ಪ್ರತಿಷ್ಠಿತ ಆಸ್ಕರ್ ಕ್ಲೈನ್ ಗೌರವ ಪಡೆದ ಭಾರತೀಯ ವಿಜ್ಞಾನಿ ಅಶೋಕ್ ಸೇನ್; ಇವರ ಸಾಧನೆಗಳೇನು ಗೊತ್ತಾ?

ಆಧುನಿಕ ವಿಜ್ಞಾನದ ಕ್ಷೇತ್ರದಲ್ಲಿ ಭಾರತದ ಹೆಸರು ಜಾಗತಿಕ ಮಟ್ಟದಲ್ಲಿ ರಾರಾಜಿಸುವಂತೆ ಮಾಡಿದ ಪ್ರಮುಖ ವಿಜ್ಞಾನಿಗಳಲ್ಲಿ ಪ್ರೊಫೆಸರ್ ಅಶೋಕ್ ಸೇನ್ ಮುಂಚೂಣಿಯಲ್ಲಿದ್ದಾರೆ. ಸೈದ್ಧಾಂತಿಕ ಭೌತಶಾಸ್ತ್ರದಲ್ಲಿ ನೀಡಿದ ಮಹತ್ವದ ಕೊಡುಗೆಗಳಿಗಾಗಿ ಅವರು ಪ್ರತಿಷ್ಠಿತ ಆಸ್ಕರ್ ಕ್ಲೈನ್ ಪದಕವನ್ನು ಪಡೆದ ಮೊದಲ ಭಾರತೀಯ ವಿಜ್ಞಾನಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಸ್ಟ್ರಿಂಗ್ ಸಿದ್ಧಾಂತ, ಕಪ್ಪು ಕುಳಿಗಳು ಹಾಗೂ ಬ್ರಹ್ಮಾಂಡದ ಮೂಲಭೂತ ನಿಯಮಗಳ ಕುರಿತಾದ ಅವರ ಸಂಶೋಧನೆಗಳು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದಿವೆ. ತಮ್ಮ ಅಪಾರ ವೈಜ್ಞಾನಿಕ ಸಾಧನೆಗಳಿಗಾಗಿ ಹಲವು ಪ್ರತಿಷ್ಠಿತ ಜಾಗತಿಕ ಗೌರವಗಳಿಗೆ ಭಾಜನರಾಗಿರುವ ಪ್ರೊಫೆಸರ್ ಅಶೋಕ್ ಸೇನ್ ಅವರ ಶೈಕ್ಷಣಿಕ ಪಯಣ ಮತ್ತು ಸಂಶೋಧನಾ ಕೊಡುಗೆಗಳು ವಿಜ್ಞಾನ ಕ್ಷೇತ್ರದಲ್ಲಿ ಸಾಧನೆ ಮಾಡಲು ಬಯಸುವ ಯುವಜನರಿಗೆ ದೊಡ್ಡ ಸ್ಫೂರ್ತಿಯಾಗಿವೆ.

ಸ್ಟ್ರಿಂಗ್ ಸಿದ್ಧಾಂತ ಮತ್ತು ಪ್ರೊ. ಅಶೋಕ್ ಸೇನ್ ಅವರ ಸಂಶೋಧನೆ:

ಗುರುತ್ವಾಕರ್ಷಣೆಯ ನಿಯಮಗಳು (Gravity) ಮತ್ತು ಕ್ವಾಂಟಮ್ ಭೌತಶಾಸ್ತ್ರದ (Quantum Physics) ಸಿದ್ಧಾಂತಗಳನ್ನು ಏಕಕಾಲದಲ್ಲಿ ಅರ್ಥಮಾಡಿಕೊಳ್ಳುವುದು ಆಧುನಿಕ ಭೌತಶಾಸ್ತ್ರಕ್ಕೆ ದೊಡ್ಡ ಸವಾಲಾಗಿತ್ತು. ಈ ಎರಡು ಭಿನ್ನ ಜಗತ್ತುಗಳ ನಡುವಿನ ಅಂತರವನ್ನು ಕಡಿಮೆ ಮಾಡಲು ‘ಸ್ಟ್ರಿಂಗ್ ಸಿದ್ಧಾಂತ’ ಕಾರ್ಯನಿರ್ವಹಿಸುತ್ತದೆ. ಪ್ರೊ. ಅಶೋಕ್ ಸೇನ್ ಅವರು ಈ ಸಿದ್ಧಾಂತದ ಆಳವಾದ ಅಧ್ಯಯನದಲ್ಲಿ ತೊಡಗಿಸಿಕೊಂಡು, ಬ್ರಹ್ಮಾಂಡದ ಮೂಲಭೂತ ರಚನೆಯನ್ನು ಅರ್ಥೈಸಿಕೊಳ್ಳುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ.

ಆಧುನಿಕ ಭೌತಶಾಸ್ತ್ರದ ತಿಳುವಳಿಕೆಗೆ ಅಮೂಲ್ಯ ಕೊಡುಗೆ:

ಅಶೋಕ್ ಸೇನ್ ಅವರು ಮುಖ್ಯವಾಗಿ ‘ಎಸ್-ಡ್ಯುಯಲಿಟಿ’ (S-duality), ‘ಸ್ಟ್ರಿಂಗ್ ಫೀಲ್ಡ್ ಸಿದ್ಧಾಂತ’ (String Field Theory) ಮತ್ತು ‘ಕಪ್ಪು ಕುಳಿಗಳು’ (Black Holes) ಗೆ ಸಂಬಂಧಿಸಿದ ಸಂಕೀರ್ಣ ಲೆಕ್ಕಾಚಾರಗಳ ಕುರಿತು ಅತ್ಯಂತ ಗಮನಾರ್ಹವಾದ ಕೆಲಸ ಮಾಡಿದ್ದಾರೆ. ಪ್ರಪಂಚದಾದ್ಯಂತ ಇರುವ ಭೌತಶಾಸ್ತ್ರಜ್ಞರು ಬ್ರಹ್ಮಾಂಡದ ರಹಸ್ಯಗಳನ್ನು ಬಿಡಿಸಲು ಸೇನ್ ಅವರ ಈ ಸಂಶೋಧನೆಗಳನ್ನು ಪ್ರಮುಖ ಆಧಾರವಾಗಿ ಬಳಸಿಕೊಳ್ಳುತ್ತಿದ್ದಾರೆ.

ಜಾಗತಿಕ ವೇದಿಕೆಯಲ್ಲಿ ಲಭಿಸಿದ ಅತ್ಯುನ್ನತ ಗೌರವಗಳು:

ಸೇನ್ ಅವರ ಈ ಅದ್ವಿತೀಯ ಸಾಧನೆಗಾಗಿ ಅನೇಕ ಪ್ರತಿಷ್ಠಿತ ಅಂತಾರಾಷ್ಟ್ರೀಯ ಗೌರವಗಳು ಅರಸಿ ಬಂದಿವೆ. ‘ಆಸ್ಕರ್ ಕ್ಲೈನ್ ಪದಕ’ಕ್ಕೂ (Oskar Klein Medal) ಮುಂಚಿತವಾಗಿ, ಅವರು ಭೌತಶಾಸ್ತ್ರದ ಅತ್ಯುನ್ನತ ಪುರಸ್ಕಾರಗಳಾದ ‘ಡಿರಾಕ್ ಪದಕ’ (Dirac Medal) ಮತ್ತು ‘ಮೂಲಭೂತ ಭೌತಶಾಸ್ತ್ರದಲ್ಲಿ ಬ್ರೇಕ್‌ಥ್ರೂ ಪ್ರಶಸ್ತಿ’ (Breakthrough Prize in Fundamental Physics) ಗಳನ್ನು ಪಡೆದಿದ್ದಾರೆ.

ಇವರೊಂದಿಗೆ ಇತರ ಭಾರತೀಯ ಮೂಲದ ವಿಜ್ಞಾನಿಗಳಾದ ದೀಪಕ್ ಧಾರ್ ಅವರಿಗೆ ‘ಡಿರಾಕ್ ಪದಕ’ ಹಾಗೂ ಜೈನೇಂದ್ರ ಜೈನ್ ಅವರಿಗೆ ‘ವುಲ್ಫ್ ಪ್ರಶಸ್ತಿ’ (Wolf Prize) ಲಭಿಸಿರುವುದು ಜಾಗತಿಕ ವಿಜ್ಞಾನ ಜಗತ್ತಿನಲ್ಲಿ ಭಾರತೀಯ ವಿಜ್ಞಾನಿಗಳ ಬಲವಾದ ಉಪಸ್ಥಿತಿ ಮತ್ತು ಸಾಮರ್ಥ್ಯಕ್ಕೆ ಸಾಕ್ಷಿಯಾಗಿದೆ.

ವಿಜ್ಞಾನಿಯಾಗುವ ಪ್ರಯಾಣ ಆರಂಭವಾಗಿದ್ದು ಎಲ್ಲಿಂದ?

ಅಶೋಕ್ ಸೇನ್ ಅವರು 1956 ರಲ್ಲಿ ಕೋಲ್ಕತ್ತಾದಲ್ಲಿ ಜನಿಸಿದರು. ಅವರ ತಂದೆ ಸ್ಕಾಟಿಷ್ ಚರ್ಚ್ ಕಾಲೇಜಿನಲ್ಲಿ ಭೌತಶಾಸ್ತ್ರದ ಉಪನ್ಯಾಸಕರಾಗಿದ್ದರು, ಹೀಗಾಗಿ ಚಿಕ್ಕಂದಿನಿಂದಲೇ ವಿಜ್ಞಾನದ ವಾತಾವರಣ ಮನೆಯಲ್ಲಿತ್ತು. ಕೋಲ್ಕತ್ತಾದ ಪ್ರಸಿದ್ಧ ಪ್ರೆಸಿಡೆನ್ಸಿ ಕಾಲೇಜಿನಿಂದ ಬಿ.ಎಸ್ಸಿ ಮುಗಿಸಿದ ಅವರು, ನಂತರ ಪ್ರತಿಷ್ಠಿತ ಐಐಟಿ (IIT) ಕಾನ್ಪುರದಲ್ಲಿ ಉನ್ನತ ಶಿಕ್ಷಣ ಪಡೆದರು.

ನಂತರ ಹೆಚ್ಚಿನ ಅಧ್ಯಯನಕ್ಕಾಗಿ ಅಮೆರಿಕಕ್ಕೆ ತೆರಳಿದ ಅವರು, ಸ್ಟೋನಿ ಬ್ರೂಕ್ ವಿಶ್ವವಿದ್ಯಾಲಯದಿಂದ ಪಿಎಚ್‌ಡಿ (PhD) ಪದವಿ ಪಡೆದರು. ತಮ್ಮ ವೃತ್ತಿಜೀವನದ ಆರಂಭಿಕ ದಿನಗಳಲ್ಲಿ ವಿಶ್ವಪ್ರಸಿದ್ಧ ಸ್ಟ್ಯಾನ್‌ಫೋರ್ಡ್ ವಿಶ್ವವಿದ್ಯಾಲಯ ಮತ್ತು ಫರ್ಮಿಲಾಬ್ (Fermilab) ಸಂಶೋಧನಾ ಕೇಂದ್ರಗಳಲ್ಲಿಯೂ ಸೇವೆ ಸಲ್ಲಿಸಿದರು.

ಇದನ್ನೂ ಓದಿ: 68ರ ವಯಸ್ಸಿನಲ್ಲೂ ಕಲಿಕೆಯ ಉತ್ಸಾಹ; ನಿವೃತ್ತ ಅಧಿಕಾರಿ ಈಗ ಸೈಕಾಲಜಿ ಸ್ಟೂಡೆಂಟ್!

ಭಾರತಕ್ಕೆ ಮರಳಿ ದೇಶದ ಸಂಶೋಧನಾ ಕ್ಷೇತ್ರಕ್ಕೆ ನೀಡಿ ಕೊಡುಗೆ:

ಅಮೆರಿಕದಲ್ಲೇ ಉಳಿದು ಸೌಲಭ್ಯಗಳನ್ನು ಪಡೆಯುವ ಅವಕಾಶವಿದ್ದರೂ, ಪ್ರೊ. ಸೇನ್ ಅವರು ಭಾರತಕ್ಕೆ ಮರಳಿ ದೇಶದಲ್ಲೇ ಸಂಶೋಧನೆ ಮುಂದುವರಿಸಲು ನಿರ್ಧರಿಸಿದರು. ಭಾರತಕ್ಕೆ ಬಂದ ನಂತರ ಅವರು ‘ಟಾಟಾ ಇನ್ಸ್ಟಿಟ್ಯೂಟ್ ಆಫ್ ಫಂಡಮೆಂಟಲ್ ರಿಸರ್ಚ್’ (TIFR) ಸೇರಿದರು. ನಂತರ 1995 ರಲ್ಲಿ, ಪ್ರಯಾಗ್‌ರಾಜ್‌ನಲ್ಲಿರುವ ಹರೀಶ್ ಚಂದ್ರ ಸಂಶೋಧನಾ ಸಂಸ್ಥೆಯಲ್ಲಿ (HRI) ತಮ್ಮ ಸುದೀರ್ಘ ಸಂಶೋಧನಾ ಪ್ರಯಾಣವನ್ನು ಮುಂದುವರಿಸಿದರು.

ಪ್ರೊ. ಅಶೋಕ್ ಸೇನ್ ಅವರ ಈ ಅದ್ಭುತ ಸಾಧನೆಯ ಪ್ರಯಾಣವು, ಸತತ ಕುತೂಹಲ, ಕಠಿಣ ಪರಿಶ್ರಮ ಮತ್ತು ಸಂಶೋಧನೆಗೆ ಸಂಪೂರ್ಣ ಸಮರ್ಪಣೆ ಇದ್ದರೆ ದೇಶದಲ್ಲೇ ಇದ್ದುಕೊಂಡು ಜಾಗತಿಕ ಮಟ್ಟದ ಮನ್ನಣೆ ಹಾಗೂ ಗೌರವಗಳನ್ನು ಗಳಿಸಬಹುದು ಎಂಬುದಕ್ಕೆ ಅತ್ಯುತ್ತಮ ನಿದರ್ಶನವಾಗಿದೆ.

ಶಿಕ್ಷಣ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 4:18 pm, Sun, 25 October 26