ಹಂದಿ ಚರ್ಮದ ಬೈಂಡಿಂಗ್, 1896ರಲ್ಲಿ ಪ್ರಕಟಗೊಂಡ ಪುಸ್ತಕ; 2.68 ಕೋಟಿ ರೂ.ಗೆ ಮಾರಾಟ
1896ರಲ್ಲಿ ಪ್ರಕಟಗೊಂಡ 'ಕೆಲ್ಮ್ಸ್ಕಾಟ್ ಚಾಸರ್' ಎಂಬ ಅಪರೂಪದ ಪುಸ್ತಕದ ಪ್ರತಿಯೊಂದು ಇತ್ತೀಚೆಗಷ್ಟೇ ಬರೋಬ್ಬರಿ 2.68 ಕೋಟಿ ರೂ.ಗೆ ಮಾರಾಟವಾಗಿದೆ. ಹಂದಿ ಚರ್ಮದ ಬೈಂಡಿಂಗ್, 87 ಮರದ ಕೆತ್ತನೆಗಳನ್ನು ಹೊಂದಿರುವುದು ಈ ಪುಸ್ತಕದ ವಿಶೇಷತೆ. ಇದಲ್ಲದೇ ಕೇವಲ 50 ಪ್ರತಿಗಳನ್ನು ಮಾತ್ರ ಹೊಂದಿರುವ ಈ ಅದ್ಭುತ ಕಲಾಕೃತಿಯ ಮತ್ತಷ್ಟು ವಿಶೇಷತೆ ಇಲ್ಲಿ ತಿಳಿಯಿರಿ.
Updated on: Oct 23, 2026 | 4:26 PM
1896ರಲ್ಲಿ ಪ್ರಕಟಗೊಂಡ ‘ಕೆಲ್ಮ್ಸ್ಕಾಟ್ ಚಾಸರ್’ (Kelmscott Chaucer) ಪುಸ್ತಕವು ಜಗತ್ತಿನ ಅತ್ಯಂತ ಅಪರೂಪದ ಕಲಾಕೃತಿಗಳಲ್ಲಿ ಒಂದಾಗಿದೆ. ಇತ್ತೀಚೆಗೆ ಈ ಪುಸ್ತಕದ ಅತಿ ಅಪರೂಪದ ಪ್ರತಿಯೊಂದು ಸುಮಾರು 2.68 ಕೋಟಿ ರೂ.ಗೆ ಮಾರಾಟವಾಗುವ ಮೂಲಕ ಭಾರಿ ಸುದ್ದಿಯಾಗಿದೆ. ವಿನ್ಯಾಸ, ಮುದ್ರಣ ಮತ್ತು ಕರಕುಶಲತೆಯ ದೃಷ್ಟಿಯಿಂದ ಇದೊಂದು ಸಾಹಿತ್ಯ ಲೋಕದ ಮೈಲಿಗಲ್ಲಾಗಿದೆ.
ಮುದ್ರಣ ಮತ್ತು ನಿರ್ಮಾಣದ ಸುದೀರ್ಘ ಪಯಣ:
ಇಂಗ್ಲಿಷ್ ವೆಬ್‌ಸೈಟ್‌ನ ವರದಿಯ ಪ್ರಕಾರ, ಈ ಪುಸ್ತಕದ ಕೆಲಸವನ್ನು ಪ್ರಕಾಶಕರು ಹಲವಾರು ವರ್ಷಗಳ ಹಿಂದೆಯೇ ಆರಂಭಿಸಿದ್ದರು. ಇದರ ಮುದ್ರಣ ಕಾರ್ಯವು ಆಗಸ್ಟ್ 1894ರಲ್ಲಿ ಅಧಿಕೃತವಾಗಿ ಪ್ರಾರಂಭವಾಗಿ, ಅಂತಿಮವಾಗಿ ಜೂನ್ 1896ರಲ್ಲಿ ಪುಸ್ತಕವು ಪ್ರಕಟಗೊಂಡು ವಿತರಿಸಲ್ಪಟ್ಟಿತು. ಲಂಡನ್‌ನ ಹ್ಯಾಮರ್ಸ್ಮಿತ್‌ನಲ್ಲಿರುವ ವಿಲಿಯಂ ಮೋರಿಸ್ ಅವರ ‘ಕೆಲ್ಮ್ಸ್ಕಾಟ್ ಪ್ರೆಸ್’ನ ಅತ್ಯಂತ ಮಹತ್ವಾಕಾಂಕ್ಷೆಯ ಯೋಜನೆಗಳಲ್ಲಿ ಇದು ಒಂದಾಗಿತ್ತು. ಮೋರಿಸ್ ಅವರು ಕಲೆ ಮತ್ತು ಕರಕುಶಲ ಚಳುವಳಿಯಿಂದ ಪ್ರಭಾವಿತರಾಗಿದ್ದು, ಪುಸ್ತಕಗಳು ಕೇವಲ ಸಾಹಿತ್ಯದ ಮಾಧ್ಯಮ ಮಾತ್ರವಲ್ಲ, ಅವು ಸೌಂದರ್ಯದ ವಸ್ತುಗಳಾಗಿಯೂ ರೂಪುಗೊಳ್ಳಬೇಕು ಎಂದು ಬಲವಾಗಿ ನಂಬಿದ್ದರು.
ಹಂದಿ ಚರ್ಮದ ಬೈಂಡಿಂಗ್ ಮತ್ತು ಕಲಾತ್ಮಕ ವಿನ್ಯಾಸ:
ಈ ದುಬಾರಿ ಪುಸ್ತಕದ ಮತ್ತೊಂದು ಪ್ರಮುಖ ಆಕರ್ಷಣೆ ಎಂದರೆ ಅದರ ಬೈಂಡಿಂಗ್. ಇದು ಹಂದಿ ಚರ್ಮದಿಂದ (Pigskin) ಸಿದ್ಧಪಡಿಸಲಾದ ಬೈಂಡಿಂಗ್ ಅನ್ನು ಹೊಂದಿದೆ. ಜರ್ಮನ್ ಪುಸ್ತಕ ಬೈಂಡಿಂಗ್ ಸಂಪ್ರದಾಯಗಳಿಂದ ಪ್ರೇರಿತವಾಗಿರುವ ಈ ಬಿಳಿ ಪಿಗ್‌ಟೇಲ್ ಬೈಂಡಿಂಗ್, ‘ಡವ್ಸ್ ಬೈಂಡರಿ’ಯ ಕರಕುಶಲ ಕಲಾ ಶೈಲಿಯನ್ನು ಒಳಗೊಂಡಿದೆ. ಪುಸ್ತಕವನ್ನು ರಕ್ಷಿಸಲು ವಿಶೇಷ ಪೆಟ್ಟಿಗೆಯನ್ನು ಸಹ ನೀಡಲಾಗಿದೆ. ಮುಖಪುಟಗಳಲ್ಲಿ ಬಳ್ಳಿ ಮಾದರಿಗಳು, ಗುಲಾಬಿಗಳು, ಲಿಲ್ಲಿಗಳು ಮತ್ತು ಓಕ್ ಎಲೆಗಳ ಸಂಕೀರ್ಣ ಕೆತ್ತನೆಗಳಿದ್ದು, ಎರಡು ಲೋಹದ ಲಾಚ್‌ಗಳೊಂದಿಗೆ ಇದು ಮುಕ್ತಾಯಗೊಳ್ಳುತ್ತದೆ. ಅಲ್ಲದೆ, ಪುಸ್ತಕವನ್ನು ಆಕರ್ಷಕ ಕಪ್ಪು ಮತ್ತು ಕೆಂಪು ಬಣ್ಣಗಳಲ್ಲಿ ಮುದ್ರಿಸಲಾಗಿದೆ.
ಇದನ್ನೂ ಓದಿ: 68ರ ವಯಸ್ಸಿನಲ್ಲೂ ಕಲಿಕೆಯ ಉತ್ಸಾಹ; ನಿವೃತ್ತ ಅಧಿಕಾರಿ ಈಗ ಸೈಕಾಲಜಿ ಸ್ಟೂಡೆಂಟ್!
87 ಅದ್ಭುತ ಮರದ ಕೆತ್ತನೆಗಳು:
ಈ ಪುಸ್ತಕವು ಒಟ್ಟು 87 ದೊಡ್ಡ ಮರದ ಕೆತ್ತನೆಗಳನ್ನು (Woodcuts) ಒಳಗೊಂಡಿರುವುದು ಇದರ ಮತ್ತೊಂದು ವಿಶೇಷತೆ. ಈ ರೇಖಾಚಿತ್ರಗಳನ್ನು ಮೋರಿಸ್ ಅವರ ಕಲಾತ್ಮಕ ಸಹಯೋಗಿ ಬರ್ನ್-ಜೋನ್ಸ್ ಅವರು ಸಿದ್ಧಪಡಿಸಿದ್ದರು. ಇವುಗಳನ್ನು ರಾಬರ್ಟ್ ಕ್ಯಾಟರ್ಸನ್-ಸ್ಮಿತ್ ಪುನರುತ್ಪಾದಿಸಿದ್ದು, W. H. ಹೂಪರ್ ಅವರು ಮರದ ಮೇಲೆ ಕೆತ್ತನೆ ಮಾಡಿದ್ದಾರೆ. ಇದರ ಜೊತೆಗೆ ಪುಸ್ತಕದ ಅಲಂಕಾರಿಕ ಗಡಿಗಳು, ಅಕ್ಷರಗಳು ಮತ್ತು ಶೀರ್ಷಿಕೆ ಪುಟವನ್ನು ಸ್ವತಃ ಮೋರಿಸ್ ಅವರೇ ವಿನ್ಯಾಸಗೊಳಿಸಿ, ಪುಸ್ತಕಕ್ಕೆ ವಿಶಿಷ್ಟ ಹಾಗೂ ರಾಜಸಿಕ ನೋಟವನ್ನು ತಂದುಕೊಟ್ಟಿದ್ದಾರೆ.
ಕೇವಲ 50 ಪ್ರತಿಗಳ ಅಪರೂಪತೆ:
ಈ ಅಮೂಲ್ಯವಾದ ‘ಕೆಲ್ಮ್ಸ್ಕಾಟ್ ಚಾಸರ್’ ಪುಸ್ತಕದ ವಿಶ್ವದಲ್ಲೇ ಕೇವಲ 50 ಪ್ರತಿಗಳನ್ನು ಮಾತ್ರ ಮುದ್ರಿಸಿ ಉತ್ಪಾದಿಸಲಾಗಿತ್ತು. ಅಂತಹ ಅತ್ಯಂತ ಅಪರೂಪದ ಮತ್ತು ಸೀಮಿತ ಪ್ರತಿಗಳಲ್ಲಿ ಒಂದಾದ ಈ ಪುಸ್ತಕವು ಅಕ್ಟೋಬರ್ 2026 ರಲ್ಲಿ ಭಾರಿ ಮೊತ್ತವಾದ 2.68 ಮಿಲಿಯನ್‌ಗೆ ಮಾರಾಟವಾಗುವ ಮೂಲಕ ಸಾಹಿತ್ಯ ಪ್ರಿಯರ ಹಾಗೂ ಸಂಗ್ರಹಕಾರರ ಗಮನ ಸೆಳೆದಿದೆ.
ಶಿಕ್ಷಣ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
