‘ಬಾರ್ಡರ್ 2’ ಯಶಸ್ಸಿನ ಬೆನ್ನಲ್ಲೇ ‘ಸಂಕಿ’ ಸಿನಿಮಾ ಚಿತ್ರೀಕರಣ ಆರಂಭಿಸಲಿರುವ ಅಹಾನ್ ಶೆಟ್ಟಿ

‘ಬಾರ್ಡರ್ 2’ ಸಿನಿಮಾದ ಭರ್ಜರಿ ಯಶಸ್ಸಿನ ನಂತರ ಬಾಲಿವುಡ್ ನಟ ಅಹಾನ್ ಶೆಟ್ಟಿ ಮತ್ತೆ ಆ್ಯಕ್ಷನ್ ಅವತಾರದಲ್ಲಿ ಪ್ರೇಕ್ಷಕರ ಎದುರು ಬರಲು ಸಜ್ಜಾಗಿದ್ದಾರೆ. ಟಿನು ಸುರೇಶ್ ದೇಸಾಯಿ ನಿರ್ದೇಶನದ ಅವರ ಮುಂದಿನ ಬಿಗ್ ಬಜೆಟ್ ಸಿನಿಮಾ ‘ಸಂಕಿ’ ಚಿತ್ರೀಕರಣವು ಅಕ್ಟೋಬರ್ 30ರಿಂದ ಮಧ್ಯಪ್ರದೇಶದ ಭೋಪಾಲ್‌ನಲ್ಲಿ ಅಧಿಕೃತವಾಗಿ ಆರಂಭವಾಗಲಿದೆ. ಈ ಸಿನಿಮಾದಲ್ಲಿ ರೋಮಾಂಚಕ ಆ್ಯಕ್ಷನ್ ಜೊತೆಗೆ ಭಾವನಾತ್ಮಕ ಪ್ರೇಮಕಥೆ ಇರಲಿದೆ ಎಂದು ಚಿತ್ರತಂಡ ಹೇಳಿದೆ.

ಜ್ಞಾನೇಂದ್ರ ವಾಸುದೇವ್ ಕಥೆ ಹೆಣೆದಿರುವ ‘ಸಂಕಿ’ ಚಿತ್ರವು ಮೂಲತಃ ಭಾವನಾತ್ಮಕ ಪ್ರೇಮಕಥೆಯನ್ನು ಹೊಂದಿದ್ದು, ರೋಮಾಂಚಕ ಹಾಗೂ ಸಾಹಸಮಯ ಆ್ಯಕ್ಷನ್ ಸನ್ನಿವೇಶಗಳನ್ನು ಒಳಗೊಂಡಿರಲಿದೆ. ಅಕ್ಷಯ್ ಕುಮಾರ್ ಅಭಿನಯದ ‘ರುಸ್ತುಂ’ ಮತ್ತು ‘ಮಿಷನ್ ರಾಣಿಗಂಜ್’ ರೀತಿಯ ಯಶಸ್ವಿ ಚಿತ್ರಗಳನ್ನು ನೀಡಿದ ಟಿನು ಸುರೇಶ್ ದೇಸಾಯಿ ಈ ಚಿತ್ರಕ್ಕೆ ನಿರ್ದೇಶನ ಮಾಡುತ್ತಿದ್ದಾರೆ.

ಚಿತ್ರೀಕರಣದ ಪೂರ್ವಭಾವಿ ಸಿದ್ಧತೆಗಳಿಗಾಗಿ ನಿರ್ದೇಶಕ ಟಿನು ದೇಸಾಯಿ ಹಾಗೂ ಅವರ ತಾಂತ್ರಿಕ ತಂಡ ಈಗಾಗಲೇ ಭೋಪಾಲ್‌ನಲ್ಲಿದ್ದು, ಅಂತಿಮ ಹಂತದ ಕೆಲಸಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಚಿತ್ರದ ಕಥಾವಸ್ತು ಹಾಗೂ ಇತರ ಪ್ರಮುಖ ವಿವರಗಳನ್ನು ಸದ್ಯಕ್ಕೆ ರಹಸ್ಯವಾಗಿಡಲಾಗಿದ್ದು, ಮುಂಬರುವ ದಿನಗಳಲ್ಲಿ ಚಿತ್ರತಂಡ ಒಂದೊಂದಾಗಿ ಮಾಹಿತಿಯನ್ನು ಹೊರಹಾಕಲಿದೆ.

ಬಾಕ್ಸ್ ಆಫೀಸ್‌ನಲ್ಲಿ ಧೂಳೆಬ್ಬಿಸಿದ ‘ಬಾರ್ಡರ್ 2’ ಚಿತ್ರದ ಯಶಸ್ಸಿನ ನಂತರ ಅಹಾನ್ ಶೆಟ್ಟಿ ಅವರು ತಮ್ಮ ಮುಂದಿನ ಪ್ರಾಜೆಕ್ಟ್‌ಗಳನ್ನು ಆಯ್ಕೆ ಮಾಡುವಲ್ಲಿ ಸಾಕಷ್ಟು ಮುನ್ನೆಚ್ಚರಿಕೆ ವಹಿಸಿದ್ದರು. ‘ಸಂಕಿ’ ಸಿನಿಮಾದ ನಂತರ ಅವರು ವಿಕ್ರಮ್ ಭಟ್ ನಿರ್ದೇಶನದ ‘1920 ಕೋಲ್ಡ್ ವಿಂಟರ್’ ಚಿತ್ರದಲ್ಲಿ ನಟಿಸಲಿದ್ದಾರೆ. ಇದರ ಜೊತೆಗೆ 2027ರಲ್ಲಿ ಸೆಟ್ಟೇರಲಿರುವ ಮತ್ತಷ್ಟು ಹೊಸ ಸಿನಿಮಾಗಳಿಗೂ ಅವರು ಒಪ್ಪಿಗೆ ಸೂಚಿಸಿದ್ದಾರೆ.

ಇದನ್ನೂ ಓದಿ: ಹೋಟೆಲ್​ ಕ್ಲೀನರ್​ ಆಗಿದ್ದ ಸುನೀಲ್​ ಶೆಟ್ಟಿ ತಂದೆ ವೀರಪ್ಪ ಶೆಟ್ಟಿ; ‘ಅಪ್ಪನೇ ನನ್ನ ಹೀರೋ’ ಎಂದ ಕನ್ನಡಿಗ

‘ಸಂಕಿ’ ಚಿತ್ರವನ್ನು ‘ವಿ ದಿ ಪೀಪಲ್’, ‘ರೋರಿಂಗ್ ರಿವರ್ ಪ್ರೊಡಕ್ಷನ್ಸ್’ ಮತ್ತು ‘ಪಾಲ್ಸ್ ಆ್ಯಂಡ್ ಪೀರ್ಸ್ ಎಂಟರ್‌ಟೇನ್‌ಮೆಂಟ್’ ನಿರ್ಮಾಣ ಸಂಸ್ಥೆಗಳು ಜಂಟಿಯಾಗಿ ನಿರ್ಮಿಸುತ್ತಿವೆ. ಈ ಚಿತ್ರವು 2027ರ ಮೊದಲಾರ್ಧದಲ್ಲಿ ಚಿತ್ರಮಂದಿರಗಳಲ್ಲಿ ಅದ್ದೂರಿಯಾಗಿ ಬಿಡುಗಡೆಯಾಗಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.