ರೀಟೇಲ್ ಹಣದುಬ್ಬರ 37 ಮೂಲಾಂಕಗಳಷ್ಟು ಏರಿಕೆ; ಆಗಸ್ಟ್ನಲ್ಲಿ ಚಿಲ್ಲರೆ ಹಣದುಬ್ಬರ ದರ ಶೇ. 4.82 ದಾಖಲು
ಸಗಟು ಮಾರಾಟ ದರ ಹಣದುಬ್ಬರ ಆಗಸ್ಟ್ನಲ್ಲಿ ಶೇ. 9.92 ಇದ್ದರೆ, ರೀಟೇಲ್ ಹಣದುಬ್ಬರ ಶೇ 4.82 ಇದೆ. ಆಹಾರ ಉತ್ಪನ್ನಗಳು, ಇಂಧನ ಹಾಗೂ ವೈಯಕ್ತಿಕ ನಿರ್ವಹಣಾ ವಸ್ತುಗಳ ಬೆಲೆಯಲ್ಲಿ ಹೆಚ್ಚಳವಾದ ಹಿನ್ನೆಲೆಯಲ್ಲಿ ಚಿಲ್ಲರೆ ಹಣದುಬ್ಬರ ದರ ಏರಿಕೆಯಾಗಿದೆ. ಜುಲೈ ತಿಂಗಳಿನಲ್ಲಿ ಈ ದರವು ಶೇ. 4.45 ರಷ್ಟಿತ್ತು. ಕೇಂದ್ರ ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ (MoSPI) ಬಿಡುಗಡೆ ಮಾಡಿರುವ ನೂತನ ಅಂಕಿಅಂಶಗಳು ಈ ಏರಿಕೆಯನ್ನು ದೃಢಪಡಿಸಿವೆ.
ನವದೆಹಲಿ, ಸೆಪ್ಟೆಂಬರ್ 14: ಹೋಲ್ಸೇಲ್ ಹಣದುಬ್ಬರದ ದತ್ತಾಂಶ ಬಂದ ಬೆನ್ನಲ್ಲೇ ಈಗ ರೀಟೇಲ್ ಹಣದುಬ್ಬರ ವರದಿಯೂ ಬಂದಿದೆ. ಕಳೆದ ಜುಲೈನಲ್ಲಿ ಶೇಕಡಾ 4.45 ರಷ್ಟಿದ್ದ ಚಿಲ್ಲರೆ ಹಣದುಬ್ಬರವು ಆಗಸ್ಟ್ನಲ್ಲಿ ಶೇಕಡಾ 4.82 ಕ್ಕೆ ಜಿಗಿಯುವ ಮೂಲಕ ಸತತ ಮೂರನೇ ತಿಂಗಳು ಏರಿಕೆ ಹಾದಿಯಲ್ಲಿದೆ. ಗ್ರಾಮೀಣ ಮತ್ತು ನಗರ ಪ್ರದೇಶಗಳೆರಡರಲ್ಲೂ ಆಹಾರ ಧಾನ್ಯಗಳು ಹಾಗೂ ದಿನಸಿ ವಸ್ತುಗಳ ಬೆಲೆ ಹೆಚ್ಚಿರುವುದು ಇದಕ್ಕೆ ಪ್ರಮುಖ ಕಾರಣವಾಗಿದೆ. ಕೆಲ ಹೊತ್ತಿನ ಮೊದಲು ಬಿಡುಗಡೆಯಾದ ಸಗಟು ಮಾರಾಟ ದರ ಹಣದುಬ್ಬರ ಬಹುತೇಕ ಎರಡಂಕಿ ಸಮೀಪದಲ್ಲಿದೆ. ಈಗ ರೀಟೇಲ್ ಹಣದುಬ್ಬರ ತುಸು ಏರಿಕೆಯಾಗಿರುವುದು ಅನಿರೀಕ್ಷಿತವೇನಲ್ಲ. ಈ ಹಣದುಬ್ಬರ ದತ್ತಾಂಶದ ಕೆಲ ಮುಖ್ಯಾಂಶಗಳು ಈ ಕೆಳಕಂಡಂತಿವೆ:
- ಆಹಾರ ಧಾನ್ಯ ಮತ್ತು ತರಕಾರಿ ದರ ಏರಿಕೆ: ಚಿಲ್ಲರೆ ಆಹಾರ ಹಣದುಬ್ಬರವು (Food Inflation) ಜುಲೈನಲ್ಲಿದ್ದ ಶೇ. 5.52 ರಿಂದ ಆಗಸ್ಟ್ನಲ್ಲಿ ಶೇ. 5.95 ಕ್ಕೆ ಹೆಚ್ಚಾಗಿದೆ.
- ಈರುಳ್ಳಿ ಮತ್ತು ಬೆಳ್ಳುಳ್ಳಿ: ಈರುಳ್ಳಿ ಹಣದುಬ್ಬರವು ಜುಲೈನ ಶೇ. 22.54 ರಿಂದ ಆಗಸ್ಟ್ನಲ್ಲಿ ಶೇ. 48.27 ಕ್ಕೆ ದುಪ್ಪಟ್ಟಾಗಿದ್ದರೆ, ಬೆಳ್ಳುಳ್ಳಿ ಹಣದುಬ್ಬರ ಶೇ. 43.60 ಕ್ಕೆ ತಲುಪಿದೆ.
- ಸಕ್ಕರೆ ದರ: ಸಕ್ಕರೆ ಬೆಲೆಯು ಆಗಸ್ಟ್ ತಿಂಗಳಿನಲ್ಲಿ ದಾಖಲೆಯ ಸಾರ್ವಕಾಲಿಕ ಗರಿಷ್ಠ ಮಟ್ಟವನ್ನು ತಲುಪಿದೆ.
- ಟೊಮ್ಯಾಟೋ ಮತ್ತು ಆಲೂಗಡ್ಡೆ ಇಳಿಕೆ: ಟೊಮ್ಯಾಟೋ ದರ ಶೇ. -31.09 ಮತ್ತು ಆಲೂಗಡ್ಡೆ ಶೇ. -13.14 ರಷ್ಟು ಇಳಿಕೆಯಾಗುವ ಮೂಲಕ ಸಾರ್ವಜನಿಕರಿಗೆ ಕೊಂಚ ಸಮಾಧಾನ ತಂದಿದೆ.
ಗ್ರಾಮೀಣ ಪ್ರದೇಶದ ಹಣದುಬ್ಬರ ದರವು ಶೇಕಡಾ 5.23 ಕ್ಕೆ ಏರಿಕೆಯಾಗಿದೆ. ನಗರ ಪ್ರದೇಶದ ಹಣದುಬ್ಬರ ದರವು ಶೇಕಡಾ 4.31 ರಷ್ಟಿದೆ. ಆಭರಣ ವಲಯದಲ್ಲಿ ಭಾರಿ ಬೆಲೆ ಏರಿಕೆ ಕಂಡುಬಂದಿದೆ. ಬೆಳ್ಳಿ ಆಭರಣಗಳ ಹಣದುಬ್ಬರ ಶೇ. 107.11 ರಷ್ಟಿದ್ದರೆ, ಚಿನ್ನ ಮತ್ತು ಪ್ಲಾಟಿನಂ ಆಭರಣಗಳ ಹಣದುಬ್ಬರ ಶೇ. 35.53 ರಷ್ಟಿದೆ.
ಆರ್ಬಿಐ ಮುನ್ಸೂಚನೆ: ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ಹಣದುಬ್ಬರವನ್ನು ನಿಯಂತ್ರಣದಲ್ಲಿಡಲು ತನ್ನ ಮಧ್ಯಮಾವಧಿ ಗುರಿಯಾದ ಶೇ. 4 ಕ್ಕೆ ಹತ್ತಿರವಿರಿಸಲು ಶ್ರಮಿಸುತ್ತಿದೆ. ಪ್ರಸ್ತುತ ಹಣದುಬ್ಬರ ಏರಿಕೆಯು ಸದ್ಯದ ಮಟ್ಟಿಗೆ ಆಹಾರ ಮತ್ತು ಇಂಧನ ಬೆಲೆಗಳಿಗೆ ಸೀಮಿತವಾಗಿದ್ದು, ಮುಂಬರುವ 3 ನೇ ತ್ರೈಮಾಸಿಕದಲ್ಲಿ (Q3) ಇದು ಗರಿಷ್ಠ ಮಟ್ಟ ತಲುಪಿ ಬಳಿಕ ತಗ್ಗುವ ಸಾಧ್ಯತೆಯಿದೆ ಎಂದು ಆರ್ಬಿಐ ನಿರೀಕ್ಷಿಸಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ