ಪ್ರವಾಸಕ್ಕೆ ಬುಕ್​ ಮಾಡಿದ್ದ ಕಾರು ಕಳವು ಕೇಸ್: ಕಿರುತೆರೆ ನಟ ಅರೆಸ್ಟ್​

ಬೆಂಗಳೂರು: ಪ್ರವಾಸಕ್ಕೆ ಕಾರ್ ಬುಕ್ ಮಾಡಿ ಕಳ್ಳತನ ಮಾಡಿದ್ದ ಆರೋಪಿಯನ್ನು ಬ್ಯಾಟರಾಯನಪುರ ಪೊಲೀಸರು ಬಂಧಿಸಿದ್ದಾರೆ. ಕನ್ನಡದ ಕಿರುತೆರೆ ನಟ ಕರಣ್‌ ಕುಮಾರ್(27) ಬಂಧಿತ ಆರೋಪಿ. ಮೊಬೈಲ್ ಲೊಕೇಷನ್ ಆಧರಿಸಿ ನಗರದ ಕತ್ರಿಗುಪ್ಪೆ ನಿವಾಸಿ ಕರಣ್​ನನ್ನು ಪೊಲೀಸರು ಸೆರೆ ಹಿಡಿದಿದ್ದಾರೆ.

ಜಸ್ಟ್ ಡಯಲ್ ಮೂಲಕ ಮೈಸೂರಿಗೆ ಪ್ರವಾಸಕ್ಕೆ ಹೋಗಲು ಆರೋಪಿ ಕರಣ್ ಕಾರು ಬುಕ್ ಮಾಡಿದ್ದ. ಸೌಮ್ಯ ಟೂರ್ಸ್ ಅಂಡ್ ಟ್ರಾವೆಲ್ಸ್ ಸಂಪರ್ಕಿಸಿದ ಆರೋಪಿ 22 ಲಕ್ಷ ಮೌಲ್ಯದ ಇನೋವಾ ಕಾರು ಬುಕ್ ಮಾಡಿದ್ದ. ಟ್ರಾವೆಲ್ಸ್​ನವರು ಚಾಲಕ ಅರುಣ್​ಗೆ ಮೈಸೂರಿಗೆ ಹೋಗುವಂತೆ ಹೇಳಿದ್ರು. ನಾಯಂಡಹಳ್ಳಿ ಮೆಟ್ರೋ ಸ್ಟೇಷನ್​ ಬಳಿಯ ಹೋಟೆಲ್​ನಲ್ಲಿ ಸ್ನೇಹಿತನ ಬಳಿ 10 ಸಾವಿರ ಹಣ ತೆಗೆದುಕೊಳ್ಳಬೇಕೆಂದು ಕಾರು ಚಾಲಕನಿಗೆ ಹೇಳಿದ್ದ. ಚಾಲಕ ಹೋಟೆಲ್​ಗೆ ಹೋಗಿ ಬರುವಷ್ಟರಲ್ಲಿ ಕಾರು ಸಮೇತ ಆರೋಪಿ ಕರಣ್ ಎಸ್ಕೇಪ್ ಆಗಿದ್ದ.

ಅರೋಪಿ ಕರಣ್ ಕುಮಾರ್ ಕನ್ನಡದ ಹಲವಾರು ಧಾರವಾಹಿಗಳಲ್ಲಿ ನಟಿಸಿದ್ದಾನೆ. ಈ ಹಿಂದೆ ದಾವಣಗೆರೆಯಲ್ಲಿ ನಡೆದಿದ್ದ ಒಂದು ಕೊಲೆ ಕೇಸ್​ನಲ್ಲಿಯು ಕರಣ್ ಆರೋಪಿಯಾಗಿದ್ದಾನೆ. ಕಾರು ಕದ್ದ ದಿನವೇ ಮತ್ತೊಂದು ಕೃತ್ಯ ನಡೆಸಿರುವ ಬಗ್ಗೆಯೂ ಆರೋಪಿ ಕರಣ್ ಕುಮಾರ್ ಬಾಯ್ಬಿಟ್ಟಿದ್ದಾನೆ. ಆರೋಪಿಯಿಂದ ಕದ್ದ ಇನೋವಾ ಕಾರು ಸೇರಿ ಎರಡು ಕಾರುಗಳನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.