Gold Bond: ಸಾವರಿನ್ ಗೋಲ್ಡ್ ಬಾಂಡ್, ಜೂನ್ 19ರಿಂದ 23ರವರೆಗೆ; ಗ್ರಾಂಗೆ ಎಷ್ಟು ಬೆಲೆ? ರಿಯಾಯಿತಿ, ಬಡ್ಡಿ, ತೆರಿಗೆ ಇತ್ಯಾದಿ ಮಾಹಿತಿ ತಿಳಿದಿರಿ

ಸಾವರಿನ್ ಗೋಲ್ಡ್ ಬಾಂಡ್ ಅಥವಾ ಸಾರ್ವಭೌಮ ಚಿನ್ನ ಸಾಲಪತ್ರ (Sovereign Gold Bond) ಮತ್ತೆ ಬಿಡುಗಡೆ ಆಗುತ್ತಿದೆ. ಈ ಹಣಕಾಸು ವರ್ಷದ ಮೊದಲಾರ್ಧದಲ್ಲಿ ಎರಡು ಸರಣಿಯಲ್ಲಿ ಗೋಲ್ಡ್ ಬಾಂಡ್​ಗಳನ್ನು ಸರ್ಕಾರ ವಿತರಿಸುತ್ತಿದೆ. ಮೊದಲ ಸರಣಿಯಲ್ಲಿ ಜೂನ್ 19ರಿಂದ (ಸೋಮವಾರ) 23ರವರೆಗೆ ಈ ಚಿನ್ನದ ಬಾಂಡ್​ಗಳನ್ನು ಹಂಚಲಾಗುತ್ತದೆ. 5 ದಿನಗಳ ಕಾಲಾವಕಾಶವನ್ನು ಸಾರ್ವಜನಿಕರಿಗೆ ನೀಡಲಾಗಿದೆ. ಸಾರ್ವಜನಿಕರು ಈ ದಿನಾಂಕ ತಪ್ಪಿದರೂ ಸೆಪ್ಟಂಬರ್ 11ರಿಂದ 15ರವರೆಗೆ ಇರುವ ಎರಡನೇ ಸರಣಿಯಲ್ಲಿ ಬಾಂಡ್​ಗಳನ್ನು ಖರೀದಿಸುವ ಅವಕಾಶ ಇದೆ. ಸಾವರಿನ್ ಗೋಲ್ಡ್ ಬಾಂಡ್ ಸ್ಕೀಮ್​ನಲ್ಲಿ ನೀವು ಚಿನ್ನದ ಮೇಲೆ ಹೂಡಿಕೆ ಮಾಡುತ್ತೀರಿ. ನಿಮ್ಮ ಹೂಡಿಕೆಯ ಮೊತ್ತಕ್ಕೆ ಬಡ್ಡಿಯೂ ಪ್ರಾಪ್ತವಾಗುತ್ತದೆ. ರಿಯಾಯಿತಿ ಇತ್ಯಾದಿ ಸೌಲಭ್ಯವೂ ಇರುತ್ತದೆ. ಈ ದೃಷ್ಟಿಯಿಂದ ಸಾವರಿನ್ ಗೋಲ್ಡ್ ಬಾಂಡ್​ನ ಯೋಜನೆ ಯಾರಿಗಾದರೂ ಕೂಡ ನಷ್ಟ ತಂದುಕೊಡದ ಹೂಡಿಕೆ ಆಗುತ್ತದೆ.

ಒಂದು ಗ್ರಾಂಗೆ 5,926 ರೂ, ಆನ್​ಲೈನ್​ನಲ್ಲಿ ಹಣ ಪಾವತಿಸುವವರಿಗೆ ಡಿಸ್ಕೌಂಟ್

ಸಾವರಿನ್ ಗೋಲ್ಡ್ ಬಾಂಡ್ ಸ್ಕೀಮ್​ನಲ್ಲಿ 1 ಗ್ರಾಮ್​ನಿಂದ ಹಿಡಿದು 4 ಕಿಲೋ ಚಿನ್ನದವರೆಗೆ ಹೂಡಿಕೆ ಮಾಡಬಹುದು. ಈ ಬಾಂಡ್ 8 ವರ್ಷದ ಅವಧಿಯದ್ದಾಗಿರುತ್ತದೆ. ಜೂನ್ 19ರಿಂದ 23ರವರೆಗೆ ನೀಡಲಾಗುವ ಗೋಲ್ಡ್ ಬಾಂಡ್​ನಲ್ಲಿ ಒಂದು ಗ್ರಾಮ್​ಗೆ 5,926 ರೂ ದರ ನಿಗದಿ ಮಾಡಲಾಗಿದೆ. ಇಷ್ಯೂ ದಿನಾಂಕದಿಂದ 3 ಹಿಂದಿನ ಕಾರ್ಯ ದಿನಗಳಲ್ಲಿ 24 ಕ್ಯಾರಟ್ ಚಿನ್ನದ ಬೆಲೆ ಎಷ್ಟಿದೆ ಎಂಬುದರ ಸರಾಸರಿಯನ್ನು ಲೆಕ್ಕ ಮಾಡಲಾಗುತ್ತದೆ. ಈ ಸರಣಿಯಲ್ಲಿ ಜೂನ್ 17 ಇಷ್ಯೂ ಡೇಟ್ ಆಗಿದೆ. ಇದರ ಹಿಂದಿನ ವರ್ಕಿಂಗ್ ಡೇ ಎಂದರೆ ಜೂನ್ 14ರಿಂದ ಜೂನ್ 16. ಈ ಅವಧಿಯಲ್ಲಿ ಇದ್ದ ಚಿನ್ನದ ಬೆಲೆಯ ಸರಾಸರಿ ಗಣಿಸಿದರೆ 5,926 ರೂ ಆಗುತ್ತದೆ. ಇದು ಸಾವರಿನ್ ಗೋಲ್ಡ್ ಬಾಂಡ್ ಸ್ಕೀಮ್​ನ ಮೊದಲ ಸರಣಿಯಲ್ಲಿ ಒಂದು ಗ್ರಾಮ್​ಗೆ ಇರುವ ಬೆಲೆ.

ಇದನ್ನೂ ಓದಿ: Sovereign Gold Bond: ಸಾವರಿನ್ ಗೋಲ್ಡ್ ಬಾಂಡ್ ಜೂನ್ 19ರಿಂದ: ಅಮೋಘ ಹೂಡಿಕೆ ಅವಕಾಶ ಕಳೆದುಕೊಳ್ಳದಿರಿ; ಏನಿದು ಸ್ಕೀಮ್, ಹೆಚ್ಚಿನ ಮಾಹಿತಿ ತಿಳಿಯಿರಿ

ಸಾವರೀನ್ ಗೋಲ್ಡ್ ಬಾಂಡ್ ಸ್ಕೀಮ್​ನಲ್ಲಿ ನೀವು ಯುಪಿಐ, ನೆಟ್​ಬ್ಯಾಂಕಿಂಗ್ ಇತ್ಯಾದಿ ಡಿಜಿಟಲ್ ಆಗಿ ಹಣ ಪಾವತಿಸಿದರೆ ರಿಯಾಯಿತಿ ಸಿಗುತ್ತದೆ. ಒಂದು ಗ್ರಾಮ್​ಗೆ ಬರೋಬ್ಬರಿ 50 ರೂ ಡಿಸ್ಕೌಂಟ್ ಸಿಗುತ್ತದೆ. 5,926 ರೂ ಇರುವ ಒಂದು ಗ್ರಾಮ್ ಚಿನ್ನವನ್ನು ನೀವು 5,876 ರುಪಾಯಿಗೆ ಖರೀದಿಸಬಹುದು.

ಒಬ್ಬ ವ್ಯಕ್ತಿ ಎಷ್ಟು ಚಿನ್ನದ ಮೇಲೆ ಹೂಡಿಕೆ ಮಾಡಬಹುದು?

ಆರ್​ಬಿಐ ನಿಯಮದ ಪ್ರಕಾರ ಒಬ್ಬ ವ್ಯಕ್ತಿ ಸಾವರಿನ್ ಗೋಲ್ಡ್ ಬಾಂಡ್ ಸ್ಕೀಮ್​ನಲ್ಲಿ 1 ಗ್ರಾಮ್​ನಿಂದ ಹಿಡಿದು 4 ಕಿಲೋವರೆಗೂ ಹೂಡಿಕೆ ಮಾಡಬಹುದು. ಸುಮಾರು 2.37 ಕೋಟಿ ರೂವರೆಗೂ ಈ ಬಾರಿ ಒಬ್ಬ ವ್ಯಕ್ತಿ ಈ ಗೋಲ್ಡ್ ಬಾಂಡ್ ಖರೀದಿಸಬಹುದು. ಟ್ರಸ್ಟ್​​ಗಳು ಇತ್ಯಾದಿ ಸಂಘ ಸಂಸ್ಥೆಗಳು 20 ಕಿಲೋ ಚಿನ್ನದವರೆಗೂ ಹೂಡಿಕೆ ಮಾಡಬಹುದು.

ಸಾವರಿನ್ ಗೋಲ್ಡ್ ಬಾಂಡ್ ಸ್ಕೀಮ್ 8 ವರ್ಷದ ಅವಧಿಯದ್ದಾಗಿರುತ್ತದೆ. ಬೇಕೆಂದರೆ 5 ವರ್ಷದ ಬಳಿಕ ಹಿಂಪಡೆಯುವ ಅವಕಾಶ ಇರುತ್ತದೆ. ಬಾಂಡ್ ಮೆಚ್ಯೂರ್ ಆದಾಗ ಅಂದಿನ ಚಿನ್ನದ ಮಾರುಕಟ್ಟೆ ದರ ಪ್ರಕಾರ ನಿಮ್ಮ ಹೂಡಿಕೆ ಬೆಳೆದಿರುತ್ತದೆ. ನೀವು ಗ್ರಾಮ್​ಗೆ 5,926 ರನಂತೆ 100 ಗ್ರಾಮ್ ಚಿನ್ನಕ್ಕೆ 5,92,600 ರೂ ಕೊಟ್ಟು ಹೂಡಿಕೆ ಮಾಡಿದ್ದೀರಿ ಎಂದಿಟ್ಟುಕೊಳ್ಳಿ. 8 ವರ್ಷದ ಬಳಿಕ ಚಿನ್ನದ ಬೆಲೆ ಗ್ರಾಮ್​ಗೆ 10,000 ರೂ ಆದರೆ 5,92,600 ರೂ ಇದ್ದ ನಿಮ್ಮ ಹೂಡಿಕೆ 10,00,000 ರೂಗೆ ಏರಿರುತ್ತದೆ.

ಇದನ್ನೂ ಓದಿ: Mahila Samman Savings scheme: ಮಹಿಳಾ ಸಮ್ಮಾನ್ ಸೇವಿಂಗ್ ಸ್ಕೀಮ್: 2 ವರ್ಷಕ್ಕೆ ಮೆಚ್ಯೂರಿಟಿ; ಬಡ್ಡಿ ಎಷ್ಟು? ತೆರಿಗೆ ಬೀಳುತ್ತಾ?

ಈ ಮಧ್ಯೆ ನಿಮ್ಮ ಹೂಡಿಕೆಗೆ ಆಗಾಗ್ಗೆ ಬಡ್ಡಿಯೂ ಪ್ರಾಪ್ತವಾಗುತ್ತಿರುತ್ತದೆ. ಸದ್ಯ ವರ್ಷಕ್ಕೆ ಶೇ. 2.5ರಷ್ಟು ಬಡ್ಡಿ ನೀಡಲಾಗುತ್ತದೆ. ಈ ಬಡ್ಡಿ ಹಣ ಮೂರು ತಿಂಗಳಿಗೊಮ್ಮೆ ಬಿಡುಗಡೆ ಆಗುತ್ತದೆ. ಈ ಬಡ್ಡಿ ಹಣಕ್ಕೆ ಟಿಡಿಎಸ್ ಕಡಿತ ಮಾಡಲಾಗುತ್ತದೆ.

ಇನ್ನು, ಸಾವರಿನ್ ಗೋಲ್ಡ್ ಬಾಂಡ್ ಸ್ಕೀಮ್​ನಲ್ಲಿ ನೀವು ಮಾಡುವ ಹೂಡಿಕೆ ಮೇಲೆ ಅಗತ್ಯಬಿದ್ದರೆ ಸಾಲವನ್ನೂ ಕೊಡಲಾಗುತ್ತದೆ. ಇದಕ್ಕೆ ಬಡ್ಡಿಯೂ ಕಡಿಮೆಯೇ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ