ಭಾರತದ ಸರ್ವಂ ಈಗ ಅಮೆರಿಕದ ಎಐ ಮಾಡಲ್​ಗಳನ್ನೂ ಹೋಸ್ಟ್ ಮಾಡಬಲ್ಲುದು: ಸಹ-ಸಂಸ್ಥಾಪಕ ಪ್ರತ್ಯೂಶ್ ಕುಮಾರ್

ನವದೆಹಲಿ, ಅಕ್ಟೋಬರ್ 21: ಭಾರತ ತಡವಾಗಿ ಎಐ ಟೆಕ್ನಾಲಜಿ ಕ್ಷೇತ್ರಕ್ಕೆ ಕಾಲಿಟ್ಟರೂ ಕ್ಷಿಪ್ರ ವೇಗದಲ್ಲಿ ಬೆಳೆಯುತ್ತಿದೆ. ವರ್ಷದ ಹಿಂದಷ್ಟೇ ಶುರುವಾದ ಸರ್ವಂ ಎಐ ಕಂಪನಿ ಇದೀಗ ಅಮೆರಿಕದ ಎಐ ಮಾಡಲ್​ಗಳನ್ನು ಹೋಸ್ಟ್ ಮಾಡುವ ಫೌಂಡೇಶನಲ್ ಮಾಡಲ್ ಇನ್​ಫ್ರಾಸ್ಟ್ರಕ್ಚರ್ ಸಾಮರ್ಥ್ಯ ರೂಪಿಸಿದೆ. ಬೆಂಗಳೂರು ಮೂಲದ ಸರ್ವಂ ಎಐ ಕಂಪನಿಯ ಸಹ-ಸಂಸ್ಥಾಪಕ ಪ್ರತ್ಯೂಶ್ ಕುಮಾರ್ ಅವರು ಈ ಮಾಹಿತಿ ನೀಡಿದ್ದಾರೆ.

ಮನಿಕಂಟ್ರೋಲ್ ಸ್ಟಾರ್ಟಪ್ ಕಾಂಕ್ಲೇವ್ 2026 ಕಾರ್ಯಕ್ರಮದಲ್ಲಿ ಮಾತನಾಡುತ್ತಿದ್ದ ಪ್ರತ್ಯೂಶ್ ಕುಮಾರ್, ಸರ್ವಂ ಎಐ ಇನ್​ಫ್ರಾಸ್ಟ್ರಕ್ಚರ್ ಈಗ ತನ್ನದೇ ಸ್ವಂತ ಎಐ ಮಾಡಲ್​ಗಳನ್ನು ಹೋಸ್ಟ್ ಮಾಡುವುದಷ್ಟೇ ಅಲ್ಲ, ಅಮೆರಿಕದವರದ್ದೂ ಸೇರಿ ಇತರೆ ಕಂಪನಿಗಳು ನಿರ್ಮಿಸಿದ ಎಐ ಮಾಡಲ್​ಗಳನ್ನೂ ಹೋಸ್ಟ್ ಮಾಡಬಲ್ಲುದು ಎಂದಿದ್ದಾರೆ.

ಇದನ್ನೂ ಓದಿ: ಜಿಯೋ ಪ್ಲಾಟ್​ಫಾರ್ಮ್ಸ್ ಐಪಿಒ; ಅತಿವೇಗದ ಸಬ್​ಸ್ಕ್ರಿಪ್ಷನ್ ಸೇರಿ ಪ್ರಮುಖ ದಾಖಲೆಗಳು; ಹೊಸ ಇತಿಹಾಸ

ಸರ್ವಂ ಎಐ ಸಂಸ್ಥೆ ಕೆಲ ಫೌಂಡೇಶನ್ ಮಾಡಲ್​ಗಳನ್ನು ನಿರ್ಮಿಸಿ ಸೈ ಎನಿಸಿದೆ. ಈಗ ಒಂದು ಹೆಜ್ಜೆ ಮುಂದೆ ಹೋಗಿ ಎಐ ಇನ್​ಫ್ರಾಸ್ಟ್ರಕ್ಚರ್ ನಿರ್ಮಿಸುವ ಕೆಲಸ ಮಾಡುತ್ತಿದೆ. ಉದ್ದಿಮೆಗಳು ಸರ್ವಂನ ಎಐ ಮಾಡಲ್​ಗಳನ್ನು ಬಳಸಬಹುದು. ಅಥವಾ ತಮ್ಮವೇ ಯಾವುದಾದರೂ ಎಐ ಮಾಡಲ್​ಗಳಿದ್ದರೆ ಅವನ್ನು ಸರ್ವಂ ಇನ್​ಫ್ರಾಸ್ಟ್ರಕ್ಚರ್​ನಲ್ಲಿ ಬಳಸಬಹುದು ಎಂದು ಸರ್ವಂ ಸಹ-ಸಂಸ್ಥಾಪಕರು ಹೇಳಿದ್ದಾರೆ.

ತನ್ನ ಇನ್​ಫ್ರಾಸ್ಟ್ರಚರ್​ನಲ್ಲಿ ಉದ್ದಿಮೆಗಳು ಎಐ ಅಳವಡಿಕೆ ಸುಲಭಗೊಳಿಸಲು ಸರ್ವಂ ಸಂಸ್ಥೆ ತನ್ನದೇ ಎಂಜಿನಿಯರುಗಳನ್ನು ಕ್ಲೈಂಟ್ ಸ್ಥಳಕ್ಕೆ ಕಳುಹಿಸುತ್ತಿದೆ. ಕ್ಲೈಂಟ್​ಗಳ ತಂಡಗಳ ಜೊತೆಗೆ ಸರ್ವಂನ ಎಂಜಿನಿಯರುಗಳೂ ಸೇರಿ ಎಐ ಇನ್​ಫ್ರಾಸ್ಟ್ರಕ್ಚರ್ ನಿರ್ಮಿಸಲು ನೆರವಾಗುತ್ತಿದ್ದಾರೆ ಎನ್ನುವ ಮಾಹಿತಿಯನ್ನು ಪ್ರತ್ಯೂಶ್ ಕುಮಾರ್ ನೀಡಿದ್ದಾರೆ.

ಇದನ್ನೂ ಓದಿ: ಮಾರ್ಕೊ ರೂಬಿಯೋ-ಮುಕೇಶ್ ಅಂಬಾನಿ ಭೇಟಿ; ಅಮೆರಿಕದ ವಿದೇಶಾಂಗ ಸಚಿವನಿಗೆ ರಿಲಯನ್ಸ್ ದಿಗ್ಗಜನೊಂದಿಗೆ ಏನು ಕೆಲಸ? ಇಲ್ಲಿವೆ ಕಾರಣಗಳು

ಸರ್ಕಾರದ ಕಂಪ್ಯೂಟರ್ ಆರ್ ಅಂಡ್ ಡಿ ವಿಭಾಗವಾದ ಎನಿಸಿದ ಸಿ-ಡಾಕ್ ಜೊತೆ ಸರ್ವ ಒಪ್ಪಂದ ಮಾಡಿಕೊಂಡಿದೆ. ಸಿ-ಡಾಕ್ ಅಭಿವೃದ್ಧಿಪಡಿಸಿದ ಕಂಪ್ಯೂಟಿಂಗ್ ಸಿಸ್ಟಂಗಳಲ್ಲಿ ಸರ್ವಂನ ಮಾಡಲ್​ಗಳು, ಅಪ್ಲಿಕೇಶನ್​ಗಳು ರನ್ ಆಗಲಿವೆ.

ಐಬಿಎಂ, ಎಚ್​ಪಿ, ಐಡಿಎಫ್​ಸಿ ಫಸ್ಟ್ ಬ್ಯಾಂಕ್ ಇತ್ಯಾದಿ ಸಂಸ್ಥೆಗಳು ಸರ್ವಂ ಜೊತೆ ಸಹಭಾಗಿತ್ವ ಒಪ್ಪಂದ ಮಾಡಿಕೊಂಡಿರುವುದು ಗಮನಾರ್ಹ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ