ರಾಮಾಯಣ’ ಸಿನಿಮಾದಲ್ಲಿ ವಾರಿಯರ್ ಪ್ರಿನ್ಸೆಸ್ ಆಗಿ ಸಾಯಿ ಪಲ್ಲವಿ

ನಮಿತ್ ಮಲ್ಹೋತ್ರಾ ನಿರ್ಮಾಣದ ಬೃಹತ್ ಬಜೆಟ್‌ನ ‘ರಾಮಾಯಣ‘ ಸಿನಿಮಾದಲ್ಲಿ ಸೀತೆಯ ಪಾತ್ರದ ಹೊಸ ಅವತಾರ ಹೊರಬಿದ್ದಿದೆ. ಈ ಸಿನಿಮಾದಲ್ಲಿ ನಟಿ ಸಾಯಿ ಪಲ್ಲವಿ ಕೇವಲ ಶಾಂತಸ್ವರೂಪಿ ಸೀತೆಯಾಗಿ ಅಲ್ಲದೆ, ಖಡ್ಗ ಹಿಡಿದು ಹೋರಾಡುವ ವಾರಿಯರ್ ಪ್ರಿನ್ಸೆಸ್ ಆಗಿ ಕಾಣಿಸಿಕೊಂಡಿದ್ದಾರೆ. ಈ ಹೊಸ ಸಂಗತಿ ಈಗ ವಿಶ್ವಾದ್ಯಂತ ಭಾರಿ ಕುತೂಹಲಕ್ಕೆ ಕಾರಣವಾಗಿದೆ. ಸಾಯಿ ಪಲ್ಲವಿ ಸ್ವತಃ ಈ ಸಾಹಸಮಯ ಪಾತ್ರದ ಸತ್ಯಾಸತ್ಯತೆಯನ್ನು ಖಚಿತಪಡಿಸಿದ್ದಾರೆ.

ಸೀತೆ ಎಂದರೆ ಕೇವಲ ಸಹನೆ ಮತ್ತು ತ್ಯಾಗದ ಸಂಕೇತವೆಂದು ನಾವು ಭಾವಿಸಿದ್ದೇವೆ. ಆದರೆ ಭಾರತೀಯ ಪರಂಪರೆಯಲ್ಲಿ ಸೀತೆಯನ್ನು ನಾನಾ ರೂಪಗಳಲ್ಲಿ ವಿವರಿಸಲಾಗಿದೆ. ಅದ್ಭುತ ರಾಮಾಯಣದಲ್ಲಿ ಸೀತೆಯು ಮಹಾಕಾಳಿಯ ಉಗ್ರ ರೂಪ ತಳೆದು ರಾವಣನ ತಮ್ಮ ಸಹಸ್ರ ರಾವಣನನ್ನು ಸಂಹರಿಸುತ್ತಾಳೆ. ಇಲ್ಲಿ ಸೀತೆ ರಾಮನಿಗೆ ನೆರವಾಗುವ ಬಲಿಷ್ಠ ಶಕ್ತಿಯಾಗಿ ಹೊರಹೊಮ್ಮುತ್ತಾಳೆ.

ಜನಪದ ಮತ್ತು ಬುಡಕಟ್ಟು ಪರಂಪರೆಯಲ್ಲೂ ಸೀತೆಯ ವೀರಾಂಗನೆ ರೂಪದ ಉಲ್ಲೇಖವಿದೆ. ಮಧ್ಯಪ್ರದೇಶದ ಗೋಂಡ್ ರಾಮಾಯಣದಲ್ಲಿ ಸೀತೆ ಸ್ವತಂತ್ರ ನಿರ್ಧಾರ ತಳೆಯುವ ಧೀರ ಮಹಿಳೆಯಾಗಿದ್ದಾಳೆ. ಅಷ್ಟೇ ಅಲ್ಲದೆ, ಪ್ರಸಿದ್ಧ ಲೇಖಕ ಅಮೀಶ್ ತ್ರಿಪಾಠಿ ತಮ್ಮ ಪುಸ್ತಕದಲ್ಲಿ ಸೀತೆಯನ್ನು ಸಮರಕಲೆ ಬಲ್ಲ ಯೋಧೆಯಾಗಿ ಚಿತ್ರಿಸಿದ್ದಾರೆ. ವಾಲ್ಮೀಕಿ ರಾಮಾಯಣದಲ್ಲೂ ಸೀತೆ ಬಾಲ್ಯದಲ್ಲೇ ಶಿವಧನಸ್ಸನ್ನು ಎತ್ತಿದ್ದ ಸಂಗತಿ ಇದನ್ನೇ ಸೂಚಿಸುತ್ತದೆ.

ಸಿನಿಮಾದಲ್ಲಿ ತಮ್ಮ ಸಾಹಸ ದೃಶ್ಯಗಳ ಬಗ್ಗೆ ನಟಿ ಸಾಯಿ ಪಲ್ಲವಿ ಸಂತಸ ಹಂಚಿಕೊಂಡಿದ್ದಾರೆ. ತಮಗೆ ನೃತ್ಯದ ಹಿನ್ನೆಲೆ ಇದ್ದ ಕಾರಣ ಕಾಲುಗಳು ಸದೃಢವಾಗಿದ್ದವು ಎಂದು ಹೇಳಿದ್ದಾರೆ. ಆದರೆ ಖಡ್ಗವರಸೆ ಕಲಿಯಲು ಅವರು ವಿಶೇಷ ತರಬೇತಿ ಪಡೆದಿದ್ದಾರೆ. ಅವರ ಸಾಹಸ ದೃಶ್ಯಗಳು ನೃತ್ಯದ ರೀತಿಯಲ್ಲಿ ಅತ್ಯಂತ ಸೌಂದರ್ಯಯುತವಾಗಿ ಮೂಡಿಬಂದಿವೆ.

ಇದನ್ನೂ ಓದಿ: ‘ರಾವಣ ಸಂಪೂರ್ಣ ಕೆಟ್ಟವನಲ್ಲ’; ರಾಮಾಯಣ ಸಿನಿಮಾ ಕುರಿತು ನಟಿ ಸಾಯಿ ಪಲ್ಲವಿ ಅಚ್ಚರಿಯ ಹೇಳಿಕೆ

ಇಂದಿನ ಪೀಳಿಗೆಗೆ ಸೀತೆಯ ಈ ನವೀನ ಹಾಗೂ ಶಕ್ತಿಶಾಲಿ ಅವತಾರ ಹೊಸ ಸ್ಪೂರ್ತಿ ನೀಡಲಿದೆ. ನಮಿತ್ ಮಲ್ಹೋತ್ರಾ ಅವರ ಈ ರಾಮಾಯಣವು ಭಾರತೀಯ ಇತಿಹಾಸದ ಹೊಸ ಪುಟವನ್ನು ಅನಾವರಣಗೊಳಿಸಲಿದೆ. ಸಾಯಿ ಪಲ್ಲವಿ ಅಭಿನಯದ ಈ ಯೋಧ ಸೀತೆಯ ಪಾತ್ರ ಬೆಳ್ಳಿಪರದೆಯಲ್ಲಿ ಕೌತುಕ ಸೃಷ್ಟಿಸಲು ಸಜ್ಜಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.