ಎನ್​ಪಿಎಸ್ ಮಾಮೂಲಿಯ ಪೆನ್ಷನ್ ಸ್ಕೀಮ್ ಆಗಿ ಉಳಿದಿಲ್ಲ; ಪಿಂಚಣಿ ಮತ್ತು ಹೂಡಿಕೆ ಮೇಳೈಸಿದ ಈ ಯೋಜನೆಯಲ್ಲಿ ಆಗಿದೆ ಹೊಸ ಬದಲಾವಣೆ

ಸರ್ಕಾರದ ಹಳೆಯ ಪಿಂಚಣಿ ಸಿಸ್ಟಂಗೆ ಪರ್ಯಾಯವಾಗಿ ರೂಪಿಸಿದ್ದು ರಾಷ್ಟ್ರೀಯ ಪಿಂಚಣಿ ವ್ಯವಸ್ಥೆ (NPS – National Pension System). ಇದು ಕಾಲಕ್ರಮೇಣ ಕೇವಲ ನಿವೃತ್ತಿ ಯೋಜನೆಯಾಗಿ ಉಳಿಯದೆ, ಹೆಚ್ಛಿನ ರಿಟರ್ನ್ಸ್ ನೀಡುವ ಆಧುನಿಕ ಹೂಡಿಕೆ ಸಾಧನವಾಗಿ ರೂಪಾಂತರಗೊಂಡಿದೆ. ಅಗತ್ಯಕ್ಕೆ ತಕ್ಕಂತೆ ಬದಲಾವಣೆಗಳನ್ನು ಕಾಣುತ್ತಾ ಬಂದಿದೆ. ನಿವೃತ್ತಿ ಭದ್ರತೆ ಮಾತ್ರವಲ್ಲ, ಉತ್ತಮ ಆದಾಯ ಸೃಷ್ಟಿಸುವ ಪ್ಲಾಟ್​ಫಾರ್ಮ್ ಆಗಿದೆ. ಪಿಎಫ್‌ಆರ್‌ಡಿಎ (PFRDA) ಮತ್ತು ಕೇಂದ್ರ ಸರ್ಕಾರವು ತಂದಿರುವ ಪ್ರಮುಖ ಬದಲಾವಣೆಗಳು ಇಲ್ಲಿವೆ:

ಯುನಿಫೈಡ್ ಪೆನ್ಷನ್ ಸ್ಕೀಮ್ (UPS) ಆಯ್ಕೆ

ಸರ್ಕಾರಿ ನೌಕರರಿಗಾಗಿ ನೂತನ ‘ಯುನಿಫೈಡ್ ಪೆನ್ಷನ್ ಸ್ಕೀಮ್’ (UPS) ಅನ್ನು ತರಲಾಗಿದ್ದು, ಇದು ಎನ್‌ಪಿಎಸ್‌ನ ಮಾರುಕಟ್ಟೆ ಆಧಾರಿತ ರಿಟರ್ನ್ಸ್ ಹಾಗೂ ಹಳೆಯ ಪಿಂಚಣಿ ಯೋಜನೆಯ (OPS) ನಿಗದಿತ ಪಿಂಚಣಿ ಗ್ಯಾರಂಟಿ — ಎರಡರ ಅನುಕೂಲಗಳನ್ನೂ ಸಂಯೋಜಿಸುತ್ತದೆ. 25 ವರ್ಷ ಸೇವೆ ಸಲ್ಲಿಸಿದ ನೌಕರರಿಗೆ ಕೊನೆಯ 12 ತಿಂಗಳ ಸರಾಸರಿ ಮೂಲ ವೇತನದ ಶೇ. 50 ರಷ್ಟು ಪಿಂಚಣಿ ಗ್ಯಾರಂಟಿ ಸಿಗಲಿದೆ.

ಈಕ್ವಿಟಿ (ಷೇರು ಮಾರುಕಟ್ಟೆ) ಹೂಡಿಕೆ ಮಿತಿ ಹೆಚ್ಚಳ

ಖಾಸಗಿ ವಲಯದ ಚಂದಾದಾರರಿಗೆ ಎನ್‌ಪಿಎಸ್‌ನಲ್ಲಿ ಈಕ್ವಿಟಿ (Equity/E) ವಿಭಾಗದಲ್ಲಿ ಹೂಡಿಕೆ ಮಾಡುವ ಗರಿಷ್ಠ ಮಿತಿಯನ್ನು ಶೇ. 75 ಕ್ಕೆ ಏರಿಸಲಾಗಿದೆ. ಸರ್ಕಾರಿ ನೌಕರರಿಗೂ ಸಹ ತಮಗೆ ಬೇಕಾದ ಫಂಡ್ ಮ್ಯಾನೇಜರ್ ಮತ್ತು ಷೇರು ಹೂಡಿಕೆ ಪ್ರಮಾಣವನ್ನು ಆಯ್ಕೆ ಮಾಡಿಕೊಳ್ಳುವ ಸೌಲಭ್ಯ ನೀಡಲಾಗಿದೆ.

ಇದನ್ನೂ ಓದಿ: ಭಾರತದ ಕರೆನ್ಸಿ ನೋಟುಗಳ ಮೇಲೆ ಮಹಾತ್ಮ ಗಾಂಧಿ ಚಿತ್ರ ಮುದ್ರಿಸುವುದು ಯಾಕೆ? ಇಲ್ಲಿವೆ ಕೆಲ ಸ್ವಾರಸ್ಯಕರ ಸಂಗತಿಗಳು

‘ಸಿಸ್ಟಮ್ಯಾಟಿಕ್ ವಿತ್‌ಡ್ರಾಯಲ್ ಪ್ಲಾನ್’ (SWP) ಸೌಲಭ್ಯ

ನಿವೃತ್ತಿಯ ನಂತರ (60 ವರ್ಷಗಳ ನಂತರ) ಒಟ್ಟಾರೆಯಾಗಿ ಪಡೆಯಬಹುದಾದ ಶೇ. 60 ರಷ್ಟು ಕಾರ್ಪಸ್ ಮೊತ್ತವನ್ನು ಒಂದೇ ಬಾರಿಗೆ ಹಿಂಪಡೆಯುವ ಬದಲು, ಮಾಸಿಕ, ತ್ರೈಮಾಸಿಕ ಅಥವಾ ವಾರ್ಷಿಕ ಕಂತುಗಳಲ್ಲಿ ‘ಸಿಸ್ಟಮ್ಯಾಟಿಕ್ ವಿತ್‌ಡ್ರಾಯಲ್ ಪ್ಲಾನ್’ (SWP) ಮೂಲಕ 75 ವರ್ಷ ವಯಸ್ಸಿನವರೆಗೆ ಹಿಂಪಡೆಯುವ ಆಯ್ಕೆ ನೀಡಲಾಗಿದೆ.

ಶೇ. 100 ರಷ್ಟು ಕಾರ್ಪಸ್ ಹಿಂಪಡೆಯುವಿಕೆ ಮಿತಿ ಏರಿಕೆ

ಖಾತೆಯಲ್ಲಿರುವ ಒಟ್ಟು ನಿಧಿ ಮೊತ್ತ (Corpus) ₹5 ಲಕ್ಷ ಅಥವಾ ಅದಕ್ಕಿಂತ ಕಡಿಮೆಯಿದ್ದರೆ, ಆ್ಯನುಟಿ (Annuity) ಖರೀದಿಸುವುದು ಕಡ್ಡಾಯವಿಲ್ಲ. ಸಂಪೂರ್ಣ ₹5 ಲಕ್ಷ ಮೊತ್ತವನ್ನು ತೆರಿಗೆ ರಹಿತವಾಗಿ ಒಂದೇ ಬಾರಿಗೆ ಹಿಂಪಡೆಯಲು ಅವಕಾಶ ನೀಡಲಾಗಿದೆ (ಈ ಹಿಂದೆ ಈ ಮಿತಿ ₹2 ಲಕ್ಷ ಇತ್ತು).

ಭಾಗಶಃ ಹಣ ಹಿಂಪಡೆಯುವಿಕೆ (Partial Withdrawal) ಸರಳೀಕರಣ

ಮಕ್ಕಳ ಶಿಕ್ಷಣ, ಮದುವೆ, ಮನೆ ಖರೀದಿ/ನಿರ್ಮಾಣ ಅಥವಾ ಗಂಭೀರ ಕಾಯಿಲೆಗಳ ಚಿಕಿತ್ಸೆಗೆ ಒಟ್ಟು ಸ್ವಂತ ವಂತಿಗೆಯ ಶೇ. 25 ರಷ್ಟು ಹಣವನ್ನು ಭಾಗಶಃ ಹಿಂಪಡೆಯುವ ನಿಯಮಗಳನ್ನು ಆನ್‌ಲೈನ್ ಸ್ವಯಂ-ದೃಢೀಕರಣದ (Self-declaration) ಮೂಲಕ ಇನ್ನಷ್ಟು ಸರಳಗೊಳಿಸಲಾಗಿದೆ.

ಇದನ್ನೂ ಓದಿ: ಎಂಡಿಆರ್ ಕ್ರಮ ಜಾರಿಗೆ ಮುನ್ನವೇ ಸೆಪ್ಟೆಂಬರ್​ನಲ್ಲಿ ಯುಪಿಐ ವಹಿವಾಟು ಇಳಿಮುಖ; ಆರ್​ಬಿಐ ದತ್ತಾಂಶ

ಫಂಡ್ ಮ್ಯಾನೇಜರ್ ಮತ್ತು ಅಸೆಟ್ ಅಲೋಕೇಷನ್ ಬದಲಾವಣೆಗೆ ಸುಲಭ ಅವಕಾಶ

ಚಂದಾದಾರರು ವರ್ಷದಲ್ಲಿ 4 ಬಾರಿ ತಮ್ಮ ಅಸೆಟ್ ಅಲೋಕೇಷನ್ (Asset Allocation) ಬದಲಾಯಿಸಲು ಮತ್ತು ವರ್ಷಕ್ಕೆ ಒಮ್ಮೆ ತಮ್ಮ ಪಿಂಚಣಿ ಫಂಡ್ ಮ್ಯಾನೇಜರ್ ಅನ್ನು (PFM) ಯಾವುದೇ ಹೆಚ್ಚುವರಿ ಶುಲ್ಕವಿಲ್ಲದೆ ಬದಲಾಯಿಸಲು ಅವಕಾಶ ಕಲ್ಪಿಸಲಾಗಿದೆ.

ಎನ್‌ಪಿಎಸ್ ಟ್ರೇಡ್ ಅಕೌಂಟ್ ಮತ್ತು ಡಿಜಿಟಲ್ ಆನ್‌ಬೋರ್ಡಿಂಗ್

ಆಧಾರ್ ಆಧಾರಿತ e-KYC ಮತ್ತು ಡಿಜಿಲಾಕರ್ ಮೂಲಕ ಕೆಲವೇ ನಿಮಿಷಗಳಲ್ಲಿ ಎನ್‌ಪಿಎಸ್ ಖಾತೆ (PRAN) ತೆರೆಯುವ ಪ್ರಕ್ರಿಯೆ ಜಾರಿಯಲ್ಲಿದ್ದು, ಕಾರ್ಪೊರೇಟ್ ನೌಕರರಿಗೆ ತೆರಿಗೆ ಉಳಿತಾಯ (Section 80CCD(1B) ಅಡಿಯಲ್ಲಿ ಹೆಚ್ಚುವರಿ ₹50,000 ವಿನಾಯಿತಿ) ಅನುಕೂಲ ನೀಡಲಾಗಿದೆ.

ಈ ಬದಲಾವಣೆಗಳಿಂದಾಗಿ ಎನ್‌ಪಿಎಸ್ ಈಗ ಹೆಚ್ಚು ನಮ್ಯತೆ (Flexibility) ಹಾಗೂ ಗರಿಷ್ಠ ರಿಟರ್ನ್ಸ್ ನೀಡುವ ಪ್ರಮುಖ ನಿವೃತ್ತಿ ಹೂಡಿಕೆ ಮಾರ್ಗವಾಗಿ ಹೊರಹೊಮ್ಮಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ