Kidney Racket ಸಿಲಿಕಾನ್ ಸಿಟಿಯಲ್ಲಿ ಮತ್ತೆ ಕಿಡ್ನಿ ಮಾರಾಟ ದಂಧೆ: ಹಾಸ್ಮ್ಯಾಟ್ ಆಸ್ಪತ್ರೆ ಹೆಸರು ಬಳಸಿ ವಂಚನೆ
ರಾಜ್ಯ ರಾಜಧಾನಿಯಲ್ಲಿ ಕೆಲವು ದಶಕಗಳ ಹಿಂದೆ ಎಗ್ಗಿಲ್ಲದೆ ನಡೆಯುತ್ತಿದ್ದ ಕಿಡ್ನಿ ಮಾರಾಟ ದಂಧೆಗೆ ಕಾಲಕ್ರಮೇಣ ಬ್ರೇಕ್ ಬಿದ್ದಿತ್ತು. ಆದರೆ, ಇದೀಗ ಸಿಲಿಕಾನ್ ಸಿಟಿಯಲ್ಲಿ ಈ ಕರಾಳ ದಂಧೆ ಮತ್ತು ಅದರ ಹೆಸರಿನಲ್ಲಿ ಜನರಿಗೆ ವಂಚನೆ ಮಾಡುತ್ತಿರುವುದು ಬೆಳಕಿಗೆ ಬಂದಿದೆ.
ಬೆಂಗಳೂರು: ರಾಜ್ಯ ರಾಜಧಾನಿಯಲ್ಲಿ ದಶಕಗಳ ಹಿಂದೆ ಎಗ್ಗಿಲ್ಲದೆ ನಡೆಯುತ್ತಿದ್ದ ಕಿಡ್ನಿ ಮಾರಾಟ ದಂಧೆಗೆ Kidney Racket ಕಾಲಕ್ರಮೇಣ ಬ್ರೇಕ್ ಬಿದ್ದಿತ್ತು. ಆದರೆ, ಇದೀಗ ಸಿಲಿಕಾನ್ ಸಿಟಿಯಲ್ಲಿ ಈ ಕರಾಳ ದಂಧೆ ಮತ್ತು ಅದರ ಹೆಸರಿನಲ್ಲಿ ಜನರಿಗೆ ವಂಚನೆ ಮಾಡುತ್ತಿರುವುದು ಬೆಳಕಿಗೆ ಬಂದಿದೆ.
ಕಿಡ್ನಿ ಕೊಟ್ಟವರಿಗೆ 2 ಕೋಟಿ ಹಣ ಕೊಡುತ್ತೇವೆಂದು ನಂಬಿಸಿ ವಂಚನೆ ಮಾಡಿರುವ ಪ್ರಕರಣ ಇದೀಗ ನಡೆದಿದೆ. ಹಾಸ್ಮ್ಯಾಟ್ ಆಸ್ಪತ್ರೆ ಹೆಸರು ಬಳಸಿ ಅಮಾಯಕರಿಗೆ ಕರೆ ಮಾಡುತ್ತಿದ್ದ ನಯವಂಚಕರು ಕಿಡ್ನಿ ಕೊಡಿಸ್ತೇವೆಂದು ರೋಗಿ ಸಂಬಂಧಿಕರಿಂದ ಮುಂಗಡ ಹಣ ಪಡೆಯುತ್ತಿದ್ದರು. ಇತ್ತ, ಕಿಡ್ನಿ ದಾನಿಗಳಿಗೆ 2 ಕೋಟಿ ಕೊಡುತ್ತೇವೆಂದು ನಂಬಿಸಿ ಕಿಡ್ನಿ ರೋಗಿಗಳ ಜೊತೆ ಮಾತನಾಡಿಸುತ್ತಿದ್ದರು. ರೋಗಿಯ ಸಂಬಂಧಿಕರಿಗೆ ನಂಬಿಕೆ ಬಂದ ಮೇಲೆ ಅವರಿಂದ ಮುಂಗಡ ಹಣ ಪಡೆದ ಆಸಾಮಿಗಳು ಎಸ್ಕೇಪ್!
ಅಂದ ಹಾಗೆ, ಈ ಕಿಡ್ನಿ ಕಿರಾತಕರು ಹಾಸ್ಮ್ಯಾಟ್ ಆಸ್ಪತ್ರೆ ಹೆಸರು ಬಳಸಿ ಹಲವರಿಗೆ ವಂಚನೆ ಮಾಡಿದ್ದರು ಎಂದು ಹೇಳಲಾಗಿದೆ. ನಾನು ಹಾಸ್ಮ್ಯಾಟ್ ಆಸ್ಪತ್ರೆ ವೈದ್ಯನೆಂದು ಹೇಳಿ ವಂಚಿಸಿದ್ದನು ಎಂದು ತಿಳಿದುಬಂದಿದೆ. ಸದ್ಯ, ಈ ಬಗ್ಗೆ ಹಲಸೂರು ಪೊಲೀಸ್ ಠಾಣೆಯಲ್ಲಿ ಕೇಸ್ ದಾಖಲಾಗಿದೆ.
ಈ ನಡುವೆ, ನಮ್ಮ ಆಸ್ಪತ್ರೆಯಲ್ಲಿ ಯಾರಿಂದಲೂ ಕಿಡ್ನಿ ಪಡೆಯುತ್ತಿಲ್ಲ. ಸಾರ್ವಜನಿಕರು ಮೋಸ ಹೋಗಬೇಡಿ. ನಮ್ಮ ಆಸ್ಪತ್ರೆಯ ಹೆಸರನ್ನು ದುರ್ಬಳಕೆ ಮಾಡಿಕೊಳ್ಳಲಾಗ್ತಿದೆ. ಕಿಡ್ನಿ ಹೆಸರಲ್ಲಿ ವಂಚನೆ ಬಗ್ಗೆ ಪೊಲೀಸರಿಗೆ ದೂರು ನೀಡಿದ್ದೇವೆ ಎಂದು ಆಸ್ಪತ್ರೆ ಪ್ರಕಟಣೆಯಲ್ಲಿ ಸೂಚಿಸಿದೆ.
ಹಾಸ್ಮ್ಯಾಟ್ ಆಸ್ಪತ್ರೆ ಹೆಸರಲ್ಲಿ ಯಾರಾದರೂ ಕರೆ ಮಾಡಿದ್ರೆ. ಆಸ್ಪತ್ರೆ ಆಡಳಿತ ಮಂಡಳಿ ಅಥವಾ ಪೊಲೀಸರಿಗೆ ದೂರು ನೀಡಿ. ಕಿಡ್ನಿ ಜಾಲದ ಬಗ್ಗೆ ತನಿಖೆ ನಡೆಸುವಂತೆ ಪೊಲೀಸರಿಗೆ ಮನವಿ ಮಾಡಿದ್ದೇವೆ ಎಂದು ಆಸ್ಪತ್ರೆಯ ಎಂಡಿ ಡಾ.ಅಜಿತ್ ಬೆನೆಡಿಕ್ಟ್ ರಾಯನ್ ಮನವಿ ಮಾಡಿದ್ದಾರೆ.
