EPF Withdrawal: ಉಮಂಗ್ ಆ್ಯಪ್ ಮೂಲಕ ಇಪಿಎಫ್ ಹಣ ವಿತ್​ಡ್ರಾ ಮಾಡುವುದು ಬಹಳ ಸುಲಭ; ಇಲ್ಲಿದೆ ವಿವರ

ಉದ್ಯೋಗಿಗಳು ಕೆಲಸ ಮಾಡುವಾಗ ಪ್ರತೀ ತಿಂಗಳು ಸಂಬಳದಲ್ಲಿ ನಿರ್ದಿಷ್ಟ ಭಾಗವು ಇಪಿಎಫ್ ಖಾತೆಗೆ (EPF) ಜಮೆ ಆಗುತ್ತಾ ಹೋಗುತ್ತದೆ. ಇದು ನಿವೃತ್ತಿ ಬಳಿಕ ಜೀವನ ಸಹಾಯಕ್ಕೆಂದು ಕೇಂದ್ರದ ಇಪಿಎಫ್​ಒ ರೂಪಿಸಿರುವ ಯೋಜನೆ. ಇದೀಗ ಆನ್​ಲೈನ್​ನಲ್ಲಿ ಇಪಿಎಫ್ ಖಾತೆಯ ಎಲ್ಲಾ ವಿವರಗಳನ್ನೂ ನೋಡುವ ಅವಕಾಶ ಇದೆ. ಇಪಿಎಫ್​ಒನ ಪೋರ್ಟಲ್​ನಲ್ಲಿ ಮಾತ್ರವಲ್ಲ, ಉಮಂಗ್ ಆ್ಯಪ್​ನಲ್ಲೂ ಇಪಿಎಫ್ ಸೌಲಭ್ಯ ಇದೆ. ಇಪಿಎಫ್ ಅಷ್ಟೇ ಅಲ್ಲದೆ ಆಧಾರ್, ನ್ಯಾಷನಲ್ ಪೆನ್ಷನ್ ಸ್ಕೀಮ್, ಆಭಾ ಹೆಲ್ತ್ ಸ್ಕೀಮ್ (ABHA) ಇತ್ಯಾದಿ ಯೋಜನೆಗಳ ಮಾಹಿತಿ ಈ ಉಮಂಗ್ ಆ್ಯಪ್​ನಲ್ಲಿ ನೋಡಬಹುದಾಗಿದೆ.

ಉಮಂಗ್ ಆ್ಯಪ್​ನಲ್ಲಿ ಇಪಿಎಫ್​ನ ವಿವಿಧ ಸೇವೆಗಳು ಲಭ್ಯ ಇವೆ. ನಿಮ್ಮ ಯುಎಎನ್ ಅಡಿಯಲ್ಲಿ ಎಷ್ಟು ಇಪಿಎಫ್ ಖಾತೆಗಳಿವೆ, ಎಷ್ಟು ಹಣ ಶೇಖರಣೆ ಆಗಿದೆ ಇತ್ಯಾದಿ ವಿವರ ಇದೆ. ಅಲ್ಲದೇ ಇಪಿಎಫ್ ಹಣವನ್ನು ವಿತ್​ಡ್ರಾ ಮಾಡಿಕೊಳ್ಳಲು ಅರ್ಜಿ ಸಲ್ಲಿಸುವ ಅವಕಾಶವೂ ಇದೆ.

ಇದನ್ನೂ ಓದಿ: 7 IPOs: ಮುಂದಿನ ವಾರ ಏಳು ಐಪಿಒಗಳ ಬಿಡುಗಡೆ; 1600 ಕೋಟಿ ರೂ ಬಂಡವಾಳ ಸಂಗ್ರಹದ ಗುರಿ

ಉಮಂಗ್ ಆ್ಯಪ್​ನಲ್ಲಿ ಇಪಿಎಫ್ ಕ್ಲೈಮ್ ಮಾಡುವುದು ಹೇಗೆ?

• ಉಮಂಗ್ ಆ್ಯಪ್ ಡೌನ್​ಲೋಡ್ ಮಾಡಿ, ಲಾಗಿನ್ ಆಗಿರಿ.
• ಹೊಸದಾಗಿ ಸೈನಪ್ ಆಗಿದ್ದರೆ ಇಪಿಎಫ್​ಒ ಅನ್ನು ಸರ್ಚ್ ಮಾಡಿ ತೆರೆಯಿರಿ.
• ಇಪಿಎಫ್​ಒ ಸೇವೆಗಳ ಪಟ್ಟಿಯಲ್ಲಿ ‘ರೈಸ್ ಕ್ಲೈಮ್’ ಮೇಲೆ ಕ್ಲಿಕ್ ಮಾಡಿ
• ಯುಎಎನ್ ನಂಬರ್ ಹಾಕಿರಿ. ಬಳಿಕ ಯುಎಎನ್ ಜೊತೆ ಜೋಡಿತವಾಗಿರುವ ನಂಬರ್​ಗೆ ಒಟಿಪಿ ಬರುತ್ತದೆ. ಅದನ್ನು ನಮೂದಿಸಿ.
• ಹಣ ಹಿಂಪಡೆಯಲು ಯಾಕೆ ಎಂದು ಆರಿಸಿ, ಬಳಿಕ ಸಬ್ಮಿಟ್ ಕೊಡಿ

ಇದಾದ ಬಳಿಕ ನಿಮಗೆ ಸ್ವೀಕೃತಿ ಪತ್ರ ಅಥವಾ ಕ್ಲೈಮ್ ರೆಫರೆನ್ಸ್ ಸಂಖ್ಯೆ ಬರುತ್ತದೆ. ನಿಮ್ಮ ಅರ್ಜಿಯ ಸ್ಥಿತಿ ಏನಾಯಿತು ಎಂದು ತಿಳಿಯಲು ಈ ಸಂಖ್ಯೆಯನ್ನು ಬಳಸಬಹುದು. ಕೆಲ ದಿನಗಳಲ್ಲೇ ನಿಮ್ಮ ಕ್ಲೈಮ್ ಸ್ಥಿತಿಗತಿ ಏನೆಂದು ತಿಳಿಸಿ ಮೊಬೈಲ್ ನಂಬರ್​ಗೆ ಸಂದೇಶ ಬರುತ್ತದೆ. ಅಥವಾ ಉಮಂಗ್ ಆ್ಯಪ್​ಗೆ ಬಂದು ಬೇಕಾದರೂ ಇದನ್ನು ತಿಳಿಯಬಹುದು. ನಿಮ್ಮ ಕ್ಲೈಮ್ ಅನ್ನು ತಿರಸ್ಕರಿಸಲಾಗಿದ್ದರೆ ಅದಕ್ಕೆ ಏನು ಕಾರಣ ಎಂದೂ ಇದರಲ್ಲಿ ತಿಳಿಯಬಹುದು.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ