೆ 25 ಮಿಲಿಯನ್ ಡಾಲರ್ ಫಂಡಿಂಗ್ ಪಡೆದಿದೆ. ಡೈರಿ ಸೆಕ್ಟರ್​ನಲ್ಲಿರುವ ದೂಧ್​ವಾಲೆ ಫಾರ್ಮ್ಸ್ ಎನ್ನುವ ಸಂಸ್ಥೆ 3 ಮಿಲಿಯನ್ ಫಂಡಿಂಗ್ ಪಡೆದಿದೆ.

ಇದನ್ನೂ ಓದಿ: ಸರ್ಕಾರಿ ನೌಕರರಿಗೆ ಸುಗ್ಗಿ; ಕನಿಷ್ಠ ಮೂಲವೇತನ 51,000 ರೂ ದಾಟಲಿದೆಯಾ? ಇಲ್ಲಿದೆ ಮಾಹಿತಿ

ಈ ವಾರ ಭಾರತೀಯ ಸ್ಟಾರ್ಟಪ್​ಗಳು ಮಾಡಿಕೊಂಡಿರುವ ಡೀಲ್​ಗಳಲ್ಲಿ ಸಿಂಹಪಾಲು ಬೆಂಗಳೂರಿನ ಸ್ಟಾರ್ಟಪ್​ಗಳಿಗೇ ಸಿಕ್ಕಿದೆ. 15 ಡೀಲ್​ಗಳಲ್ಲಿ ಹತ್ತು ಬೆಂಗಳೂರಿನ ಕಂಪನಿಗಳಿಂದ ಆಗಿವೆ. ದೆಹಲಿ, ಹೈದರಾಬಾದ್, ಚೆನ್ನೈ, ಮುಂಬೈ ಮತ್ತು ಪುಣೆಯ ಒಂದೊಂದು ಸ್ಟಾರ್ಟಪ್​ಗಳಿಗೆ ತಲಾ ಒಂದು ಡೀಲ್ ಸಿಕ್ಕಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ