ಶ್ರೀಲಂಕಾದಲ್ಲಿ ಅದಾನಿ ಗ್ರೂಪ್ಗೆ ಧನಸಹಾಯ ಕೊಡುವ ಮುನ್ನ ಹಿಂಡನ್ಬರ್ಗ್ ವರದಿ ಅವಲೋಕಿಸಿದ್ದ ಅಮೆರಿಕದ ಸರ್ಕಾರ
US, Adani Group and Hindenburg Report: ಅದಾನಿ ಪೋರ್ಟ್ಸ್ ಅಂಡ್ ಎಸ್ಇಝಡ್ ಸಂಸ್ಥೆ ಶ್ರೀಲಂಕಾದ ಕೊಲಂಬೋದ ಬಂದರಿನಲ್ಲಿ ಕಂಟೈನರ್ ಟರ್ಮಿನಲ್ವೊಂದನ್ನು ನಿರ್ಮಿಸುತ್ತಿದೆ. ಅದಾನಿ ಗ್ರೂಪ್ನ ಈ ಪೋರ್ಟ್ ಪ್ರಾಜೆಕ್ಟ್ಗೆ ಅಮೆರಿಕದ ಇಂಟರ್ನ್ಯಾಷನಲ್ ಡೆವಲಪ್ಮೆಂಟ್ ಫೈನಾನ್ಸ್ ಕಾರ್ಪ್ ಕಳೆದ ತಿಂಗಳು ಹಣದ ನೆರವು ಘೋಷಿಸಿತ್ತು. ಅದಾನಿ ಗ್ರೂಪ್ನ ಷೇರು ಅಕ್ರಮಗಳ ವಿರುದ್ಧ ಹಿಂಡನ್ಬರ್ಗ್ ರಿಸರ್ಚ್ನ ವರದಿಯ ಅಂಶಗಳನ್ನು ಅವಲೋಕಿಸಿಯೇ ಅದಾನಿ ಕಂಪನಿಗೆ ಧನಸಹಾಯ ಒದಗಿಸಲಾಗಿದೆ.
ವಾಷಿಂಗ್ಟನ್, ಡಿಸೆಂಬರ್ 5: ಶ್ರೀಲಂಕಾದಲ್ಲಿ ಅದಾನಿ ಗ್ರೂಪ್ನ ಸಂಸ್ಥೆಯೊಂದು ನಡೆಸುತ್ತಿರುವ ಪೋರ್ಟ್ ಪ್ರಾಜೆಕ್ಟ್ಗೆ ಕಳೆದ ತಿಂಗಳು ಅಮೆರಿಕದಿಂದ ಧನಸಹಾಯ ಘೋಷಣೆ ಆಗಿತ್ತು. ಹಿಂಡನ್ಬರ್ಗ್ ರಿಸರ್ಚ್ ಸಂಸ್ಥೆ ಅದಾನಿ ಗ್ರೂಪ್ ವಿರುದ್ಧ ಅಕ್ರಮ ಆರೋಪಗಳನ್ನು (Hindenburg Research Report) ಮಾಡಿದ್ದ ಹಿನ್ನೆಲೆಯಲ್ಲಿ ಈ ಬೆಳವಣಿಗೆ ಆಗಿದ್ದು ಹಲವರ ಹುಬ್ಬೇರಿಸಿತ್ತು. ಆದರೆ, ಅಮೆರಿಕದ ಸರ್ಕಾರ ಯಾವುದೋ ಮರ್ಜಿಯಲ್ಲಿ ಅದಾನಿ ಗ್ರೂಪ್ಗೆ ಹಣದ ನೆರವು ಒದಗಿಸಿಲ್ಲ ಎಂಬುದು ಅಲ್ಲಿನ ಹಿರಿಯ ಅಧಿಕಾರಿಯೊಬ್ಬರ ಹೇಳಿಕೆ ದೃಢೀಕರಿಸಿದೆ. ಅದಾನಿ ಗ್ರೂಪ್ನ ಪೋರ್ಟ್ ಪ್ರಾಜೆಕ್ಟ್ಗೆ ಹಣದ ನೆರವು ಒದಗಿಸುವ ಮುನ್ನ ಹಿಂಡನ್ಬರ್ಗ್ ವರದಿಯ ಅಂಶಗಳನ್ನು ಅವಲೋಕಿಸಲಾಗಿತ್ತು ಎಂದು ಅಮೆರಿಕದ ಅಧಿಕಾರಿಯೊಬ್ಬರು ಹೇಳಿರುವುದಾಗಿ ಬ್ಲೂಮ್ಬರ್ಗ್ ಸುದ್ದಿಸಂಸ್ಥೆ ವರದಿ ಮಾಡಿದೆ.
ಅದಾನಿ ಗ್ರೂಪ್ಗೆ ಸೇರಿದ ಅದಾನಿ ಪೋರ್ಟ್ಸ್ ಅಂಡ್ ಸ್ಪೆಷಲ್ ಎಕನಾಮಿಕ್ ಝೋನ್ ಲಿ ಸಂಸ್ಥೆ ಶ್ರೀಲಂಕಾದ ಕೊಲಂಬೋದ ಬಂದರಿನಲ್ಲಿ ಕಂಟೈನರ್ ಟರ್ಮಿನಲ್ವೊಂದನ್ನು ನಿರ್ಮಿಸುತ್ತಿದೆ. ಈ ಯೋಜನೆಗೆ ಅಮೆರಿಕದ ಸರ್ಕಾರಿ ಸ್ವಾಮ್ಯದ ಇಂಟರ್ನ್ಯಾಷನಲ್ ಡೆವಲಪ್ಮೆಂಟ್ ಫೈನಾನ್ಸ್ ಕಾರ್ಪೊರೇಶನ್ ಸಂಸ್ಥೆ (ಡಿಎಫ್ಸಿ) 553 ಮಿಲಿಯನ್ ಡಾಲರ್ ಮೊತ್ತದ ಸಾಲ ಸೌಲಭ್ಯ ಒದಗಿಸಿತ್ತು.
ಇದನ್ನೂ ಓದಿ: Corporate Bond: ಆರು ವರ್ಷದಲ್ಲಿ ದ್ವಿಗುಣಗೊಳ್ಳಲಿದೆ ಭಾರತದ ಕಾರ್ಪೊರೇಟ್ ಬಾಂಡ್ ಮಾರುಕಟ್ಟೆ; ಏನಿದು ಬಾಂಡ್?
ಈ ಸಾಲ ನೀಡುವ ಮುನ್ನ ಡಿಎಫ್ಸಿ ಸಂಸ್ಥೆ ಹಿಂಡನ್ಬರ್ಗ್ ವರದಿಯ ಅಂಶಗಳನ್ನು ಅವಲೋಕಿಸಿತ್ತು. ಹಿಂನ್ಬರ್ಗ್ ಮಾಡಿದ ಆರೋಪಗಳು ಶ್ರೀಲಂಕಾದಲ್ಲಿ ಪೋರ್ಟ್ ಪ್ರಾಜೆಕ್ಟ್ ಕೈಗೊಂಡಿರುವ ಅದಾನಿ ಕಂಪನಿಗೆ ಅನ್ವಯ ಆಗುವುದಿಲ್ಲ ಎಂಬುದು ಖಾತ್ರಿ ಆದ ಬಳಿಕ ಸಾಲ ನೀಡಲು ನಿರ್ಧರಿಸಲಾಯಿತು ಎಂದು ಡಿಎಫ್ಸಿ ಅಧಿಕಾರಿ ಸ್ಪಷ್ಟಪಡಿಸಿದ್ದಾರೆ.
ಆದರೆ, ಅದಾನಿಯ ಈ ಸಂಸ್ಥೆಯ ಮೇಲೆ ಮತ್ತು ಅದರ ಹಣಕಾಸು ನಡವಳಿಕೆ ಮತ್ತಿತರ ವಿಚಾರದ ಬಗ್ಗೆ ಸದಾ ಒಂದು ಕಣ್ಣಿಟ್ಟಿರಲಾಗುತ್ತದೆ ಎಂದೂ ಅಮೆರಿಕದ ಡೆವಲಪ್ಮೆಂಟ್ ಫೈನಾನ್ಸ್ ಕಾರ್ಪೊರೇಶನ್ ಸಂಸ್ಥೆ ಹೇಳಿದೆ.
ಕೊಲಂಬೋದಲ್ಲಿ ಅದಾನಿ ಗ್ರೂಪ್ ಕೈಗೊಂಡಿರುವ ಪೋರ್ಟ್ ಪ್ರಾಜೆಕ್ಟ್ಗೆ ಅಮೆರಿಕ ಬೆಂಬಲ ನೀಡಲು ರಾಜಕೀಯ ಕಾರಣವೂ ಇದೆ. ಶ್ರೀಲಂಕಾದಲ್ಲಿ ಚೀನಾದ ಹಿಡಿತ ದಿನೇ ದಿನೇ ಹೆಚ್ಚುತ್ತಿದೆ. ಚೀನಾದ ಪ್ರಭಾವವನ್ನು ಸರಿದೂಗಿಸುವುದು ಅಥವಾ ಕಡಿಮೆ ಮಾಡುವುದು ಅಮೆರಿಕದ ಗುರಿ. ಈ ಹಿನ್ನೆಲೆಯಲ್ಲಿ ಕೊಲಂಬೋ ಪೋರ್ಟ್ ಯೋಜನೆಯಲ್ಲಿ ಅಮೆರಿಕವೂ ಶಾಮೀಲಾಗಲು ನಿರ್ಧರಿಸಿದಂತಿದೆ.
ಇದನ್ನೂ ಓದಿ: ಅದಾನಿ-ಹಿಂಡನ್ಬರ್ಗ್ ರಿಪೋರ್ಟ್, ಚೀನಾ ಬೆಂಬಲಿಗರ ಕರ್ಮಕಾಂಡ: ರಾಜ್ಯಸಭಾ ಸಂಸದ ಮಹೇಶ್ ಜೇಠ್ಮಲಾನಿ ಅರೋಪ
ಕೊಲಂಬೋದಲ್ಲಿ ಪೋರ್ಟ್ ಈಗಾಗಲೇ ಅಸ್ತಿತ್ವದಲ್ಲಿದೆ. ಅದರಲ್ಲಿ ವಿವಿಧ ಟರ್ಮಿನಲ್ಗಳಿದ್ದು, ಇನ್ನೂ ಕೆಲ ಹೊಸ ಟರ್ಮಿನಲ್ಗಳನ್ನು ನಿರ್ಮಿಸಲಾಗುತ್ತಿದೆ. ಅದರ ಒಂದು ಟರ್ಮಿನಲ್ ನಿರ್ಮಾಣದ ಗುತ್ತಿಗೆಯನ್ನು ಅದಾನಿ ಪೋರ್ಟ್ಸ್ ಅಂಡ್ ಎಸ್ಇಝಡ್ ಕಂಪನಿಗೆ ವಹಿಸಲಾಗಿದೆ. ಇದೇ ಬಂದರಿನಲ್ಲಿ ಚೀನಾ ಬೇರೆ ಒಂದು ಟರ್ಮಿನಲ್ ನಿರ್ಮಿಸಿ ಅದನ್ನು ನಿರ್ವಹಿಸುತ್ತಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ