ಕಳೆದ ಮೂರು ತಿಂಗಳಲ್ಲಿ ಭಾರತದಲ್ಲಿ ಮಾರಾಟವಾದ ಸ್ಮಾರ್ಟ್ಫೋನ್ಗಳ ಸಂಖ್ಯೆ 5 ಕೋಟಿ ಸಮೀಪ
Smartphone shipments rose on 2nd quarter: ಜುಲೈನಿಂದ ಸೆಪ್ಟೆಂಬರ್ವರೆಗಿನ ತ್ರೈಮಾಸಿಕ ಅವಧಿಯಲ್ಲಿ ಭಾರತದ ಮಾರುಕಟ್ಟೆ ಪ್ರವೇಶಿಸಿರುವ ಸ್ಮಾರ್ಟ್ಫೋನ್ ಸಂಖ್ಯೆ 4.71 ಕೋಟಿ ಆಗಿದೆ. ಕೆನಲಿಸ್ ವರದಿ ಪ್ರಕಾರ ಶಿಪ್ಪಿಂಗ್ ಆದ ಸ್ಮಾರ್ಟ್ಫೋನ್ನಲ್ಲಿ ಶೇ. 9ರಷ್ಟು ಹೆಚ್ಚಳವಾಗಿದೆ. ವಿವೋ ಭಾರತದಲ್ಲಿ ಮೊದಲ ಬಾರಿಗೆ ವಿವೋ ಮೊದಲ ಸ್ಥಾನ ಪಡೆದಿದೆ. ಶಿಯೋಮಿ, ಸ್ಯಾಮ್ಸುಂಗ್, ಓಪ್ಪೋ ಮತ್ತು ರಿಯಲ್ಮಿ ಕಂಪನಿಗಳು ಟಾಪ್-5ನಲ್ಲಿವೆ.
ನವದೆಹಲಿ, ಅಕ್ಟೋಬರ್ 20: ಈ ಹಣಕಾಸು ವರ್ಷದ ಎರಡನೇ ಕ್ವಾರ್ಟರ್ ಆದ ಜುಲೈನಿಂದ ಸೆಪ್ಟೆಂಬರ್ವರೆಗಿನ ಅವಧಿಯಲ್ಲಿ ಭಾರತದಲ್ಲಿ ಸ್ಮಾರ್ಟ್ಫೋನ್ ಮಾರಾಟದಲ್ಲಿ ಭರ್ಜರಿ ಹೆಚ್ಚಳವಾಗಿದೆ. ಕೆನಲಿಸ್ ಎನ್ನುವ ಮಾರ್ಕೆಟ್ ರಿಸರ್ಚ್ ಕಂಪನಿ ನಿನ್ನೆ ಬಿಡುಗಡೆ ಮಾಡಿದ ವರದಿ ಪ್ರಕಾರ ಸೆಪ್ಟೆಂಬರ್ ಅಂತ್ಯದ ತ್ರೈಮಾಸಿಕ ಅವಧಿಯಲ್ಲಿ ಭಾರತದಲ್ಲಿ ಬಿಕರಿಯಾದ ಸ್ಮಾರ್ಟ್ಫೋನ್ಗಳ ಸಂಖ್ಯೆ 47.1 ಮಿಲಿಯನ್ (4.71 ಕೋಟಿ). ಕಳೆದ ವರ್ಷದ ಇದೇ ಕ್ವಾರ್ಟರ್ಗೆ ಹೋಲಿಸಿದರೆ ಸ್ಮಾರ್ಟ್ಫೋನ್ ಮಾರಾಟದಲ್ಲಿ ಶೇ. 9ರಷ್ಟು ಏರಿಕೆ ಆಗಿದೆ.
ವಿವೋ ನಂಬರ್ ಒನ್
ಚೀನಾ ಮೂಲದ ಕಂಪನಿಗಳೇ ಭಾರತದ ಸ್ಮಾರ್ಟ್ಫೋನ್ ಮಾರುಕಟ್ಟೆಯಲ್ಲಿ ಪ್ರಾಬಲ್ಯ ಮುಂದುವರಿಸಿವೆ. ವಿವೋ ಕಂಪನಿ ಈಗ ಮೊದಲ ಬಾರಿಗೆ ಅಗ್ರಪಟ್ಟ ಗಿಟ್ಟಿಸಿದೆ. ಸ್ಮಾರ್ಟ್ಫೋನ್ ಮಾರಾಟದಲ್ಲಿ ಶಿಯೋಮಿಯನ್ನು ವಿವೋ ಹಿಂದಿಕ್ಕಿದೆ. ಕೆನಲಿಸ್ ವರದಿ ಪ್ರಕಾರ ವಿವೋದ 91 ಲಕ್ಷ ಯೂನಿಟ್ಗಳು ಈ ಮೂರು ತಿಂಗಳಲ್ಲಿ ಬಿಕರಿಯಾಗಿವೆ. ಒಟ್ಟಾರೆ ಮಾರುಕಟ್ಟೆಯಲ್ಲಿ ಅದು ಶೇ. 19ರಷ್ಟು ಪಾಲು ಹೊಂದಿದೆ.
ಇದನ್ನೂ ಓದಿ: ಭಾರತದಲ್ಲಿ ಸ್ಟಾರ್ಟಪ್ಗಳಿಗೆ ಮತ್ತೆ ಫಂಡಿಂಗ್ ಸುಗ್ಗಿ; ಒಂದೇ ವಾರದಲ್ಲಿ ಮೂರು ಪಟ್ಟು ಬಂಡವಾಳ ಹೆಚ್ಚಳ
ವಿವೋ, ಶಿಯೋಮಿ, ಸ್ಯಾಮ್ಸುಂಗ್, ಓಪ್ಪೋ ಮತ್ತು ರಿಯಲ್ಮಿ ಕಂಪನಿಗಳು ಸ್ಮಾರ್ಟ್ಫೋನ್ ಮಾರಾಟದಲ್ಲಿ ಕ್ರಮವಾಗಿ ಒಂದರಿಂದ ಐದು ಸ್ಥಾನಗಳನ್ನು ಪಡೆದಿವೆ. ಆ್ಯಪಲ್ ಕಂಪನಿಯ ಐಫೋನ್15 ಸ್ಮಾರ್ಟ್ಫೋನ್ಗೆ ಒಳ್ಳೆಯ ಬೇಡಿಕೆ ಇದೆ. ಸಣ್ಣ ನಗರಗಳಿಂದಲೂ ಈ ಹೊಸ ಐಫೋನ್ ಮಾಡಲ್ಗೆ ಬೇಡಿಕೆ ಇದೆ. ಮೊಟರೋಲ, ಗೂಗಲ್, ನಥಿಂಗ್ ಇತ್ಯಾದಿ ಬ್ರ್ಯಾಂಡ್ಗಳ ಸ್ಮಾರ್ಟ್ಫೋನ್ಗಳ ಮಾರಾಟವೂ ಹೆಚ್ಚಳ ಕಂಡಿದೆ.
ಜುಲೈನಿಂದ ಸೆಪ್ಟೆಂಬರ್ ಅವಧಿಯಲ್ಲಿ ಟಾಪ್-5 ಕಂಪನಿಗಳು ಮತ್ತು ಮಾರಾಟ ಪ್ರಮಾಣ
ಬಿಕರಿಯಾದ ಒಟ್ಟು ಸ್ಮಾರ್ಟ್ಫೋನ್ಗಳು: 4.71 ಕೋಟಿ
- ವಿವೋ: 91 ಲಕ್ಷ ಯೂನಿಟ್
- ಶಿಯೋಮಿ: 78 ಲಕ್ಷ ಯೂನಿಟ್
- ಸ್ಯಾಮ್ಸುಂಗ್: 75 ಲಕ್ಷ ಯೂನಿಟ್
- ಓಪ್ಪೋ: 63 ಲಕ್ಷ ಯೂನಿಟ್
- ರಿಯಲ್ಮಿ: 53 ಲಕ್ಷ ಯೂನಿಟ್
ಇಲ್ಲಿ ಓಪ್ಪೋ ಸ್ಮಾರ್ಟ್ಫೋನ್ ಮಾರಾಟದಲ್ಲಿ ಒನ್ಪ್ಲಸ್ ಫೋನ್ಗಳನ್ನು ಒಳಗೊಳ್ಳಲಾಗಿಲ್ಲ.
ಇದನ್ನೂ ಓದಿ: ಅಂಬಾನಿ ವರ್ಸಸ್ ಮಸ್ಕ್; ಭಾರತೀಯ ಸೆಟಿಲೈಟ್ ಇಂಟರ್ನೆಟ್ ಯುದ್ಧದಲ್ಲಿ ಗೆಲ್ಲೋದ್ಯಾರು?
ಸ್ಮಾರ್ಟ್ಫೋನ್ ಮಾರಾಟ ಹೆಚ್ಚಳವಾದರೂ ಕಂಪನಿಗಳು ನಿರೀಕ್ಷಿಸಿದಷ್ಟಿಲ್ಲ…
ಈ ಬಾರಿ ಹಬ್ಬದ ಸೀಸನ್ಗೆ ವಿವಿಧ ಸ್ಮಾರ್ಟ್ಫೋನ್ ಕಂಪನಿಗಳು ಭರ್ಜರಿ ಡಿಸ್ಕೌಂಟ್ ಸೇಲ್ ಕೈಗೊಂಡಿದ್ದವು. ಸಾಕಷ್ಟು ಸ್ಮಾರ್ಟ್ಫೋನ್ಗಳ ದಾಸ್ತಾನು ಉಳಿದಿದ್ದು ಅವನ್ನು ಖಾಲಿ ಮಾಡುವ ಉಮೇದಿನಲ್ಲಿ ಆನ್ಲೈನ್ ಸೇಲ್ನಲ್ಲಿ ಒಳ್ಳೆಯ ಡಿಸ್ಕೌಂಟ್ ನೀಡಲಾಗಿತ್ತು. ಎಲ್ಲಾ ದಾಸ್ತಾನು ಖಾಲಿ ಮಾಡುವ ನಿರೀಕ್ಷೆಯಲ್ಲಿದ್ದ ಕಂಪನಿಗಳಿಗೆ, ನಿರೀಕ್ಷಿಸಿದಷ್ಟು ಮಾರಾಟ ಆಗದೇ ನಿರಾಸೆಯಾಗಿದೆ. ಇನ್ನೂ ಬಹಳಷ್ಟು ಸ್ಟಾಕ್ಗಳಿದ್ದು, ಇಯರ್ ಎಂಡ್ ಸೇಲ್ನಲ್ಲಿ ಅವನ್ನು ಮಾರಿ ಮುಗಿಸುವ ಆಲೋಚನೆಯಲ್ಲಿವೆ. ಈ ಹಿನ್ನೆಲೆಯಲ್ಲಿ ಡಿಸೆಂಬರ್ವರೆಗೂ ವಿವಿಧ ಸ್ಮಾರ್ಟ್ಫೋನ್ಗಳನ್ನು ಭರ್ಜರಿ ಡಿಸ್ಕೌಂಟ್ ದರದಲ್ಲಿ ಖರೀದಿಸುವ ಅವಕಾಶ ಸಿಗಲಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ