Kashish Methwani: ಗ್ಲಾಮರ್ ಜಗತ್ತಿನಲ್ಲಿ ಮಿಂಚಿದ್ದ ಮಾಜಿ ಮಿಸ್ ಇಂಡಿಯಾ ಇಂದು ಭಾರತೀಯ ಸೇನಾ ಅಧಿಕಾರಿ
ಮಾಡೆಲಿಂಗ್ ಜಗತ್ತಿನಲ್ಲಿ ಖ್ಯಾತಿ ಗಳಿಸಿದ್ದ ಕಾಶಿಶ್ ಮೆಥ್ವಾನಿ, ಸಿಡಿಎಸ್ ಪರೀಕ್ಷೆಯಲ್ಲಿ ಅಖಿಲ ಭಾರತದಲ್ಲಿ ಎರಡನೇ ರ್ಯಾಂಕ್ ಗಳಿಸಿ ಎಲ್ಲರನ್ನೂ ಅಚ್ಚರಿಗೊಳಿಸಿದ್ದಾರೆ. ಐಐಎಸ್ಸಿ ಎಂಎಸ್ಸಿ ಪದವೀಧರೆಯಾದ ಇವರು ಹಾರ್ವರ್ಡ್ನ ಪಿಎಚ್ಡಿ ಅವಕಾಶವನ್ನು ತಿರಸ್ಕರಿಸಿ ದೇಶಸೇವೆಗೆ ಆದ್ಯತೆ ನೀಡಿದ್ದಾರೆ. ರಾಷ್ಟ್ರಮಟ್ಟದ ಪಿಸ್ತೂಲ್ ಶೂಟರ್, ಬ್ಯಾಸ್ಕೆಟ್ಬಾಲ್ ಆಟಗಾರ್ತಿ, ತಬಲಾ ವಾದಕಿ ಮತ್ತು ಭರತನಾಟ್ಯ ಕಲಾವಿದೆ ಕೂಡ ಆಗಿರುವ ಕಾಶಿಶ್ ಅವರ ಸಾಧನೆ ಯುವಜನರಿಗೆ ಸ್ಫೂರ್ತಿಯಾಗಿದೆ.
ಗ್ಲಾಮರ್ ಜಗತ್ತಿನ ಜೊತೆಗೆ ಸಶಸ್ತ್ರ ಪಡೆಗಳಲ್ಲಿಯೂ ಮಿಂಚಬಹುದು ಎಂಬುದನ್ನು ತೋರಿಸಿಕೊಟ್ಟಿದ್ದಾರೆ ಕಾಶಿಶ್ ಮೆಥ್ವಾನಿ. ಮಾಡೆಲಿಂಗ್ ಜಗತ್ತಿನಲ್ಲಿ ಸಖತ್ ಫೇಮಸ್ ಆಗಿದ್ದ ಕಾಶಿಶ್, ಕಂಬೈನ್ಡ್ ಡಿಫೆನ್ಸ್ ಸರ್ವೀಸಸ್ ಅಂದರೆ ಸಿಡಿಎಸ್ ಪರೀಕ್ಷೆಯಲ್ಲಿ ಅಖಿಲ ಭಾರತ 2 ನೇ ರ್ಯಾಂಕ್ ಗಳಿಸುವ ಮೂಲಕ ಎಲ್ಲರನ್ನೂ ಅಚ್ಚರಿಗೊಳಿಸಿದ್ದಾರೆ.
ವರದಿಗಳ ಪ್ರಕಾರ, ಕಾಶಿಶ್ ಈ ಹಿಂದೆ ಮಿಸ್ ಇಂಟರ್ನ್ಯಾಷನಲ್ ಇಂಡಿಯಾ ಪ್ರಶಸ್ತಿಯನ್ನು ಗೆದ್ದಿದ್ದರು ಮತ್ತು NCC ಕೆಡೆಟ್ ಕೂಡ ಆಗಿದ್ದರು. 2021 ರಲ್ಲಿ, ಅವರಿಗೆ ಪ್ರಧಾನಿ ಮೋದಿಯವರು ವಾಯುಪಡೆಯ ವಿಭಾಗಕ್ಕಾಗಿ ಅತ್ಯುತ್ತಮ ಅಖಿಲ ಭಾರತ ಕೆಡೆಟ್ ಪ್ರಶಸ್ತಿಯನ್ನು ನೀಡಿದ್ದಾರೆ.
ಹಾರ್ವರ್ಡ್ನ ಪಿಎಚ್ಡಿ ಕೊಡುಗೆ ತಿರಸ್ಕೃತ:
ಕಾಶಿಶ್ ಮೊದಲಿನಿಂದಲೂ ಅಧ್ಯಯನದಲ್ಲಿ ಮುಂದಿದ್ದರು. ಅವರು ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆಯಿಂದ (ಐಐಎಸ್ಸಿ) ನರವಿಜ್ಞಾನದಲ್ಲಿ ತಮ್ಮ ಎಂಎಸ್ಸಿ ಪ್ರಬಂಧವನ್ನು ಪೂರ್ಣಗೊಳಿಸಿದ್ದರು. ಬಳಿಕ ಹಾರ್ವರ್ಡ್ ವಿಶ್ವವಿದ್ಯಾಲಯದಿಂದ ಪಿಎಚ್ಡಿ ಪದವಿಗೂ ಅವಕಾಶ ಸಿಕ್ಕಿತು. ಆದಾಗ್ಯೂ, ಸಂಶೋಧನಾ ಜಗತ್ತಿಗೆ ವಿದೇಶಕ್ಕೆ ಹೋಗುವ ಬದಲು, ದೇಶ ಸೇವೆ ಮಾಡಲು ಭಾರತೀಯ ಸೇನೆಗೆ ಸೇರಲು ನಿರ್ಧರಿಸಿದರು. ಈಗ ಕಾಶಿಶ್ ಸೇನಾ ಅಧಿಕಾರಿಯಾಗಲು ಚೆನ್ನೈನ ಅಧಿಕಾರಿಗಳ ತರಬೇತಿ ಅಕಾಡೆಮಿಯಲ್ಲಿ ತರಬೇತಿ ಪಡೆಯುತ್ತಿದ್ದಾರೆ.
ಇದನ್ನೂ ಓದಿ: ಪ್ರತಿಭಾವಂತ ಕ್ರಿಕೆಟ್ ಆಟಗಾರ ಇಂದು ಐಪಿಎಸ್ ಅಧಿಕಾರಿ; ಕಾರ್ತಿಕ್ ಮಧಿರಾ ಅವರ ಸ್ಪೂರ್ತಿದಾಯಕ ಕಥೆಯಿದು
ಕಾಶಿಶ್ ಬಹುಮುಖ ಪ್ರತಿಭೆ:
ವರದಿಗಳ ಪ್ರಕಾರ, ಕಾಶಿಶ್ ರಾಷ್ಟ್ರಮಟ್ಟದ ಪಿಸ್ತೂಲ್ ಶೂಟರ್ ಕೂಡ ಹೌದು. ಇದಲ್ಲದೆ, ಅವರು ಬ್ಯಾಸ್ಕೆಟ್ಬಾಲ್ ಆಡುತ್ತಾರೆ, ತಬಲಾ ನುಡಿಸುತ್ತಾರೆ ಮತ್ತು ಭರತನಾಟ್ಯ ನೃತ್ಯದಲ್ಲೂ ಪ್ರವೀಣರು. ಅಧಿಕಾರಿಯಾಗಿ ತನ್ನ ಯಶಸ್ಸಿಗೆ ತನ್ನ ಕುಟುಂಬ ಮತ್ತು ಎನ್ಸಿಸಿ ಕಾರಣ ಎಂದು ಅವರು ಹೇಳುತ್ತಾರೆ, ಅಲ್ಲಿ ಅವರು ಶಿಸ್ತು ಮತ್ತು ನಾಯಕತ್ವ ಕೌಶಲ್ಯಗಳನ್ನು ಕಲಿತರು. ಕಾಶಿಶ್ ಅವರ ಕಥೆ ದೇಶಾದ್ಯಂತದ ಯುವಕರಿಗೆ, ವಿಶೇಷವಾಗಿ ಹುಡುಗಿಯರಿಗೆ ಸ್ಫೂರ್ತಿಯಾಗಿದೆ.
ಮತ್ತಷ್ಟು ಉದ್ಯೋಗಕ್ಕೆ ಸಂಬಂಧಿಸಿದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ