ChatGPT: ಫ್ರಾನ್ಸ್​ ವಿಶ್ವವಿದ್ಯಾಲಯದಲ್ಲಿ ಚಾಟ್​ಜಿಪಿಟಿ ನಿಷೇಧ, ಕರ್ನಾಟಕದಲ್ಲಿಯೂ ನಿರ್ಬಂಧಕ್ಕೆ ಚಿಂತನೆ; ವಿದ್ಯಾರ್ಥಿಗಳಿಗೆ ಎಚ್ಚರಿಕೆ ಕೊಟ್ಟ ಕಾಲೇಜುಗಳು

ಬೆಂಗಳೂರು / ಪ್ಯಾರೀಸ್: ಫ್ರಾನ್ಸ್ ರಾಜಧಾನಿ ಪ್ಯಾರೀಸ್​ನಲ್ಲಿರುವ ಪ್ರತಿಷ್ಠಿತ ‘ಸೈನ್ಸಸ್ ಪೊ ಸ್ಕೂಲ್’ ವಿಶ್ವವಿದ್ಯಾಲಯವು ಅಮೆರಿಕ ಮೂಲದ ‘ಓಪನ್​ಎಐ’ (OpenAI) ಕೃತಕ ಬುದ್ಧಿಮತ್ತೆ ಕಂಪನಿ ರೂಪಿಸಿರುವ ‘ಚಾಟ್​ಜಿಪಿಟಿ’ (ChatGPT) ಬಳಕೆಯನ್ನು ವಿದ್ಯಾರ್ಥಿಗಳು ಮತ್ತು ಬೋಧಕರಿಗೆ ನಿಷೇಧಿಸಿದೆ. ಕರ್ನಾಟಕದಲ್ಲಿಯೂ ತಾಂತ್ರಿಕ ಶಿಕ್ಷಣ ಸಂಸ್ಥೆಗಳಲ್ಲಿ ಈ ಕುರಿತು ಚರ್ಚೆ ಆರಂಭವಾಗಿದ್ದು, ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯ ಹಾಗೂ ಇತರ ಡೀಮ್ಡ್​ ವಿವಿಗಳು ಈ ಕುರಿತು ಶೀಘ್ರ ಅಧಿಸೂಚನೆ ಹೊರಡಿಸುವ ಸಾಧ್ಯತೆಯಿದೆ. ‘ಅಸೈನ್​ಮೆಂಟ್​ಗಳಿಗಾಗಿ ಕೃತಕ ಬುದ್ಧಿಮತ್ತೆ ಬಳಸುವುದನ್ನು ನಾವು ಸಂಪೂರ್ಣವಾಗಿ ನಿಷೇಧಿಸುತ್ತೇವೆ. ಯಾರೇ ಆದರೂ ಇಂಥ ಸಾಧನಗಳ ನೆರವಿನಿಂದ ಅಸೈನ್​ಮೆಂಟ್ ಪೂರ್ಣಗೊಳಿಸಿದ್ದು ಬೆಳಕಿಗೆ ಬಂದರೆ ವಿಶ್ವವಿದ್ಯಾಲಯದಿಂದ ನಿಷೇಧಿಸುವುದೂ ಸೇರಿದಂತೆ ಉನ್ನತ ಶಿಕ್ಷಣದ ಅವಕಾಶ ನಿರ್ಬಂಧಿಸಲಾಗುವುದು’ ಎಂದು ವಿಶ್ವವಿದ್ಯಾಲಯವು ಎಚ್ಚರಿಸಿದೆ.

ಫ್ರಾನ್ಸ್​ನ ವಿವಿ ತನ್ನ ಆದೇಶದಲ್ಲಿ ಎಲ್ಲಿಯೂ ChatGPT ಎಂದು ಉಲ್ಲೇಖಿಸಿಲ್ಲ. ಆದರೆ ‘ವಿದ್ಯಾರ್ಥಿಗಳು ಮೌಖಿಕ ಅಥವಾ ಲಿಖಿತ ಅಸೈನ್​ಮೆಂಟ್ ಪೂರ್ಣಗೊಳಿಸಲು ಕೃತಕ ಬುದ್ಧಿಮತ್ತೆ ಬಳಸುವಂತಿಲ್ಲ’ ಎಂದಷ್ಟೇ ಹೇಳಿದೆ. ‘ಉಪನ್ಯಾಸಕರ ಮಾರ್ಗದರ್ಶನದಲ್ಲಿ ಕಲಿಕೆಗಾಗಿ ಚಾಟ್​ಜಿಪಿಟಿ ಬಳಸಲು ಅವಕಾಶವಿದೆ’ ಎಂದು ಹೇಳಿರುವ ವಿವಿ ಆಡಳಿತವು, ಚಾಟ್​ಜಿಪಿಟಿ ಬಳಕೆಯಿಂದ ಸಂಶೋಧನಾ ಪ್ರಬಂಧಗಳು ನಕಲಾಗುವ ಅಪಾಯ ಹೆಚ್ಚಾಗಿದೆ’ ಎಂದು ಅಭಿಪ್ರಾಯಪಟ್ಟಿದೆ.

ಕರ್ನಾಟಕದಲ್ಲಿಯೂ ನಿಷೇಧಕ್ಕೆ ಚಿಂತನೆ

ಶಿಕ್ಷಣದ ಮೇಲೆ ‘ಚಾಟ್​ಜಿಪಿಟಿ’ ಪರಿಣಾಮದ ಬಗ್ಗೆ ಚರ್ಚೆ ಆರಂಭವಾಗಿದೆ. ಅಸೈನ್​ಮೆಂಟ್​ ಮತ್ತು ವರ್ಕ್​ಶೀಟ್​ ಬರೆಯಲು ವಿದ್ಯಾರ್ಥಿಗಳು ‘ಚಾಟ್​ಜಿಪಿಟಿ’ ಬಳಸಲು ಆರಂಭಿಸಿದರೆ ಅವರ ಕಲಿಕೆ ಹಿಂದುಳಿಯಬಹುದು, ಸೃಜನಶೀಲತೆ ಸತ್ತು ಹೋಗಬಹುದು ಎಂದು ಹಲವು ಉಪನ್ಯಾಸಕರು ಆತಂಕ ವ್ಯಕ್ತಪಡಿಸಿದ್ದಾರೆ. ಬೆಂಗಳೂರಿನ ಆರ್​ವಿ ವಿಶ್ವವಿದ್ಯಾಲಯದ ಕಂಪ್ಯೂಟರ್​ ಸೈನ್ಸ್​ ಎಂಜಿನಿಯರಿಂಗ್ ವಿಭಾಗವು ಆಂತರಿಕ ಅಧಿಸೂಚನೆ ಹೊರಡಿಸಿದ್ದು ವಿದ್ಯಾರ್ಥಿಗಳಿಗೆ ಚಾಟ್​ಜಿಪಿಟಿ (ChatGPT) ಹಾಗೂ ಗಿಟ್​ಹಬ್ ಕೊಪೈಲಟ್ (GitHub Copilot) ಬಳಸುವಂತಿಲ್ಲ ಎಂದು ಸೂಚಿಸಿದೆ. ‘ಈ ವಿಚಾರದಲ್ಲಿ ನಾವು ವ್ಯವಸ್ಥಿತವಾಗಿ ಮುಂದಿನ ಹೆಜ್ಜೆ ಇಡುತ್ತೇವೆ’ ಎಂದು ಆರ್​ವಿ ವಿವಿಯ ಕಂಪ್ಯೂಟರ್ ಸೈನ್ಸ್ ಅಂಡ್ ಎಂಜಿನಿಯರಿಂಗ್ ವಿಭಾಗದ ಡೀನ್ ಸಂಜಯ್ ಆರ್.ಚಿಟ್ನೀಸ್ ಹೇಳಿದ್ದಾರೆ.

ಚಾಟ್​ಜಿಪಿಟಿ ವಿಚಾರದಲ್ಲಿ ಜೈನ್ ವಿಶ್ವವಿದ್ಯಾಲಯವು (ಡಿಮ್ಡ್​ ಟು ಬಿ ಯೂನಿವರ್ಸಿಟಿ) ಸ್ಪಷ್ಟ ನಿಲುವು ತೆಗೆದುಕೊಂಡಿದೆ. ‘ಇದು ಅಪ್ರಾಮಾಣಿಕತೆ. ವಿದ್ಯಾರ್ಥಿಗಳು ಇಂಥ ಸಾಧನಗಳನ್ನು ಬಳಸುವಂತಿಲ್ಲ. ಈ ಬಗ್ಗೆ ನಾವು ಶೀಘ್ರ ನೀತಿಯೊಂದನ್ನು ರೂಪಿಸುತ್ತೇವೆ’ ಎಂದು ಜೈನ್​ ವಿವಿಯ ಜಂಟಿ ಕುಲಸಚಿವ ಎಂ.ಎಸ್.ಸಂತೋಷ್ ತಿಳಿಸಿದರು.

‘ಚಾಟ್​ಜಿಪಿಟಿ ಈಗಷ್ಟೇ ಬಂದಿದೆ. ಅದರ ಬಳಕೆಯನ್ನು ನಿಷೇಧಿಸುವ ಬಗ್ಗೆ ಇನ್ನೂ ಯಾವುದೇ ತೀರ್ಮಾನ ತೆಗೆದುಕೊಂಡಿಲ್ಲ. ನಕಲು ಪತ್ತೆ ತುಂಬಾ ಕಷ್ಟ. ಮುಂದಿನ ದಿನಗಳಲ್ಲಿ ಸಂಯೋಜಿತ ಕಾಲೇಜುಗಳ ಪ್ರಾಚಾರ್ಯರ ಅಭಿಪ್ರಾಯಪಡೆದು ನಿರ್ಧಾರ ತೆಗೆದುಕೊಳ್ಳುತ್ತೇವೆ’ ಎಂದು ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯದ (Visvesvaraya Technological University – VTU) ಉಪಕುಲಪತಿ ಎಸ್.ವಿದ್ಯಾಶಂಕರ್ ಹೇಳಿದರು. ಈ ಹೇಳಿಕೆಯನ್ನು ‘ಡೆಕ್ಕನ್ ಹೆರಾಲ್ಡ್’ ದಿನಪತ್ರಿಕೆ ವರದಿ ಮಾಡಿದೆ.

ಇದನ್ನೂ ಓದಿ: ChatGPT: ಏನಿದು ಚಾಟ್​ ಜಿಪಿಟಿ, ಹೇಗೆ ಕೆಲಸ ಮಾಡುತ್ತೆ? ಇತಿ, ಮಿತಿಗಳ ಬಗ್ಗೆ ಇಲ್ಲಿದೆ ವಿವರ

ಶಿಕ್ಷಣಕ್ಕೆ ಸಂಬಂಧಿಸಿದ ಮತ್ತಷ್ಟು ಮಾಹಿತಿಗೆ ಇಲ್ಲಿ ಕ್ಲಿಕ್ ಮಾಡಿ